प्रधानमंत्री नरेन्द्र मोदी ह किहीन हे कि देस केे युवा शक्ति ह बहुत जल्दी भारत ल एक ठिन विकसित राष्ट्र बनाही। आज नई दिल्ली के भारत मंडपम म विकसित भारत युवा नेता संवाद के मउका म बोलत ओमन किहीन कि भारत के युवा सक्ति ह देखे के लइक बदलाव लावत हे। श्री मोदी ह किहीन कि ओमन ल नवा पीढ़ी उपर भरोसा हवय कि सबो परेसानी के समाधान खोज लीहीं। ओमन यहू किहीन कि महत्वाकांक्षी लक्ष्य ल पहुंचाय बर देस के हरेक नागरिक के सक्रिय भागीदारी अउ सामूहिक प्रयास के जरूरत होथे। ओमन ए बात उपर प्रकास डालीन कि भारत ह समय ले पहिली कई ठिन क्षेत्र म अपन लक्ष्य ल पूरा कर लेहे। प्रधानमंत्री ह किहीन कि विकसित भारत ह आर्थिक, रणनीतिक, सामाजिक अउ सांस्कृतिक रूप ले मजबूत होही। ओमन यहू किहीन कि पाछु एक दसक म पच्चीस करोड़ मनखे मन ल गरीबी ले बाहिर निकाले गेहे। कार्यक्रम म श्री मोदी ह देसभर के तीन हजार जवान नेता मन ले गोठबात करीन।
इहां ए बतादन कि बीते दस जनवरी ले सुरू होय तीन दिन के विकसित भारत युवा नेता संवाद ह जवान लइका मन ल विकसित भारत बर सुघ्घर समाधान बताय बर एक ठिन बढ़िया मंच प्रदान करे हे।
राज्य स्तरीय युवा महोत्सव
स्वामी विवेकानंद जयंती के मउका म राजधानी रायपुर के साईंस काॅलेज मैदान म आज ले तीन दिन वाले राज्य स्तरीय युवा महोत्सव अब ले थोरिक देर बाद सुरू होही।
उद्घाटन समारोह के पहिली कतकोन अकन प्रतियोगिता होवत हे, जेमा युवा प्रतिभागी मन बड़ उछाह संग भाग लेवत हे। एखर चलत लोकनृत्य, रंगमंच, चित्रकला अउ भाषण प्रतियोगिता ए सब गतिविधि सामिल हे।
राष्ट्रीय युवा दिवस-राज्यपाल/अरूण साव
राज्यपाल रमेन डेका ह राष्ट्रीय युवा दिवस के मउका म आज नई दिल्ली के रामकृष्ण मिशन म राखे गे कार्यक्रम म सामिल होइन। ए मउका राज्यपाल ह स्वामी विवेकानंद के विचार ल बतावत किहीन कि आज के जवान लइका आत्मविश्वास अउ आत्मनिर्भरता के संग अपन लक्ष्य सोझ बाढ़ सकत हे। कार्यक्रम म भारत के अटारनी जनरल आर. वेंकटरमणि, सांसद बांसुरी स्वराज अउ रामकृष्ण मिशन नई दिल्ली के सचिव स्वामी सर्वलोकानंद मौजूद रिहीन।
ऐति, उपमुख्यमंत्री अरूण साव आज नारायणपुर के रामकृष्ण मिशन आश्रम म राखे गे राष्ट्रीय युवा दिवस कार्यक्रम म सामिल होइन। ए मउका म श्री साव ह कहिन कि राज्य सरकार ह जवान लइका मन ल आगू बढ़ाय बर हरसंभव सहयोग करत हे। ओमन यहू कहिन कि नारायणपुर जिला के अंदरूनी जघा म स्वामी विवेकानंद रामकृष्ण मिशन आश्रम चलाय जावत हे, जिहा सिक्षा के संगेसंग भारतीय संस्कृति अउ समाज ल आगू बढ़ाय बारे म काम होवत हे। कार्यक्रम ल वन मंत्री केदार कश्यप अउ रामकृष्ण मिशन आश्रम के सचिव स्वामी व्याप्तानंद जी महाराज घलो संबोधित करीन।
