प्रधानमंत्री नरेंद्र मोदी ह किहीन हे कि पाछू डेढ़ बछर म देस के करीबन दस लाख युवा मन ल सरकारी नौकरी देवाय गेहे। ओमन आज वीडियो कान्फ्रेंसिंग ले इकहत्तर हजार ले जादा नवा नियुक्त करमचारी मन ल नियुक्ति पत्र बांटिन। प्रधानमंत्री ह किहीन कि ए रोजगार साफगोई संग देवाय जात हे, अउ नवा नियुक्त करमचारी समर्पण अउ सत्यनिष्ठा संग राष्ट्र के सेवा करत हे। श्री मोदी ह किहीन कि पाछू दस बछर ले देस के आने-आने मंत्रालय विभाग अउ संस्था म सरकार नौकरी देवाय के अभियान चलाय जात हे। प्रधानमंत्री ह किहीन कि रोजगार मेला युवा मन ल मजबूत बनाय के संगेसंग उंखर बर संभावना के दुवार खोलत हे।
श्री मोदी ह किहीन कि सरकार के नीति अउ फैइसला के सेति ग्रामीण भारत म रोजगार अउ स्व-रोजगार के नवा मउका बनाय जात हे। ओमन किहीन कि सरकार ह मातृ भाषा म शिक्षा अउ परीक्षा के मंजूरी देके अउ तेरह ठिन भाषा म भर्ती परीक्षा के सुविधा देवाय बर गांव के युवा अउ सीमांत समुदाय के भाषा संबंधी बाधा ल हटाय गेहे। ओमन किहीन कि भारत बछर दू हजार सैंतालिस तक विकसित राष्ट्र बने खातिर प्रतिबध्द हवय। प्रधानमंत्री ह किहीन कि सरकार ह हरेक नागरिक ल बीमा सुरक्षा देवाय बर बीमा सक्ति योजना सुरू करे गेहे अउ गांव-गंवई म रोजगार के मउका देवाय जात हे। ओमन किहीन कि ड्रोन दीदी, लखपति दीदी अउ बैंक सखी योजना जइसन परयास ले घलो कृषि अउ ग्रामीण क्षेत्र म रोजगार मिलत हे।
छत्तीसगढ़-रोजगार मेला
आज रईपुर जिला के भिलाई गांव स्थित केंद्रीय रिजर्व पुलिस बल के गु्रप केंद्र म घलो रोजगार मेला लगाय गीस। एमा कतकोन केंद्रीय सशस्त्र बल अउ आने केंद्रीय विभाग के चुने गे चार सौ ले जादा युवा मन ल नियुक्ति पत्र बांटे गीस। ए कारीकरम म मौजूद केंद्रीय अवासन अउ सहरी कार्य राज्यमंत्री तोखन साहू ह किहीन कि रोजगार मेला ले देस के दस लाख युवा मन ल रोजगार देवाय के प्रावधान राखे गेहे।
श्री साहू ह किहीन कि प्रधानमंत्री नरेंद्र मोदी के रोजगार ल सबले पहिली प्राथमिकता देके प्रतिबध्दता ल पूरा करे खातिर, ए रोजगार मेला ए ऐतिहासिक कदम हवय। रोजगार मेला आगू घलो रोजगार देवाय बर काम करही अउ युवा मन ल ओखर सशक्तिकरण अउ राष्ट्रीय विकास म भागीदारी बर मउका दिही।
‘‘मुख्यमंत्री-इन्वेस्टर कनेक्ट मीट‘‘
नई दिल्ली म राखेगे ‘छत्तीसगढ़ इन्वेस्टर कनेक्ट‘ म मुख्यमंत्री विष्णुदेव साय ह देस के परमुख उद्योगपति अउ निवेसक मन ल छत्तीसगढ़ म निवेस करे बर नेवता दीन। कारीकरम म सामिल होय परमुख उद्योगपति मनले छत्तीसगढ़ सरकार ल पंद्रह हजार एक सौ चौरासी करोड़ रूपिया के निवेस प्रस्ताव घलो मिलिस। मुख्यमंत्री श्री साय ह किहीन कि छत्तीसगढ़ के नवा औद्योगिक नीति उद्योग ल टेक्स म छूट, भुंईया के उपलब्धता, बिजली म छूट के संगेसंग सिंगल विंडो क्लियरेंस जइसन सुविधा देवत हे। नवा औद्योगिक नीति म बिसेस छूट अउ प्रोत्साहन पैकेज सामिल हे। मुख्यमंत्री ह किहीन कि बस्तर म औद्योगिक विकास के बढ़वार बर कोर सेक्टर के स्टील ईकाई अउ आने उद्योग ल बड़ राहत देहे।
