केंद्रीय ग्रामीण विकास अउ कृषि मंत्री शिवराज सिंह चौहान ह आज अपन छत्तीसगढ़ प्रवास के दउरान दुरूग जिला के नगपुरा म आयोजित ‘‘मोर मकान मोर अधिकार‘‘ कारीकरम म सामिल होइन। कारीकरम ल संबोधित करत श्री चौहान ह किहीन कि केंद्र म प्रधानमंत्री नरेंद्र मोदी के अगुवई म तीसर बार सरकार बने के संग ही छत्तीसगढ़ ल प्रधानमंत्री आवास योजना के तहत आठ लाख ले जादा मकान दे गीस। ओमन किहीन कि ए वित्तीय बछर म तीन लाख ले जादा मकान दे जात हे।
केंद्रीय मंत्री ह किहीन कि छत्तीसगढ़ के गांव गरीबी ले मुक्त बनाय जाही। ओमन बतइन कि कृषि योजना बर राज्य ल एक सौ बयासी करोड़ रूपिया ले जादा दे गेहे। आज ओमन दू सौ तीन करोड़ रूपिया अउ देके घोसना करीन।
ए मउका म मुख्यमंत्री विष्णुदेव साय, उपमुख्यमंत्री विजय शर्मा घलो मौजूद रिहीन।
इंडियन वाटर-अधिवेशन
मुख्यमंत्री विष्णुदेव साय ह आज रायपुर म तीन दिन के इंडियन वाटर वर्क्स एसोसिएसन के संतानवें वार्षिक अधिवेसन आज ले सुरू होगे हे। ए अधिवेसन म देसभर के चार सौ ले जादा जल बिसेसज्ञ अउ अनुभवी इंजीनियर्स सामिल होत हे। ए अधिवेसन के थीम ‘‘जल-तीन सौ साठ डिग्री‘‘ रखे गेहे।
समारोह ल संबोधित करत मुख्यमंत्री ह किहीन कि जल संरक्षण हम सबके जिम्मेदारी हरय। जल प्रबंधन समय के मांग हे। हमन ल अवइया पीढ़ी के अच्छा जीवन बर जल के प्रंबधन, संरक्षण के संघरा जल स्त्रोत के संवर्धन उपर बिसेस धियान देना होही।
मुख्यमंत्री ह किहीन कि राज्य सरकार ह छत्तीसगढ़ के ग्रामीण इलाका मन म स्वच्छ पेयजल उपलब्ध कराय बर नल कनेक्सन प्रदान करे हे, जेखर ले लोगन मनके घर म साफ पानी पहुंचे ले ओमन के स्वास्थ्य स्तर घलो सुधरे हे अउ ग्रामीण मन के जीवन स्तर म घलो सकारात्मक बदलाव आय हे। कारीकरम म मुख्यमंत्री ह इंडियन वाटर एसोसिएसन के स्मारिका के विमोचन घलो करीन।
उप मुख्यमंत्री अरूण साव ह कारीकरम ल संबोधित करत किहीन कि देसभर ले आय इंजीनियर अउ बिसय बिसेसज्ञ जल संरक्षण उपर गहन बिचार विमर्स करही अउ एखर बर रणनीति तियार करे म योगदान दीही।
कुंभवाणी-चैनल
उत्तर प्रदेस के प्रयागराज म आज मुख्यमंत्री योगी आदित्यनाथ ह महाकुंभ ल समर्पित आकाशवाणी के कुंभवाणी चैनल के सुभारंभ करीन। ए मउका म मुख्यमंत्री ह भरोसा जतइन कि कुंभवाणी चैनल दूर-दराज के गांव मन तक महाकुंभ के आध्यात्मिक संदेस ल प्रसारित करही। कारीकरम के दउरान उत्तर प्रदेस के मुख्यमंत्री डहार ले कुंभ मंगल धुन के घलो सुभारंभ करे गीस।
कारीकरम म सूचना अउ प्रसारण राज्य मंत्री डॉक्टर एल मुरूगन वर्चुअली सामिल होइन। ए मउका म प्रसार भारती के अध्यक्ष डॉक्टर नवनीत कुमार सहगल, मुख्य कार्यकारी अधिकारी गौरव द्विवेदी, आकाशवाणी के महानिदेसक डॉक्टर प्रज्ञा पालीवाल गौड़, दूरदर्सन के महानिदेसक कंचन प्रसाद समेत कई गणमान्य मनखे मौजूद रिहीन।
आकाशवाणी के कुंभवाणी चैनल आज ले छब्बीस फरवरी तक हरेक दिन बिहनिया पांच बजके पचपन मिनट ले रतिहा के दस बजके पांच मिनट तक महाकुंभ के हर गतिविधि उपर आधारित कारीकरम प्रसारित करत हे। ए कारीकरम एक सौ तीन दसमलव पांच मेगाहर्ट्ज फ्रीक्वेंसी म मौजूद रिही।
बतादन कि प्रयागराज म महाकुंभ के आयोजन तेरह जनवरी ले छब्बीस फरवरी तक करे जात हे। पुष पुन्नी म पवित्र अमृत स्नान के संग महाकुंभ सुरू होही अउ महाशिवरात्रि के दिन आखिरी अमृत स्नान के संग ए सिराही।
मुख्यमंत्री-ऑल इंडिया स्टील
मुख्यमंत्री विष्णुदेव साय ह आज नवा रायपुर म ऑल इंडिया स्टील कॉन्क्लेव टू प्वाइंट-ओ के सुभारंभ करीन। ए कॉन्क्लेव म सत्रह राज्य के पंद्रह सौ ले जादा प्रतिनिधी स्टील उद्योग के चुनौती अउ नवा अवसर मन उपर मंथन करही।
