प्रदेस के चौदह नगर निगम मन ले सात नगर निगम म महापौर के पद अनारक्षित रइही। एमा सामिल हे रायपुर, कोरबा अउ बीरगांव धमतरी, राजनांदगांव, चिरमिरी, जगदलपुर। एमा ले रायपुर, बीरगांव अउ कोरबा नगर निगम सामान्य वर्ग के महिला बर आरक्षित रहइी। एखर संगेसंग दुरूग, भिलाई-चरौदा अउ बिलासपुर नगर पालिक निगम म महापौर अउ अध्यक्ष के पद अन्य पिछड़ा वर्ग बर आरक्षित रइही। एमा ले दुरूग म महापौर के पद अन्य पिछड़ा वर्ग महिला बर आरक्षित हे।
आज निकाले गे लॉटरी के मुताबिक रिसाली अउ रायगढ़ नगर पालिक निगम मन म महापौर अउ अध्यक्ष के पद अनुसूचित जाति बर आरक्षित करे गेहे। एमा ले रिसाली के पद अनुसूचित जाति के महिला बर आरक्षित रइही। उहें, अंबिकापुर नगर पालिक निगम म महापौर के पद अनुसूचित जनजाति बर आरक्षित करे गेहे।
उहें, राज्य के चौव्वन नगर पालिका परिषद म ले सत्ताईस नगर पालिका मन ले अध्यक्ष के पद अनारक्षित रइही। एखर संगेसंग तेरह नगर पालिका मन म अन्य पिछड़ा वर्ग, छै म अनुसूचित जनजाति बर अउ आठ म अनुसूचित जाति बर अध्यक्ष के पद बर आरक्षित करे गेहे।
एक सौ चौबीस नगर पंचायत मन म बासठ म अध्यक्ष के पद अनारक्षित, छब्बीस नगर पंचायत मन म अन्य पिछड़ा वर्ग बर, बीस म अनुसूचित जनजाति बर अउ सोलह नगर पंचायत म अध्यक्ष के पद अनुसूचित जाति बर आरक्षित करे गेहे।
जवान-श्रध्दांजलि
मुख्यमंत्री विष्णुदेव साय ह आज दंतेवाड़ा के कारली पुलिस लाइन म काली बीजापुर जिला के ग्राम अंबेली म आईईडी बिस्फोट म मारे गे जवान अउ ड्राइवर मनके पार्थिव सरीर म पुष्पचक्र चढ़ाके ओमन मन ल श्रध्दांजलि दीन। ओमन जवान मनके परिजन मन ले भेंटकर शोक संवेदना व्यक्त करीन अउ ओमन ल सांत्वना दीन। मुख्यमंत्री ह किहीन कि हर कदम म राज्य सरकार उंखर संग हे। श्री साय ह किहीन कि बीजापुर म माओवादी डहार करे गे कायराना हमला न सिरिफ हमर जवान उपर, बल्कि लोकतंत्र अउ सांति के मूल्य मन उपर प्रहार हे। ओमन किहीन कि जवान मनके बलिदान व्यर्थ नइ जाय। माओवादी मनके खात्मा बर अभियान जारी रइही। ओमन किहीन कि हिंसा अउ आतंक ल सहन नइ करे जाही। राज्य सरकार बस्तर संभाग म सांति स्थापित करे बर पूरा तरह ले प्रतिबध्द हे।
ए मउका म उपमुख्यमंत्री अउ गृह मंत्री विजय शर्मा, वन मंत्री केदार कश्यप, बस्तर सांसद महेश कश्यप, डीजीपी अशोक जुनेजा, एडीजीपी विवेकानंद सिन्हा, बस्तर कमिश्नर डोमन सिंह, बस्तर रेंज के आईजी सुंदरराज पी. समेत पुलिस के बड़का अधिकारी घलो मौजूद रिहीन।