उहें, गांव नियानार म एक सौ अट्ठारा एकड़ भुंईया म नवा औद्योगिक क्षेत्र विकसित करे जात हे। मुख्यमंत्री ह बतइन कि उद्योगपति मन ल राज्य सरकार कोति ले बिसेस सहूलियत दे जावत हे।
माओवादी गिरफ्तार-हत्या
कांकेर जिला म पुलिस ह माओवादी प्रमुख प्रभाकर उर्फ बालमुरी नारायण राव ल गिरफ्तार करे हे। प्रभाकर राव पाछू चालीस बछर ले नक्सल संगठन म सक्रिय रिहीस। एखर उपर पच्चीस लाख रूपिया के इनाम घोसित रिहीस हे। जानकारी के मुताबिक पाछू कुछेक दिन ले प्रभाकर के कांकेर क्षेत्र म होय के खबर मिले रिहीस। अंतागढ़ पुलिस कोति ले करे गे कार्रवाई म प्रभाकर ल गिरफ्तार करे गीस। बस्तर के पुलिस महानिरीक्षक सुदंरराज पी. ह बतइन कि प्रभाकर के गिरफ्तारी पुलिस बल के बड़े सफलता हे।
इही बीच, बीजापुर जिला म माओवाद कोति ले गांव के तीन झन मनखे के हत्या के मामला आगू आय हे। माओवादी मन ह गंगालूर थाना क्षेत्र म जनअदालत लगाके ए तीनो के हत्या कर दीन। एमा ले एक मनखे ल रेड्डी गांव के सप्ताहिक हाट ले माओवादी मन ह अपहरण करे रिहीन, जेखर सव आज बरामद कर ले गेहे। उहें, कोरचोली गांव ले ईतवार के माओवादी मन ह दू झिन के अपहरण करीन अउ ओखरो हत्या कर दीन। पुलिस मामला के जांच करत हे।
उहें, इही जिला के तर्रेम थाना क्षेत्र म सुरक्षा बल ह माओवादी मन कोति ले बनाय गे एक नक्सली स्मारक ल ध्वस्त कर दीन। ए स्मारक गांव कोमटपल्ली के जंगल म बने रिहीस। डीआरजी, एसटीएफ, कोबरा, बीडीएस अउ सीआरपीएफ के संयुक्त पार्टी ह नक्सल ऑपरेसन के बेरा एला ध्वस्त कर दीन।
आईईडी-बरामद
नारायणपुर जिला म नक्सल विरोधी अभियान म निकले डीआरजी-बीएसएफ के टीम ह पंद्रह ठिन बम बरामद करे हे। खबर के मुताबिक कच्चापाल कैंप ले सुरक्षा बल के टीम तोकमुसेर गांव कोति गस्त म निकले रिहीन। इही बेरा पहाड़ी म सुरक्षा बल ह माओवादी मन कोति ले लगाय गे करीबन पांच-पांच किलो पंद्रह ठिन आईईडी ल बरामद करीन, जेला बम निरोधक दस्ता ह मउकच म नष्ट कर दीन। दू दिन पहलीच माओवादी मन ह इही जघा म आईईडी लगाय रिहीन, जेखर चपेट म आय ले दू झिन जवान घायल होगे रिहीन।
किसान-दिवस
आज पूर्व प्रधानमंत्री चौधरी चरण सिंह के जयंती हे। ए दिवस ल राष्ट्रीय किसान दिवस के रूप म मनाय जात हे। उपराष्ट्रपति जगदीप धनखड़, प्रधानमंत्री नरेंद्र मोदी ह चौधरी चरण सिंह ल श्रध्दांजलि दीन हे। मुख्यमंत्री विष्णुदेव साय ह घलो सबो किसान मन ल राष्ट्रीय किसान दिवस के बधई अउ सुभकामना दीन।
