राष्ट्रपति द्रौपदी मुर्मू ह आज वीर बाल दिवस के मउका म नई दिल्ली म बढ़िया काम करइया सत्रह झिन लइका मन ल प्रधानमंत्री राष्ट्रीय बाल पुरस्कार ले सम्मानित करीन। ए लइका मन म छत्तीसगढ़ के कोंडागांव जिला के हेमबती नाग घलो सामिल हे। ए लइका मन ल कला-संस्कृति, बहादुरी, नवाचार, विज्ञान अउ प्रौद्योगिकी, सामाजिक सेवा, खेल अउ पर्यावरण के क्षेत्र म बढ़िया काम करे बर सम्मानित करे गीस। ए मउका म राष्ट्रपति ह साहिबजादा मनके बहादुरी अउ बलिदान ल नमन करत किहीन कि ए दिन ह श्री गुरू गोविंद सिंह के लइका मनके बलिदान अउ उंखर मनके हिम्मत के सम्मान करे के दिन हरय। राष्ट्रपति ह इनाम पवइया लइका मन ल बधाई देवत कहिन कि एखर मनके सफलता ह जम्मों लोगन मन ल आगू बढ़े बर प्रेरित करथे।
कोंडागांव जिला के जूडो खिलाड़ी हेमबती नाग ल खेलो इंडिया अउ राष्ट्रीय स्तर के प्रतियोगिता म बढ़िया प्रदर्शन करे के सेती ए पुरस्कार दे गीस। ओखर सफलता उपर मुख्यमंत्री ह हेमबती ल सुभकामना दे हवय।
वीर बाल दिवस-प्रधानमंत्री
प्रधानमंत्री नरेन्द्र मोदी ह कहिन हे कि भारत के लोकतंत्र के फैलाव ह गुरू मनके सिक्षा, साहिबजादा मनके बलिदान अउ देस के एकता के मूल मंत्र उपर आधारित हे। आज नई दिल्ली म वीर बाल दिवस समारोह ल संबोधित करत प्रधानमंत्री ह कहिन कि गुरू मनके पंरपरा ह हमन ल सामान आदर के संग देखे के सिक्षा देहे अउ देस के संविधान ह घलो इही विचार बर प्रेरित करथे।
प्रधानमंत्री ह कहिन कि संविधान ह लोगन मन ल देस के संप्रभूता अउ एकता ल सबले उपर राखे के सिद्धांत के सीख देथे। ए मउका म प्रधानमंत्री ह सुपोषित ग्राम पंचायत अभियान के घलो सुभारंभ करीन। अभियान के उद्देश्य पोषण ले जुड़े सेवा मन ल मजबूती ले लागू करना हवय।
वीर बाल दिवस के मउका म प्रदेस म घलो आज कतकोन कार्यक्रम करे जात हे। मुख्यमंत्री विष्णुदेव साय ह वीर साहिबजादा मनके बलिदान ल सुरता करत कहिन कि ए दिन सिख पंथ के दसवां गुरू, गुरू गोविंद सिंह के साहिबजादा मन ह देस के रक्षा बर अपन प्राण गवां दीन।
प्रधानमंत्री-स्वामित्व योजना
प्रधानमंत्री नरेन्द्र मोदी ह काली स्वामित्व योजना के तहत छप्पन लाख ले जादा परिसम्पत्ति कार्ड बांटही। ए मउका म प्रधानमंत्री ह योजना के फायदा पवइया लोगन मन ले गोठबात करही। केन्द्रीय पंचायती राज मंत्रालय कोति ले दस राज्य अउ दू ठिन केन्द्रसासित प्रदेस मनके करीबन पचास हजार गांव मन म स्वामित्व संपत्ति कार्ड बांटे जाही। ए राज्य मन म छत्तीसगढ़ घलो सामिल हे। योजना म ग्रामीण आबादी के बसावट वाले क्षेत्र मन म परिसम्पत्ति के मालिक मन ल भूईंया के दस्तावेज दे जाही।
मुख्यमंत्री विष्णुदेव साय ह धमतरी म होवइया कार्यक्रम म स्वामित्व सम्पत्ति कार्ड दीहीं।
निकाय चुनाव-आरक्षण
प्रदेस म नगरीय निकाय चुनाव बर नगर पालिक निगम मनके महापौर, नगर पालिका परिषद अउ नगर पंचायत अध्यक्ष मनके पद बर काली होवइया आरक्षण ल स्थगित कर दे गेहे। नगरीय प्रशासन अउ विकास विभाग के संचालक कुंदन कुमार ह ए बारे म अधिसूचना जारी कर देहे। एखर मुताबिक अब सात जनवरी के आरक्षण के काम रायपुर के साईंस कॉलेज परिसर स्थित पंडित दीनदयाल उपाध्याय ऑडिटोरियम म बिहनिया ग्यारह बजे ले होही।
अटल परिसर-आधारशिला
पूर्व प्रधानमंत्री अटल बिहारी वाजपेयी के जयंती सुशासन दिवस के मउका म काली प्रदेस के एक सौ बैसठ नगरीय निकाय म अटल परिसर निर्माण के आधारसिला राखे गीस। ए मउका म मुख्यमंत्री विष्णुदेव साय, विधानसभा अध्यक्ष डॉक्टर रमन सिंह अउ उपमुख्यमंत्री अरूण साव ह वर्चुअल रूप ले जुड़ीन। इही कड़ी म कोरबा जिला म श्रम मंत्री लखनलाल देवांगन ह अटल परिसर निर्माण काम के सिलान्यास करीन।
मुख्यमंत्री-जशपुर
