राज्यपाल-दीक्षांत समारोह
राज्यपाल रमेन डेका ह आज रईपुर के एक निजी विश्वविद्यालय के दूसरइया दीक्षांत समारोह म सामिल होइन। समारोह म ओमन इक्कीस झन विद्यार्थी ल स्वर्ण पदक अउ अट्ठारा विद्यार्थी मन ल रजत पदक समेत तीन सौ बांसठ झन ल डिग्री प्रदान करीन। कारीकरम म गोठियात हुए राज्यपाल ह किहीन कि जीवन म आगू बढ़े बर सिखना जरूरी हे। ओमन किहीन कि सुघ्घर मनखे बनव काबर कि, उही मन बढ़िया समाज के निर्माण करथे। ओमन विद्यार्थी मनले किहीन कि अपन लक्ष्य ला पाय बर कड़ा मेहनत अउ लगन ले काम करंव।
अरूण साव-सेमिनार
उपमुख्यमंत्री अरूण साव ह आज रईपुर म होम्योपैथी रिसर्च और डेवलपमेंट एसोसिएसन डहार ले राखेगे नेशनल होम्योपैथी सेमिनार म सामिल होइन। ए मउका म ओमन किहीन कि होम्योपैथी ह प्रतिरोधक क्षमता ल बढ़ाके बीमारी ल ठीक करे म सक्षम हे। श्री साव ह किहीन कि देस के अच्छा रिसर्च अउ मेडिकल संस्थान के अध्ययन करके प्रदेस म घलो होम्योपैथी के एक बढ़िया मेडिकल कॉलेज अउ रिसर्च सेंटर सुरू करे जाही। कारीकरम म स्वास्थ्य मंत्री श्याम बिहारी जायसवाल ह घलो उपस्थित रिहीस।
दुर्घटना
बस्तर जिला के दरभा क्षेत्र म आज एक मिनी ट्रक ह पलट गे। ए घटना म तीन माईलोगिन समेत चार झन मनखे के मउत होगे। उहें, लगभग तीस झन घायल होगे हे। बताय जावत हे, कि ए मिनी ट्रक म लगभग पैंतालिस झन संवार रिहीन, जेन मन बाजार जावत रिहीस। लहुटत हुए चांदामेटा अउ कोलेंग गांव के बीच मिनी ट्रक ह पलट गे। घटना के जानकारी पाके सीआरपीएफ कैम्प के जवान मन मउका म पहुंचिन अउ घायल मन ल अस्पताल पहुंचाइन।
ऐति, सूरजपुर जिला म रेलवे फाटक पार करत हुए मोटर साइकिल संवार दू झन युवक मालगाड़ी के चपेट म आगे, एमा एक झन के मउत होगे। उहें, दूसरइया ह घायल हे। जानकारी मिले हे कि करंजी चौकी क्षेत्र के बतरा रेलवे फाटक ले मालगाड़ी के निकले के बीच रेलवे क्रासिंग ले एक युवक मन ट्रेक पार करत रिहीस, उही बीच एमन चपेट म आ गीस।
उहें, दुरूग जिला के मोहंदी गांव के तीर काली संझा स्कूल ले घर लहुटत एक नोनी लइका ल हाईवा ह अपन चपेट म ले लीस, जेखर ले ओखर मउका म ही मउत होगे।
ऐति, रायगढ़ म जिंदल रोड म वृंदावन चौक के तीर पाछू रतिहा ट्रेलर ले एक मोटर साइकिल ह टकरागे। मोटर साइकिल संवार के मउका म ही मउत होगे।
जांजगीर-चांपा जिला म राछा रोड के तीर पाछू रतिहा यात्री बस अउ कैप्सूल गाड़ी म होय टक्कर ले तेरह झन ल लागे हे। बस म बीस झन बइठे रिहीस। घायल मन ल नवागढ़ अस्पताल म भर्ती कराय गेहे।
सुकमा बीजापुर-कैम्प स्थापना
सुकमा अउ बीजापुर जिला म सुरक्षाबल के दू नवा कैम्प बनाय गेहे। पहिली कैम्प सुकमा के गढ़ गोमगुड़ा अउ दूसरइया कैम्प बीजापुर के कोंडापल्ली के वाटेवागू म सुरू होय हे। ए मउका म दूनों जिला के पुलिस अधीक्षक, सीआरपीएफ के डीआईजी अउ कोबरा बटालियन के कमांडेंट जुरे रिहीन। कैम्प खुले ले सुरक्षा बल के पहुंच अब सुकमा म रायगुड़म ले आगू अउ बीजापुर म कोंडापल्ली ले आगू तक होगे हे।
ट्रेन परिचालन
दक्षिण पूर्व रेलवे के चक्रधरपुर मंडल के चक्रधरपुर-लोटापहाड़ रेलवे स्टेसन के बीच मरम्मत के काम करे जाही। जेखर सेति तेईस अउ चौबीस दिसंबर के कुछेक रेलगाड़ी के अवई-जवई प्रभावित रइही। चौबीस दिसंबर के बिलासपुर-टाटा नगर एक्सप्रेस रद्द रइही। उहें, तेईस दिसंबर के पुणे-सांतरागाछी एक्सप्रेस अउ हजूर साहिब नान्देड-सांतरागाछी एक्सप्रेस ढाई घंटा देरी ले छुटही। एखरे जइसन चौबीस दिसंबर के हावड़ा-सीएसएमटी दुरन्तो एक्सप्रेस अपन समय ले छै घंटा देरी ले चलही।
युवा कांग्रेस-घेराव
