केन्द्र सरकार के रीजनल कनेक्टिविटी योजना के तहत काली 19 दिसंबर ले प्रदेस के तीन ठन सहर – रईपुर, अंबिकापुर अउ बिलासपुर ल जोड़े बर नवा उड़ान सेवा सुरू होही। ए हवाई सेवा हफ्ता म तीन दिन बिरस्पत, सुकरवार अउ सनिच्चर के चलही। यात्री मन पहिली आओ-पहिली पाओ के आधार म ए सेवा बर बुकिंग करा सकथे। ए नवा उड़ान सेवा के सुरूआती किराया नौ सौ निन्यानवे रूपिया राखे गेहे। ए नवा सेवा यात्रा के बेरा ल तो कम करही ही फेर इंटरसिटी यात्रा ल घलो आसान बनाही। एखर ले पर्यटन, बेपार अउ क्षेत्रीय विकास ल बढ़ावा मिलही।
सिविल जज-तबादला/पदोन्नति
छत्तीसगढ़ उच्च न्यायालय ह सिविल जज मनके पदोन्नति अउ तबादला आदेस जारी करे हे। आदेश अनुसार पांच सेशन अउ चालीस सिविल जज के तबादला करे गेहे। उहें, बयालीस सीनियर सिविल जज जेन सीजेएम रैंक के रिहीन, ओमन ल पदोन्नत करके डिस्ट्रिक्ट एंड एडिशनल सेशन जज बनाय गेहे।
ईडी/जीएसटी छापा
प्रवर्तन निदेशालय-ईडी ह आज बिहनिया रईपुर के मौदहापारा म चावल कारोबारी रफीक मेमन अउ गरियाबंद जिला के मैनपुर म कारोबारी इकबाल मेमन के घर म छापा मारे हे। ए कार्रवाई पाछु दू बछर म दू करोड़ रूपिया ले जादा के संपत्ति बिसाय ल लेके करे गेहे। बताय जावत हे कि थोरकुन दिन पहिली ही मैनपुर के जाड़ापदर म बनाय गे राईस मिल ल लेके ग्रामीण मन विरोध जताय रिहीन। ए मिल ह इकबाल के बेटा गुलाम मेमन के बताय जावत हे। गुलाम मेमन ह रईपुर के महापौर एजाज ढेबर अउ सराब घोटाला मामला म जेल म बंद अनवर ढेबर के मौसेरा भाई हे।
उहें, कोरबा म एक सीमेंट कारोबारी के आफिस म जीएसटी के टीम ह छापा मारिस हे। टीम डहार ले कागज-पातर के जांच के बाद आगू के कार्रवाई करे जाही।
राज्य सरकार-संगठन प्रतिबंध
राज्य सरकार ह पहिली ले प्रतिबंधित दू संगठन ल गैर कानूनी संगठन घोषित करत हुए फेर एक बछर बर प्रतिबंधित कर देहे। एमा छत्तीसगढ़ के चेतना नाट्य मंच अउ झारखंड के जनमुक्ति परिषद सामिल हे। माओवादी मन ले जुड़े ए दूनों संगठन उपर राज्य सरकार ह बिसेस जनसुरक्षा कानून के तहत रोक लगाय हे। गृह विभाग अनुसार दूनों संगठन राज्य म बड़ लंबा समय ले प्रतिबंधित हे।
विधानसभा समाचार
राज्य विधानसभा म शीतकालीन सत्र के तीसइया दिन काली उन्नीस दिसंबर के दूसरइया अनुदान मांग उपर मतदान होही। एखर अलावा वित्त मंत्री ओ.पी. चौधरी ह छत्तीसगढ़ विनियोग विधेयक ल सदन म पेस करही अउ जेखर उपर चर्चा होही। काली सदन म छत्तीसगढ़ विधानसभा सदस्य वेतन, भत्ता अउ पेंसन संशोधन विधेयक, छत्तीसगढ़ भू-राजस्व संहिता संशाधन विधेयक, छत्तीसगढ़ नगर पालिका संशोधन विधेयक, छत्तीसगढ़ माल अउ सेवाकर संशोधन विधेयक अउ छत्तीसगढ़ अनाधिकृत विकास के नियमितीकरण संशोधन विधेयक म घलो चर्चा होही।
चिकित्सा संस्थान-अधिसूचना
राज्य सरकार ह छत्तीसगढ़ राज्य उपचार्यगृह अउ बीमारी के उपचार ले जुड़े नियम ल सरल बनाय बर चिकित्सा संस्थान मन बर नवा अधिसूचना जारी करे हे। अब प्रदेस म सबो अस्पताल ल आवेदन के संग तय मापदंड के पालन करे संबंधी सपथ पत्र देके बाद स्वतः लाइसेंस दे जाही, जेला ओमन डाउनलोड घलो कर सकही। नवा नियम अनुसार एक ले दस बिस्तर तक के अस्पताल ल आवेदन के संग मापदंड के पालन करे के सपथ पत्र देहे के बाद लाइसेंस दे जाही अउ तीन महीना के अंदर ओ मापदंड ल पूरा घलो करना होही। उहें, ग्यारह ले तीस बिस्तर वाले अस्पताल ल नियम के तहत आवेदन करना होही अउ चिकित्सा अधिकारी कोति ले तीन महीना के अंदर ओ अस्पताल के जांच करके लाइसेंस जारी करे जाही। तीस बिस्तर वाले अस्पताल ल फायर अउ बायोमेडिकल वेस्ट ले जुड़े एनओसी के बाध्यता ले छूट होही।
स्वास्थ्य मंत्री श्याम बिहारी जायसवाल ह ए बदलाव ल स्वास्थ्य सुविधा के विस्तार बर ऐतिहासिक कदम बताय हे।
