मुख्यमंत्री-जगदलपुर
मुख्यमंत्री विष्णुदेव साय ह आज जगदलपुर म तीन सौ छप्पन करोड़ रूपिया ले जादा के आने-आने विकास काम के लोकार्पण अउ भूमिपूजन करीन।
एक ठिन आने कार्यक्रम म मुख्यमंत्री ह गांव कंगोली म श्री वेदमाता गायत्री महाविद्यालय के भूमिपूजन करीन। ए मउका म ओमन विद्याभारती संस्था के विकास बर पचास लाख रूपिया देके घोसना करीन। त उहें, कांकेर सांसद भोजराज नाग ह प्रदेस म स्थित विद्या भारती संस्था के आने-आने साखा के विकास बर सांसद निधि ले हर साल एक करोड़ रूपिया अउ जगदलपुर विधायक किरण सिंह देव ह जगदलपुर स्थित संस्था के विकास बर दस लाख रूपिया के वित्तीय सहायता देके घोसना करीन।
कार्यक्रम ल उपमुख्यमंत्री अरूण साव, वन मंत्री केदार कश्यप अउ खेल मंत्री टंक राम वर्मा ह घलो संबोधित करीन।
चावल निर्यातक-मंडी शुल्क छूट
राज्य सरकार ह प्रदेस के चाउर उद्योग ल आगू बढ़ाय बर राज्य ले गैर-बासमती चाउर के निर्यात ल बढ़ावा दे बर मंडी शुल्क अउ कृषक कल्याण शुल्क ले पूरा छूट देके फइसला लेहे। ए छूट अइसन चावल निर्यातक मन ले मिलही, जउन ह राज्य के राईस मिलर्स अउ मंडी मनके माध्यम ले बिसाय गे धान ले तियार गैर-बासमती चाउर के निर्यात करही। ए फइसला ले प्रदेस के चाउर उद्योग ल राष्ट्रीय अउ अंतर्राष्ट्रीय बाजार के प्रतिस्पर्धा म मदद मिलही। राज्य सरकार डहार ले राजपत्र म प्रकाशन बर अधिसूचना जारी कर दे गेहे। ए छूट ह एक बछर तक रइही। ए दूनों सुल्क म छूट बर चावल निर्यातक मन ल ए पक्का करना होही कि उंखर शिपिंग बिल म चाउर के कार्गो के मूल जघा छत्तीसगढ़ लिखे राहय। संगेसंग कोनों-कोनों अउ सर्त के पालन करना होही।
मुख्यमंत्री-बैठक
मुख्यमंत्री विष्णुदेव साय ह नवा साल के पहिली दिन काली मंत्रालय म जम्मों विभाग मनके सचिव अउ विभागाध्यक्ष मनके बइठका लेके सरकारी कामकाज म बने ढंग ले कसावट लाय के निरदेस दीन। संगेसंग आम लोगन मन ले जुड़े मामला के तुरते निपटारा करे के बात कहिन। ओमन किहीन कि प्रशासनिक कामकाज म कोनों प्रकार के सुस्ती ल बर्दास्त नइ करे जाय।
मुख्यमंत्री ह मंत्रालय के संगेसंग जम्मों कार्यालय मन म ई-ऑफिस के व्यवस्था ल बने ढंग ले लागू करे के निरदेस दीन। ओमन किहीन कि छत्तीसगढ़ के औद्योगिक नीति के फायदा निवेसक मन ल मिले, एखर बिसेस ध्यान राखे जाय। मुख्यमंत्री ह प्रदेस म कानून व्यवस्था के स्थिति के संगेसंग नक्सल अभियान उपर मिले सफलता के गोठबात करीन।
कबीरधाम-सड़क सुरक्षा अनुभव कक्ष
