बीजापुर जिला म आज मंझनिया माओवादी मन ह सुरक्षा बल के एक ठन वाहन गाड़ी ल बारूदी बिस्फोट ले उड़ा दीन। ए घटना म वाहन म सवार आठ झन जवान के संगेसंग एक झन ड्राइवर के मउत होगे। उहें, एक झन जवान ल लापता बताय जात हे।
डीआईजी कमलोचन कश्यप ह बतइन कि दंतेवाड़ा नारायणपुर अउ बीजापुर के संयुक्त टीम ह सर्चिंग करके वापस लहुटत रिहीन, उही समय आज मंझनिया बीजापुर के कुटरू थाना क्षेत्र के अम्बेली गांव के तीर माओवादी मन डहार ले बारूदी बिस्फोट करके सुरक्षा बल के गाड़ी ल उड़ा दीन। ए घटना म आठ झन जवान के संगेसंग एक झन ड्राइवर के मउत होगे। उहें, एक झन जवान ल लापता बताय जात हे, जेखर खोजबीन करे जात हे। उहें, अतिरिक्त पुलिस टीम ल घटना स्थल कोति रवाना करे गेहे।
राज्यपाल रमेन डेका अउ मुख्यमंत्री विष्णुदेव साय ह ए घटना म दुख जतइन हे। ओमन किहीन कि मोर संवेदना ह सहीद के परिवार वाले मन संग हे। श्री साय ह किहीन कि बस्तर म चलत नक्सली अभियान के सेति नक्सली मन ह हतास होगे हे, जेखर ले अइसन घटना करत हे। ओमन किहीन कि जवान मनके सहादत ह अविरथा नइ जाय। नक्सलवाद के खात्मा करे खातिर ए लड़ाई ल अउ तेज करे जाही।
नारायणपुर-मुठभेड़ अपटेड
उहें, नारायणपुर जिला के अबूझमाड़ इलाका म काली होय मुठभेड़ म माओवादी मन के संख्या बाढ़के पांच होगे हे। सुरक्षा बल के टीम डहार ले घटनास्थल के तलासी के दउरान एक झन अउ माओवादी के लास ल बरामद करे गीस। ए मुठभेड़ म दू झन महिला अउ पांच झिन माओवादी मन के लास ल बरामद करे गेहे। घटना के जघा ले कई ठन हथियार घलो बरामद करे गीस।
महापौर/अध्यक्ष-आरक्षण प्रक्रिया
नगरीय निकाय मन म आम चुनाव बर नगर निगम मन म महापौर अउ नगर पालिका के संगेसंग नगर पंचायत मन म अध्यक्ष पद खातिर आरक्षण के काम ल काली सात जनवरी के रईपुर म करे जाही। ए काम ल साईंस कॉलेज मैदान म बने पंडित दीनदयाल उपाध्याय ऑडिटोरियम म काली बिहनिया साढ़े दस बजे ले सुरू करे जाही।
नगरीय प्रशासन विभाग डहार ले प्रदेस म होवइया नगरीय निकाय के आम चुनाव खातिर छत्तीसगढ़ नगर पालिका नियम के प्रावधान के तहत नगर पालिक निगम के महापौर, नगर पालिका परिषद अउ नगर पंचायत के अध्यक्ष के पद के आरक्षण ल घलो करे जाही।
खबर के मुताबिक नगरीय प्रशासन अउ विकास विभाग डहार ले पहिली एला सत्ताईस दिसंबर दू हजार चौबीस के दिन ल तय करे गे रिहीस।
मुख्यमंत्री-लोकार्पण
मुख्यमंत्री विष्णुदेव साय ह आज जांजगीर-चांपा जिला के खोखरा भांठा म बनाय गे खेल स्टेडियम के सुभारंभ करीन। ए मउका म ओमन किहीन कि खेल स्टेडियम म खिलाड़ी मन ल एके संघरा एके जघा म क्रिकेट, फुटबॉल, रनिंग ट्रेक, स्केटिंग, बास्केट बॉल, वॉलबॉल जइसन खेल खेले बर बहुत बढ़िया स्टेडियम बनाय गेहे।
उहें, एक ठन अउ दिगर कारीकरम म मुख्यमंत्री ह जांजगीर-चांपा जिला के कलेक्टर भवन म राष्ट्रपिता महात्मा गांधी के मूर्ति के अनावरण करीन।
