मुख्यमंत्री विष्णुदेव साय ह आज रायपुर के स्वामी विवेकानंद हवाई अड्डा ले रायपुर-अंबिकापुर-बिलासपुर के बीच हवाई सेवा के सुभारंभ करीन। ए मउका म मुख्यमंत्री ह कहिन कि प्रदेस के विकास के दिसा म ए ह बड़का कदम हरय। ओमन किहीन कि रायपुर-अंबिकापुर-बिलासपुर विमान सेवा के सुभारंभ हमर क्षेत्रीय मेलमिलाप के प्रतीक हरय। ए सेवा के सुरूवाती किराया नौ सौ निन्यानवे रूपिया राखे गेहे। मुख्यमंत्री ह कहिन कि सरगुजा अउ बस्तर जइसन दूर-दराज के क्षेत्र ले लोगन मन ल आय-जाय म सुविधा मिलही। संगेसंग पर्यटन म घलो बढ़ोतरी होही। राज्य सरकार के प्रयास हवय कि चार बछर म छत्तीसगढ़ ल विमान के क्षेत्र म नवा ऊंचाई तक ले जाय जाही।
राज्यपाल-विवि समीक्षा
राज्यपाल रमेन डेका ह आज प्रदेस के जम्मों प्राईवेट विश्वविद्यालय मनके बइठका लेके उंखर पढ़ई-लिखई के संगेसंग नवा शिक्षा नीति के कामकाज के समीक्षा करीन। बइठका म राज्यपाल ह जम्मों विश्वविद्यालय मन म नवाचार, अनुसंधान अउ स्टार्टअप उपर बिसेस ध्यान दे बर किहीन। ओमन विश्वविद्यालय अनुदान आयोग के नियम के मुताबिक कामकाज करे के निरदेस विश्वविद्यालय मन ल दीन। राज्यपाल ह किहीन कि छात्र मनके हित म अकादमिक कैलेंडर के पालन करय। ओमन उच्च सिक्षा के गुणवत्ता म सुधार बर आने विश्वविद्यालय मनके संग एमओयू करे बर किहीन। बइठका म आने-आने विश्वविद्यालय के कुलपति मन ह राष्ट्रीय शिक्षा नीति के कामकाज के बारे म जानबा दीन।
मुख्यमंत्री-घासीदास जयंती
मुख्यमंत्री विष्णुदेव साय ह काली मुंगेली जिला के लालपुरधाम म होय बाबा गुरू घासीदास जी के दू सौ अड़सठवां जयंती समारोह म सामिल होइन। ए मउका म मुख्यमंत्री ह लालपुरधाम म गुरू घासीदास मंदिर ल ठीकठाक करे बर पचास लाख रूपिया अउ लोरमी म नालंदा परिसर बनाय के घोसना करीन। संगेसंग मुख्यमंत्री ह मुंगेली जिला के मोतिमपुर-अमरटापू म होय गुरू पर्व मेला म घलो सामिल होइन।
एनआईए-छापा
राष्ट्रीय जांच एजेंसी-एनआईए ह माआवोदी मन ल दे जाय सामान के आपूर्ति अउ समर्थन श्रृंखला के जांच बर बीजापुर जिला के चार ठिन आने-आने जघा म छापामार कार्रवाई करीन। ए कार्रवाई भैरमगढ़, आवापल्ली अउ तर्रेम जइसन जघा म करे गीस।
एखर पहिली, एनआईए ह पालनार जइसन जगह म छापामार कार्रवाई के दउरान कोनों-कोनों लोगन मन ल गिरफ्तार करके उंखर तीर ले माओवादी जिनीस बरामद करीन। एनआईए के ए कार्रवाई छत्तीसगढ़ अउ पड़ोसी राज्य मन म सक्रिय माओवादी समूह मनके परभाव उपर रोक लगाना हे।
एक भारत-श्रेष्ठ भारत-एमओयू
