मुंगेली जिला के सरगांव स्थित एक ठिन फैक्ट्री के चिमनी ह आज मंझनिया अचानक गिर गे, जेखर नीचे कतकोन मजूर मनके मलबा म दबे के आसंका हे। ए घटना के तुरते बाद पुलिस अउ प्रशासन के टीम ह पहुंचिस अउ रेस्क्यू ऑपरेसन ल सुरू करीस। अभी तक दू मजदूर ल गंभीर हालत म बाहिर निकाले जा चुके हे, जेला बिलासपुर के अस्पताल म भर्ती कराय गेहे। उहें, बांकी मजदूर मन ल निकाले बर रेस्क्यू अभियान चलाय जात हे।
पुलिस ह बतइन कि फैक्ट्री के चिमनी ह अतेक भारी हे कि ओला हटाय म बहुत मुश्किल होवत हे। संगेसंग चिमनी म भारी मात्रा म राख होय ले घलो रेस्क्यू करे म परेसानी आत हे।
माओवादी-मुठभेड़
सुकमा जिला म आज सुरक्षा बल मनके संग होय मुठभेड़ म तीन झिन माओवादी मनके मारे जाय के खबर हे। फेर माओवादी मनके मारे जाय के अधिकारिक पुष्टि अभी तक नइ होय हे। जानबा के अनुसार-डीआरजी, एसटीएफ अउ सीआरपीएफ के कोबरा बटालियन के संयुक्त टीम ह बीजापुर जिला के सीमा म माओवादी मनके मौजूदगी के सूचना म निकले रिहीस। फेर इही बेरा म सुरक्षा बल अउ माओवादी मनके बीच मुठभेड़ होगे।
विजय शर्मा-बैठक
उपमुख्यमंत्री विजय शर्मा के अध्यक्षता म काली मंत्रालय म गृह विभाग के एक ठिन समीक्षा बइठका होइस। बइठक म उपमुख्यमंत्री ह एनडीपीएस एक्ट के चलत जारी एसओपी के पालन ल लेके अधिकारी मन ल सख्त निरदेस देहे। ओमन ह किहीन हे कि नसा के अवैध कारोबार म सामिल लोगन मनके खिलाफ कड़ा कार्रवाई करे जाय। ओमन ह स्पष्ट करे हे कि अगर कोनो पुलिस अधिकारी या फेर कोनो करमचारी ए अवैध कारोबार म सामिल होही, त उंखर खिलाफ तुरते बर्खास्त करे के कार्रवाई करे जाही।
बइठका म उपमुख्यमंत्री ह पुलिस विभाग के करमचारी अउ अधिकारी मन बर नवा स्थानांतरण नीति ल लागू करे के घलो निरदेस दीन हे। संगेसंग सहीद जवान मनके परिवार ल प्राथमिकता देत हुए अनुकम्पा नियुक्ति के लंबित प्रकरण के निराकरण ल जल्दी करे बर केहे हे। ओमन किहीन कि सहीद होय जवान मनके ‘‘अमर बलिदानी स्मारक‘‘ के निर्माण उंखर परिवार के सहमति ले प्राथमिकता के आधार म करे जाय। जेखर ले ओखर सहादत के सम्मान हर स्तर म सुनिश्चित हो सकय।
चिटफंड कंपनी के खिलाफ होवत कार्रवाई के समीक्षा करत हुए उपमुख्यमंत्री ह किहीन हे कि अइसन कंपनी के बांचे संपत्ति के जल्दी निलामी करे जाय अउ ओखर ले मिले पइसा ल प्रभावित निवेसक मन ल लहुटाय जाय। बइठका म यातायात प्रबंधन ल प्रभावी बनाय बर ब्लैक स्पॉट्स के चिन्हांकन अउ ओखर समाधान के कार्ययोजना ल लेके घलो चर्चा होइस।
भाजपा संविधान-गौरव यात्रा
भारतीय संविधान के पचहत्तरवां बछर के मउका म भारतीय जनता पार्टी ह प्रदेस म ग्यारा ले पच्चीस जनवरी तक संविधान गौरव यात्रा निकालही। ए अभियान के सफल संचालन बर राज्य स्तरीय समिति के गठन घलो करे गेहे। ए समिति के संयोजक पूर्व नेता प्रतिपक्ष नारायण चंदेल ल बनाय गेहे। उहें, भाजपा विधायक गुरू खुशवंत साहेब ह समिति के सह-संयोजक होही। नीलकंठ टेकाम, अनुसूचित जाति मोर्चा के प्रदेस अध्यक्ष नवीन मारकंडे अउ किरण बघेल ल सदस्य नियुक्त करे गेहे।
संविधान गौरव अभियान समिति के प्रदेस संयोजक नारायण चंदेल ह बतइन कि ए यात्रा के चलत सबो प्रदेस के राजधानी अउ प्रमुख केंद्र म पचास गोष्ठी के आयोजन करे जाही, जेमा केंद्र सरकार के मंत्री अउ भाजपा के वरिष्ठ नेता मन सामिल होही। ओमन ह बतइन कि यात्रा के बेरा सब्बो जिला केंद्र म अनुसूचित जाति मोर्चा कोति ले ‘‘हमारा संविधान-हमारा स्वाभिमान‘‘ बिसय उपर गोष्ठी के आयोजन करे जाही। उहें, स्कूल, कॉलेज, विश्वविद्यालय अउ सबो सिक्षण संस्थान म क्वीज निबंध अउ भाषण प्रतियोगिता आयोजित करे जाही।
चौहान-दौरा
