प्रदेस म नगरीय निकाय चुनाव बर नगर पालिक निगम के महापौर अउ नगर पालिका परिषद अउ नगर पंचायत अध्यक्ष के पद के आरक्षण अवइया सत्ताईस दिसंबर के करे जाही। नगरीय प्रशासन अउ विकास विभाग के मुताबिक महापौर अउ अध्यक्ष मनके पद के आरक्षण के कार्यवाही राजधानी रायपुर के साईंस कॉलेज परिसर स्थित पंडित दीनदयाल उपाध्याय ऑडिटोरियम म सत्ताईस दिसंबर के बिहनिया दस बजे ले सुरू करे जाही।
उहें, पंचायत अउ ग्रामीण विकास विभाग डहार ले त्रिस्तरीय पंचायत चुनाव बर घलो आरक्षण के कार्यवाही बर समय-सारिणी घोषित कर दे गेहे। एखर मुताबिक अट्ठाईस अउ उनतीस दिसंबर के जिला पंचायत सदस्य, जनपद अध्यक्ष, जनपद सदस्य, सरपंच अउ पंच पद के आरक्षण के कार्यवाही अउ अधिसूचना के प्रकाशन कलेक्टर डहार ले करे जाही।
अइसने, राज्य के तैंतीस जिला पंचायत के अध्यक्ष पद के आरक्षण अउ माईलोगिन बर आरक्षण के कार्यवाही अवइया तीस दिसंबर के बिहनिया दस बजे ठाकुर प्यारेलाल पंचायत अउ ग्रामीण विकास संस्थान, निमोरा म करे जाही।
नवा रायपुर-मेडिसिटी प्रस्ताव
नवा रायपुर अटल नगर म अंतर्राष्ट्रीय स्तर के मेडिसिटी के स्थापना करे जाही। एखर बर अटल नगर विकास प्राधिकरण ह कार्यवाही सुरू कर देहे। नवा रायपुर के सेक्टर-सैंतीस म भूमि के चिन्हा करे गेहे। करीबन दू सौ एकड़ क्षेत्र म विकसित होवइया ए प्रोजेक्ट म निजी निवेस के सहायता ले करीबन पांच हजार बिस्तर क्षमता के स्वास्थ्य सुविधा के विकास करे जाही। मेडिसिटी के स्थापना बर हालेच म केन्द्र सरकार के उपक्रम इंफ्राटेक सर्विसेस लिमिटेड के संग नवा रायपुर अटल नगर विकास प्राधिकरण ह समन्वय बइठका घलो करे हे। ए बइठका म मेडिसिटी परियोजना के आने-आने मुद्दा उपर गोठबात करे गीस।
राज्यपाल-दीक्षांत समारोह
राज्यपाल रमेन डेका ह आज गरियाबंद जिला म एक निजी विश्वविद्यालय के दूसर दीक्षांत समारोह म सामिल होइन। ए मउका म ओमन दू सौ ले जादा छात्र-छात्रा मन ल डिग्री, उनतीस झन ल पीएचडी के उपाधि अउ तेरह झिन विद्यार्थी मन ल गोल्ड मेडल दीन। समारोह ल संबोधित करत राज्यपाल ह सिक्षा ल समाज म बदलाव लाने सबले प्रभावी साधन बतावत छात्र-छात्रा मन ले राज्य अउ राष्ट्र के विकास म योगदान देके अपील करीन। श्री डेका ह विद्यार्थी मन ले नवाचार, उद्यमिता अउ सामाजिक उत्थान म योगदान दे उपर जोर दीन। समारोह म लेफ्टिनेंट जर्नल डॉक्टर अशोक जिंदल मुख्य वक्ता के रूप म सामिल होइन। विश्वविद्यालय के कुलाधिपति विनय अग्रवाल, कुलपति आनंद महलवार अउ कुल सचिव बी.पी. भोल ह घलो समारोह ल संबोधित करीन।
श्रम मंत्री-राशि अंतरण
