यात्री मनके सुविधा ल ध्यान म राखत बिलासपुर अउ रायपुर ले अंबिकापुर बर हवाई सेवा अब हफ्ता म छह दिन – सोमवार ले सनिच्चर तक सुरू कर दे गेहे। ए सेवा पहिली हफ्ता म तीन दिन – गुरूवार, सुक्रवार अउ सनिवार के संचालित करे जावत रिहीस। एयरलाइंस के नवा समय-सारिणी के मुताबिक अब रायपुर ले अंबिकापुर के उड़ान बिहनिया नौ बजे ले सुरू होही अउ सवा दस बजे अंबिकापुर पहुंचही। दस बजके चालीस मिनट म विमान बिलासपुर बर रवाना होही।
हवाई सुविधा जनसंघर्ष समिति ह अंबिकापुर के उड़ान बर यात्री मन ले सीट बुक कराय के आग्रह करे हे, जेखर ले ए सेवा लगातार जारी राहय।
पाठ्य-पुस्तक-वितरण
मुख्यमंत्री विष्णुदेव साय ह अवइया सिक्षा सत्र म जम्मों विद्यार्थी मन ल समय-सीमा म निःशुल्क पाठ्य-पुस्तक मनके वितरण सुनिश्चित करे के निरदेस सिक्षा विभाग के अधिकारी मन दीन हे। ओमन कहिन कि एखर बर वितरण काम के निगरानी ऑनलाइन ट्रेकिंग ऐप के माध्यम ले करे जास। श्री साय ह मंत्रालय म राखे गे छत्तीसगढ़ पाठ्य-पुस्तक निगम के बइठका म अधिकारी मन ले किहीन कि पाठ्य पुस्तक के मुद्रण बर कव्हर पेपर अउ इनर पेपर के खरीदी अउ आने-आने निविदा जेम पोर्टल के माध्यम ले करे जाय।
निर्वाचन आयोग-रिमोट वोटिंग व्यवस्था
भारत निर्वाचन आयोग ह देस के प्रवासी लोगन मन बर रिमोट वोटिंग व्यवस्था सुरू करे के प्रस्ताव करे हे। एखर बर बहु-निर्वाचन क्षेत्र म रिमोट इलेक्ट्रॉनिक वोटिंग मसीन के उपयोग करे जाही। ए मसीन डहार ले एक मतदान केन्द्र ले बहत्तर निर्वाचन क्षेत्र बर मतदान करे जा सकथे। कहूं ए लागू होथे त अपन मूल निवास स्थान ले काम के सिलसिला म देस के आने-आने क्षेत्र म गे लोगन मन अपन निर्वाचन क्षेत्र बर मतदान कर सकही।
चिकित्सा अधिकारी-संविदा नियुक्ति
राज्य सरकार ह राष्ट्रीय स्वास्थ्य मिशन के अंतर्गत सात विशेषज्ञ डॉक्टर अउ पैंतीस चिकित्सा अधिकारी मनके संविदा नियुक्ति के आदेस जारी करे हे। एमा रायपुर, दुरूग अउ बस्तर संभाग के सरकारी अस्पताल म छह-छह, बिलासपुर संभाग म बारह अउ सरगुजा संभाग म पांच चिकित्सा अधिकारी मनके नियुक्ति करे गेहे। ए डॉक्टर मन ल संबंधित जिला के ग्रामीण अउ सहरी प्राथमिक स्वास्थ्य केन्द्र, सामुदायिक स्वास्थ्य केन्द्र अउ जिला अस्पताल मन म पदस्थ करे गेहे।
नववर्ष
राज्यपाल रमेन डेका अउ मुख्यमंत्री विष्णुदेव साय ह प्रदेसवासी मन ल नववर्ष के सुभकामना देवत सुख-समृद्धि के कामना करे हे। राज्यपाल ह कहिन हे कि नवा बछर एक नवा संभावना, नवा दृष्टिकोण अउ नवा उत्साह के संग आवत हे। हमन सबो झन ल मिलके एक सशक्त अउ समृद्ध प्रदेस के निर्माण के दिसा म कदम बढ़ाके देस के प्रगति म योगदान देना हे।
उहें, उपमुख्यमंत्री अरूण साव ह बछर दू हजार चौबीस ल राज्य सरकार बर उपलब्धिपूर्ण बतईन।
वनवासी क्रीडा प्रतियोगिता-समापन
राजधानी रायपुर म राखे गे चौबीसवां राष्ट्रीय वनवासी खेलकूद प्रतियोगिता के आज समापन होगे हे। आखिरी दिन खेले गे फुटबॉल के फाइनल मुकाबला म संथाल परगना ह केरल ल टाई ब्रेकर म एक के मुकाबला चार गोल ले हराके खिताब म कब्जा करीन। उहें, केरल के टीम उपविजेता बनीस अउ झारखंड के टीम ल तीसरा स्थान मिलीस। तीरंदाजी प्रतियोगिता म राजस्थान ह पहला अउ उत्तरप्रदेश ह दूसरइया इनाम पाय हे। राष्ट्रीय वनवासी क्रीडा प्रतियोगिता म देस के उनतीस राज्य मनके संग नेपाल के करीबन छह सौ जनजातीय नोनी-बाबू मन ह हिस्सा लीन।
समापन समारोह म वनवासी कल्याण आश्रम के राष्ट्रीय अध्यक्ष सत्येंद्र सिंह माईपहुना के रूप म सामिल होइन अउ विजेता टीम ल पुरस्कृत करीन। उहें, वन मंत्री अउ स्वागत समिति के अध्यक्ष केदार कश्यप अउ खेल मंत्री टंकराम वर्मा ह खिलाड़ी मनके उत्साहवर्धन करीन। वनवासी कल्याण आश्रम के राष्ट्रीय खेल प्रमुख फूल शेरिंग लेपचा ह आकाशवाणी समाचार ल बतईन कि वनवासी क्रीडा प्रतियोगिता रायपुर म अट्ठाईस ले इकतीस दिसंबर तक राखे गे रिहीस।
