बीजापुर के पत्रकार मुकेश चंद्रकार के हत्या के मामला म पुलिस ह तीन झन आरोपी ल गिरफ्तार करे हे। गिरफ्तार आरोपी मन म रितेश चंद्रकार, दिनेश चंद्राकर अउ महेन्द्र रामटेके सामिल हे। ए मामला म सुरेश चंद्रकार ल मुख्य आरोपी बनाय गेहे।
उपमुख्यमंत्री अउ गृहमंत्री विजय शर्मा ह आज रईपुर म आयोजित एक ठन पत्रकारवार्ता म बतइन कि ए घटना के जांच बर अतिरिक्त पुलिस अधीक्षक मयंक गुर्जर के नेतृत्व म ग्यारह सदस्यीय एसआईटी के टीम गठित करे गेहे।
ओति, बीजापुर म आज पत्रकार मन ले बातचीत करत हुए बस्तर आईजी सुंदरराज पी. ह बतइन कि ए हत्याकांड म ठेकेदार सुरेश चंद्रकार ल मुख्य आरोपी बनाय गेहे। सुरेश चंद्रकार के बाड़ा म ही हत्या के घटना ल अंजाम दे गीस। ए घटना म रितेश चंद्रकार अउ सुपरवाइजर महेन्द्र रामटेके सीधा सामिल रहिन। दूनो झन मिलके मुकेश चंद्रकार उपर प्राण घातक हमला करीन। जबकि सुरेश चंद्रकार ह साक्ष्य मिटाय के काम करे हे। आईजी ह बतइन कि रितेश ल दिल्ली ल गिरफ्तार करे गेहे। ओमन बतइन कि सुरेश चंद्रकार के संपत्ति जब्त कर ले गेहे। अभी तीन ठिन बैंक खाता सील करे गेहे। ओमन बतइन कि पुलिस तीन ले चार हफ्ता के भीतर कोर्ट म चालान पेस कर देहे। ओमन किहीन कि आरोपी मन ले पूछताछ के बाद ही घटना के कारण के खुलासा हो पाही।
इही बीच, मुकेश चंद्रकार के हत्या के विरोध म बीजापुर नगर आज पूर्णता बंद रिहीस। उहें, पत्रकार मन राष्ट्रीय राजमार्ग म चक्काजाम कर विरोध प्रदर्सन करीन अउ आरोपी मन के खिलाफ सख्त कार्रवाई करे के मांग करीन।
बीजापुर जिला प्रशासन ह त्वरित कार्रवाई करत हुए आरोपी मनके अवैध निर्माण उपर बुलडोजर चला देहे।
पत्रकार-हत्याकांड-02
ऐति, मुकेश चंद्रकार के हत्या विरोध म राजधानी रायपुर समेत प्रदेसभर म पत्रकार मन ह धरना प्रदर्सन करीन अउ आरोपी मन के खिलाफ सख्त कार्रवाई करे के मांग करीन।
गौरतलब हे कि पुलिस ह काली देर संझा पाछू तीन दिन ले लापता बीजापुर के पत्रकार मुकेश चंद्रकार के शव बरामद करीस। शव ठेकेदार सुरेश चंद्रकार के बैडमिंटन कोर्ट के तीर बने टैंक ले मिलीस।
प्रधानमंत्री-ग्रामीण भारत महोत्सव
प्रधानमंत्री नरेंद्र मोदी ह गांव मन ल विकास अउ अवसर मनके जीवंत केंद्र म बदल के ग्रामीण भारत ल सशक्त बनाय के सरकार के दृष्टिकोण उपर बल देहे। श्री मोदी ह नई दिल्ली के भारत मंडपम म ग्रामीण भारत महोत्सव के उद्घाटन समारोह के दौरान किहीन कि गांव के लोगन मन ल सशक्त बनाना उंखर सरकार के प्राथमिकता आय।
ग्रामीण भारत महोत्सव नौ जनवरी तक चलही। एखर विषय हे- विकसित भारत- दू हजार सैंतालिस के लिए आत्मनिर्भर ग्रामीण भारत का निर्माण और सिध्दांत-गांव बढ़े तो देश बढ़े हैं।
राज्यपाल-स्वास्थ्य शिविर
महतारी वंदन योजना-किस्त
