मुख्यमंत्री-लोकार्पण
मुख्यमंत्री विष्णुदेव साय ह आज कोंडागांव म होय कारीकरम म दू सौ अठ्यासी करोड़ अट्ठारा लाख रूपिया ले जादा के एक सौ सड़सठ विकास काम के लोकार्पण अउ सिलान्यास करीन। ए दउरान मुख्यमंत्री ह एक सौ अठ्यासी हितग्राही मन ल अंठावन लाख चौरासी हजार रूपिया के जिनिस घलो बांटिन।
एखर पहिली, मुख्यमंत्री ह सुकमा अउ बचेली म होय कारीकरम म भूमिपूजन अउ लोकार्पण म सामिल होइन।
मुख्यमंत्री-युवा महोत्सव
राजधानी रईपुर के साईंस कॉलेज मैदान म स्वामी विवेकानंद जयंती के मउका म काली राज्य स्तरीय युवा महोत्सव के उद्घाटन मुख्यमंत्री विष्णुदेव साय ह करही। ए मउका म समारोह ल संबोधित करत ओमन किहीन कि आधुनिक भारत ल बनाय म स्वामी विवेकानंद के बड़का योगदान हे। ओमन किहीन कि युवा सक्ति के आगू आय ले विकसित भारत के संगेसंग विकसित छत्तीसगढ़ के बड़का इमारत खड़े होही। मुख्यमंत्री ह किहीन कि राज्य सरकार ह दिल्ली के यूथ हॉस्टल म सीट मन के संख्या ल पचास ले बढ़ाके एक सौ पचयासी कर देहे। एखर ले प्रतियोगी परीक्षा देवइया छात्र मन अपन तियारी बने ढंग ले कर सकय। संगेसंग व्यावसायिक परीक्षा मंडल के परीक्षा मनके वार्षिक कैलेंडर घलो जारी कर दे गेहे। राष्ट्रीय शिक्षा नीति ह रोजगार बर युवा मन ल तियार करही। एखर बर नवा रईपुर म आईटी कंपनी मन अपन यूनिट सुरू करत हे। जल्दीच नवा रईपुर ह आईटी हब के रूप म जाने जाही। कारीकरम म विधानसभा अध्यक्ष डॉक्टर रमन सिंह के संगेसंग उपमुख्यमंत्री अरूण साव, विजय शर्मा के संगेसंग युवा कल्याण मंत्री टंकराम वर्मा घलो आय रिहीन।
प्रयागराज-महाकुंभ
विश्व के सबले बड़का आध्यात्मिक अउ सांस्कृतिक समागम महाकुंभ आज पुष पूर्णिमा के मउका म प्रयागराज म अमृत स्नान के संग सुरू होगे। लाखो श्रध्दालू अउ तीर्थयात्री मन गंगा यमुना अउ सरस्वती नदिया के त्रिवेणी संगम के बनाय गे आने-आने घाट म डूबकी लगावत हे। प्रधानमंत्री नरेंद्र मोदी ह आज ले सुरू होय महाकुंभ उपर देस के लोगन मन ल सुभकामना दे हवय। महाकुंभ के समापन छब्बीस फरवरी के महाशिवरात्रि के दिन होही।
नई दिल्ली-अतिथि
नई दिल्ली के कर्तव्य पथ म होवइया गणतंत्र दिवस परेड म छत्तीसगढ़ ले घलो कतकोन अतिथि सामिल होही जउन मन ल छब्बीस जनवरी के दिन दिल्ली अतिथि के रूप म बलाय गेहे। ओमा आपदा राहत कार्यकर्ता, सरपंच, पीएम यशस्वी योजना विजेता, बढ़िया काम करइया स्व-सहायता समूह के सदस्य, आसा अउ आंगनबाड़ी कार्यकर्ता के संगेसंग स्टार्ट-अप जइसन श्रेणी मनके इकतीस झिन लोगन सामिल हे। एमा पीएम यशस्वी योजना ले जुड़े छत्तीसगढ़ के अनुभव राठौर, हस्तसिल्प के क्षेत्र म राष्ट्रीय पुरस्कार पवइया अनुराधा साहू, कमला बाई अउ नोवेन राजवाड़े ल अतिथि के रूप म बलाय गेहे।
दिव्या निषाद-एट होम
नई दिल्ली के राष्ट्रपति भवन म छब्बीस जनवरी के होवइया एट होम रिसेप्सन म सामिल होय बर राजनांदगांव के कुसमी गांव के लखपति दीदी दिव्या निषाद ल चुने गेहे। ए दउरान राष्ट्रपति द्रौपदी मुर्मू ह ओमन ल सम्मानित करही।
आकाशवाणी ले गोठबात म दिव्या निषाद ह अपन लखपति दीदी बने के अनुभव ल साझा करीन।
