छत्तीसगढ़ म आज सुरक्षाबल के संग मुठभेड़ म चार झन माओवादी मारे गिन। ए मुठभेड़ म एक झन सुरक्षाकर्मी घलो सहीद हो गिस।
नारायणपुर जिला के दक्षिण अबूझमाड़ इलाका म माओवादी मनके ठउर के खुफिया जानकारी मिले के बाद एसटीएफ अउ डीआरजी के दल ह तलासी अभियान म निकले रिहीस हे। इही बेरा संझाकुन सुरक्षाबल मनके नक्सली मन ले मुठभेड़ हो गिस। ए मुठभेड़ ह रातभर रूक-रूक के चलत रिहीस। उहें, सुरक्षाबल मन मारे गेय माओवादी मनके सव ल बरामद कर लिन हें। मउका ले अब्बड़ अकन हथियार अउ गोला-बारूद घलो बरामद होइस।
सुनइया मन ल बतादन कि मुठभेड़ म सहीद प्रधान आरक्षक सन्नू कारम ल दंतेवाड़ा के पुलिस लाइन कारली म सलामी दे गिस।
मुख्यमंत्री विष्णुदेव साय ह सोक जतावत किहीन कि सहीद जवान के बलिदान बेकार नइ जाही। मुख्यमंत्री ह किहीन कि नक्सलवाद के खिलाफ सुरक्षा बल के जवान मन मजबूती ले लड़ाई लड़त हें, अउ नक्सलवाद के खात्मा तक ए लड़ाई जारी रइही।
ऐति, बीजापुर जिला म सुरक्षाबल मन दू किलो के दू ठन बम बरामद करिन। जेला बम निरोधक दस्ता ह मउका म ही नष्ट कर दीस। बतादन कि सीआरपीएफ के जवान मन तलासी अभियान म निकले रिहीन। इही बेरा आवापल्ली-अउ बासागुड़ा रद्दा म मुरदंडा के तिर बम मिले रिहीस।
मुख्यमंत्री-पत्रकार हत्या
मुख्यमंत्री विष्णुदेव साय ह बीजापुर के पत्रकार मुकेश चंद्राकर के हत्या उपर दुख जतइन हें। ओमन मीडिया ले गोठबात करत किहीन कि ए घटना के जांच बर राज्य सरकार के डहार ले एसआईटी के गठन करे गिस हे। घटना के तीन झन अपराधी पकड़े गिन हें।
मुख्यमंत्री ह किहीन कि कोनो घलो दोषी ल बख्से नइ जाही। ठेकादार के सबो बैंक खाता ल सील कर दे गेहे अउ ओखर अवैध कब्जा ल घलो हटाय गिस।
मुख्यमंत्री-लोकार्पण
मुख्यमंत्री विष्णुदेव साय ह आज गरियाबंद जिला ल करोड़ो रूपिया के सौगात देइन हें। मुख्यमंत्री ह जिला म तीन सौ अड़तीस करोड़ रूपिया के एक सौ तिरानबे बिकास कारज के लोकार्पण अउ भूमिपूजन करिन। ए मउका म मुख्यमंत्री ह गरियाबंद म देवभोग-झाखरपारा रद्दा म पुलिया निर्माण के घोसना करिन हें। ओमन किहीन कि पुलिया निर्माण ले तिर-तखार के गांव के लोगन मन ल आय-जाय म सुविधा मिलही।
कारीकरम ल संबोधित करत मुख्यमंत्री ह किहीन कि केंद्र सरकार के डहार ले अब तक प्रदेस म आठ लाख छियालिस हजार प्रधानमंत्री आवास स्वीकृत करे गेहे। झटकुन प्रदेस ल उपराहा साढे़ तीन लाख आवास के स्वीकृति घलो मिलही। राज्य सरकार के उदिम ले हर जरूरतमंद परिवार के अपन घर के सपना साकार होही।
भाजपा-जिलाध्यक्ष
भारतीय जनता पार्टी के प्रदेस इकाई ह आज पंद्रह जिलाध्यक्ष मनके नांव के घोसना कर देहे। जारी के सूची के अनुसार रमेश ठाकुर ल रइपुर सहर अउ श्याम नारंग ल रइपुर ग्रामीण के जिलाध्यक्ष बनाय गेहे। उहें, महेश जैन ल कांकेर, पुरूषोत्तम देवांगन ल भिलाई, सुरेन्द्र कौशिक ल दुरूग, घासीराम नाग ल बीजापुर, लालजी यादव ल गौरेला-पेण्ड्रा अउ चेमन देशमुख ल बालोद के जिलाध्यक्ष नियुक्त करे गेहे। एखर संगेसंग मुरलीधर सोनी ल सूरजपुर, दीनानाथ केशरवानी ल मुंगेली, अरूणधर दीवान ल रायगढ़, ओमप्रकाश जायसवाल ल बलरामपुर, भरत सिंह ल जशपुर, नम्रता िंसंह ल मोहला-मानपुर अउ मनोज शर्मा ल कोरबा के जिलाध्यक्ष बनाय गिस हे।
