प्रदेस म त्रि-स्तरीय पंचायत चुनाव बर आरक्षण के प्रक्रिया पूरा होगे हे। आज रायपुर के निमोरा स्थित पंचायत अउ ग्रामीण विकास संस्थान म प्रदेस के तैंतीस जिला पंचायत अध्यक्ष पद बर आरक्षण होइस। एमा सोलह सीट अनुसूचित जनजाति वर्ग बर, चार सीट अनुसूचित जाति वर्ग बर अउ तेरह सीट सामान्य वर्ग बर आरक्षित करे गेहे। एमा ले सत्रह सीट जम्मो वर्ग के महिला मन बर आरक्षित हे। सामान्य सीट मन म मुंगेली, सारंगढ़-बिलाईगढ़, कबीरधाम, रायपुर, धमतरी अउ महासमुंद जिला पंचायत सामिल हे।
शिवराज सिंह-किसान सम्मेलन
केंद्रीय गृहमंत्री शिवराज सिंह चौहान ह किहीन हे कि छत्तीसगढ़ अवइया समय म धान के संगेसंग सब्जी अउ फल के कटोरा घलो बनही। ओमन किहीन कि केंद्र सरकार, कृषि के संगेसंग उद्यानिकी अउ बागवानी फसल मन ल घलो बढ़ावा देवत हे। केंद्रीय कृषि मंत्री काली दुरूग जिला के ग्राम खपरी म आयोजित तीन दिवसीय किसान सम्मेलन के सुभारंभ समारोह ल संबोधित करत रिहीन। ओमन किसान मनले राहेर, मुंग अउ उड़द जइसन फसल मनके उत्पादन करे अउ प्रोसेसिंग यूनिट लगाय के अपील करीन। ए अवसर म श्री चौहान ह प्रगतिसील किसान संघ डहार ले निर्मित भवन के लोकार्पण अउ प्रसिक्षण केंद्र बर भूमिपूजन करीन। संगेसंग तेरह जनवरी ले उत्तर प्रदेस के प्रयागराज म सुरू होवइया महाकुंभ बर दू सौ क्विंटल सब्जी ले भरे ट्रक ल झंडी दिखाके रवाना करीन।
कारीकरम म मुख्यमंत्री विष्णुदेव साय ह किहीन कि छत्तीसगढ़ के विकास बर प्रधानमंत्री नरेंद्र मोदी अउ केंद्र सरकार के भरपूर सहयोग मिलत हे।
अपन दुर्ग प्रवास के दौरान केंद्रीय मंत्री शिवराज सिंह चौहान ह नगपुरा के रेस्टहाउस म वृक्षारोपण कर छत्तीसगढ़ म ‘एक पेड़ मां के नाम‘ अभियान ल बढ़ावा देके संगेसंग लोगन मन ल पर्यावरण संरक्षण के संदेस दीन।
प्रधानमंत्री उज्ज्वला योजना
मुख्यमंत्री विष्णुदेव साय ह किहीन हे कि प्रधानमंत्री उज्ज्वला योजना ले गांव मन म घर-घर तक एलपीजी गैस कनेक्सन पहुंचे हे। जेखर ले हमर पेड़ जंगल अउ पर्यावरण सुरक्षित हे। एखर ले महिला मन ल चुल्हा के धुंआ ले होवइया परेसानी मनले छुटकारा घलो मिले हे। श्री साय ह काली रायपुर म छत्तीसगढ़ इंडेन एलपीजी डिस्ट्रीब्यूटर्स एसोसिएसन डहार ले आयोजित वार्षिक सम्मेलन अउ एलपीजी वितरक मनके सम्मान समारोह ल संबोधित करत रिहीन। अपन संबोधन म ओमन किहीन कि आज घरेलू गैस के सुविधा जइसे आसान होय हे, ओखर पाछू भारत सरकार के पेट्रोलियम मंत्रालय के संगेसंग ए काम ले जुड़े डिस्ट्रीब्यूटर्स मनके घलो अहम भूमिका हे।
कारीकरम म उप मुख्यमंत्री विजय शर्मा अउ वन मंत्री केदार कश्यप घलो मौजूद रिहीन।
