आज पूर्व प्रधानमंत्री अटल बिहारी वाजपेयी के एक सौवीं जयंती म कृतज्ञ देस ह ओमन ल श्रध्दांजलि अर्पित करत हे। राजधानी नई दिल्ली म श्री वाजपेयी के समाधि स्थल ‘‘सदैव अटल‘‘ म राष्ट्रपति द्रौपदी मुर्मु, उपराष्ट्रपति जगदीप धनखड़ अउ प्रधानमंत्री नरेंद्र मोदी ह फूल चढ़ाके उंहला सुरता करीन। पूर्व राष्ट्रपति रामनाथ कोविंद, केंद्रीय गृहमंत्री अमित शाह, लोकसभा अध्यक्ष ओम बिरला अउ भारतीय जनता पार्टी के राष्ट्रीय अध्यक्ष जे.पी.नड्डा ह घलो श्रध्दांजलि दीन।
वाजपेयी जयंती-राज्यपाल/मुख्यमंत्री
भारतरत्न स्वर्गीय अटल बिहारी वाजपेयी के जयंती के दिन म आज राज्यपाल रमेन डेका ह ओमन ल श्रध्दासुमन अर्पित करीन। राजभवन म होय ए कारीकरम म राज्यपाल ह श्री वाजपेयी ले जुड़े स्मृति ल साझा करीन अउ किहीन कि ओमन छोटे-बड़े सबो कार्यकर्ता मन के धियान अउ सम्मान करत रिहीन। राज्यपाल ह किहीन कि श्री वाजपेयी के जयंती ल ‘‘सुशासन दिवस‘‘ के रूप म समर्पित करना, उंखर मूल्य अउ आदर्स बर हमर श्रध्दांजलि हवय। ए मउका म उंखर कविता के पाठ घलो करे गीस। इही मउका म राज्यपाल ह राजभवन म लगाय गे दू दिनी रक्तदान अउ स्वास्थ्य सिविर के अवलोकन करीस अउ अपन स्वास्थ्य जांच घलो कराइन। सिविर म अब्बड़ अकन विभाग के डॉक्टर मन ह राजभवन के अधिकारी, कर्मचारी मनके स्वास्थ्य परीक्षण करीन।
उहें, आज मुख्यमंत्री विष्णुदेव साय ह घलो मुख्यमंत्री निवास म श्री वाजपेयी के फोटू उपर फूल चढ़ाके ओमन ल सुरता करीन। ए मउका म श्री साय ह छत्तीसगढ़ राज्य के निर्माण म अटल बिहारी वाजपेयी के भूमिका ल याद करीन। ओमन किहीन कि श्री वाजपेयी के सपना ल पूरा करे के दिसा म राज्य सरकार ह सरलग काम करत हे। राज्य सरकार ह उंखर सुरता म ए रजत जयंती बछर ल ‘‘अटल निर्माण वर्ष‘‘ के रूप म मनाय के फइसला करे हे।
मुख्यमंत्री ह रईपुर म स्थापित श्री वाजपेयी के मूर्ति ल माला पहिरा के उंखर पूण्य स्मरण करीन। एखर बाद श्री साय ह प्रदेस भाजपा कार्यालय कुशाभाऊ ठाकरे परिसर म राखेगे सुशासन दिवस कारीकरम म घलो सामिल होइन। ए कारीकरम म विधानसभा अध्यक्ष डॉक्टर रमन सिंह समेत भाजपा के पदाधिकारी सांसद अउ विधायक मन जुर रिहीन।
आज सुशासन दिवस के मउका म राज्य के जिला मन म आने-आने कारीकरम करके श्री वाजपेयी ल श्रध्दांजलि दे जावत हे।
वाजपेयी जयंती-प्रधानमंत्री
प्रधानमंत्री नरेंद्र मोदी ह आज मध्यप्रदेस के खजुराहो म केन अउ बेतवा नदी ल जोड़े वाले देस के पहिली परियोजना के आधारसिला रखिन। ए कारीकरम पूर्व प्रधानमंत्री भारतरत्न स्वर्गीय अटल बिहारी वाजपेयी के सौवां जयंती के मउका म राखे गे रिहीस। ए मउका म प्रधानमंत्री ह किहीन कि भारतीय जनता पार्टी बर सुशासन बस एक दिन के कारीकरम नइ हवय, फेर उंखर सरकार के चिन्हारी हे। आने दल के सरकार के संग भाजपा सरकार के तुलना करे के बात करत हुए श्री मोदी ह किहीन कि भाजपा के सरकार ह सुशासन बर सब्बो मानक म हमेसा कड़ा महिनत करे हे। भाजपा के सरकार ह लोगन मन बर समर्पित रेहे हे।
श्री वाजपेयी के सुरता ल साझा करत हुए श्री मोदी ह किहीन कि अटल जी सुशासन अउ सुसेवा बर हमेसा हमनके प्रेरणा रेहे हे।
प्रधानमंत्री ह एक हजार एक सौ अटल ग्राम सुशासन भवन के भूमिपूजन करीन अउ श्री वाजपेयी के सुरता म एक ठन डाक टिकिट अउ सिक्का घलो जारी करीन।
निकाय चुनाव-खर्च सीमा
