केन्द्रीय गृहमंत्री अमित शाह ह अपन छत्तीसगढ़ के दूसर अउ आखिरी दिन काली रायपुर म वामपंथी उग्रवाद ल लेके समीक्षा बइठका करीन। ए बइठका म मुख्यमंत्री विष्णुदेव साय, उपमुख्यमंत्री विजय शर्मा, केन्द्रीय गृह सचिव गोविंद मोहन, मुख्य सचिव अमिताभ जैन समेत पुलिस महानिदेशक अशोक जुनेजा अउ केन्द्रीय सशस्त्र बल के पुलिस महानिदेशक ह मौजूद रिहीन।
बइठका म श्री शाह ह सबो बल अउ एजेंसी ल मार्च दू हजार छब्बीस तक वामपंथी उग्रवाद ल खतम करे बर मिलके कोसिस करे बर केहे हे। बइठका के बाद अपन समापन संबोधन म केन्द्रीय गृहमंत्री ह कहिन कि हमर सुरक्षा बल अउ राज्य पुलिस ह मिलके बहुत अच्छा काम करे हे। ओमन कहिन कि हमर सुरक्षा बल मन ह पाछु एक बछर म माओवादी मन ल सबले जादा नुकसान पहुंचाय हे। श्री शाह कहिन कि मार्च दू हजार छब्बीस ले पहिली माओवाद ल खतम करे कोति एन.आई.ए. के घलो प्रमुख भूमिका रइही। ओमन ह कहिन कि सीआरपीएफ, आईटीबीपी, बीएसएफ, डीआरजी अउ छत्तीसगढ़ पुलिस ह पाछु एक बछर म बहुत बड़े लक्ष्य कोति बाढ़े हे।
एखर ले पहिली केन्द्रीय गृहमंत्री ह बीजापुर जिला के गुण्डम फारवर्ड ऑपरेटिंग बेस के दउरा करीन अउ सुरक्षा बल मन कोति ले माओवादी मनके खिलाफ होवत तैयारी के समीक्षा करीन। ए बेरा म श्री शाह ह एसो माओवाद के खिलाफ मिले सफलता उपर जवान मन ल बधाई घलोक दीन हे।
अमित शाह-डेयरी/वनोपज
प्रदेस म सहकारी विकास अउ ग्रामीण अर्थव्यवस्था के ससक्तीकरण कोति कदम बढ़ात जात हे, जेखर चलत केन्द्रीय गृह अउ सहकारिता मंत्री अमित शाह अउ मुख्यमंत्री विष्णुदेव साय ह काली रायपुर म दू ठिन महत्वपूर्ण समझौता ज्ञापन म हस्ताक्षर करीन। छत्तीसगढ़ सरकार अउ राष्ट्रीय डेयरी विकास बोर्ड-एन.डी.डी.बी. के बीच डेयरी म विकास बर अउ छत्तीसगढ़ राज्य लघु वनोपज सहकारी संघ मर्यादित अउ राष्ट्रीय सहकारी आर्गेनिक्स लिमिटेड-एन.सी.ओ.एल. के बीच एक ठन एमओयू होइस।
ए बेरा म केन्द्रीय गृहमंत्री ह कहिन कि डेयरी अउ वनोपज म दू ठन नवा अच्छा सुरूआत होय हे। ओमन कहिन कि जैविक खेती न सिर्फ स्वास्थ्य बर अच्छा हवय, बल्कि ए ह पर्यावरण अउ भूईंया के उर्वरता बर घलो अनुकूल हे। श्री साव ह कहिन कि जैविक खेती ले कृषि ल लाभकारी बनाय जात सकत हे। ओमन कहिन कि जनजातीय समुदाय के वनोपज जउन कि पहली कम कीमत बिकत रिहीस। अब सर्टिफिकेशन अउ अच्छा मार्केटिंग ले उचित कीमत म बेचे जाही। एखर ले आदिवासी समुदाय ल ससक्त बनाय अउ उंखर आय ल बढ़ाय म घलो मदद मिलही।
ए मउका म मुख्यमंत्री विष्णुदेव साय ह कहिन कि प्रदेस म अभी के बेरा म छह सौ इक्कीस ठिन सहकारी समिति ह काम करत हे। ए समझौता ले अवइया तीन बछर म तीन हजार दू सौ नवा समिति के स्थापना के संगेसंग तीन हजार आठ सौ पचास गांव ल जोड़े जाही।