व्यापम-परीक्षा कैलेंडर
छत्तीसगढ़ व्यावसायिक परीक्षा मंडल-व्यापमं ए बछर अलग-अलग विभाग के रिक्त पद म भर्ती बर बत्तीस ले जादा परीक्षा मनके आयोजन करही। व्यापमं ह ए परीक्षा मन बर संभावित तिथि के घोसना कर देहे। एमा उप अभियंता, सहायक सांख्यिकी अधिकारी, मत्स्य निरीक्षक, एडीईओ ल लेके पुलिस कांस्टेबल, स्टॉफ नर्स अउ वार्ड ब्वॉय तक के पद सामिल हे। ए परीक्षा नौ मार्च ले सुरू होके इक्कीस दिसंबर तक चलही। ए संबंध म जादा जानकारी व्यापमं के आधिकारिक वेबसाइट ले, ले जा सकत हे।
अरूण साव-मोवा ओवरब्रिज
रायपुर के मोवा ओवरब्रिज के मरम्मत काम म लापरवाही के सिकायत मिले के बाद उपमुख्यमंत्री अउ लोकनिर्माण मंत्री अरूण साव ह मउका के निरीक्षण करीन। ओमन मरम्मत काम म लापरवाही अउ खराब काम बर नाराजगी जतावत हुए संबंधित ठेकेदार अउ इंजीनियर मन ल सख्त चेतावनी देहे। ओमन ठेकेदार ल मरम्मत काम के भुगतान नइ करे के निरदेस दीन। संगेसंग ओमन किहीन कि अइसन करे जाय उपर अधिकारी मन के वेतन ले ओखर भरपाई करे जाही।
श्री साव ह उच्च अधिकारी मन ल मउका म ही मुख्य अभियंता स्तर के अधिकारी ले ओवरब्रिज मरम्मत काम के जांच करवा के तीन दिन म रिपोर्ट पेस करे के निरदेस दीन। ओमन किहीन कि गुणवत्ताहीन काम बर जिम्मेदार अधिकारी मन ल नइ बख्से जाय अउ जांच के बाद उंखर खिलाफ कड़ा कार्रवाई करे जाही।
राज्यपाल-राजनांदगांव
राज्यपाल रमेन डेका ह काली अपन राजनांदगांव प्रवास के दौरान सुंदरा गांव म प्रधानमंत्री आवास योजना के तहत निर्मित भवन मन के अवलोकन करीन। ए दौरान ओमन हितग्राही मन ले बातचीत कर पक्का मकान मिले के बाद ओखर जीवन म आय बदलाव के बारे म जानकारी लीन। ओमन अधिकारी मनले सबो मकान मनके गुणवत्ता के संग समय-सीमा म पूरा होय के निरदेस दीन। राज्यपाल ह किहीन कि ए मकान मनके गुणवत्ता अउ समय म निर्माण सुनिश्चित करना प्रशासन के प्राथमिकता होना चाही।
उहें, राज्यपाल सुंदरा स्थित छत्तीसगढ़ डेंटल कॉलेज अउ रिसर्च इंस्टीट्यूट सुंदरा के स्नातक समारोह म घलो सामिल होइन। ए मउका म ओमन किहीन कि दंत चिकित्सक मन के समाज म महत्वपूर्ण भूमिका हे। राज्यपाल ह किहीन कि राज्य सरकार डहार ले स्वास्थ्य, शिक्षा समेत अलग-अलग क्षेत्र म काम करे जात हे लेकिन देस के आबादी ल देखत हुए निजी क्षेत्र मनके भूमिका अउ सहभागिता महत्वपूर्ण हे।
अपन राजनांदगांव प्रवास के दौरान राज्यपाल ह दिव्यांग मन बर समर्पित संस्था अभिलाषा के वार्षिकोत्सव, पुरस्कार वितरण अउ सम्मान समारोह म घलो सामिल होइन। ए मउका म ओमन संस्था ल दू लाख पचास हजार रूपिया दे के घोसना करीन। ए मउका म सांसद संतोष पांडेय घलो मौजूद रिहीन।