प्रदेस म नगरीय निकाय चुनई म प्रत्यासी मन कोति ले खरचा के सीमा निर्धारित कर दे गेहे। ए बारे म नगरीय प्रशासन और विकास विभाग ह अधिसूचना जारी कर देहे, जेखर अनुसार पांच लाख ले जादा आबादी वाले नगर-निगम म महापौर अउ अध्यक्ष पच्चीस लाख रूपिया खरचा कर पाही। उहें, तीन ले पांच लाख जनसंख्या वाले नगर-निगम बर खरचा के सीमा बीस लाख रूपिया होही। एखरे जइसन तीन लाख ले कमती आबादी वाले नगर-निगम बर पंद्रह लाख रूपिया के सीमा राखे गेहे। उहें, पचास हजार या ओखर ले जादा आबादी वाले नगर-पालिका परषिद म महापौर अउ अध्यक्ष पद बर खरचा के सीमा दस लाख रूपिया होही। एखरे जइसन पचास हजार ले कम जनसंख्या वाले नगर-पालिका परिषद बर आठ लाख रूपिया के रासि तय करे गेहे। एखर अलावा नगर पंचायत म अध्यक्ष पद बर जादा ले जादा खरचा के सीमा छै लाख रूपिया होही।
शाह-कृषि सहकारिता
केंद्रीय सहकारिता मंत्री अमित शाह ह आज नई दिल्ली म दस हजार ले जादा नवा बहुउद्देसीय प्राथमिक कृषि सहकारी समिति मन ल देस ल समर्पित करीन। ए समिति मन पशुपालन अउ मछरी उद्योग ले घलो जुड़े हे। ए मउका म श्री शाह ह समिति मन ल पंजीकरण प्रमाण-पत्र, रूपे किसान क्रेडिट कार्ड अउ छोटे एटीएम घलो बांटिन।
कृषि विवि-कार्यशाला
अवइया बछर बर कृषि विज्ञान केंद्र मन के कार्ययोजना तियार करे बर रईपुर के इंदिरागांधी कृषि विश्वविद्यालय म दू दिनी कार्यसाला आयोजित होइस। कार्यसाला म गोठियात हुए कुलपति गिरीश चंदेल ह किहीन कि छत्तीसगढ़ म काम करत सब्बो कृषि विज्ञान केंद्र किसनहा मनके उन्नति बर उन्नत कृषि तकनीक के विकास करके उंखर आर्थिक विकास म सहभागी बनय। ओमन कृषि विज्ञान केंद्र के बड़का वैज्ञानिक मन ल जादा ले जादा कृषक उत्पादक समूह अउ महिला स्व-सहायता समूह बनाके किसनहा मनके आमदनी बढ़ाय वाले काम करे के निरदेस दीन।
बीजापुर-स्कूल
बीजापुर जिला म ‘‘स्कूल चले अभियान‘‘ के तहत बंद पड़े अट्ठाईस स्कूल म फेर पढ़ाई सुरू होगे हे, जिहां नौ सौ बांसठ लइका मन भर्ती घलो होगे हे। एमा बारह ठन स्कूल अइसने हे, जउन मन कभू माओवाद ले परभावित अति संवेदनसील क्षेत्र म रिहीस अउ करीब बीस बछर ले बंद पड़े रिहीस।
प्रशासन के पहल म अब उंहा लइका मन ल पढ़ाय जावत हे। एमा कावडगांव, मुदवेन्डी, डुमरीपालनार, हिरोली, हिरामगुण्डा, कुरूष अउ ईसुलनार जइसन गांव सामिल हे। ए इलाका मन म स्कूल खोलके जिला प्रशासन ह स्थानीय बेरोजगार युवा मन ल शिक्षादूत के रूप म भर्ती करे हे। लइका मन ल जरूरी सुविधा के संग पढ़ई-लिखई के समान घलो दे जात हे। इंहा नवा स्कूल भवन बनाय के काम सुरू होगे हे।
क्रिसमस
आज क्रिसमस के तिहार छत्तीसगढ़ समेत पूरा देस म बड़ उछाह संग मनाय जात हे। प्रभु यीशू के जनम के मउका म ए तिहार मनाय जाथे। राष्ट्रपति द्रौपदी मुर्मु, उपराष्ट्रपति जगदीप धनखड़, प्रधानमंत्री नरेंद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह लोगन ल क्रिसमस के बधई अउ सुभकामना दीन हे।
ऐति, राजधानी रईपुर समेत प्रदेस भर म क्रिसमस के तिहार धार्मिक उछाह संग मनाय जावत हे। आज राजधानी समेत प्रदेस के आने-आने सहर के चर्च मन म सुघ्घर सजावट करे गेहे, जिहां खास प्रार्थना सभा राखे गीस अउ लोगन ह एक-दूसर ल क्रिसमस के बधई दीन।
अउ अब मौसम के हाल...
प्रदेस के मौसम ह एक घांव फेर बदले हे, अउ कुछेक जिला म बरसा होय के आसार बाढ़ गेहे। अवइया चौबीस घंटा म बस्तर संभाग अउ ओखर ले लगे जिला म एक-दू जघा म थोरकुन बरसा होय अउ गरज-चमक के संग छींटा पड़े के संभावना हे। मौसम विज्ञानी एच. पी. चंद्रा ह आकाशवाणी समाचार ले गोठियात हुए बतइन कि अवइया तीन-चार दिन म उत्तर अउ दक्षिण छत्तीसगढ़ म बरसा होय के संभावना हे।
इही बीच, कांडागांव जिला म काली रतिहा ले रूक-रूक के होवत बरसा ह किसनहा मनके चिंता बढ़ा देहे। उहें, राजधानी रईपुर म आज दिनभर बदरा छाय रिहीस, जेखर सेति दिन के तापमान म बढ़ोत्तरी दरज होय हे।