धर्मेन्द्र प्रधान-प्रवेश परीक्षा
केन्द्रीय शिक्षा मंत्री धर्मेन्द्र प्रधान ह कहिन हे कि राष्ट्रीय परीक्षा एजेंसी ह अवइया बछर ले भर्ती परीक्षा के जगह उच्च सिक्षा बर प्रवेस परीक्षा आयोजित करे उपर बिसेस जोर दीहीं। नई दिल्ली म मीडिया ले गोठबात करत ओमन ह कहिन कि सरकार ह दस नवा पद के सृजन करके राष्ट्रीय परीक्षा एजेंसी के पुनर्गठन करे के योजना बनात हे। सोधार्थी मन बर एक राष्ट्र-एक सदस्यता-ओ.एन.ओ.एस. उपर श्री प्रधान ह कहिन कि अभी लगभग तेरह हजार ई-जनरल पढ़ईया लइका मन बर उपलब्ध हे अउ अवइया तीन बछर म सरकार ह एमा छह हजार करोड़ रूपिया के निवेस करही।
आरक्षण-कार्रवाई स्थगित
प्रदेस म त्रिस्तरीय पंचायत चुनई बर उन्नीस दिसंबर के होवइया आरक्षण के प्रक्रिया ल रोक दे गेहे। ए संबंध म पंचायत अउ ग्रामीण विकास विभाग कोति ले आदेस जारी कर दे गेहे। नवा आदेस म पुराना आदेस ल परिहार्य कारण बतात हुए निस्तर कर दे गेहे। बताय जात हे कि आरक्षण ल लेके नवा आदेस जल्दी जारी करे जाही।
विधानसभा-सत्र-01
छत्तीसगढ़ विधानसभा के शीतकालीन सत्र के दूसर दिन आज एक ध्यानाकर्षण प्रस्ताव म होय चर्चा के जवाब देवत वित्तमंत्री ओ.पी. चौधरी ह घोसना करीन कि अवैध प्लाटिंग करइया मनके खिलाफ नवा नियम बनाके कार्रवाई करे जाही। ओमन कहिन कि रेरा अउ टाउन एंड कंट्री प्लानिंग के नियम के चलत जउन मन ल स्वीकृति नइ मिले हे, ओमन ल लेके राज्य सरकार जल्दी ही नियम बनाही। अवैध प्लाटिंग के मुद्दा ल आज एक ध्यानाकर्षण सूचना के माध्यम ले धरसीवां विधायक अनुज शर्मा ह उठईन। एमा राजस्व मंत्री टंकराम वर्मा ह आश्वस्त करीन कि अवैध प्लाटिंग करइया मनके खिलाफ नियमानुसार कार्रवाई करे जाही। चर्चा के बेरा भाजपा विधायक राजेश मूणत और अजय चंद्राकर ह घलो प्रदेस म अवैध प्लाटिंग के मुद्दा ल उठईन।
एखर अलावा आज सत्र के दूसर दिन जल जीवन मिशन म गड़बड़ी के घलो मुद्दा उठाय गीस। प्रश्नकाल के बेरा भाजपा विधायक धरमलाल कौशिक ह सवाल करीन कि जल जीवन मिशन म गड़बड़ी के सिकायत मिले के बाद घलो ठेकेदार मनके टेंडर निरस्त काबर नइ करे गेहे। एमा विभागीय मंत्री अरूण साव ह कहिन कि जउन सिकायत मिले हे, ओखर उपर कार्रवाई होय हे। ठेकेदार मन ल ब्लैक लिस्ट घलो करे गेहे। जांच चलत हे, ओखर आधार म आगू के कार्रवाई होही, जरूरत पड़ही त एफ.आई.आर. घलो दरज करे जाही।
विधानसभा-सत्र-02