राज्य सरकार महतारी वंदन योजना के ग्यारहवां किस्त के रासि जारी कर देहे। एखर तहत प्रदेस के पात्र सत्तर लाख महिला मन ल एक-एक हजार रूपिया के सहायता रासि उंखर बैंक खाता म अंतरित करे गेहे। ए योजना म पाछू बछर मार्च ले लेके अब तक हितग्राही महिला मन ल ग्यारह मासिक किस्त म करीब सात हजार एक सौ बियासी करोड़ रूपिया के आर्थिक सहायता दे जा चुके हे।
मुख्यमंत्री-आबकारी समीक्षा बैठक
मुख्यमंत्री विष्णुदेव साय ह आबकारी विभाग के अधिकारी मन ल प्रदेस म अवैध सराब के विनिर्माण, धारण, परिवहन अउ विक्रय उपर प्रभावी नियंत्रण बर पुलिस विभाग के समन्वय ल कड़ी कार्रवाई करे के निरदेस देहे। ओमन किहीन कि राज्य के सीमावर्ती इलाका मन म स्थापित आबकारी चेकपोस्ट ल क्रियासील राखंय। राज्य म स्थित बॉटलिंग इकाइयां, होटल, बार अउ क्लब के नियमित जांच सुनिश्चित करे जाय। श्री साय ह काली मंत्रालय म आबकारी विभाग के काम मनके समीक्षा बइठका म ए निरदेस दीन।
मुख्यमंत्री ह किहीन राज्य म देसी सराब के नवा बॉटलिंग इकाई बर मिले आवेदन मन उपर नियमानुसार जल्द-जल्द से कार्रवाई करे जाय अउ छत्तीसगढ़ ले बाहिर निर्मित सराब के विनिर्माण इकाई मन ल छत्तीसगढ़ म स्वयं के विनिर्माण सयंत्र लगाय बर प्रोत्साहित करे जाय, ताकि स्थानीय लोगन मन ल रोजगार मिल सकय। श्री साय ह आबकारी विभाग के रिक्त पद म भर्ती कार्रवाई सीघ्र करे के निरदेस दीन। ओमन महुआ संग्राहक वनवासी मन ल आय के बेहतर साधन उपलब्ध कराय के उद्देस्य ले दूसर राज्य मन म प्रचलित महुआ नीति के अध्ययन करे बर घलो किहीन।
भूमि रिकॉर्ड-डिजिटलीकरण
राज्य सरकार डहार ले ग्रामीण अउ सहरी क्षेत्र मन म भूमि अभिलेख मन के डिजीटलीकरण अउ आधुनिकीकरण बर करे गे प्रयास मनके केंद्र सरकार ह सराहना करे हे। केंद्र सरकार ह एखर सकारात्मक प्रभाव ल देखत हुए राज्य सरकार ल दू सौ पच्चीस करोड़ रूपिया के प्रोत्साहन रासि प्रदान करे हे। एमा भूमि रजिस्ट्री प्रक्रिया ल ऑनलाइन करे अउ एला भूमि रिकॉर्ड ले जोड़े बर एक सौ पचास करोड़ रूपिया अउ विरासत रजिस्ट्री ल डिजीटल कर आम जनता बर सर्च उपलब्ध कराय पचहत्तर करोड़ रूपिया सामिल हे।
मुख्यमंत्री विष्णुदेव साय ह किहीन हे कि केंद्र सरकार डहार ले देगे ए रासि ले डिजीटलीकरण के प्रयास म तेजी आही, जेखर ले आम नागरिक मन ल सरकारी योजना अउ सेवा मन के लाभ सुगमता ले मिल सकही।
साइबर जागरूकता अभियान
ऑनलाइन ठगी के बाढ़त घटना अउ साइबर अपराध के खिलाफ छत्तीसगढ़ सिख समाज डहार काली रायपुर के खालसा स्कूल म ‘‘साइबर क्राइम जागरूकता अभियान‘‘ सुरू करे गीस। पुलिस के सहयोग ले आयोजित ए अभियान के तहत साइबर विशेषज्ञ महेन्द्र सिंह राजपूत ह साइबर अपराध ले बांचे के उपाय के बारे म जानकारी दीन। उहें, कुमारी सेजल मक्कड़ ह स्कूली छात्र-छात्रा मन ल मोबाइल के जरिया, होवइया साइबर अपराध के जानकारी दीन। संगेसंग अइसन अपराध ले बांचे के उपाय बतइन।