उपमुख्यमंत्री विजय शर्मा ह आज कबीरधाम म राज्य के पहिली सड़क सुरक्षा अनुभव कक्ष के उद्घाटन करीन। ए दउरान श्री शर्मा ह कक्ष के जम्मों पहलु मनके अवलोकन करीन अउ एखर कामकाज के जानबा लीन। ए मउका म उपमुख्यमंत्री ह किहीन कि अब ड्राइविंग लाइसेंस बनवाय बर अवइया मनखे मन ल एक ठिन बिसेस ऑडियो अउ वीडियो सत्र ले गुजरना होही। ए सत्र अरजी करइया मन ल ट्रैफिक नियम अउ सड़क सुरक्षा के प्रति जागरूक करे के उद्देश्य ले सुरू करे गेहे।
सड़क सुरक्षा अनुभव कक्ष के उद्देश्य लोगन मन म सड़क सुरक्षा कोति जागरूक करना हे। ए कक्ष म आने-आने प्रकार के सड़क सुरक्षा ले जुड़े जानबा अउ जिनीस पेस करे गेहे, जेमा गाड़ी मन म दुर्घटना ले बचे के उपाय, ट्रैफिक नियम के पालन अउ बने ढंग ले गाड़ी चलाय के बारे म बताय गेहे। कक्ष म आने-आने वर्चुअल अनुभव, वीडियो अउ मॉडल्स के माध्यम ले सड़क सुरक्षा ल समझे के एक ठिन बढ़िया तरीका अपनाय गेहे।
विजय शर्मा-कबीरधाम
उपमुख्यमंत्री विजय शर्मा ह कबीरधाम प्रवास के दउरान नवागांव म बनत प्रधानमंत्री आवास योजना के फायदा पवइया लोगन मन ले मिलीन। ए मउका म ओमन अधिकारी मन ल चलत काम म गुणवत्ता लाय अउ ओला बेरा म पूरा करे के निरदेस दीन। उपमुख्यमंत्री ह किहीन कि प्रधानमंत्री आवास योजना के तहत घर बनाना सिरिफ एक बुनियादी जरूरत नइ हे, भलूक हर मनखे ल सम्मान के संग जिनगी जीये के मउका देथे।
जल जीवन मिशन
जल जीवन मिशन के तहत राज्य म चालीस लाख ले जादा परिवार मनके इहां घरेलू नल कनेक्शन लगा दे गेहे। प्रदेस म रायगढ़ जिला ह नल कनेक्शन देके मामला म सबले आगू हे। त उहें, दूसर नंबर म महासमुंद जिला अउ तीसर नंबर म जांजगीर-चांपा जिला सामिल हे। जल जीवन मिशन के तहत राज्य के पचास लाख ले जादा परिवार मन ल घरेलू नल कनेक्शन देके लक्ष्य राखे गेहे।
कारोगुट्टा-सुरक्षा कैम्प
बीजापुर जिला के कोरागुट्टा गांव म सुरक्षा बल मनके नवा कैंप खोले गेहे। ए कैम्प केन्द्रीय रिजर्व पुलिस बल-सीआरपीएफ अउ कोबरा बटालियन के हरय। कोरागुट्टा म नवा कैम्प के बने ले पच्चीस साल बाद बीजापुर-तर्रेम-कोण्डापल्ली-पामेड़ रद्दा म अवई-जवई बने ढंग ले होही। काली कैम्प के बने के संगेसंग सीआरपीएफ ह स्वास्थ्य सिविर लगाके लोगन मनके जांच करीन अउ ओमन ल मुफत म दवई दीन। कोरागुट्टा म नवा सुरक्षा कैम्प खुले ले इहां के गांव के लोगन मन ह अब्बड़ उछाह म हवय।
गणतंत्र दिवस-परेड-टिकट