‘‘एक भारत-श्रेष्ठ भारत‘‘ अभियान के तहत आज छत्तीसगढ़ संस्कृति विभाग अउ उत्तरप्रदेश सरकार के संस्कृति विभाग के बीच एमओयू होइस। ए समझौता म भारतीय एकता के भावना ल मजबूत करे, समृद्ध सांस्कृतिक विरासत ल प्रदर्शित करे, नवाचार अउ अनुभव मन ल साझा करे बर दूनों राज्य ह मिलके मदद करही। एखर ले उत्तरप्रदेश अउ छत्तीसगढ़ के सांस्कृतिक संबंध के नवा दउर के सुरूवात होही।
जकांछ-विलय
जनता कांग्रेस छत्तीसगढ़ के अध्यक्ष रेणु जोगी ह अपन पार्टी के कांग्रेस म विलय कराय बर प्रदेस कांग्रेस अध्यक्ष दीपक बैज ल चिट्ठी लिखे हे। ओमन बिनती करे हे कि जोगी-कांग्रेस ल भारतीय राष्ट्रीय कांग्रेस म सामिल कर ले जाय। प्रदेस कांग्रेस अध्यक्ष के कहना हे कि ए मामला म आखिरी फैसला कांग्रेस कमेटी ह लीहीं।
आईईडी-विस्फोट
नारायणपुर जिला के डीहीपारा-ओकपाड़ के जंगल म माओवादी मन ह आईईडी विस्फोट करे हे। फेर, ए घटना म कोनों मनखे के हताहत होय के समाचार नइ मिले हे। हमर संवाददाता ले मिले जानबा के मुताबिक जिला पुलिस बल अउ आई.टी.बी.पी. के संयुक्त टीम ह मोहंदी कैम्प ले डीहीपारा-ओकपाड़ कोति गश्त बर निकले रिहीन। इही दउरान माओवादी मन ह आईईडी विस्फोट कर दीन। घटना वाले जघा ले सुरक्षा बल मन ल माओवादी जिनीस मिले हे।
स्वर्णप्राशन
रोग प्रतिरोधक क्षमता ल बढ़ाय बर रायपुर के शासकीय आयुर्वेद महाविद्यालय चिकित्सालय म काली सत्ताईस सौ ले जादा लइका मन ल स्वर्णप्राशन कराय गीस। उहें, साढ़े तीन सौ लइका मन ल पांच ठिन दवई ले बने बाल रक्षा किट बांटे गीस। आयुर्वेद महाविद्यालय परिसर म लइका मन ल स्वर्णप्राशन कराय बर आय चार सौ तीन अभिभावक मनके ‘‘देस का प्रकृति परीक्षण‘‘ अभियान के तहत प्रकृति परीक्षण घलो करे गीस।
विधानसभा समाचार
राज्य विधानसभा के शीतकालीन सत्र के तीसर दिन आज चालू वित्तीय बछर बर अनुदान के द्वितीय अनुपूरक अनुमान ध्वनिमत ले पारित करे गीस। त उहें, आठ सौ पांच करोड़ इकहत्तर लाख रूपिया ले जादा के अनुपूरक राशि मंजूर करे गीस। वित्त मंत्री ओ.पी. चौधरी ह सदन म कहिन कि अवइया बछर अटल निर्माण वर्ष के रूप म मनाय जाही। बजट म लखपति दीदी अउ ड्रोन दीदी योजना बर दू सौ पचास करोड़ रूपिया के प्रावधान करे गेहे। उहें, उड़ान योजना, यूनिटी मॉल, नियद नेल्लानार अउ बस्तर ओलंपिक बर घलो प्रावधान करे गेहे। ए मउका म नेताप्रतिपक्ष डॉक्टर चरणदास महंत ह किहीन कि सरकार ह विकास काम बर स्वीकृति म पक्षपात करत हे।
सदन म आज छत्तीसगढ़ विधानसभा सदस्य वेतन, भत्ता अउ पेंशन संशोधन विधेयक, छत्तीसगढ़ भू-राजस्व संहिता संशोधन विधेयक, छत्तीसगढ़ नगर निगम अउ नगर पालिका संशोधन विधेयक के संगेसंग छत्तीसगढ़ मॉल अउ सेवा कर संशोधन विधेयक ध्वनिमत ले पारित करे गीस।