दुर्घटना
कोरबा जिला म होय एक ठन सड़क दुर्घटना म एसईसीएल के दू झन कर्मचारी मनके मउत होगे। मिले जानकारी के अनुसार बांगो थाना क्षेत्र के मदनपुर घाटी करा एक ठन कार अनियंत्रित होके सड़क ले पचीस फीट नीचे खाई म जा गिरिस। कार पूरी तरह ले क्षतिग्रस्त होगे हे। ए हादसा म कार सवार दू झन के मउका म ही मउत होगे। उहें, दू झन गंभीर रूप ले घायल होगे हे, जेन ल अस्पताल म भर्ती कराय गेहे।
अरूण साव-लोकार्पण/भूमिपूजन
उपमुख्यमंत्री, नगरीय निकाय प्रशासन अउ विकास मंत्री अरूण साव ह काली मुंगेली म छत्तीस करोड़ रूपिया ले जादा के विकास काम मन के लोकार्पण अउ भूमिपूजन करीन। ए दउरान ओमन मुंगेली सहर बर पच्चीस करोड़ रूपिया ले जादा के नवा विकास काम मनके घोसना करीन। एखर तहत मुंगेली म छह करोड़ बीस लाख रूपिया के लागत ले हाईटेक बस स्टैंड अउ चार करोड़ इकतालिस लाख रूपिया के लागत ले नालंदा परिसर के निर्माण करे जाही।
डिजिटल-डेटा संरक्षण नियम
केंद्र सरकार ह डिजिटल वैयक्तिक डेटा संरक्षण नियम-दू हजार पच्चीस के मसौदा जारी कर देहे। मसौदा नियम म लइका मनके सोसल मीडिया अकाउंट खोले बर अभिभावक मन के अनिवार्य अउ प्रमाणित सहमति लेके प्रावधान करे गेहे। इलेक्ट्रानिकी अउ सूचना प्रौद्योगिकी मंत्री अश्विनी वैष्णव ह सोशल मीडिया पोस्ट म किहीन कि मसौदा नियम, परामर्स बर खुले हे। ओमन लोगन मन ले अपन बिचार व्यक्त करे ल घलो किहीन। डिजिटल वैयक्तिक डेटा संरक्षण अधिनियम-दू हजार तेईस ल राष्ट्रपति द्रौपदी मुर्मु ह अगस्त दू हजार तेईस म मंजूरी दे रिहीन।
हिदायतुल्लाह विवि-एमओयू
हिदायतुल्लाह नेशनल लॉ युनिवर्सिटी ह अभी हाल ही म टेक्सास ए. एंड. एम. यूनिवर्सिटी के स्कूल ऑफ लॉ के संग एमओयू करे हे। एमओयू उपर हिदायतुल्लाह नेशनल लॉ यूनवर्सिटी डहार ले डॉक्टर वी.सी. विवेकानंद अउ टेक्सास ए. एंड. एम. यूनिवर्सिटी डहार ले डॉक्टर हॉली हडसन ह हस्ताक्षर करीन। ए समझौता दूनो संस्थान मनके बीच एक व्यापक अकादमिक साझेदारी के सुरूआत हे, जेखर उद्देस्य फैकल्टी अउ छात्र आदान-प्रदान, संयुक्त शोध पहल अउ नवीन अकादमिक कारीकरम के विकास ल बढ़ावा देना हे।
– केंद्र सरकार ह डिजिटल वैयक्तिक डेटा संरक्षण नियम-दू हजार पच्चीस के मसौदा जारी कर देहे।
– उपमुख्यमंत्री, नगरीय निकाय प्रशासन अउ विकास मंत्री अरूण साव ह काली मुंगेली म छत्तीस करोड़ रूपिया ले जादा के विकास काम मन के लोकार्पण अउ भूमिपूजन करीन।
अउ
– हिदायतुल्लाह नेशनल लॉ युनिवर्सिटी ह अभी हाल ही म टेक्सास ए. एंड. एम. यूनिवर्सिटी के स्कूल ऑफ लॉ के संग एमओयू करे हे।