समारोह ल संबोधित करत मुख्यमंत्री ह किहीन कि विकसित छत्तीसगढ़ के निर्माण बर हमन दृढ़ इच्छा सक्ति के संग काम करत हन। प्रधानमंत्री नरेंद्र मोदी ह बछर दू हजार तीस तक तीन सौ मिलियन टन स्टील उत्पादन के लक्ष्य रखे हे अउ ए लक्ष्य ल पाय म छत्तीसगढ़ के सबसे अहम भूमिका होही। एखर बर प्रदेस के हरेक उद्यमी ल छत्तीसगढ़ के विकास यात्रा के ब्राण्ड एंबेसडर बनना होही। प्रदेस के स्टील उद्योग ल नवा ऊंचाई म ले जाय बर हमर सरकार हर संभव सहयोग करही।
माओवादी-आत्मसमर्पण
बीजापुर जिला म तेरह माओवादी मन ह पुलिस के आगू आत्मसमर्पण कर देहे। एमा ले दू झिन माओवादी उपर पांच-पांच लाख रूपिया अउ तीन माओवादी मन उपर एक-एक लाख रूपिया के ईनाम घोसित रिहीस। एमा गोंदिया डिवीजन म सक्रिय एक माओवादी दंपत्ति घलो सामिल हे। ए माओवादी मन केंद्रीय रिजर्व पुलिस बल के उप महानिरीक्षक देवेन्द्र सिंह नेगी, बीजापुर के पुलिस अधीक्षक डॉक्टर जितेन्द्र कुमार यादव अउ एसटीएफ के पुलिस अधीक्षक विजय कुमार पाण्डे के आगू आत्मसमर्पण करीन। छत्तीसगढ़ सरकार के पुर्नवास नीति के तहत आत्मसमर्पित जम्मो माओवादी मन ल पच्चीस-पच्चीस हजार रूपिया के प्रोत्साहन रासि दे गेहे। ए जम्मो झन उपर आने-आने माओवादी घटना म सामिल होय के आरोप हे।
ऐति, कोंडागांव जिला के पुलिस अधीक्षक कार्यालय म एक लाख रूपिया के ईनामी माओवादी ह आत्मसमर्पण करे हे। ए माओवादी आमदई एरिया कमेटी अंतर्गत एलओएस सदस्य के पद म कार्यरत रिहीस।
उहें, सुकमा जिला के पालीगुड़ा-गुंडराजगुडेम म काली होय मुठभेड़ म मारे गे तीनो माओवादी मनके सिनाख्त होगे हे। पुलिस अधीक्षक किरण चव्हाण ह बतइन कि मुठभेड़ म मारे गे माओवादी मनके पहिचान जगरगुंडा म होय घटना के मास्टर माइंड कोरसा महेश, माडवी नवीन एसीएम पश्चिम बस्तर अउ अलवम भीमा एसीएम जोनागुड़ा के रूप म होय हे। ए माओवादी मन उपर अट्ठारा लाख रूपिया के ईनाम घोसित रिहीस। पुलिस अधीक्षक ह बतइन कि घटना स्थल ले दू बीजीएल लांचर, एक बारह बोर के रायफल अउ तीन टिफिन बम समेत भारी मात्रा म बिस्फोटक जिनिस बरामद होय हे।
बातों-बातों में
प्रादेशिक समाचार एकांश आकाशवाणी रायपुर डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत छत्तीसगढ़ के उप मुख्यमंत्री श्री अरूण साव ले लेगे भेंटवार्ता के प्रसारण करे जाही। ए कारीकरम काली ग्यारा जनवरी के बिहनिया साढ़े दस बजे आकाशवाणी केन्द्र रायपुर ले प्रसारित होही। एला छत्तीसगढ़ के सबो आकाशवाणी केंद्र मन रिले करही।
मंत्रि-मंडल उप समिति-बैठक
खाद्य अउ नागरिक आपूर्ति मंत्री दयालदास बघेल के अध्यक्षता म आज मंत्रालय म मंत्रिमंडलीय उप समिति के बइठका होइस। बइठका म राज्य सरकार डहार ले अनुमानित एक सौ साठ ले एक सौ पैंसठ लाख मीट्रिक टन धान के सत-प्रतिसत निष्पादन बर मंथन करे गीस। केंद्रीय अउ राज्य पूल म एक सौ पच्चीस लाख मीट्रिक टन धान के निष्पादन हो सकही। अतिशेष चालीस लाख मीट्रिक टन धान के निलामी बर निविदा प्रक्रिया उपर विचार विमर्स करे गीस। धान खरीदी के बाद फरवरी के दूसरा हफ्ता ले निलामी के प्रक्रिया सुरू करे के निर्णय ले गीस। अंतिम निर्णय मंत्रिपरिषद के बइठका म तय होही।
बइठका म धान खरीदी बेवस्था, कस्टम मीलिंग बर धान के उठाव, किसान मन बर पर्याप्त बारदान के बेवस्था, टोकन के स्थिति समेत आने-आने किसान हित ले जुड़े मुद्दा के घलो समीक्षा करे गीस।
गौ-मांस बिक्री-गिरफ्तार
रायपुर पुलिस ह मोमिनपारा इलाका के एक घर ले दू सौ छब्बीस किलो ले जादा गौ मांस बरामद करे हे। ए मामला म पुलिस ह छै मनखे मन ल गिरफ्तार करे हे। रायपुर एसएसपी लाल उमेद सिंह ह पत्रकारवार्ता म बतइन कि आठ अउ नौ जनवरी के रतिहा मुखबिर ले पुलिस ल सूचना मिलिस की मोमिनपारा स्थित एक मकान म कुछ लोगन मन डहार ले गौ मांस बेचे जात हे। सूचना म पुलिस ह छापामार कार्रवाई करीस।