अडानी/मुख्यमंत्री-मुलाकात
अडानी समूह छत्तीसगढ़ म ऊर्जा अउ सीमेंट के क्षेत्र म पैंसठ हजार करोड़ रूपिया ले जादा के राशि के निवेस करही। ए घोसना अडानी समूह के मुखिया गौतम अडानी ह आज विष्णुदेव साय ले रायपुर स्थित उंखर निवास कार्यालय म भेंट बेरा करीन। ओमन बतईन कि अडानी समूह ह प्रदेस के रायपुर, कोरबा अउ रायगढ़ म पावर प्लांट के विस्तार बर साठ हजार करोड़ रूपिया के निवेस करही। ए प्रोजेक्ट के माध्यम ले राज्य के बिजली उत्पादन म छह हजार एक सौ बीस मेगावाॅट के उपरहा बढ़ोतरी होही। ओमन यहू बतईन कि अडानी ग्रुप ह राज्य म सीमेंट कारखाना मनके विकास अउ विस्तार बर घलो पांच हजार करोड़ रूपिया निवेस करही। एखर ले राज्य के औद्योगिक विकास ह मजबूत होही संगे कमाख-खाय के नवा मउका घलो दीही।
प्रयागराज-महाकुंभ
आस्था अउ मानवता के सबले बड़का संगम महाकुंभ के सुरूवात काली उत्तरप्रदेस के प्रयागराज म पुस पुन्नी म पहिली अमृत स्नान के संग होही। ए भव्य आयोजन म सामिल होय बर श्रद्धालु मन बर जम्मों तैयारी पूरा कर ले गेहे। ए महाकुंभ म सामिल होय बर बड़ भारी संख्या म श्रद्धालु मन पहुंचत हे। संस्कृति मंत्रालय ह प्रयागराज म कलाग्राम बनाय हे, जउन ह देस के समृद्ध अउ जीवंत संस्कृति ल देखाही। प्रयागराज म कतकोन जघा म बियाबान जंगल असन बनाय गेहे, जेखर ले महाकुंभ म अवइया श्रद्धालु मन बर सुद्ध हवा अउ स्वस्थ वातावरण तय करे जा सकय।
माओवादी-मुठभेड़
बीजापुर जिला म आज सुरक्षा बल मन संग होय मुठभेड़ म पांच झिन माओवादी मारे गेहे, जेखर मनके लास बरामद कर ले गेहे।
जिला के पुलिस अधीक्षक जितेन्द्र यादव ह घटना के पुष्टि करत बतईन कि मद्देड़ थाना क्षेत्र ले डिस्ट्रिक्ट रिजर्व गार्ड-डीआरजी, स्पेशल टाॅस्क फोर्स-एसटीएफ अउ जिला पुलिस बल के संघरा टीम ह सर्चिंग बर निकले रिहीस, तभे नेशनल पार्क इलाका म आगूच ले घात लगाय बइठे माओवादी मन सुरक्षा बल मन उपर फायरिंग सुरू कर दीस। फेर, जवान मन डहार होय जवाबी कार्रवाई म पांच झन माओवादी मारे गीस। मउका ले आॅटोमेटिक हथियार समेत अब्बड़ अकन गोला बारूद अउ माओवादी जिनीस बरामद करे गेहे।
ओति, नारायणपुर जिला म सुरक्षा बल मनके टीम ह सोनपुर थाना क्षेत्र के हिरगेनार-गुमचुर के बीच पहाड़ी म माओवादी मन डहार ले डम करे गे विस्फोटक के संगे आने माओवादी जिनीस बरामद करे हे। एमा ले एक नग बीजीएल सेल, पन्द्रह नग तीर बम, एक नग देसी ग्रेनेड, तीन बंडल बिजली वायर, कुकर, टिफिन, सोल प्लेट, माओवादी वर्दी, पिठ्ठू अउ पटासी समेत आने जिनीस सामिल हे।
