उहें, पंचानवे नगर पंचायत मन म घलो प्रशासक के नियुक्त करे जाही। इंहा तहसीलदार ल प्रशासक बनाय जाही।नगर-पालिका निलंबन
राज्य शासन ह दल्लीराजहरा नगर पालिका के मुख्य नगर पालिका अधिकारी भूपेन्द्र वार्डेकर ल निलंबित कर देहे। कोंडागांव नगर पालिका म प्रभारी मुख्य नगर पालिका अधिकारी के पदस्थापना के दउरान अध्यक्ष कक्ष के रिनोवेसन कार्य अउ फर्नीचर खरीदी म गंभीर अनियमितता पाय गे रिहीस। ए मामला ल गंभीर कदाचार मानत राज्य शासन ह ओमन ल तत्काल प्रभाव ले निलंबित कर देहे। निलंबन अवधि म श्री वार्डेकर के मुख्यालय नगरीय प्रशासन अउ विकास विभाग के क्षेत्रीय संयुक्त संचालक कार्यालय, जगदलपुर नियत करे गेहे।
राजिम-कुंभ कल्प
राजिम म बारह फरवरी ले छब्बीस फरवरी तक कुंभ कल्प के आयोजन करे जाही। मुख्यमंत्री विष्णुदेव साय ह आज मंत्रालय म पैरी, महानदी अउ सोंढूर नदी के संगम म होवइया राजिम कुंभ कल्प के तियारी के संबंध म उच्च स्तरीय समीक्षा बइठका लेके जरूरी निरदेस दीन। ओमन साही स्नान, गंगा आरती, संत समागम समेत कुंभ कल्प के प्रमुख आयोजन अउ श्रध्दालू मन बर सुविधा जनक व्यवस्था सुनिश्चित करे बर किहीन। मुख्यमंत्री ह बारह फरवरी के आयोजित होवइया मांघी पुन्नी स्नान, इक्कीस फरवरी के संत समागम अउ छब्बीस फरवरी के होवइया साही स्नान के तियारी उपर बिसेस धियान देबर किहीन।
केंद्रीय राज्यमंत्री-समीक्षा बैठक
केंद्रीय राज्यमंत्री तोखन साहू ह आज राष्ट्रीय शहरी मामला के संस्थान नेशनल इंस्टीट्यूट ऑफ अर्बन अफेयर्स के संग छत्तीसगढ़ बर आने-आने सहरी विकास परियोजना मनके समीक्षा करीन। बइठका म छत्तीसगढ़ म जारी परियोजना के अलावा अवइया सहरी विकास परियोजना के प्रगति अउ भविष्य के योजना उपर चर्चा करे गीस। चर्चा के दउरान प्रमुख परियोजना मन म सामिल अमृत परियोजना के तहत रईपुर अउ बेमेतरा म शैलो एक्विफर प्रबंधन के स्थिरता, सिटीस पहल के तहत बिलासपुर म ठोस कचरा प्रबंधन बर प्रस्ताव म घलो चर्चा होइस। बइठका म श्री साहू ह छत्तीसगढ़ के सहरी स्थानीय निकाय डहार ले राष्ट्रीय सहरी डिजिटल मिसन ल अपनाय उपर जोर दीन। एखर अलावा ‘‘मिशन क्लीन सिटी-अंबिकापुर‘‘ म छत्तीसगढ़ के प्रस्तुति ल राष्ट्रीय सहरी सम्मेलन म सराहे गीस।
माओवाद-मुठभेड़
गरियाबंद जिला म आज सुरक्षा बल अउ माओवादी मनके बीच होय मुठभेड़ म एक माओवादी मारे गेहे। उहें, कुछ माओवादी मनके घायल होय के घलो खबर हे।
पुलिस अधीक्षक निखिल रखेचा ह बतइन कि माओवादी मनके मौजूदगी के सूचना म गरियाबंद पुलिस, ओडिसा पुलिस अउ केंद्रीय रिजर्व पुलिस बल-सीआरपीएफ डहार ले संयुक्त रूप ले नक्सल आपरेसन चलाय गीस। इही दउरान इंदागांव थाना क्षेत्र के कांडेसर म सुरक्षा बल अउ माओवादी मनके बीच मुठभेड़ होइस। ए मुठभेड़ म सुरक्षा बल मन ह एक माओवादी मार गिराइन। घटना स्थल ले सुरक्षा बल मन ह मारे गे माओवादी के सव के संघरा हथियार अउ बिस्फोटक घलो बरामद करीन हे। घटना स्थल म सर्चिंग अभियान जारी हे।
ऐति, बीजापुर जिला म आज माओवादी मन डहार ले लगाय गे आईईडी के चपेट म आय ले तीन झिन जवान घायल होगे हे। मिले जानकारी के अनुसार डिस्ट्रिक्ट रिजर्व गार्ड-डीआरजी के टीम गस्त म निकले रिहीस। इही दउरान तोड़का करा माओवादी मन कोति ले लगाय गे आईईडी म बिस्फोट होय ले डीआरजी के तीन झिन जवान घायल होगे हे। जवान मनके हालत खतरा ले बाहिर बताय जात हे।
ईडी कवासी लखमा