छत्तीसगढ़ नगर निगम संशोधन विधेयक ल विपक्ष के नेता के संगेसंग कांग्रेस के आने विधायक मन घलो विरोध करीन। कांग्रेस विधायक मन ह विधानसभा अध्यक्ष डॉक्टर रमन सिंह ल ए विधेयक ल लेके व्यवस्था के मांग करीन। एखर बर विधानसभा अध्यक्ष ह सदन म चर्चा कराय के अनुमति दीन, जेखर बाद कांग्रेस के जम्मों विधायक मन सदन ले चर्चा के बहिष्कार करत सदन ले बाहिर निकल गे।
विधानसभा-सड़क निर्माण
विधानसभा में आज प्रश्नकाल के दउरान उपमुख्यमंत्री विजय शर्मा ह दंतेवाड़ा म सड़क निर्माण काम म गड़बड़ी के मामला म पांच झिन लोगन मन ल निलंबित कर देहे। संगेसंग ओमन ठेकेदार ले वसूली करे अउ उंखर मनके खिलाफ एफआईआर दरज करे के घलो बात किहीन। ए मुद्दा आज भाजपा विधायक अजय चंद्राकर ह सदन म उठईन। ओमन पूछीन कि दंतेवाड़ा के जिला निर्माण समिति के अंतर्गत डीएमएफ मद ले मंजूर प्रधानमंत्री सड़क योजना के तहत कोरकोट्टी सड़क निर्माण कार्य अउ हिरोली ले हेल्प सेंटर तक पहुंच मार्ग के टेंडर अउ री-टेंडर कब होइस अउ एखर लागत रासि कतका हे। ओमन जानना चाहिन कि रद्दा बनाय के दउरान गडबड़ी के बारे म का कोनों प्रकार के सिकायत होय रिहीस। एखर जिम्मेदार लोगन मनके खिलाफ कार्रवाई होय हे कि नइ होय हे।
ए प्रश्न के उपर उपमुख्यमंत्री विजय शर्मा ह सिकईत मिले के बात मानीन। ओमन बतईन कि दंतेवाड़ा कलेक्टर डहार ले अनुविभागीय अउ राजस्व विभाग के अधिकारी मनके पांच सदस्यीय टीम ले जांच कराय गेहे। श्री चंद्राकर ह पूरक प्रश्न म भुगतान ल लेके सवाल पूछीन। ए प्रश्न उपर उपमुख्यमंत्री ह लागत दर ले कम भुगतान के जानबा दीन, जेखर बाद उपमुख्यमंत्री ह बतईन कि सिकईत के आधार म पांच झिन अधिकारी मनके खिलाफ कार्रवाई करे गेहे।
अउ अब थोरकुन समाचार सार म –
– राज्य सरकार के कामकाज के एक बछर पूरा होय के मउका म काली रायपुर के कटोरा तालाब म ‘‘खुशहाल एक साल‘‘ कार्यक्रम राखे गीस। आज संझा साईंस कॉलेज के चौपाटी म ए कारीकरम राखे गेहे।
– सूरजपुर जिला म सिरसी गांव के तीर पाछु रतिहा एक झिन गर्भवती माईलोगिन ल अस्पताल लेके जात गाड़ी ह अनते-तनते होके पलट गे। ए घटना म एक झिन सियनहा माईलोगिन के मउत होगे अउ चार झिन घायल होगे हे।
अउ
– दंतेवाड़ा जिला म बारसूर थाना क्षेत्र के कौशलनार के जंगल म आईईडी के चपेट म आय ले एक ठिन मादा भालू के मउत होगे। उहें, ए भालू के दू ठिन बच्चा के घलो मउत होगे हे। जिला पुलिस अधीक्षक ह ए घटना के पुष्टि करे हे।