केन्द्र सरकार ह आज ले ‘‘वन नेशन-वन सब्सक्रिप्शन‘‘-ओ.एन.ओ.एस. योजना के सुरूवात करे हे। ए योजना ले पढ़ईया लइका मन ल सिंगल सब्सक्रिप्शन प्लेटफॉर्म म सोध पत्र अउ सिक्षा ले जुड़े जिनीस समेत डिजिटल ज्ञान बिना रोक-टोक देवाना हे। ए योजना ले आने-आने जघा सदस्यता लेके के जरूरत नइ पड़ही अउ ज्ञान सबो ल मिलही। विश्वविद्यालय अउ आईआईटी समेत सरकारी सहायता मिले उच्च सिक्षा संस्थान के एक करोड़ अस्सी लाख विद्यार्थी मन ल दुनियाभर के लोगन के प्रकासित सोध पत्र देखे के सुभीता मिलही।
प्रधान वैज्ञानिक सलाहकार प्रोफेसर अजय कुमार सुद ह बतईन कि योजना तीन चरण म लागू होही। केन्द्रीय मंत्रिमंडल ह पाछु बछर पच्चीस नवंबर के ‘‘वन नेशन-वन सब्सक्रिप्शन‘‘ योजना ल मंजूरी दे रिहीन।
यूनिटी मॉल परियोजना-राशि स्वीकृति
केन्द्र सरकार ह छत्तीसगढ़ ल यूनिटी मॉल परियोजना बर दू सौ करोड़ रूपिया के मंजूरी देहे। एमा ले सौ करोड़ रूपिया के अग्रिम रकम राज्य ल पूंजीगत व्यय बर दे गेहे। यूनिटी मॉल बने ले स्थानीय लोगन, बुनकर, स्वयं सहायता समूह मन ल बढ़ावा मिलही अउ रोजगार के नवा मउका आगू आही। ए इहां बनइया जिनीस ल बेचे खातिर वन स्टॉप मार्केट प्लेस के रूप म काम करही। मुख्यमंत्री ह किहीन कि यूनिटी मॉल राज्य के गरीब, युवा, किसान अउ नारी शक्ति के विकास खातिर एक महत्ता के कदम हवय। ए राज्य के अर्थव्यवस्था ल नवा ऊंचाई म ले जाय खातिर स्थानीय लोगन ल बढ़ावा दीहीं।
ग्रीन-जीडीपी
वन पारिस्थितिकी तंत्र सेवा ल ग्रीन जीडीपी संग जोड़े के पहल सुरू करइया छत्तीसगढ़ देस के पहिली राज्य बन गेहे। एखर ले छत्तीसगढ़ के सरलग विकास ल जाने जा सकही। मुख्यमंत्री विष्णुदेव साय ह कहिन कि छत्तीसगढ़ सरकार प्रधानमंत्री नरेन्द्र मोदी के विकसित भारत-दू हजार सैंतालीस अउ सरलग विकास लक्ष्य ल लेके विजय दस्तावेज तियार करत हे, जेमा वन विभाग कोति ले चलाय जात पारिस्थितिकी तंत्र सेवा के मूल्यांकन के नियम ल सामिल करे गेहे। वन मंत्री केदार कश्यप ह किहीन कि पारिस्थितिकी तंत्र सेवा के मूल्यांकन बजट योजना ल जादा व्यवस्थित बनाही, भलूक भविष्य के रणनीति ल एक नवा दिसा दीहीं।
छत्तीसगढ़ म संयुक्त वन प्रबंधन कार्यक्रम ह स्थानीय समुदाय ल अउ जादा मजबूत बनाय हे। गुरू घासीदास, कांगेर घाटी अउ इंद्रावती जइसन राष्ट्रीय उद्यान संग छत्तीसगढ़ म प्रकृति ले जुड़े पर्यटन बर गजब संभावना हवय। एखर ले उहां के रहवइया लोगन के सामाजिक अउ आर्थिक विकास के बढ़वार होय हे। उहें, पर्यावरण संरक्षण के प्रयास ल मजबूत करे गेहे।