एखर बाद मुख्यमंत्री, उपमुख्यमंत्री अउ वन मंत्री ह सहीद जवान बामन सोढ़ी के पार्थिव सरीर ल कंधा देके उंखर गृहग्राम बर रवाना करीन। संगेसंग आने जवान अउ ड्राइवर के पार्थिव सरीर ल घलो उंखर गृहग्राम भेजे गीस।
खबर के मुताबिक काली बीजापुर जिला के कुटरू क्षेत्र म माओवादी मन कोति करे गे आईईडी ब्लास्ट के चपेट म आय ले डीआरजी के आठ जवान समेत एक झिन ड्राइवर के मउत होगे रिहीस।
बीजापुर घटना-निरीक्षण
इही बीच, बीजापुर जिला म काली माओवादी मन डहार ले करे गे हमला के बाद पुलिस अउ सीआरपीएफ के अधिकारी मन ह घटनास्थल के जांच करीन। डीजीपी अशोक जुनेजा अउ केंद्रीय रिजर्व पुलिस बल-सीआरपीएफ के डीजीपी वितुल कुमार ग्राम अंबेली पहुंचिन अउ घटना के जानकारी लेवत हर पहलू के बारीकी ले जांच करीन। ए दउरान उंखर संग सीआरपीएफ के डीआईजी, बस्तर रेंज के आईजी सुरंदरराज पी., डीआईजी कमलोचन कश्यप, बीजापुर अउ दंतेवाड़ा के पुलिस अधीक्षक समेत बड़का अधिकारी मौजूद रिहीन।
खबर के मुताबिक काली बीजापुर जिला के कुटरू क्षेत्र म माओवादी डहार करे गे आईईडी ब्लास्ट के चपेट म आय ले डीआरजी के आठ जवान समेत एक झिन ड्राइवर के मउत होगे रिहीस।
स्वास्थ्य मंत्री-एचएमपीवी वायरस
केंद्रीय स्वास्थ्य मंत्री जगत प्रकाश नड्डा ह किहीन हे क एचएमपीवी नवा वायरस नोहय अउ एला लेके चिंता करे के कोनो जरूरत नइ हे। स्वास्थ्य मंत्री ह सोसल मीडिया म दे वीडियो संदेस म किहीन कि एचएमपीवी वायरस के पहिचान सबले पहिली बछर दू हजार एक म करे गे रिहीस हे, अउ ए ह कतकोन बछर ले विश्व म फैलत हे। ओमन किहीन कि एचएमपीवी हवा के माध्यम ले, सांस के जरिया ले फैलत हे अउ जम्मो आयु वरग के मनखे मन ल प्रभावित कर सकत हे। श्री नड्डा ह यहू घलो बतइन कि देस के स्वास्थ्य प्रणाली अउ निगरानी नेटवर्क सतर्क हे अउ स्वास्थ्य संबंधी कोनो भी चुनौती ल तुरते निपटे के तियारी सुनिश्चित करे जावत हे।
मुख्यमंत्री-राजिम दौरा
मुख्यमंत्री विष्णुदेव साय ह आज राजिम म आयोजित भक्त माता राजिम जयंती समारोह म सामिल होइन। ए बेरा ओमन राजिम त्रिवेणी संगम म माता राजिम के भव्य कांसा के मूर्ति के स्थापना बर पांच करोड़ रूपिया देय के घोसना करीन।
मुख्यमंत्री-महासमुंद
मुख्यमंत्री विष्णुदेव साय ह काली महासमुंद जिला म दू सौ सत्रह करोड़ रूपिया के चार सौ उन्नीस विकास काम के लोकार्पण अउ भूमिपूजन करीन। कारीकरम म मुख्यमंत्री ह दू सौ इकहत्तर हितग्राही मन ल करीबन सवा करोड़ रूपिया के समान बांटिन। कारीकरम ल संबोधित करत मुख्यमंत्री ह किहिन हे कि हालेच म केंद्र सरकार ह सड़क अउ हवाई कनेक्टिविटी के संगेसंग कई ठिन रेल परियोजना मन ल मंजूरी दीन हे। ओमन