मुख्यमंत्री विष्णुदेव साय ह आज जशपुर जिला के घुघरी गांव म नागवंशी समाज डहार ले राखे गे आदिवासी गौरव सम्मेलन म सामिल होइन। ए दउरान मुख्यमंत्री ह बगीचा म एक करोड़ रूपिया के लागत ले सामाजिक भवन बनाय के घोसना करीन अउ संगेसंग तीन एकड़ जमीन के पट्टा दीन। ओमन बतईन कि राज्य सरकार ह नवा रायपुर म आदिवासी समाज बर आदर्श रेहे लोगन मन ले जुड़े एक ठिन संग्रहालय बनाय हे, जेखर लोकार्पण जल्दीच प्रधानमंत्री करही। कार्यक्रम म मुख्यमंत्री ह आदिवासी लइका मन ल जाति प्रमाण पत्र बांटीन।
सहकारी समिति-शुभारंभ
सहकारिता मंत्री केदार कश्यप ह काली जगदलपुर म राज्य के तीन सौ ले जादा नवा बने बहुउद्देशीय पैक्स, डेयरी अउ मतस्य सहकारी समिति मनके वर्चुअल रूप ले सुभारंभ करीन। ए मउका म ओमन किहीन कि अभी प्रदेस म काम करत दू हजार अंठावन पैक्स के संगेसंग लैम्स डहार ले किसान मन ल कृषि ऋण अउ खातू-बीजा जइसन सेवा दे जात हे। राज्य म पांच सौ नवा बहुउद्देशीय पैक्स बनाय जाही। ओमन बतईन कि संतावन ठिन नवा दुग्ध समिति मनके पंजीयन कर ले गेहे। त उहें, एक सौ तेरह वन-धन समिति मन ल प्राथमिक बहुउद्देशीय लघु वनोपज सहकारी समिति के रूप म पंजीकृत करे गेहे। ए मउका म बस्तर के दस ठिन नवा सहकारी समिति मन ल पंजीयन प्रमाण पत्र, पच्चीस झिन किसान मन ल रूपे किसान क्रेडिट कार्ड अउ दुग्ध उत्पादक सहकारी समिति ‘‘बड़े कापसी‘‘ ल माइक्रो एटीएम दे गीस।
जानबा के मुताबिक केन्द्रीय सहकारिता मंत्री अमित शाह ह काली नई दिल्ली म होय कार्यक्रम म देसभर के नवा बने दस हजार ले जादा बहुउद्देशीय पैक्स, डेयरी अउ मतस्य सहकारी समिति मनके सुभारंभ करे रिहीन।
माओवादी-आत्मसमर्पण
नारायणपुर जिला म एक झिन माओवादी ह पुलिस के आगू आत्मसमर्पणकरे हे। ए माओवादी कुतुल एरिया कमेटी के गुमरका जनताना सरकार म उपाध्यक्ष के पद म काम करत रिहीन अउ पाछु आठ साल ले माओवादी संगठन मन म सक्रिय रिहीन। एखर उपर ओरछा, गीदम अउ बारसूर म आने-आने माओवादी गतिविधि म सामिल रेहे के आरोप हे। आत्मसमर्पण करइया माओवादी ल राज्य सरकार के पुनर्वास नीति के तहत पच्चीस हजार रूपिया के प्रोत्साहन राशि दे गीस।
गांजा-बरामद
महासमुंद जिला के बलौदा पुलिस ह एक सौ चौंसठ किलो गांजा के संग दू झिन आरोपी मन ल आज गिरफ्तार करे हे। जब्ती करे गे गांजा के कीमत करीबन बत्तीस लाख अस्सी हजार रूपिया बताय गेहे। पुलिस के मुताबिक ट्रक म गांजा लेके दू झिन आरोपी ह ओड़िशा ले राजस्थान जावत रिहीन। मुखबिर ले सूचना मिले के बाद बलौदा पुलिस ह सिरपुर फारेस्ट नाका के तीर ट्रक ल रोक के जांच करीन। ए दउरान छह ठिन बोरी म रखे गांजा बरामद करे गीस। दूनों आरोपी मध्यप्रदेश के रहइया हरय।
नेता प्रतिपक्ष-राज्यपाल पत्र
नेता प्रतिपक्ष डॉक्टर चरणदास महंत ह राज्यपाल रमेन डेका ल चिट्ठी लिखके छत्तीसगढ़ विधानसभा के शीतकालीन सत्र म पारित छत्तीसगढ़ नगर पालिका संशोधन विधेयक-ग्यारह अउ बारह ल संविधान विरूद्ध बताय हे। ओमन एमा जरूरी कार्यवाही करे के बिनती करे हे। डॉक्टर महंत ह किहीन कि दूनों विधेयक के पारित होय के बाद पांच बछर के अवधि के पहिली नवा चुनाव कराय के बाध्यता ल खतम करके छह महीना के उपरहा बेरा म अनुज्ञेय हो जही, जउन ह असंवैधानिक हरय।
अउ अब मौसम के हाल…
उत्तरी छत्तीसगढ़ के एक-दू जघा म काली गरज-चमक के संग हल्का ले मध्यम बरसा होय के संभावना हे। त उहें, बस्तर संभाग अउ ओखर ले लगे जिला मनके एक-दू जघा म घलो हल्का बरसा हो सकथे। मौसम विभाग के मुताबिक पश्चिमी विक्षोभ के प्रभाव ले ए बेरा मौसम म बदलाव होय हे। हवा के दिसा बदले ले बंगाल के खाड़ी ले जादा मात्रा म नमी आवत हे, जेखर सेती प्रदेस म अवइया दू दिन तक हल्का बरसा होय के संभावना बने हे।