श्रम मंत्री लखनलाल देवांगन ह आज प्रदेस के छैसठ हजार ले जादा श्रमवीर मन ल आने-आने योजना के तहत करीबन उनचास करोड़ रूपिया के रासि उंखर खाता म डालीन। ए मउका म श्री देवांगन ह प्रदेस के जम्मों जिला म दाल-भात केन्द्र सुरू करे के घोसना करीन। संगेसंग ओमन श्रमिक मनके लइका मन ल श्रम कल्याण मंडल कोति ले कोचिंग दे जाय के बात कहिन। रायपुर के शंकर नगर स्थित निवास म राखे गे कार्यक्रम म श्रम मंत्री ह कहिन कि राज्य सरकार ह प्रदेस के हित म काम करत हे।
राजनांदगांव-स्वच्छता पखवाड़ा
राज्य सरकार के एक बछर पूरा होय के मउका म काली राजनांदगांव जिला के नगरीय निकाय म राखे गे स्वच्छता पखवाड़ा के समापन समारोह म वित्त मंत्री ओ.पी. चौधरी सामिल होइन। ए मउका म ओमन घर-घर कचरा इकट्ठा करे बर बीस ई-रिक्शा ल हरियर झंडा देखाके रवाना करीन। संगेसंग सफाई कर्मचारियों मन ल सौ नग ट्राइसिकल अउ सौ नग व्हील बेरो बांटीन।
भाजपा-बैठक
भारतीय जनता पार्टी के प्रदेस इकाई के बड़का नेता मनके आज नई दिल्ली स्थित छत्तीसगढ़ भवन म बइठका होइस। ए बइठका म प्रदेस के विकास ल नवा दिसा दे बर सरकार डहार ले चलाय जावत योजना अउ जनहित के कार्यक्रम के समीक्षा करे के संगेसंग अवइया योजना ल लेके घलो गोठबात करे गीस। एखर संग संगठन के काम ल लेके घलो चर्चा करे गीस। बइठका म मुख्यमंत्री विष्णुदेव साय, उपमुख्यमंत्री अरूण साव, उपमुख्यमंत्री विजय शर्मा अउ प्रदेस अध्यक्ष किरण सिंह देव समेत संगठन के प्रमुख पदाधिकारी सामिल होइन।
राष्ट्रीय उपभोक्ता दिवस
आज राष्ट्रीय उपभोक्ता दिवस हरय। ए मउका म छत्तीसगढ़ समेत देसभर म आने-आने कार्यक्रम आयोजित करे जावत हे। केन्द्रीय उपभोक्ता कार्य मंत्री प्रहलाद जोशी ह आज वर्चुअल माध्यम ले कई ठिन पहल के सुरूवात करीन। एखर उद्देश्य ई-कॉमर्स प्लेटफॉर्म म डार्क पैटर्न के पहिचान करना अउ उपभोक्ता मन ल सशक्त बनाना हे। श्री जोशी ह उपभोक्ता मनके हित के सुरक्षा अउ ई-कॉमर्स प्लेटफॉर्म म डार्क पैटर्न के पहिचान करे बर जागो ग्राहक जागो ऐप, जागृति ऐप अउ जागृति डैशबोर्ड सुरू करीन।
छत्तीसगढ़ के मुख्यमंत्री विष्णुदेव साय ह कहिन कि प्रदेस म उपभोक्ता मनके अधिकार के संरक्षण बर राज्य अउ जिला स्तर म आयोग संचालित हे। केन्द्र सरकार ह बाढ़त ऑनलाइन खरीददारी ल ध्यान म राखत ई-कॉमर्स संबंधी नियम घलो बनाय हे। श्री साय ह कहिन कि ग्राहक मन ल अपन अधिकार के प्रति जागरूक अउ सजग रहना चाही।