उहें, मुख्यमंत्री ह आज जांजगीर-चांपा जिला के लइका, सोसल मीडिया, क्रिकेट अउ गायक मन ल अपन प्रतिभा ल आगू लाय खातिर जिला मुख्यालय के कचहरी चौक के सी-मार्ट परिसर म हाईटेक स्टूडियो के सुरूआत करीन।
पत्रकार हत्या-आरोपी गिरफ्तार
बीजापुर म पत्रकार मुकेश चंद्रकार के हत्या के आरोप म फरार आरोपी सुरेश चंद्रकार ल आज पुलिस के टीम ह हैदराबाद ले गिरफ्तार कर लीन। ए घटना के बाद ले आरोपी सुरेश चंद्रकार ह भाग गे रिहीन। जेखर खोजबीन बीजापुर पुलिस के टीम डहार ले करे जात रिहीस। पुलिस के टीम ह हैदराबाद ले छापामार कार्रवाई करत रतिहा सुरेश चंद्रकार ल गिरफ्तार कर लीन। पुलिस के टीम ह आरोपी ले घटना के संबंध म पूछताछ करत हे। पुलिस के टीम ह ठेकादार के भाई के संगेसंग तीन झन लोगन मन ल घलो गिरफ्तार करे हे।
खबर के मुताबिक बीजापुर के पत्रकार मुकेश चंद्रकार पाछू एक जनवरी के लापता रिहीन। तीन जनवरी के पुलिस के टीम ह उंखर लास ल ठेकादार सुरेश चंद्रकार के घर म बने सेप्टिक टैंक ले बरामद करीन।
राष्ट्रपति-दिव्या निषाद सम्मानित
राजनांदगांव जिला के कुसमी गांव के लखपति दीदी दिव्या निषाद ल छब्बीस जनवरी के दिन गणतंत्र दिवस के मउका म राष्ट्रपति भवन नई दिल्ली म राखे गे एट होम रिसेप्सन म सामिल करे जाही। ए दउरान राष्ट्रपति द्रौपदी मुर्मू ह दिव्या निषाद ल सम्मानित करही। दिव्या निषाद ह राष्ट्रीय आजीविका मिसन बिहान ले जुड़के अपन सफलता के कहानी गढ़े हे। ओमन बतइन कि उखर परिवार के आर्थिक स्थिति ठीक नइ रिहीस हे अउ कोरोना काल म उखर गोसइया ह सरग सिधार गेहे। अइसन विपत्ति के समय म ओमन बिहान ले जुड़के काम करीन अउ समूह ले कर्जा लेके एक छोटे से किराना दुकान सुरूआत करीन। ओमन बतइन कि उंखर अभी सलाना आय ह चार लाख रूपिया ले जादा के हवय।
‘‘देश का प्रकृति परीक्षण‘‘
‘‘देश का प्रकृति परीक्षण‘‘ अभियान के तहत राज्य म चार लाख पैंतालिस हजार ले जादा मनखे मन ल ऑनलाइन प्रकृति परीक्षण करे गेहे। केंद्र सरकार के आयुष मंत्रालय डहार ले करे गे ए परीक्षण म छत्तीसगढ़ ह बिहार, ओडिसा, आंध्रप्रदेस, उत्तराखंड जइसन राज्य मन ले बढ़िया प्रदर्सन करे हे। अभियान के तहत राज्यपाल, मुख्यमंत्री, विधानसभा अध्यक्ष, स्वास्थ्य एंव परिवार कल्याण मंत्री के संगेसंग कई झन जनप्रतिनिधि मन ह परीक्षण कराय हे।
खबर के मुताबिक प्रधानमंत्री नरेंद्र मोदी ह उनतीस अक्टूबर दू हजार चौबीस के राष्ट्रीय दिवस के मउका म ए अभियान के सुरूआत करे रिहीन।
अग्निवीर भर्ती
भारतीय वायु सेना म अग्निवीर भर्ती बर ऑनलाइन आवेदन काली सात जनवरी ले सुरू करे जाही। उम्मीदवार मन ह सत्ताईस जनवरी तक पंजीयन करा सकत हे। अग्निवीर बर जनरल ड्यूटी, टेक्निकल, ऑफिस असिस्टेंट ट्रेड म महिला सैन्य पुलिस के पद म भर्ती करे जाही। अग्निवीर भर्ती म सामिल होय खातिर अउ उम्मीदवार मन ल गणित, भौतिक अउ अंग्रेजी बिसय म बारहवीं या तीन वर्षीय डिप्लोमा म पचास प्रतिसत अंक के साथ पास होना जरूरी हे। उम्मीदवार मन ह अपन ऑनलाइन रजिस्ट्रेसन ल वेबसाइट अग्निपथ वायु डॉट सीडैक डॉट इन म कर सकत हे।
अउ अब मौसम के हाल….