इसरो-प्रक्षेपण
भारतीय अंतरिक्ष अनुसंधान संगठन-इसरो ह आज रतिहा नौ बजके अंठावन मिनट म श्री हरिकोटा ले दू ठिन उपग्रह मनके प्रक्षेपण करही। ए उपग्रह कक्षा म अंतरिक्ष यान के डॉकिंग-अनडॉकिंग माने जोड़े अउ अलग करे के प्रक्रिया ल दर्साही। प्रक्षेपण यान पीएसएलवी-सी-सिक्सटी अउ दूनों उपग्रह-एसडीएक्स-वन अउ एसडीएक्स-टू ल चार सौ छिहत्तर किलोमीटर के कक्षा म स्थापित करही अउ स्पेस डॉकिंग के प्रायोगिक काम पूरा करही। स्पेडेक्स-स्पेस डॉकिंग परयोग के सफलता के बाद भारत ह उपग्रह ल उंखर राखे गे कक्षा म पहुंचा के ओला स्थिर रखइया चौथा देस बन जही।
डॉक्टर मोहन भागवत-पर्यावरण
राष्ट्रीय स्वयंसेवक संघ के सर संघचालक डॉक्टर मोहन भागवत ह ए बेरा छत्तीसगढ़ के दउरा म हवय। काली रईपुर म ओमन पर्यावरण संवर्धन ले जुड़े कामकाज उपर कार्यकर्ता अउ अधिकारी मन ल जरूरी जानबा दीन। ए मउका म ओमन किहीन कि संघ डहार ले पर्यावरण ल बचाय के संदेस ल जन-जन तक पहुंचाय बर कतकोन काम करे जात हे। डॉक्टर भागवत ह किहीन कि आज जब पूरा दुनिया ह जलवायु संकट ले परेसान होवय, तब भारत कोति विश्व ह देखत हे, काबर कि, भारत ह अपन प्रकृति के मुताबिक अउ परंपरा ले लबालब हवय। ओमन बतइन कि पर्यावरण संरक्षण गतिविधि डहार ले जम्मो कारीकरम छत्तीसगढ़ म चलाय जात हे। ए मउका म पुलिसकर्मी मन ल घलो पर्यावरण संरक्षण के संकलप देवाय गीस। प्रदेस के जिला प्रमुख, इकाई प्रमुख मनके कार्यसाला घलो होइस। ओमन किहीन कि अवइया बेरा म धार्मिक कारीकरम मन म पॉलिथीन मन ल हटाय के योजना हवय। डॉक्टर भागवत ह बतइन कि पर्यावरण प्रहरी कारीकरम के माध्यम ले ऑनलाइन प्रसिक्षण कारीकरम ले जुड़े बर संकल्प पोर्टल म पंजीयन कराय जा सकथे।
पर्यावरण गतिविधि के तहत महाकुंभ प्रयागराज ले हरितकुंभ के नजरिया ले एक थैला-ए थाली अभियान चलाय गीस। जेमा प्रदेस ले छियासठ हजार ले जादा थैला अउ थाली समाज मनके मदद ले संघ ल मिले हे।
रेलवे समय सारिणी-परिवर्तन
भारतीय रेलवे के समय सारिणी म एक जनवरी दू हजार पच्चीस ले थोरकुन फेर बदल करे गेहे। दक्षिण पूर्व मध्य रेलवे म घलो लागू होवइया नवा रेलवे समय सारिणी म अप अउ डाउन के एक सौ इकतीस स्टेसन मन म गाड़ी मनके चले के बेरा म बदलाव करे गेहे। आने स्टेसन मन म समय सारिणी जस के तस रइही। एमा पैंतालिस पैसेंजर, इकयासी मेमू अउ बीस ठिन डेमू के संगेसंग एक सौ छियालिस गाड़ी मन ल एक जनवरी ले ओखर तय नंबर ले चलाय जाही। उहें, फिरोजपुर-सिवनी-फिरोजपुर पातालकोट एक्सप्रेस ल एक मार्च ले सुपरफास्ट बनाय जात हे अउ ए रेलगाड़ी के नंबर अउ समय सारिणी म बदलाव करे जात हे।
वनवासी क्रीड़ा प्रतियोगिता
राजधानी रईपुर म चलत चौबीसवां राष्ट्रीय वनवासी क्रीडा प्रतियोगिता के काली समापन होही। प्रतियोगिता के तीसर दिन आज कतकोन मैच खेले गीस। तीरंदाजी के फाइनल मुकाबला घलो आज खेले गीस। त उहें, फुटबॉल के फाइनल मुकाबला काली खेले जाही। आज तीरंदाजी म बालक-बालिका समूह म तीस मीटर जूनियर अउ बीस मीटर सब-जूनियर के प्रतियोगिता होइस, जेमा दू सौ ले जादा जनजातीय खिलाड़ी मन सामिल होइन। वनवासी क्रीड़ा प्रतियोगिता म करीबन आठ सौ खिलाड़ी भाग लेवत हे।
ट्रेन-आरोपी गिरफ्तार
बिलासपुर-कटनी रेल रद्दा उपर भंनवारटंक रेलवे स्टेसन के तीर रेल लाईन उपर बोल्डर रखे के मामला म रेलवे सुरक्षा बल-सीआरपीएफ ह एक झिन मनखे ल गिरफ्तार करे हे। पेण्ड्रा थाना के गांव कोलबिरा के रहइया पवन सिंह के खिलाफ रेलवे अधिनियम के तहत मामला दरज करे गेहे। आरोपी मनखे ल जेल भेज दे गेहे।