राज्यपाल-लखपति दीदी
राज्यपाल रमेन डेका ह काली राजनांदगांव कलेक्ट्रेट म आयोजित एक ठन कारीकरम म लखपति दीदी दिव्या निषाद ल सम्मानित करीन। राजनांदगांव विकासखंड के कुसमी गांव के रहइया दिव्या निषाद के चयन नई दिल्ली म छब्बीस जनवरी के राष्ट्रपति भवन म आयोजित एट होम रिसेप्सन बर करे गेहे। एट होम रिसेप्सन बर दिव्या निषाद समेत देसभर ले दस लखपति दीदी मनके चयन करे गेहे।
रायपुर-हादसा
रायपुर के तेलीबांधा क्षेत्र म आज एक ठन निर्माणाधीन बहुमंजिला इमारत के छत गिरे ले एक झन मजदूर के मउत होगे हे। कलेक्टर गौरव सिंह बतइन कि ए हादसा म आठ झन मजदूर घायल होगे हे, जेमा ले तीन झन के हालत गंभीर बताय जात हे। रेस्क्यू ऑपरेसन जारी हे।
मुंगेली-फैक्ट्री हादसा
मुंगेली जिला म सरगांव के रामबोड़ करा एक ठन स्मेल्टर प्लांट म होय दुर्घटना म मारेगे श्रमिक मनके संख्या चार होगे हे। जिला प्रशासन, एनडीआरएफ अउ एसडीआरएफ डहार ले करेगे करीब चालीस घंटा तक चलाय गे रेस्क्यू ऑपरेसन के बाद पाछू रतिहा तीन झन श्रमिक मनके सव मलबा ले बाहर निकाले गेहे। सव ल पोस्टमार्टम बर तत्काल सिम्स बिलासपुर भेजे गेहे। ए घटना म एक झन श्रमिक घलो घायल हो रिहीस हे, जेखर इलाज के दौरान मउत होगे रिहीस। कलेक्ट राहुल देव ह किहीन कि ए हादसा म जेन परिवार मन ह अपन सदस्य मन ल खोय हे, उनला नियमानुसार प्रशासन डहार ले मुआवजा समेत आने जरूरी सहयोग दे जाही। ए घटनाक्रम के जउन भी दोषी होही, उंखर खिलाफ सख्त कार्रवाई करे जाही।
खबर के मुताबिक ए मामला म पुलिस ह प्लांट के ऑपरेसन मैनेजर, प्रबंधक अउ इंचार्ज के खिलाफ मामला दर्ज करे गेहे।
जवान-घायल/आईईडी बरामद
बीजापुर जिला म माओवादी मन डहार ले करेगे आईईडी विस्फोट के चपेट म आय ले सीआरपीएफ के एक झन प्रधान आरक्षक राकेश कुल्लू गंभीर रूप ले घायल होगे हे। घायल जवान ल बेहतर इलाज बर रायपुर लाय गेहे। जिला के अतिरिक्त पुलिस अधीक्षक चंद्रकांत गवर्ना ह बतइन कि सीआरपीएफ के एक टीम महादेवघाट ले सर्चिंग बर जंगल डहार निकले रिहीस, तभे माओवादी मन ओमन ल निसाना बनावत हुए आईईडी विस्फोट कर दीन। घटना के बाद सुरक्षा बल ह क्षेत्र म सर्चिंग बढ़ा देहे।
इही बीच, नारायणपुर जिला के कोहकामेटा थाना क्षेत्र के कच्चापाल-तोके मार्ग करा सुरक्षा बल ह पांच-पांच किलो के चार ठन आईईडी बरामद करे हे। ए विस्फोटक ल माओवादी मन ह सुरक्षा बल ल नुकसान पहुंचाय के नियत ले लगाय रिहीन। आईईडी ल मउका म ही निष्क्रिय कर दे गेहे।