प्रदेस म बाढ़त अपराध अउ नशाखोरी के विरोध म युवा कांग्रेस तेईस दिसंबर के मुख्यमंत्री निवास के घेराव करही। आज कांग्रेस मुख्यालय राजीव भवन म पत्रकार मन संग गोठियात हुए युवा कांग्रेस के प्रदेस प्रभारी शेषनारायण ओझा ह किहीन कि प्रदेस म अपराध अउ नसाखोरी सरलग बाढ़त हे, जेखर उपर राज्य सरकार ह लगाम नइ लगाय सकत हे। ओमन बतइन कि तेईस दिसंबर के मुख्यमंत्री निवास के घेराव के बाद चौबीस दिसंबर के बिलासपुर म नसा के खिलाफ हॉफ मैराथन होही। जेमा कांग्रेस के अब्बड़ अकन बड़का नेता मन भाग लिही।
युवा महोत्सव
रईपुर के इंदिरागांधी कृषि विश्वविद्यालय म उन्नीस दिसंबर ले जारी अंतर-महाविद्यालयीन युवा महोत्सव मड़ई म छात्र मन ह अपन-अपन जिला के लोक संस्कृति, लोक परब, रीति-रिवाज अउ पर्यटन स्थल के मनमोहक झांकी प्रस्तुत करीन। एमा पर्यावरण अउ जल संरक्षण, नारी सशक्तिकरण, सुपोषण जइसन बिसय उपर संदेस घलो दीन। ए बेरा छात्र मन ह पारंपरिक परिधान म कर्मा, पंथी, राउत नाचा, सरगुजिहा नृत्य, मुड़िया अउ जंवारा नृत्य के संग ही गौरी-गउरा जइसे प्रस्तुति दीन। काली बाईस दिसंबर के ए महोत्सव के समापन होही।
माओवादी गिरफ्तार
दंतेवाड़ा जिला के अरनपुर पुलिस ह सर्चिंग म तीन झिन माओवादी ल पकडे़ हे, जेमा ले एक माओवादी कोवासी देवा उपर एक लाख रूपिया के इनाम घोसित रिहीस। ए तीनों झन उपर मुलेर रद्दा तीर आईईडी बिस्फोट के घटना म सामिल रहय के आरोप हे। एमन के तीर ले इलेक्ट्रानिक डेटोनेटर अउ पावर बैटरी बरामद होय हे।
आरक्षक आत्महत्या
खैरागढ़-छुईखदान-गंडई जिला के जालबांधा पुलिस चौकी म पदस्थ आरक्षक अनिल रत्नाकर ह फांसी लगाके आत्महत्या कर लीस हे। आरक्षक के सव डोंगरगांव रोड म रामपुर-घोरदा के तीर पेड़ ले लटके मिलिस। मृतक के हाथ म पेन ले कुछू लिखे हुए पाय गेहे।
पुलिस ले मिले खबर अनुसार आरक्षक के सव ल पोस्टमार्टम बर भेज दे गेहे अउ ओखर परिवार जन ल घटना के जानकारी दे दे गेहे। आत्महत्या के कारण के जांच करे जावत हे।
बताय जावत हे कि आरक्षक अनिल रत्नाकर ह, पुलिस भर्ती म होय गड़बड़ी के चौदह संदिग्ध आरक्षक मन ले एक रिहीस, जेखर बारे म पुलिस ह ओखर ले पूछताछ करत रिहीस।
कार्यशाला
रईपुर के महंत घासीदास संग्रहालय म आज ले तीन दिनी संगोष्ठी सुरू होइस हे। ‘‘प्राचीन छत्तीसगढ़ में कला और वास्तुकला‘‘ बिसय उपर राखेगे ए संगोष्ठी के उद्घाटन संस्कृति और पुरातत्व विभाग के संचालक विवेक आचार्य अउ भारतीय पुरातत्व सर्वेक्षण के क्षेत्रीय निदेसक डॉक्टर भुवन विक्रम ह करीन। आज पहिली दिन तीन ठन सत्र होइस, जेमा पंद्रह ले जादा वक्ता मन अपन शोध पत्र के वाचन करीन। काली घलो तीन सत्र होही, जेमा कई झन वक्ता मन अपन शोध पत्र के वाचन करही।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र एके संघ रिले करही। ए दारी के अंक म आपमन ‘‘सरगुजा‘‘ जिला के गतिविधि के बारे म सुनिहा।
हल्बी/गोण्डी-समाचार बुलेटिन
सुनइया मन ल बतादन कि काली ईतवार के हल्बी अउ गोण्डी बोली म समाचार बुलेटिन प्रसारित करे जाही। ए दूनों बुलेटिन आकाशवाणी जगदलपुर ले प्रसारित होही, जेला बस्तर संभाग म ही सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे प्रसारित करे जाही।
महिला फुटबॉल
नारायणपुर के रामकृष्ण मिशन आश्रम म राष्ट्रीय महिला फुटबॉल चैंपियनशिप के तहत आज पहिली सेमीफाइनल मैच मणिपुर अउ रेलवे के टीम के बीच खेले गीस, जेमा मणिपुर ह रेलवे ल हराके फाइनल म पहुंच गेहे। उहें, हरियाणा अउ ओडिसा के बीच खेले गे दूसरइया सेमिफाइनल मैच म ओडिसा ह हरियाणा का दू सून्य ले हराके फाइनल म जघा बनाइस। परनदिन तेईस दिसंबर के मणिपुर अउ हरियाणा के बीच फाइनल मैच खेले जाही।