डिजिटल-डेटा संरक्षण नियम
उच्च न्यायालय-प्रतिनियुक्ति
छत्तीसगढ़ उच्च न्यायालय ह एक ठन याचिका उपर सुनवाई करत किहीन कि प्रतिनियुक्ति आदेस जारी करे ले पहिली कर्मचारी के सहमति लेना जरूरी हे। उच्च न्यायालय ह किहीन कि बिना सहमति के कोनो घलो आदेस अधिरोपित नइ करे जा सकय। न्यायाधीस एके प्रसाद के सिंगल बेंच ह राज्य सरकार के दू ठन आदेस उपर घलो रोक लगा देहे। कोर्ट ह राज्य सरकार ल चार हफ्ता के भीतर जवाब पेस करे बर केहे हे। अब ए मामला के सुनवाई दस फरवरी के होही।
बतादन कि कुम्हारी नगर पालिका म सीएमओ के पद म पदस्थ एनआर चंद्राकर ह याचिका दायर करके तबादला आदेस ल चुनौती दे रिहीस। याचिकाकर्ता ह नगरपालिका अधिनियम म देय गेय प्रावधान सोरियायिन कि सहायक उपनिरीक्षक ल सीएमओ के पद नइ देय जा सकय। सहायक उपनिरीक्षक के पद सब आर्डिनेट करमचारी हे। राज्य सरकार ह नियम के उल्टा पदस्थापना कर देहे।
मंत्री-लोकार्पण
ऐति, राजस्व मंत्री टंकराम वर्मा ह आज नगर पालिका परिषद तिल्दा- नेवरा म छै सौ पंद्रह लाख रूपिया ले जादा के बिकास कारज के भूमिपूजन करिन। संगे एक सौ दू लाख रूपिया ले जादा के बिकास कारज के लोकार्पण घलो करिन।
उहें, आदिम जाति कल्याण मंत्री रामविचार नेताम ह बलरामपुर विकासखंड ग्राम पंचायत डौरा म सात करोड़ अस्सी लाख रूपिया ले जादा के आने-आने विकास कारज के भूमिपूजन करिन।
शिक्षक-बर्खास्त
स्कूल शिक्षा विभाग ह अब्बड़ दिन ले गैर-हाजिर रहे के सेति जशपुर जिला के दू झन गुरूजी संगे चार झन करमचारी मन ल बर्खास्त कर देहे। कलेक्टर रोहित व्यास के निरदेस उपर जिला शिक्षा अधिकारी ह बर्खास्त के आदेस जारी करिन हें।
बतादन कि जउन गुरूजी अउ करमचारी मन उपर कारवाही करे गेहे, एमा शासकीय प्राथमिक साला गरांज म पदस्थ सहायक शिक्षक भागन राम अउ बिजाघाट के सहायक शिक्षक राजू राम के संगे शासकीय उच्चत्तर माध्यमिक विद्यालय कुरडेग के सहायक ग्रेड-तीन आलोक कुमार भगत अउ शासकीय पूर्व माध्यमिक विद्यालय ढोढर अम्बा के भृत्य प्रमोद मिंज सामिल हें।
अउ अब थोरकुन समाचार सार म –
– जांजगीर-चांपा जिला के पुछेली गांव के तिर एक ठन गाड़ी ह फटफटी सवार दू झन मनखे ल टक्कर मार दीस। ए हादसा म एक झन के मउका म ही मउत होगिस। उहें, एक झन आने युवक ह घलो अस्पताल जावत बेरा दम तोड़ दीस।
– सक्ती जिला के बाराद्वार इलाका के रिस्दा पेट्रोल पंप के तिर अज्ञात गाड़ी के चपेट म आय ले फटफटी सवार एक मनखे के मउत होगिस। इही जिला के दुरपा मोड़ के तिर एक ठन गाड़ी डगमगा के पलटे ले सात लोगन घायल होगिन, जेमा गंभीर रूप ले घायल चार झन ल बिलासपुर भेजे गिस हे।
अउ
– रायगढ़ जिला के कोतवाली थाना इलाका के ढिमरापुर रद्दा म आज बिहनिया एक ठन होटल म आग लग गिस। सूचना मिलतेच दमकल के टीम ह मउका म पहुंचके आगी ल बुथाइस।