किहीन हे कि महासमुंद जिला म पर्यटन के बड़ संभावना हे। प्राचीन नगरी सिरपुर अउ गंधेश्वरनाथ महादेव के ख्याति पूरा देस म हे। लक्षण मंदिर ल विश्व धरोहर के सूची म सामिल करे के दिसा म सरकार तेजी ले कोसिस करत हे। इको पर्यटन के क्षेत्र म कोडार जलासय ल विकसित करे जावत हे। श्री साय ह किहीन कि निक्षय निरामय छत्तीसगढ़ योजना के तहत जिला के दू सौ बयानवे ग्राम पंचायत मन ल टीबी मुक्त करके महासमुंद ह छत्तीसगढ़ म पहिली स्थान पाय हे।
राजभवन-स्थापना दिवस
‘‘एक भारत-श्रेष्ठ भारत‘‘ कारीकरम के तहत रायपुर स्थित राजभवन म आज कर्नाटक, तमिलनाडु, दिल्ली, झारखंड, उत्तराखंड, जम्मू-कश्मीर अउ लद्दाख राज्य मनके स्थापना दिवस मनाय गीस। ए मउका म राज्यपाल रमेन डेका ह किहीन कि ए कारीकरम के उद्देस्य आने-आने राज्य मनके भाषा, संस्कृति, परंपरा अउ प्रथा मनके ज्ञान के आदान-प्रदान करना हे, जेखर ले भारत के एकता अउ अखंडता मजबूत होही। ओमन किहीन कि ए राज्य मनके स्थापना दिवस, सिरिफ उंखर विकास के यात्रा के उत्सव नोहय, बल्कि भारत के विविधता अउ एकता के प्रतीक हरय। कारीकरम म उपस्थित ए राज्य मनके लइका अउ युवा मन ह अपन-अपन राज्य के संस्कृति अउ लोक परंपरा उपर आधारित सांस्कृतिक कारीकरम के प्रस्तुति दीन।
अग्निवीर भर्ती
भारतीय वायु सेना म अग्निवीर भर्ती बर ऑनलाइन आवेदन प्रक्रिया आज ले सुरू होगे हे। उम्मीदवार मन ह सत्ताईस जनवरी तक पंजीयन करा सकत हे। अग्निवीर बर जनरल ड्यूटी, टेक्निकल, ऑफिस असिस्टेंट ट्रेड म महिला सैन्य पुलिस के पद म भर्ती करे जाही। अग्निवीर भर्ती म सामिल होय खातिर अउ उम्मीदवार मन ल गणित, भौतिक अउ अंग्रेजी बिसय म बारहवीं या फेर तीन बछर डिप्लोमा म पचास प्रतिसत अंक के संग पास होना जरूरी हे। उम्मीदवार मन ह अपन ऑनलाइन रजिस्ट्रेसन ल वेबसाइट अग्निपथ वायु डॉट सीडैक डॉट इन म कर सकत हे।
आईईडी-बरामद
सुकमा जिला म आज सुरक्षा बल मन ह दस किलो के आईईडी बरामद करे हे। माओवादी ह ए आईईडी ल जवान मन ल नुकसान पहुंचाय के उद्देस्य ले कोन्टा-गोलापल्ली रद्दा म लगाय रिहीस हे। जिला के पुलिस अधीक्षक किरण चव्हाण ह बतइन कि बम निरोधक दस्ता के टीम ह मउकच म ही आईईडी ल निष्क्रिय कर दीन।
पत्रकार हत्या-ठेकेदार पंजीयन
बीजापुर जिला म पत्रकार मुकेश चंद्राकर के हत्या के मामला म आरोपी सुरेश चंद्राकर के ठेकेदारी के रजिस्ट्रेसन ल तुरते प्रभाव ले निलंबित कर दे गेहे। लोक निर्माण विभाग के प्रमुख अभियंता ह ए आदेस जारी करे हे। आरोपी सुरेश चंद्राकर लोक निर्माण विभाग म ‘अ वर्ग‘ के ठेकेदार रिहीस।