तीजन बाई-इलाज
मुख्यमंत्री विष्णुदेव साय के पहल म पद्म विभूषण तीजन बाई के रईपुर अखिल भारतीय आयुर्विज्ञान संस्थान-एम्स म इलाज सुरू हो गेहे। पाछू कुछ समय ले ओमन बीमार चलत हे। अभी तक बिसेसज्ञ मन के देखरेख म तीजन बाई के इलाज ओखर भिलाई के घरे म करे जात रिहीस। तीजन बाई के देखभाल बर प्रशासन कोति ले मेडिकल ऑफिसर अउ फिजियोथिरेपिस्ट के सुविधा दे गे रिहीस। डॉक्टर के टीम उंखर स्वास्थ्य जांच करके रिपोर्ट तियार करत रिहीस हे।
खबर के मुताबिक मुख्यमंत्री ह तीजन बाई के बीमारी के पता चलते उंखर इलाज खातिर स्वास्थ्य विभाग ल निरदेस दे रिहीन। पाछू दीन स्वास्थ्य मंत्री श्याम बिहारी जायसवाल तीजन बाई के स्वास्थ्य संबंधी जानकारी लीन अउ उंखर ले भेंट करे बर पहुंचे रिहीन अउ पांच लाख रूपिया के आर्थिक मदद देवाय रिहीन।
पीआरएसआई-सम्मेलन
रईपुर म राखेगे राष्ट्रीय जनसंपर्क प्रैक्टिसनर्स एसोसिएसन-पीआरएसआई के छियालीसवां सम्मेलन के समापन समारोह म उपमुख्यमंत्री अरूण साव सामिल होइन। ए मउका म ओमन किहीन कि ए छत्तीसगढ़ बर सौभाग्य के बात हे कि पीआरएसआई ह अपन छियालीसवां अधिवेसन बर छत्तीसगढ़ ल चुने हे। ओमन किहीन कि जनसंपर्क के ताकत संचार कौसल म हे जनता तक अपन बात पहुंचाय के जनसंपर्क अद्भुत माध्यम हे, जेमा सरलग बढ़वार होवत हे। तीन दिवसीय ए राष्ट्रीय सम्मेलन म जनसंपर्क के क्षेत्र म बने काम करे खातिर कतकोन संस्था अउ मनखे मन ल इनाम दे गीस।
कांग्रेस-घेराव
प्रदेस म कानून व्यवस्था के सेति अउ आने-आने विभाग भर्ती म कथित अनियमितता के खिलाफ युवा कांग्रेस कार्यकर्ता मन ह आज रईपुर म मुख्यमंत्री निवास घेरे के परयास करीन। ओमन ल रोके बर रईपुर पुलिस कोति ले जघा-जघा बैरिकेट्स लगाय गे रिहीस। घेराव के पहिली नगर-निगम मुख्यालय के तीर कार्यकर्ता मन ह एक सभा राखिन, जेमा पूर्व मुख्यमंत्री भूपेश बघेल, नेता प्रतिपक्ष डॉक्टर चरणदास महंत, प्रदेस अध्यक्ष दीपक बैज, युवा कांग्रेस के राष्ट्रीय अध्यक्ष उदयभानू चिब, समेत कतकोन बड़का नेता सामिल होइन। ए दउरान पूर्व मुख्यमंत्री भूपेश बघेल ह आरोप लगाइन कि नक्सलवाद के नांव म आदिवासी अउ लइका मनके हत्या होवत हे। ओमन महतारी वंदन योजना अउ पुलिस भर्ती म घलो सवाल उठाइन। उहें, कांग्रेस अध्यक्ष दीपक बैज ह राज्य के भाजपा सरकार उपर छत्तीसगढ़ के युवा मन संग खिलवाड़ करे के आरोप लगाइन।
सभा के बाद कार्यकर्ता मन ह मुख्यमंत्री निवास के घेराव करे बर आगू बढ़िन त, पुलिस ह ओमन ल बीच म रोक दीस। घुस्साय कार्यकर्ता मन ह बैरिकैड ल तोड़े के परयास करीन, त पुलिस ह पानी के बौछार करके भीड़ ल तितर-बीतर करीन।