केन्द्र-प्रोत्साहन राशि
छत्तीसगढ़ सरकार ह प्रशासनिक कामकाज म साफगोई अउ दक्षता लाय बर आईटी आधारित वित्तीय प्रबंधन प्रणाली ल लागू करे हे। केन्द्र सरकार ह ए डिजिटल सुधार के प्रसंसा करत राज्य ल ढाई सौ करोड़ रूपिया के प्रोत्साहन राशि देहे। ए रकम ल राज्य के अधोसंरचना निर्माण परियोजना म बुनियादी ढांचा ल मजबूत बनाय बर करे जाही।
छत्तीसगढ़ ह केन्द्र प्रवर्तित योजना के वित्तीय प्रबंधन बर ‘‘जस्ट इन टाईम मॉडल‘‘ अउ एस.एन.ए. स्पर्श प्रणाली ल अपनाय हे, जेखर ले ट्रेकिंग अउ भुगतान सरल होय हे। एमा राज्य सरकार ह केन्द्र के मद ल आरबीआई के ई-कुबेर नेटवर्क अउ राज्य के मद ल वित्तीय प्रबंधन अउ सूचना प्रणाली ले मजबूत करे हे। एखर ले मद के सही बेरा म बउरे अउ खरचा के रिपोर्टिंग आसान होय हे। मुख्यमंत्री विष्णुदेव साय ह कहिन कि तकनीक आधारित सुधार अउ सुशासन छत्तीसगढ़ के आर्थिक विकास के मूलमंत्र हे।
प्रशासक नियुक्त
राज्य सासन के नगरीय प्रसासन विभाग ह आज रईपुर समेत प्रदेस के दस नगर निगम मन म प्रशासक मनके नियुक्ति के आदेस जारी कर देहे। खबर के मुताबिक राजनांदगांव, बिलासपुर, जगदलपुर, रायपुर, धमतरी, दुरूग, रायगढ़, चिरमिरी, अंबिकापुर अउ कोरबा नगर निगम मन म निर्वाचित परिषद के कार्यकाल जनवरी महीना के अलग-अलग तारीख म सिरावत होवत हे।
जारी आदेस के अनुसार ए नगर निगम मन म निर्वाचित परिषद के कार्यकाल के समाप्त होय के तिथि ले प्रसासक नियुक्त हो जही। राज्य सासन ह संबंधित जिला के कलेक्टर मन ल नगर निगम के प्रसासक के रूप म नियुक्त करे के आदेस जारी करे हे।
अरूण साव-बैठक
उपमुख्यमंत्री अउ नगरीय प्रसासन मंत्री अरूण साव ह काली मंत्रालय म वीडियो कान्फ्रेंसिंग ले नगर निगम, नगर पालिका अउ नगर पंचायत के कामकाज के समीक्षा करीन। बइठका म ओमन नगरीय प्रसासन विभाग कोति ले मंजूर तीन सौ तिरपन पद बर अनुकंपा नियुक्ति के काम ल दस जनवरी तक पूरा करे के निरदेस दीन हे। श्री साव ह नगर निगम के आयुक्त अउ नगर पालिका अउ नगर पंचायत के मुख्य नगर पालिका के अधिकारी मन ल हरेक दिन वार्ड म घूम-घूम के निर्माण काम, साफ-सफाई अउ प्रकाश व्यवस्था के मॉनिटरिंग करे बर केहे हे। एखर संगेसंग अटल परिसर अउ नालंदा परिसर के काम ल झटकिन करे के निरदेस दीन। श्री साव ह प्रधानमंत्री आवास योजना-सहरी म बने आवास ल मार्च महीना तक पूरा करे बर किहीन हे।
आईईडी बरामद/माओवादी गिरफ्तार