गणतंत्र दिवस अउ बीटिंग रिट्रीट बर टिकट मनके बिक्री आज ले सुरू होगे हे। रक्षा मंत्रालय के मुताबिक टिकिट ल सेना भवन, शास्त्री भवन, जंतर-मंतर, प्रगति मैदान अउ राजीव चौक मेट्रो स्टेशन ले मूल फोटू पहिचान पत्र दिखाके बिसाय जा सकथे। सोझे वेबसाइट ‘‘आमंत्रण डॉट एमओडी डॉट जीओवी डॉट आईएन‘‘ अउ ‘‘आमंत्रण मोबाइल ऐप‘‘ ले घलो टिकट बिसाय जा सकथे। छब्बीस जनवरी के गणतंत्र दिवस बर टिकिट मनके कीमत बीस रूपिया ले सौ रूपिया तक अउ बीटिंग रिट्रीट बर बीस रूपिया राखे गेहे।
दुर्घटना
बलौदाबाजार जिला म पाछु रतिहा होय सड़क दुर्घटना म तीन झिन युवक के मउत होगे। ए घटना कसडोल थाना क्षेत्र के कलमीडीह गांव म होइस।
मिले जानबा के मुताबिक ए तीनों युवक तुरतुरिया ले पिकनिक मनाय के बाद महराजी-अर्जुन गांव फटफटी म बइठ के लहुटत रिहीन। तभेच ए युवक मन हाईवा के चपेट म आगे, जेखर ले इंखर मनके मउकाच म परान छूट गे। जिला प्रसासन डहार ले मृतक मनके परिवार मन ल पच्चीस-पच्चीस हजार रूपिया के सहायता राशि दे गीस।
ओति, जांजगीर-चांपा जिला के कोसमंदा गांव म रेलगाड़ी के चपेट म आय ले दू झिन मनखे के मउत होगे हे।
ईडी-कवासी लखमा
छत्तीसगढ़ के पूर्व आबकारी मंत्री कवासी लखमा ह काली तीन जनवरी के प्रवर्तन निदेशालय-ईडी के आगू पेस होही। सराब घोटाला मामला म ईडी ह कवासी लखमा ल पूछताछ बर बलाय हे। जानबा के मुताबिक पाछु सनिच्चर के ईडी के टीम ह कोंटा विधायक कवासी लखमा अउ उंखर बेटा हरीश कवासी के घर गे रिहीन। इही दउरान ईडी ह सुकमा, कोंटा अउ रायपुर के उंखर जघा म छापा मारीन। ऐति, अब तक होय कार्रवाई के जानबा ईडी ह आज सोशल मीडिया हैंडल ‘‘एक्स‘‘ म दे हे।
देवेन्द्र यादव-बलौदाबाजार
बलौदाबाजार हिंसा मामला म रायपुर जेल म बंद विधायक देवेन्द्र यादव के तबीयत खराब होगे हे। ओमन ल दाउ कल्याण सुपर स्पेशलिटी अस्पताल म भर्ती कराय गेहे। जानबा के मुताबिक ओमन पाछु पांच दिन ले अस्पताल म भर्ती हे। डॉक्टर मनके मुताबिक इंखर मनके अवइया बेरा म पेट के ऑपरेसन करे जा सकथे।
अउ अब मौसम के हाल…
प्रदेस म उत्तर ले ठंडा अउ सुष्क हवा सरगल आवत हे, जेखर सेती जाड़ा बाढ़ गेहे। मौसम विभाग के मुताबिक पश्चिमी विक्षोभ के सेती चार जनवरी ले हवा के दिसा म बदलाव के संगेसंग प्रदेस के मौसम म घलो असर पड़ही। बंगाल के खाड़ी ले नमी वाले हवा आय के सेती चार जनवरी के बाद ले न्यूनतम तापमान म छह डिग्री सेल्सियस के बढ़ोतरी होय के संभावना हे।
अब थोरकुन समाचार सार म –
– रायपुर के पंडित जवाहर लाल नेहरू स्मृति चिकित्सा महाविद्यालय म अट्ठारह झिन चिकित्सा सिक्षक मनके संविदा नियुक्ति करे गेहे।
अउ
– बालोद जिला के दल्लीराजहरा नगर पालिका के मुख्य नगर पालिका अधिकारी ल गड़बड़ी करे के आरोप म निलंबित कर दे गेहे।