केंद्रीय कृषि मंत्री शिवराज सिंह चौहान ह काली दस जनवरी के छत्तीसगढ़ के एक दिवसीय दउरा म आवत हे। ए बेरा म श्री चौहान ह प्रधानमंत्री आवास योजना के सौगात दिही। संगेसंग ओमन ह कुम्हारी के मिनी स्टेडियम म चलत किसान मेला म सामिल होही। एखर बाद केंद्रीय मंत्री ह भोपाल बर रवाना हो जही।
मुख्यमंत्री-धमतरी
मुख्यमंत्री विष्णुदेव साय ह काली धमतरी जिला म दू सौ अड़सठ करोड़ रूपिया के कतकोन विकास कार्य के लोकार्पण अउ भूमिपूजन करीन। ए बेरा म ओमन ह धमतरी म स्वामित्व कार्ड के वितरण के सुभारंभ करीन। कारीकरम ल संबोधित करत हुए मुख्यमंत्री ह किहीन कि स्वामित्व कार्ड के माध्यम ले ग्रामीण क्षेत्र म आबादी भूमि म रहइया लोगन मनके समस्या दूर होवत हे। ए लोगन मन ल आबादी भूमि म स्वामित्व के पक्का दस्तावेज मिलत हे। उहें, प्रदेस ह नागरिक सुविधा ल आसान अउ मजबूत करे खातिर डिजीटल गर्वनेंस के मॉडल ल अपनाय गेहे। ओमन ह किहीन हे कि रजिस्ट्री म लोगन मन ल सुविधा हो एखर बर सरकार ह सुगम ऐप तियार करे हे। कारीकरम म मुख्यमंत्री ह कतकोन योजना के हितग्राही मन ल सामग्री घलो बांटिन।
ए कारीकरम ल उप मुख्यमंत्री अरूण साव, खेलमंत्री टंकराम वर्मा अउ कुरूद विधायक अजय चंद्राकर ह घलो संबोधित करीन।
मलखंभ अकादमी
प्रदेस के खिलाड़ी मन ल अच्छा प्रसिक्षण सुविधा दे खातिर नारायणपुर म मलखंभ अकादमी के सुरूआत करे जाही। ए अकादमी बर राज्य सरकार ह, तेरह ठिन नवा पद ल भरे बर मंजूरी दे देहे। मलखंभ अकादमी म अंतर्राष्ट्रीय स्तर के कतकोन सुविधा अउ प्रसिक्षक मनके बेवस्था करे जाही, जेखर ले खिलाड़ी मन ल उच्च स्तरीय प्रसिक्षण मिल सकही।
पेंगोलिन तस्कर-आरोपी गिरफ्तार
बस्तर वन मंडल, वन उड़नदस्ता रायपुर अउ वाइल्डलाइफ ट्रस्ट ऑफ इंडिया के टीम ह एक संघर मिलके तैंतीस किलो पेंगोलिन के छाल ल जब्त करे हे। सूचना के आधार म वन विभाग के टीम ह तीन झिन आरोपी मन ल आने-आने जघा ले गिरफ्तार करे हे। पाछू सात जनवरी के मारे गे छापा म आरोपी जेम्स मैथ्यू ल जगदलपुर ले गिरफ्तार करके ओखर करा ले बत्तीस किलो पेंगोलिन के छाल ल जब्त करे गीस। उहे, चित्रकोट ले चुन्नीलाल बघेल अउ राजकुमार कुशवाहा ल ग्यारा किलो पेंगोलिन के छाल के संग पकड़े गेहे। फेर दू झिन आने आरोपी मन ह अभी भी फरार हे। आरोपी मन करा ले तस्करी के बेरा म बउरे एक ठिन मोटर साइकिल ल घलो जब्त करे गेहे।
अंबेडकर अस्पताल-पैथालॉजी लैब
रायपुर के डॉक्टर भीमराव अंबेडकर स्मृति चिकित्सालय के कतकोन वार्ड म भर्ती मरीज मनके घर वाला मन ल अब खून के जांच कराय बर पैथालॉजी लैब जाय बर नइ पड़ही। वार्ड म भर्ती सबो मरीज के पैथालॉजिकल जांच बर ओखर खून के सैंपल ल वार्ड बॉय ह पैथोलैब तक पहुंचाही अउ जांच के बाद ब्लड रिपोर्ट इकट्ठा करके ओखर ले संबंधित वार्ड म ऑन ड्यूटी नर्स ल दे जाही।
रायगढ़-वार्षिक कॉन्फ्रेंस
इंडियन एसोसिएसन ऑफ पैथोलॉजिस्ट के छत्तीसगढ़ चेप्टर के वार्षिक कॉन्फ्रेंस ह काली दस जनवरी ले रायगढ़ के शासकीय मेडिकल कॉलेज म आयोजित करे जाही। बारह जनवरी तक चलइया ए कॉन्फ्रेंस म छत्तीसगढ़ के अलावा देसभर के कतकोन जघा ले बिसेसज्ञ चिकित्सक अउ पीजी पढ़ईया लइका मन घलो सामिल होही। ए कॉन्फ्रेंस कि बिसय ‘‘पैथालॉजी में रोगो की प्रकृति के रहस्यों को पता लगाना‘‘ हे।
अउ अब मौसम के हाल…
मौसम विभाग के अनुसार हवा के दिसा ह बदले के सेति प्रदेस के न्यूनतम तापमान ह काली ले कुछ बाढ़ सकत हे। अवइया तीन-चार दिन म न्यूनतम तापमान म करीबन चार डिग्री सेल्सियस के बाढ़े के संभावना जताय गेहे। एखर ले लोगन मन ल ठंडा ले कुछू राहत मिलही। ए बेरा म मौसम ह सुष्क रइही। फेर उहें, ग्यारा अउ बारह जनवरी के कोरिया अउ ओखर ले लगे जिला म आंसिक रूप ले बादर कर सकत हे।