ओति, बेमेतरा जिला के ग्राम कठिया, जेवरा अउ बीजाभाठ म विधिक जागरूकता सिविर के आयोजन करे गीस। सिविर म मौजूद लोगन मन ल राष्ट्रीय उपभोक्ता दिवस के जानकारी देके संगेसंग उपभोक्ता संरक्षण अधिनियम के बारे म बताय गीस।
क्रिसमस
प्रभु यीशु के जनम दिन के तिहार क्रिसमस ल काली मनाय जाही। ए तिहार के तियारी प्रदेसभर म जोर-सोर ले चलत हे। राजधानी रईपुर समेत प्रदेस के कतकोन जघा म स्थित गिरिजा घर म आज ले खुसी के महौल देखे जावत हे। गिरिजा घर मन ल सुघ्घर ढंग ले सजाय के संगेसंग झांकी घलो सजाय आज रतिहा गिरिजा घर मन म बिसेस प्रार्थना करे जाही। उहें, काली प्रभु यीशु के जनम के खुसी मनाय जाही। तिहार के तियारी ल लेके ईसाई समाज के मन जोर-सोर ले जुटे हवय। बाजार मन म क्रिसमस ट्री अउ सांता क्लॉज असन कपड़ा अउ आने-आने सजावटी सामान मन ह बाजार के रौनक ल बढ़ा दे हवय।
राज्यपाल रमेन डेका अउ मुख्यमंत्री विष्णुदेव साय ह प्रभु यीशु के जनम दिन क्रिसमस के मउका म प्रदेसवासी मन ल बधई अउ सुभकामना दीन हे।
अटल बिहारी वाजपेयी-जयंती
पूर्व प्रधानमंत्री भारतरत्न अटल बिहारी वाजपेयी के काली जयंती हरय। स्वर्गीय वाजपेयी के जन्मदिवस ल सुशासन दिवस के रूप म घलो मनाय जाथे। ए मउका म प्रदेसभर म आने-आने कार्यक्रम राखे जाही।
राज्यपाल रमेन डेका अउ मुख्यमंत्री विष्णुदेव साय ह स्वर्गीय वाजपेयी ल नमन करे हे। राज्यपाल ह अपन संदेस म किहीन हे कि श्री वाजपेयी एक महान राजनेता, सुघ्घर मनखे, वक्ता, लेखक अउ बहुमुखी प्रतिभा के धनी होय के संगेसंग एक जननायक घलो रिहीन।
ट्रांसजेंडर-कार्यशाला
ट्रांसजेंडर मन ल नागरिक अधिकार, सुरक्षा, शिक्षा, रोजगार अउ स्वास्थ्य सुविधा के जानकारी दे बर काली रईपुर विकास प्राधिकरण म कार्यशाला के आयोजन करे गीस। कार्यशाला ल नेशनल काउंसिलिंग फॉर ट्रांसजेंडर कौंसिल के सदस्य विद्या राजपूत, रवीना बरिहा अउ पप्पी देवनाथ ह संबोधित करीन। ओमन बतईन कि केन्द्र सरकार ह बछर दू हजार उन्नीस म ‘‘ट्रांसजेंडर व्यक्ति अधिनियम‘‘ पारित करके किन्नर मन ल समाज म समानता अउ सम्मान के अधिकार देहे। एखर तहत लिंग पहिचान के अधिकार, शिक्षा, रोजगार, स्वास्थ्य सेवा, भेदभाव के खिलाफ सुरक्षा, पासपोर्ट अउ आने-आने दस्तावेज देवाय के अधिकार सामिल हे।
अउ अब मौसम के हाल….
प्रदेस म काली बस्तर संभाग के एक-दू जघा म गरज-चमक के संग थोरबहुत पानी गिरे के संभावना हे। मौसम विज्ञानी एच.पी. चन्द्रा ह बतईन कि एक पश्चिमी विक्षोभ पंजाब अउ ओखर ले लगे क्षेत्र म विस्तारित हे। एखर असर ले प्रदेस म हवा के दिसा म बदलाव होय हे, जेखर सेती नमी आवत हे। न्यूनतम तापमान म कोनो बिसेस बदलाव होय के संभावना नइ हे।