गुरू घासीदास जयंती
आज संतनाम पंथ के प्रवर्तक बाबा गुरू घासीदास के जयंती हवय। ए मउका म प्रदेसभर म आने-आने कार्यक्रम के आयोजन करे जावत हे। मुख्यमंत्री विष्णुदेव साय ह प्रदेसवासी मन ल बाबा गुरू घासीदास जयंती के बधाई अउ सुभकामना दीन हे।
छत्तीसगढ़ विधानसभा परिसर के सेंट्रल हॉल म आज बाबा गुरू घासीदास के फोटो उपर विधानसभा सचिव दिनेश शर्मा ह फूल चढ़ाके नमन करीन। ए मउका म विधानसभा सचिवालय के बड़का अधिकारी अउ कर्मचारी मन जुरे रिहीन।
स्वास्थ्य मंत्री-तीजन बाई मुलाकात
पंडवानी गायिका पद्मविभूषण तीजन बाई के हालचाल पूछे बर स्वास्थ्य मंत्री श्याम बिहारी जायसवाल ह आज दुरूग के गनियारी म उंखर घर पहुंचीन। भेंट के बीच स्वास्थ्य मंत्री ह तीजन बाई ल मुख्यमंत्री विष्णुदेव साय कोति ले जारी पांच लाख रूपिया के चेक दीन। संगेसंग सासन स्तर म ओमन ल सुघ्घर चिकित्सा सुविधा देवाय के बात घलो करीन। परिवार डहार ले नौकरी के मांग करे जाय म श्री जायसवाल ह मुख्यमंत्री ले चर्चा करे के आश्वासन दीन।
खुशहाल एक साल
राज्य सरकार के कार्यकाल के एक बछर पूरा होय के मउका म काली रईपुर के तेलीबांधा तरिया म ‘खुशहाल एक साल‘ कार्यक्रम के आयोजन करे गीस। जनसंपर्क विभाग कोति ले करे गे ए कार्यक्रम म बड़ संख्या म लोगन जुरे रिहीन। मजेदार गतिविधि के माध्यम ले लोगन ल सासन के आने-आने योजना के जानकारी दे जावत हे अउ सरकार के पाछु एक बछर के उपलब्धि अउ योजना ले जुड़े प्रश्न घलो बड़ रोचक ढंग ले पूछे जावत हे, जेखर सही जवाब देहे म गिफ्ट वाउचर अउ सुघ्घर इनाम दे जावत हे।
आज संझा कटोरा तरिया गार्डन म घलो ए कार्यक्रम के तीसरइयां कड़ी के आयोजन करे जाही।
रेलवे-पुरस्कार
भारतीय रेलवे कोति ले 21 दिसंबर के नई दिल्ली म देसभर के 101 अधिकारी अउ कर्मचारी मन ल अति विशिष्ट रेल सेवा पुरस्कार ले सम्मानित करे जाही। एमा रईपुर रेलमंडल के हरीश कुमार बंजारे ह घलो सामिल हे। आरंग के बैहार गांव के रहइया श्री बंजारे ह रईपुर रेलमंडल म सीनियर सेक्शन इंजीनियर के पद म काम करत हे। ओमन ह रईपुर-नागपुर मंडल के तीसरइया लाइन के विद्युतीकरण के काम ल सुघ्घर ढंग ले कम समय म ही पूरा करे हे। नई दिल्ली के भारत मंडपम म होवइया ए कारीकरम म रेल मंत्री अश्विनी वैष्णव ह अति विशिष्ट रेल सेवा पुरस्कार प्रदान करहीं।
रईपुर रेलमंडल के प्रबंधक संजीव कुमार समेत अधिकारी-कर्मचारी मन ह हरीश कुमार बंजारे के ए उपलब्धि उपर खुसी जतईन हे।
मुठभेड़-ग्रामीण घायल
नारायणपुर जिला के कलहाजा-डोंडरबेड़ा म पाछु बारह दिसंबर के होय मुठभेड़ म ए खुलासा होय हे कि माओवादी मन ह अपन साथी कार्तिक के जान बचाय बर नाबालिग अउ ग्रामीण मन ल ढाल जइसन बउरत रिहीन। इही बीच, माओवादी मन कोति ले करे गे गोलीबारी म चार झिन नाबालिग घायल होगे। जानकारी के अनुसार ग्रामीण मन ल एमन अपन सामान बोहे बर रखे रिहीस अउ मुठभेड़ म इही मनके आड़ लेके सुरक्षा बल उपर फायरिंग करे गे रिहीस। घायल ग्रामीण मनके बढ़िया इलाज बर बने व्यवस्था करे जात हे।
सुनइया मन ल बतादन कि कलहाजा-डोंडरबेड़ा म पाछु बारह दिसंबर के होय मुठभेड़ म दू झिन माईलोगिन समेत सात झिन माओवादी मारे गे रिहीस। एमा पच्चीस लाख रूपिया के इनामी माओवादी ओडिशा स्टेट कमेटी के सदस्य कार्तिक उर्फ दसरू अउ ओखर टीम के आने-आने सदस्य के सव बरामद होय रिहीस।
अउ अब मौसम के हाल…
मौसम विभाग कोति ले मिले जानकारी अनुसार काली अउ परन दिन बस्तर संभाग अउ ओखर ले लगे जिला के संग रईपुर अउ बिलासपुर संभाग के कुछेक जिला म हल्का ले मध्यम बरसा होय के संभावना हे। उहें, 21 दिसंबर के रायगढ़ अउ ओखर पड़ोसी जिला म हल्का बरसा हो सकथे। मौसम विभाग ह अवइया दू दिन के दउरान प्रदेस के न्यूनतम तापमान म बढ़ोतरी के संभावना जताय हे।