सड़क दुर्घटना
महाकुंभ म सामिल होय बर परिवार समेत प्रयागराज जावत भाटापारा के विधायक इंद्रकुमार साव के गाड़ी आज दुर्घटनाग्रस्त होगे। ए हादसा म उंखर पत्नी घायल होगे हे। उहें, परिवार के आने सदस्य सुरक्षित हे।
भाटापारा सहर थाना प्रभारी ह घटना के पुष्टि करत बतईन कि विधायक श्री साव ह बलरामपुर ले प्रयागराज जावत रिहीन, तभे सोनपुर तीर उंखर कार ह ट्रक ले टकरा गे। ए हादसा म विधायक के पत्नी अउ आने परिवारजन ल मामूली चोट आय हे। उहें, पीएसओ ल गंभीर चोट आय, जिखर इलाज चलत हे।
मुख्यमंत्री विष्णुदेव साय ह विधायक श्री साव ले फोन म बात करके उंखर हालचाल जानीन अउ घायल मनके जल्दी ठीक होय के कामना करीन।
ओति, जांजगीर-चांपा जिला म शिवरीनारायण तीर ट्रैक्टर ह फटफटी सवार तीन झिन मनखे ल अपन चपेट म ले लीस। ए हादसा म एक झिन जवान लइका के मउकाच म मउत होगे। उहें, गंभीर रूप ले घायल दू झन आने मनखे ल पामगढ़ अस्पताल म भर्ती कराय गेहे। ए तीनों जवान लइका कोसीर गांव के हरय।
हत्या-आरोपी गिरफ्तार
सूरजपुर जिला म खड़गवां चैकी क्षेत्र के गांव केरता म पाछु दिन भूईंया झगरा ल लेके एके परिवार के तीन झिन मनखे के हत्या के मामला म पुलिस ह तेईस झिन मन ल गिरफ्तार करे हे। ये सबो आरोपी एके परिवार के हरय। जेमा दू झिन माईलोगिन घलो हे। पुलिस ह सबो आरोपी मन ल कोर्ट म पेस करीस, जिहां ले ओमन ल जेल भेज दे गेहे।
ओति, कोरबा म सराफा व्यापारी मनके हत्या के मामला म पुलिस ह दू झिन सग भाई ल गिरफ्तार करे हे। उहें, एक झिन आने आरोपी गिरफ्तार हे, जेला खोजे जात हे। पुलिस बताय हे कि गिरफ्तार आरोपी म ले एक झिन ह मउत होय सराफा व्यापारी के ड्राईवर हरय।
इंडियन वाटर अधिवेशन
रायपुर म राखे गे तीन दिन वाले इंडियन वाटर वक्र्स एसोसिएशन के वार्षिक अधिवेशन आज संपन्न होइस। ए अधिवेशन म सोलह ठिन तकनीकी सत्र होइस, जेमा छप्पन ठन सोध पत्र प्रस्तुत करे गीस।
अउ अब मौसम के हाल…
प्रदेस म अवइया दू दिन तक न्यूनतम तापमान म गिरावट हो सकत हे। मौसम विभाग ले मिले जानकारी मुताबिक पश्चिमी विक्षोभ के असर कम होय के सेती नमी के मात्रा म कमी आही, जेखर पाय के तापमान गिर सकत हे। खास करके उत्तर छत्तीसगढ़ म करीबन चार डिग्री सेल्सियस अउ मध्य अउ दक्षिण छत्तीसगढ़ म दू डिग्री सेल्सियस गिरे के संभावना हे। उहें, पन्द्रह जनवरी ले फेर ले एक ठिन पश्चिमी विक्षोभ बने के सेती प्रदेस म न्यूनतम तापमान म बाढ़ सकत हे।