प्रधानमंत्री नरेंद्र मोदी काली नवनियुक्त युवा मन ल वीडियो कान्फ्रेंसिंग के माध्यम ले 71 हजार ले जादा नियुक्ति पत्र दिहीं। ए मउका म प्रधानमंत्री लोगन मन ल संबोधित घलो करही।
रोजगार मेला देसभर म 45 ठिन जघा मन म आयोजित करे जाही। केंद्र सरकार के आने-आने मंत्रालय अउ विभाग मन म भर्ती करे जावत हे। रोजगार मेला, रोजगार सृजन ल प्राथमिकता देके प्रधानमंत्री के वचनबध्दता ल पूरा करे के दिसा म एक ठिन कदम हवय। देसभर ले चुने गे नवा युवा मन ल गृह मंत्रालय, डाक विभाग, उच्चतर शिक्षा विभाग, स्वास्थ्य अउ परिवार कल्याण मंत्रालय के संगेसंग वित्तीय सेवाएं विभाग समेत आने-आने मंत्रालय अउ विभाग मन म नियुक्ति करे जाही।
छत्तीसगढ़ म रईपुर जिला के आरंग म केंद्रीय रिजर्व पुलिस बल के गु्रप केंद्र म घलो काली रोजगार मेला के आयोजन करे जाही। जेमा मुख्य अतिथि के रूप म केंद्रीय अवासन अउ सहरी कार्य राज्यमंत्री तोखन साहू सामिल होही। ए दउरान केंद्र सरकार अउ आने विभाग के विभागाध्यक्ष मन डहार ले 400 ले जादा केंद्रीय सशस्त्र बल अउ आने विभाग म चुने गे अभ्यर्थी मन ल नियुक्ति पत्र बांटे जाही।
मुख्यमंत्री-टीबी
मुख्यमंत्री विष्णुदेव साय ह काली केंद्रीय स्वास्थ्य मंत्री जे.पी.नड्डा के अध्यक्षता म ‘‘टीबी मुक्त भारत अभियान‘‘ के समीक्षा करे खातिर आयोजित वर्चुअल बइठका म सामिल होइन। ओमन छत्तीसगढ़ म टीबी मरीज मन के स्क्रीनिंग, इलाज अउ निदान बर करे जावत कामबूता के जानकारी दीन।
मुख्यमंत्री ह किहीन कि छत्तीसगढ़ म टीबी मुक्त भारत अभियान के संचालन पूरा मुस्तैदी के संग करे जावत हे। 7 दिसंबर ले ए अभियान के सुरूआत के बाद ले अब तक 11 लाख 23 हजार ले जादा लोगन मनके स्क्रीनिंग करे गीस। प्रदेस म निक्षय पोषण योजना के तहत टीबी मरीज मन के बैंक खाता म पोषण आहार बर एक हजार रूपिया के रासि के भुगतान करे जावत हे।
मुख्यमंत्री ह ए घलो बतइन कि बस्तर अंचल के तोकापाल क्षेत्र म स्वास्थ्य कर्मी मन स्थानीय बोली हल्बी म गीत-संगीत के जरिया ले अभियान के जोरदरहा प्रचार-प्रसार करत हवय। ए अभियान म 963 निक्षय सिविर आयोजित करे गे हवय।
मुख्यमंत्री-इन्वेस्टर कनेक्ट
मुख्यमंत्री विष्णुदेव साय ह आज दिल्ली प्रवास म रवाना होगिन हवय। श्री साय काली नई दिल्ली म आयोजित इन्वेस्टर कनेक्ट कारीकरम म सामिल होही। ए दउरान ओमन उद्योगपति मन ले मुलाकात करके नवा औद्योगिक नीति उपर चर्चा करही। संगेसंग प्रदेस म निवेस करे खातिर ओमन ल नेवता दिहीं।
कायाकल्प-सम्मान
मुख्यमंत्री विष्णुदेव साय ह काली रईपुर के मेडिकल कॉलेज म आयोजित कायाकल्प राज्य स्तरीय पुरस्कार समारोह म दस ठिन स्वास्थ्य योध्दा अउ टीबी मुक्त ग्राम पंचायत मन ल सम्मानित करीन। ए मउका म मुख्यमंत्री ह चिकित्सकीय संवर्ग के नवा भर्ती होय स्वास्थ्य कर्मी मन ल नियुक्ति पत्र दीन। मुख्यमंत्री ह कारीकरम ल संबोधित करत किहीन कि प्रदेस म स्वास्थ्य सुविधा के तेजी ले बाढ़त हे।
जानबा के मुताबिक कायाकल्प स्वच्छ अस्पताल योजना के चलत आने-आने श्रेणी म बेमेतरा जिला अस्पताल ल पहिली पुरस्कार, कांंडागांव जिला अस्पताल ल दूसरइया पुरस्कार अउ जगदलपुर जिला अस्पताल ल कंसिस्टेंसी पुरस्कार दे गे हवय। अइसने सामुदायिक स्वास्थ्य केंद्र दुलदुला ल पहिली अउ सामुदायिक स्वास्थ्य केंद्र पंडरिया ल दूसरइया स्थान प्राप्त होइस हे। उहें, सहरी प्राथमिक स्वास्थ्य केंद्र राजातालाब रईपुर ल पहिली अउ सहरी प्राथमिक स्वास्थ्य केंद्र राजकिशोर नगर बिलासपुर ल दूसरइया स्थान मिले हवय।