हमर संवाददाता ले मिले जानबा के मुताबिक आरोपी मनखे ह हीराकुंड एक्सप्रेस रेलगाड़ी ल डिरेल करे के साजिस करे रिहीन। कटकटव्वन जंगल के बीच भंनवारटंक रेलवे स्टेसन के तीर टनल के भीतर पटरी उपर आरोपी मनखे ह बोल्डर रख दे रिहीस। फेर, लोकोपायलट के नजर म आय के सेति ए बड़का दुर्घटना होय ले बांचगे अउ हीराकुंड एक्सप्रेस रेलगाड़ी म यात्रा करइया यात्री मन सही-सलामत रिहीन। ए घटना ईतवार के रतिहा के हरय। एखरे सेति इही टै्रक ले गुजरइया हीराकुंड एक्सप्रेस,रींवा एक्सप्रेस अउ अमरकंटक एक्सप्रेस रेलगाड़ी के चले म करीबन एक ले दू घंटा देरी होइस।
विरोध-प्रदर्शन
आरक्षण के संगेसंग आने-आने मांग ल लेके छत्तीसगढ़ ओबीसी महासंघ डहार ले आज बस्तर म चक्काजाम अउ बंद के आह्वान करे गीस। जेखर असर कोंडागांव जिला म देखे बर मिलिस। कोंडागांव के नारायणपुर तिराहा म राष्ट्रीय राजमार्ग तीस उपर ओबीसी समाज के लोगन मन सकलाइन। भीड़ के बाढ़े के सेति चक्काजाम जइसन स्थिति बनगे। प्रदर्सनकारी मनके समर्थन म पूर्व मंत्री अउ पूर्व विधायक मोहन मरकाम घलो सामिल होइन। ओमन ओबीसी समाज के मांग ल जायज बतावत सरकार ले जल्दी ले जल्दी निपटारा करे के बात किहीन।
किसान-फोल्डस्कोप
प्रदेस म फसल मन के कीट प्रकोप प्रबंधन अउ उन्नत नसल के पशुपालन ल बढ़ावा देके उद्देस्य ले किसान मन ल फोल्डस्कोप माइक्रोस्कोप के परयोग करे बर प्रोत्साहित करे जात हे। राष्ट्रीय जैविक तनाव प्रबंधन संस्थान के मदद ले राज्य के बीस ठिन जिला मनके किसान मन ल फोल्डस्कोप नांव के पोर्टेबल माइक्रोस्कोप बांटे गेहे। जेखर उद्देस्य किसान मन ल खेती अउ पशुपालन म वैज्ञानिक तकनीक के मदद देवाना हे। ए कारीकरम ल आईसीएआर-राष्ट्रीय जैविक तनाव प्रबंधन संस्थान डहार ले करे जात हे।
फोल्डस्कोप के उपयोग किसान कीट अउ रोग के पता लगाना, माटी के गुणवत्ता के जांच अउ पानी के सही पीएच बर करे जात हे। एखर मदद ले फसल मन म फफुंदी, पत्ती झुलसा, पत्ती मन म धब्बा रोग अउ कटाई के बाद होवइया बीमारी के पहिचान करे जात हे। अब तक फोल्डस्कोप के मदद ले सोलह प्रकार के फफुंद रोग अउ ओखर कारक जीव मनके पहिचान हो चुके हे।
दुर्घटना
राजनांदगांव जिला म काली होय सड़क दुर्घटना म तीन झन मनखे के मउत होगे। हमर संवाददाता ले मिले जानबा के मुताबिक गांव मुरमुंदा चारभाठा रोड म टरक अउ फटफटी म टक्कर होगे, जेमा फटफटी म बइठे तीन झिन मनखे के मउकच म पराण छूट गे। तीनों मनखे मुरमुंदा के रहइया हरय।
ओति, जांजगीर-चांपा जिला के बलौदा के डोंगरी गांव म आज एक ठिन बस ह खड़े ट्रेलर ले टकरा गे। ए घटना म छै झिन यात्री घायल होय हे। घायल मनके इलाज सरकारी अस्पताल बलौदा म कराय जात हे।
अउ अब थोरकुन समाचार सार म –
– दुरूग जिला के पद्मनाभपुर म लाठी डंडा ले पीटके एक मनखे के हत्या करे के मामला आगू आय हे। पुलिस ह पांच झिन संदिग्ध मन ल हिरासत म लेके मामला के जांच सुरू कर देहे।
– बिलासपुर जिला म नियुक्ति के दउरान फर्जी परित्यक्ता प्रमाण पत्र प्रस्तुत करे के मामला म जरगाडीह के आंगनबाड़ी कार्यकर्ता ल बर्खास्त करत हुए उंखर सेवा समाप्त कर दे गेहे।
अउ
– दुरूग जिला के फुंडागांव म गौ-तस्करी करइया दस हजार रूपिया के इनामी पशु तस्कर ल पुलिस ह गिरफ्तार करे हे।