बीजापुर जिला म आज सुरक्षा बल के टीम ह आने-आने जघा ले ग्यारह ठिन बम बरामद करे हे। खबर के मुताबिक केन्द्रीय रिजर्व पुलिस बल-सीआरपीएफ अउ बासागुड़ा थाना के जवान सर्चिंग म निकले रिहीन। इही बेरा तिमापुर दुर्गा मंदिर गउठान तीर माओवादी मन कोति ले लगाय गे आठ ठिन बम बमराद करीस। उहें, कोंडापल्ली अउ छुटवाई के बीच बंदलएलका नाला तीर सुरक्षा बल ह तीन-तीन किलोग्राम के तीन ठन बम बमराद करीन हे, जउन ल बम निरोधक दस्ता के टीम म निष्क्रिय कर दीन।
उहें, दंतेवाड़ा जिला म आज तीन लाख रूपिया के इनामी माओवादी ह पुलिस के आगू आत्मसमर्पण करीस हे। ए माओवादी गंगालूर एरिया कमेटी के प्लाटून नंबर बारह म ए-सेक्सन डिप्टी कमांडर के पद म सक्रिय रिहीस। आत्मसमर्पण करइया माओवादी ल राज्य सरकार के पुनर्वास नीति म पच्चीस हजार रूपिया के सहायता रासि दे जाही।
बी.एड. सहायक शिक्षक-प्रदर्शन
नौकरी ले हटाय जाय के विरोध म बी.एड. सहायक सिक्षक मन ह आज रईपुर के कुशाभाऊ ठाकरे परिसर के भाजपा कार्यालय म प्रदर्शन करीन। सूचना मिलतेच मउका म पहुंचे पुलिस ह प्रदर्सन करइया मन ल घुचईन। ए बेरा म बर्खास्त सहायक सिक्षक मन ह गिरफ्तारी दीन। उपमुख्यमंत्री अरूण साव ह किहीन हे कि सरकार ए बिसेस म सोच-विचार करत हे।
खबर के मुताबिक करीब उनतीस सौ सहायक सिक्षक मन ल पद ले बर्खास्त करे गेहे।
ठगी-आरोपी गिरफ्तार
राजधानी रईपुर म पुलिस ह करोड़ों रूपिया के ठगी के खुलासा करे हे। ए मामला के आरोपी जगमोहन सिंह मेशराम ल गिरफ्तार करे गेहे। पुलिस ह उंखर तीर ले दू दर्जन ले जादा कार बरामद करे हे। खबर के मुताबिक आरोपी कार ल गिरवी रखके ठगी करत रिहीस।
दुर्घटना
जशपुर जिला के तपकरा थाना क्षेत्र म काली रतिहा होय रद्दा दुर्घटना म तीन झन मनखे के मउत होगे। उहें, आने मनखे गंभीर रूप ले घायल होगे हे। खबर के मुताबिक चारों झन एक फटफटी म बइठ के तपकरा ले लवाकेरा जावत रिहीस हे। इही बेरा समडमा गांव तीर उंखर फटफटी रद्दा तीर खड़े टरक ले टकरा गे, जेमा तीन झिन मनखे के मउकाच म मउत होगे।
उहें, कोरबा म मानिकपुर चौकी तीर तेजी ले आवत चौपइया गाड़ी के पलटे ले एक मनखे के मउत होगे।
अउ अब मौसम के हाल..
मौसम विभाग के मुताबिक उत्तर ले ठंडा अउ सुष्क हवा के आय के सेती प्रदेस म न्यूनतम तापमान म गिरावट के दउर जारी रेहे के संभावना हे। छत्तीसगढ़ के सरगुजा जिला समेत उत्तरी भाग म कुछ जघा म सीतलहर चल सकत हे। सरगुजा संभाग अउ ओखर ले लगे जिला मन म बिहनिया के बेरा हल्का ले मध्यम कोहरा बने के संभावना हे।