वन संरक्षण रिपोर्ट-छत्तीसगढ़
भारतीय वन सर्वेक्षण रिपोर्ट- दू हजार तेईस के मुताबिक छत्तीसगढ़ ह संयुक्त वन अउ वृक्ष आवरण वृध्दि म देस म पहिली स्थान प्राप्त करीस हवय। भारतीय वन सर्वेक्षण रिपोर्ट के मुताबिक छत्तीसगढ़ के कुल वन आवरण क्षेत्र 55 हजार 8 सौ 12 वर्ग किलोमीटर हवय।
मुख्यमंत्री विष्णुदेव साय ह किहीन हे कि ए महत्वपूर्ण उपलब्धि वन अउ जलवायु परिवर्तन विभाग के सतत संरक्षण अउ संघरा प्रयास के परिणाम हवय। संगेसंग ए ह प्रदेसवासी मन के जागरूकता अउ पर्यावरण खातिर उंखर जिम्मेदारी ल दर्साथे, जउन छत्तीसगढ़ ल हरित अउ समृध्द बनाय म योगदान देवत हवय।
जानबा के मुताबिक बछर दू हजार इक्कीस के तुलना म देस के वन अउ वृक्ष आवरण म एक हजार चार सौ 45 वर्ग किलोमीटर के बढ़त होय हे, जेमा वनावरण म 156 वर्ग किलोमीटर अउ वृक्ष आवरण म एक हजार दू सौ नवासी वर्ग किलोमीटर के बढ़त सामिल हवय।
माओवादी-गिरफ्तार
सुकमा जिला के चिंतागुफा थाना क्षेत्र ले सुरक्षा बल ह एक झिन माईलोगिन समेत 5 झिन माओवादी मन ल गिरफ्तार करे हवय। ए माओवादी मन उपर 5 लाख रूपिया के इनाम घोसित रिहीस। डिस्ट्रिक्ट रिजर्व गार्ड-डी.आर.जी., जिला पुलिस बल अउ केंंद्रीय रिजर्व पुलिस बल-सी.आर.पी.एफ. के मिले-जुले टीम ल माओवादी होय के सूचना म दुलेड़ गांव अउ तीर-तखार क्षेत्र डहार रवाना करे गे रिहीस। इही दउरान सुरक्षा बल ह ए माओवादी मन ल पकड़िस। ए माओवादी बहुत बेरा ले माओवादी संगठन म सक्रिय रिहीन अउ एमन उपर कई ठिन हिंसक वारदात म सामिल रहे के आरोप हवय।
वीर बाल दिवस
प्रदेस के जम्मो स्कूल मन म अवइया 26 दिसंबर के ‘‘वीर बाल दिवस‘‘ मनाय जाथे। स्कूल शिक्षा विभाग के मुताबिक राज्य शासन ह ए बछर घलो 26 दिसंबर ल वीर बाल दिवस के रूप म मनाय के निर्णय लीस हवय। एखर तहत स्कूल मन म आने-आने कारीकरम के आयोजन करे जाही। ए कारीकरम के मुख्य उद्देस्य लइका मन के भीतर वीरता अउ बलिदान के भावना ल प्रोत्साहित करना हे। 26 दिसंबर के प्रदेस के जम्मों स्कूल मन म चित्रकारी, निबंध लेखन, कहानी सुनाना, कविताएं, वाद-विवाद, डिजिटल प्रस्तुतियां अउ भाषण प्रतियोगिता आयोजित करे जाही।
केंद्रीय जेल-योग शिविर
रईपुर के केंद्रीय जेल म काली पहिली अंतर्राष्ट्रीय ध्यान दिवस के मउका म कैदी मन खातिर बिसेस धियान अउ योग सिविर के आयोजन करे गीस। सिविर म कैदी मन ल धियान, प्राणायाम अउ योग के आने-आने तरीका के अभ्यास कराय गीस। ए धियान अउ योग सिविर के संचालन, आर्ट ऑफ लिविंग के बड़का प्रसिक्षक अजय सिंह ह करीन। ओमन बतइन कि संयुक्त राष्ट्र ह 21 दिसंबर ल अंतर्राष्ट्रीय धियान दिवस घोसित करीस हे। ओमन धियान ल मन के सांति अउ भावनात्मक स्थिरता के एक ठिन सुघ्घर जरिया बतइन। ए योग अउ धियान सिविर म दू सौ ले जादा कैदी अउ जेल के अधिकारी मन ह भाग लीन।
अउ अब मौसम के हाल…
राजधानी रईपुर समेत प्रदेस म अवइया चौबीस घंटा के दउरान न्यूनतम तापमान म हल्का गिरावट आय के संभावना हे। मौसम विभाग के मुताबिक बंगाल के खाड़ी ले नमी आय के सेति दक्षिण छत्तीसगढ़ म हल्का बादल छाय रइही। एखर परभाव ले प्रदेस के न्यूनतम तापमान म हल्का गिरावट हो सकत हे। उहें, 26 दिसंबर के बाद एक नवा पश्चिमी विक्षोभ के परभाव ले 27 अउ 28 दिसंबर के उत्तर छत्तीसगढ़ म हल्का बरसा होय के संभावना घलो जताय गे हवय।