छत्तीसगढ़िया ओलंपिक-युवा महोत्सव
राज्य स्तरीय छत्तीसगढ़िया ओलंपिक खेल मनके आयोजन आठ ले दस जनवरी तक रायपुर म करे जाही। ए खेल के प्रतिस्पर्धा रायपुर के बलबीर सिंह जुनेजा इंडोर स्टेडियम, आउटडोर स्टेडियम अउ सप्रे शाला मैदान म होही। एमा प्रदेसभर ले करीबन दू हजार प्रतिभागी मन सामिल होही।
उहें, राजधानी रायपुर के साईंस कॉलेज मैदान म बारह ले चौदह जनवरी तक युवा महोत्सव के आयोजन करे जाही। ए महोत्सव म प्रदेस के करीबन ढाई हजार कलाकार अउ प्रतिभागी मन ह भाग लीहीं।
शीघ्रलेखन-मुद्रलेखन परीक्षा
शीघ्रलेखन अउ मुद्रलेखन कम्प्यूटर कौशल परीक्षा परिषद ह स्थगित परीक्षा के पुनः संचालन के घोसना कर देहे। ए परीक्षा पांच जनवरी के आयोजित करे जाही। परीक्षार्थी मन ल अंग्रेजी मुद्रलेखन गति आठ हजार के डिप्रेशन प्रति घंटा के मान ले परीक्षा देना होही। ए परीक्षा बर रायपुर, नवा रायपुर, दुरूग, भिलाई, अउ बिलासपुर म केन्द्र बनाय गेहे। परीक्षा बर प्रवेश पत्र जारी कर दे गेहे, जेला परीक्षार्थी परिषद के आधिकारिक वेबसाइट ले डाउनलोड कर सकत हे।
ठगी आरोपी-गिरफ्तार
शेयर ट्रेडिंग के नाव म रायगढ़ के तमनार म एक करोड़ बारह लाख रूपिया के ठगी के मामला आगू आय हे। बिलासपुर रेंज के पुलिस महानिरीक्षक संजीव शुक्ला के निरदेस म रायगढ़ के पुलिस अधीक्षक दिव्यांग पटेल ह ऑनलाइन फ्रॉड सेल के गठन के निरदेस दे रिहीन। टीम ह कार्रवाई करत पश्चिम बंगाल ले तीन आरोपी ल गिरफ्तार करे हे। उंखर तीर ले भारतीय स्टेट बैंक के पैंतीस खाता, तीन ए.टी.एम., एक क्रेडिट कार्ड, सात मोबाइल, एक लैपटॉप अउ अठहत्तर लाखा रूपिया के चेक के छायाप्रति बरामद करे गेहे।
दुर्घटना
रायपुर जिला के धरसीवां इलाका म पाछु रतिहा होय सड़क दुर्घटना म एकेच परिवार के दू झिन लइका के मउत होगे। उहें, तेरह झिन मनखे घायल होगे हे। मिले खबर के मुताबिक धमतरी रहइवया एके परिवार के मनखे मन अमरकंटक ले वापिस लहुटत रिहीस। इही दउरान उंखर गाड़ी खराब होगे अउ जम्मों झन हाईवे के तीर बइठे रिहीन, तभेच सिलतरा ओवरब्रिज के तीर तेज रफ्तार ट्रक ह ए लोगन मन ल अपन चपेट म ले लीस। ए हादसा म दू झिन लइका के मउकाच म मउत होगे। घटना के सूचना मिलतेच सिलतरा पुलिस ह मउका म पहुंचीस अउ ट्रक ल जब्त करके ड्राईवर ल गिरफ्तार कर लीस। उहें, घायल मन ल अस्पताल म भर्ती कराय गे हे।
बालोद जिला के गुरूर थाना क्षेत्र म स्कूली लइका मन ल लेके जावत एक ठिन वैन आज अनते-तनते होके पलट होगे। ए हादसा म एक लइका के मउत होगे अउ चार झिन आने लइका घायल होगे हे। एमा ले एक के हालत गंभीर बने हवय। मिले खबर के मुताबिक निपानी गांव के आत्मानंद स्कूल के बारह लइका मन ह वैन म बइठ के स्कूल जावत रिहीस, इही दउरान सोहपुर गांव के तीर वैन ह पलट गे।
ऐति, जांजगीर-चांपा जिला के गोविंदा गांव म दू झिन फटफटी के बीच होय टक्कर म एक झिन माईलोगिन के मउत होगे। उहें, एक झिन लइका समेत चार झिन लोगन घायल होगे हे।
उहें, सक्ती जिला के बाराद्वार थाना क्षेत्र म कार अउ फटफटी के बीच टक्कर होय ले बाइक सवार एक झिन युवक के मउत होगे।
अउ अब थोरकुन समाचार सार म –
– रायपुर के चंगोराभांटा इलाका म पाछु रतिहा आपसी विवाद के चलत बजरंग दल के नेता समेत दू झिन युवक मनके हत्या कर दे गेहे। पुलिस ह ए मामला म दू नाबालिग समेत छह लोगन मन ल गिरफ्तार करे हे।
अउ
– कोंडागांव जिला के फरसगांव पुलिस ह गांजा तस्करी के मामला म दू झिन आरोपी मन ल गिरफ्तार करे हे। उंखर तीर ले पन्द्रह किलो ले जादा के गांजा बरामद करे गेहे, जेखर कीमत करीबन डेढ़ लाख रूपिया बताय गेहे।