सराब घोटाला मामला म छत्तीसगढ़ के पूर्व आबकारी मंत्री कवासी लखमा ले आज रईपुर म प्रवर्तन निदेशालय-ईडी ह पूछताछ करीस।
एखर पहिली, कवासी लखमा आज रईपुर स्थित प्रवर्तन निदेशालय के दफ्तर पहुंचिन। सराब घोटाला मामला म निदेशालय ल कवासी के खिलाफ सबूत मिले हे। प्रवर्तन निदेशालय के दावा हे कि कवासी लखमा अवैध सराब बिक्री उपर कमीशन लेत रिहीस। ए मामला म ओमन ल नोटिस देके पूछताछ बर बुलाय गे रिहीस।
बतादन कि पाछू शनिवार के ईडी के टीम ह कांटा विधायक कवासी लखमा अउ ओखर बेटा हरीश कवासी के घर दबिस दे रिहीस। ए दउरान ईडी ह सुकमा, कोंटा अउ रईपुर स्थित ओखर ठिकाना मन म छापा मारे रिहीस।
देवेन्द्र यादव-जमानत याचिका
बलौदाबाजार हिंसा मामला म जेल म बंद भिलाई विधायक देवेन्द्र यादव के जमानत याचिका ल छत्तीसगढ़ उच्च न्यायालय ह खारिज कर देहे। जमानत याचिका म सुनवाई के बाद सत्रह दिसंबर के हाईकोर्ट ह फइसला सुरक्षित रखे रिहीन।
बतादन कि पुलिस ह बलौदाबाजार हिंसा के मामला म भिलाई विधायक देवेन्द्र यादव ल आरोपी बनाय हे। विधायक देवेन्द्र यादव के जमानत याचिका निचली अदालत म खारिज होय के बाद ओमन हाईकोर्ट म जमानत बर अर्जी लगाय रिहीन।
ट्रेन-परिचालन
चक्रधरपुर अउ रांची रेलमंडल म आने-आने सेक्शन मन म अधोसंरचना काम ल लेके ब्लॉक करे जाही। एखर सेति दक्षिण पूर्व मध्य रेलवे ले जुड़े कुछेक गाड़ी मनके परिचालन प्रभावित रिही। चार ले सोलह जनवरी तक बिलासपुर-टाटानगर-बिलासपुर-एक्
इही बीच, रईपुर रेल मंडल के अंतर्गत भैंसबोर्ड समपार फाटक पांच जनवरी बिहनिया ग्यारा बजे ले आठ जनवरी के संझा छै बजे तक बंद रिही। जरूरी मरम्मत कार्य के सेति समपार फाटक ले वाहन मनके अवई-जवई बंद रइही।
गणतत्र दिवस एनसीसी शिविर
गणतंत्र दिवस सिविर- दू हजार पच्चीस म राष्ट्रीय कैडेट कोर-एनसीसी के देसभर के नौ सौ सत्रह बालिका कैडेट समेत दू हजार तीन सौ ले जादा कैडेट हिस्सा लिही। आज नई दिल्ली म आकाशवाणी ले बिसेस गोठबात करत एनसीसी के महानिदेसक लेफ्टिनेंट जनरल गुरबीर पाल सिंह ह किहीन कि एक महिना तक चलइया ए सिविर के औपचारिक उद्घाटन पांच जनवरी के उपराष्ट्रपति जगदीप धनखड़ करहीं। सिविर म भाग लेवइया कैडेट छब्बीस जनवरी के गणतंत्र दिवस परेड समेत कई ठिन गतिविधि म हिस्सा लिही। लेफ्टिनेंट जनरल सिंह ह बतइन कि सिविर के समापन सत्ताईस जनवरी के प्रधानमंत्री नरेंद्र मोदी के रैली के संग होही।
धान खरीदी
राज्य सरकार डहार ले प्रदेस के किसान मन ले ए दिन म धान के खरीदी करे जात हे। उहें, धान खरीदी व्यवस्था उपर वरिष्ठ अधिकारी मन डहार ले सरलग निगरानी राखे जात हे। राज्य म चौदह नवंबर ले सुरू होय धान खरीदी के सिलसिला सरलग जारी हे। अब तक लगभग तिरानवे लाख मैट्रिक टन ले जादा के धान के खरीदी हो चुके हे। एखर एवज म करीबन अट्ठारा लाख सत्तर हजार किसान मन ल बैंक लिंकिंग व्यवस्था के तहत इक्कीस हजार चालीस करोड़ रूपिया के भुगतान करे गेहे। धान खरीदी के ए अभियान इकतीस जनवरी तक चलही।
धान खरीदी के संगेसंग मिलर्स कोति ले धान के उठाव घलो तेजी ले करे जात हे। धान उठाव बर लगभग बांसठ लाख मीट्रिक टन धान बर डीओ अउ टीओ जारी करे गेहे, जेखर विरूध्द अब तक करीबन छत्तीस लाख मीट्रिक टन धान के उठाव कर ले गेहे।
खाद्य विभाग के अधिकारी मन बतइन कि ए खरीफ बछर बर दू हजार सात सौ उनतालिस उपार्जन केंद्र मनके माध्यम ले एक सौ साठ लाख मीट्रिक टन धान खरीदी अनुमानित हरय।