आईईडी विस्फोट-घायल
सुकमा जिला के चिंतलनार थाना क्षेत्र म काली आईईडी के चपेट म आय ले एक झिन नोनी घायल होगे। पुलिस अधीक्षक किरण चव्हाण ह बतइन कि तिम्मापुर गांव के ए लइका ह खेल-खेल म आईईडी के ट्रिगर ल छू दिन, जेखर ले बिस्फोट होगे अउ ए नोनी ह घायल होगे। ए लइका ल चिंतलनार के सीआरपीएफ फील्ड अस्पताल म भर्ती कराय गेहे, जिहां एखर इलाज चलत हे।
प्लांट हादसा-जांच
मुंगेली जिला के सरगांव स्थित कुसुम प्लांट म पाछू दिन होय हादसा के बाद कलेक्टर राहुल देव ह ए प्लांट म लगाय गे जम्मो साईलो उपर रोक लगा देहे। कलेक्टर ह अधिकारी मन ल एखर जुड़े जघा के जांच करके साईलो के परयोग, जरूरी जांच, टेस्टिंग, सुरक्षा मानक अउ आने पैरामीटर के जांच करे के बाद प्रतिवेदन पेस करे बर केहे हे। ओमन श्रम पदाधिकारी ल कारखाना अधिनियम के तहत प्रकरण ल लेबर कोर्ट म प्रस्तुत करे बर केहे गेहे। जेखर ल मृतक के परिवार वाले मन ल जादा ले जादा मुआवजा दिलाय जा सकय।
जानबा के मुताबिक ए दुर्घटना म चार झन मजूर के मउत होय रिहीस ए मामला म पुलिस ह प्लांट के ऑपरेसन मैनेजर, प्रबंधक अउ इंचार्ज के खिलाफ मामला दर्ज करे हे।
छेरछेरा-पर्व
लइका-जवान अउ सियान मन ल दान धरम देके परब छेरछेरा आज छत्तीसगढ़ म उछाह के संग मनाय जात हे। बिहनियच ले लइका मन ह टोली बनाके घरोघर छेरछेरा के हाना लगावत धान, चंउर अउ कोनो प्रकार के दान मांगत हे। मुख्यमंत्री विष्णुदेव साय ह प्रदेस के जाने-माने परब छेरछेरा के बधई अउ सुभकामना देहे। ए मउका म ओमन प्रदेस के लोगन मनके सुख-समृध्दि अउ उछाह के कामना करे हे।
मकर संक्रांति
ऐति, प्रदेस म घलो लोहड़ी के परब उछाह के संग मनाय जात हे। गुरूद्वारा मन म सबद कीर्तन गाय जाथे। त उहें, पूर्वोत्तर भारत म आज माघ बीहू के तिहार मनाय जात हे।तातापानी महोत्सव
बलरामपुर जिला म काली ले तीन दिन तक चलइया तातापानी महोत्सव सुरू हो जही। ए महोत्सव के सुभारंभ मुख्यमंत्री विष्णुदेव साय ह करही। ए मउका म मुख्यमंत्री ह एक सौ बहत्तर करोड़ तिरासी लाख रूपिया ले जादा के आने-आने विकास काम के सिलान्यास अउ लोकार्पण करही। मुख्यमंत्री ह महोत्सव के दौरान मुख्यमंत्री सामूहिक कन्या विवाह योजना के तहत तीन सौ जोड़ा मनके बिहाव कारीकरम म घलो सामिल होही। ऐति, तातापानी महोत्सव के सेति इंहा ले जवइया बड़का गाड़ी मन ल दूसर रद्दा कोति ले आगू भेजे जाही। जारी आदेस के मुताबिक तेरह ले सोलह जनवरी तक बड़का गाड़ी मनके ए रद्दा ले अवई-जवई उपर रोक रइही। अंबिकापुर ले रामानुजगंज अउ कुसमी ले रामानुजगंज के संगेसंग रामानुजगंज ले अंबिकापुर जाय बर दूसर रद्दा तय करे गेहे।
विश्वकर्मा योजना-प्रदर्शनी
विश्वकर्मा योजना के फायदा पवइया मन बर रईपुर म इक्कीस ले तेईस जनवरी तक प्रदर्सनी सह व्यापार मेला लगाय जाही। ए प्रदर्सनी के उद्घाटन वाणिज्य अउ उद्योग मंत्री लखनलाल देवांगन ह करही। प्रदर्सनी म राज्य के आने-आने जिला ले अट्ठारा ट्रेन के करीबन साठ लाभार्थी मन डहार ले स्टाल लगाके अपन उत्पाद के प्रदर्सन के संगेसंग ओला बेचही।