आज प्रश्नकाल के बेरा म कांग्रेस विधायक कवासी लखमा ह सुकमा अउ दंतेवाड़ा म पुलिया निर्माण म गड़बड़ी करइया अधिकारी मन उपर कार्रवाई करे के मांग करीन। श्री लखमा ह आरोप लगईन कि बिना स्वीकृति अउ बिना आदेस के रद्दा ल बनाय गेहे। पूर्व मुख्यमंत्री भूपेश बघेल ह घलो कहिन कि एमा गड़बड़ी करइया अधिकारी मन उपर कार्रवाई होवत हे, कि नहीं। श्री बघेल ह कहिन कि ए इलाका म पुलिया पहिली बनीस, ओखर बाद टेंडर होइस। ए गंभीर बात हे। ए मुद्दा उपर पक्ष अउ विपक्ष के सदस्य मनके बीच नोंकझोंक होइस। बाद म विपक्षी सदस्य मन ह नाराबाजी करत हुए सदन ले बहिर्गमन कर दीन।
सून्यकाल म आज मुख्य विपक्षी दल कांग्रेस ह माइक्रो फाइनेंस कंपनी मनके धोखाधड़ी उपर स्थगन प्रस्ताव के जरिया चर्चा कराय के मांग करीस। विपक्ष के नेता डॉक्टर चरणदास महंत अउ दूसर कांग्रेस विधायक मन ह स्थगन प्रस्ताव प्रस्तुत करीन। कांग्रेस विधायक मन ह आरोप लगईन कि, कि महिला समूह मन ले ठगी करे जात हे। लोन वसूले के नाव म ओमन ल प्रताड़ित करे जात हे अउ राज्य सरकार जांच के नाव म खानापूर्ति करत हे। बाद म विधानसभा अध्यक्ष डॉक्टर रमन सिंह ह विपक्ष के स्थगन प्रस्ताव ल अग्राह्य कर दीन।
सदन म आज उपमुख्यमंत्री अरूण साव ह छत्तीसगढ़ नगर पालिका अउ नगर निगम संशोधन विधेयक पेस करीन। उहें, वित्त मंत्री ओ.पी. चौधरी ह घलो सदन म छत्तीसगढ़ माल अउ सेवा कर संशोधन विधेयक अउ छत्तीसगढ़ अनाधिकृत विकास के नियमितीकरण संशोधन विधेयक पेस करीन।
सदन म आज द्वितीय अनुपूरक अनुदान मांग उपर चर्चा चलत हे।
घासीदास जयंती
सतनाम पंथ के प्रवर्तक बाबा गुरू घासीदास के काली जयंती हे। ए मउका म राज्यपाल रमेन डेका अउ मुख्यमंत्री विष्णुदेव साय ह प्रदेसवासी मन ल बधाई अउ सुभकामना दीन हे। राज्यपाल ह कहिन हे कि बाबा गुरू घासीदास ह सामाजिक, आर्थिक सोषण, जातिवाद अउ अत्याचार के खिलाफ आवाज उठईन। उहें, मुख्यमंत्री ह कहिन हे कि बाबा गुरू घासीदास जी ह अपन उपदेश ले दुनिया ल सत्य, अहिंसा अउ सामाजिक सद्भावना के रद्दा देखाय हे। ओमन ह जम्मों मानव जाति ल ‘‘मनखे-मनखे एक समान‘‘ के संदेस देके समानता अउ मानवता के पाठ पढ़ईन हे। श्री साय ह कहिन कि गुरू घासीदास जी के जीवन दर्शन अउ विचार ह आज घलो प्रासंगिक हे।
बाघिन-रेस्क्यू
कोरिया वनमंडल के चिरमिरी म एक बाघिन ह पकड़ाय हे। ए बाघिन ह पाछु एक हफ्ता ले चिरमिरी के पूर्वी साजा पहाड़ के रिहायशी इलाका म घूमत रिहीस, जेखर ले लोगन मन ह डर्रावत रिहीन। ए बेरा म बाघिन ह कतकोन मवेसी के सिकार घलो करे रिहीस। फेर वन विभाग के टीम ह बाघिन ल हल्दीबाड़ी बघनच्चा दफाई के तीर जंगल म टैं्रकुलाइज करीन। एखर बाद ओला पिंजरा म डाले गीस। वन मुख्यालय ले निरदेस मिले के बाद बाघिन ल कोनों टाईगर रिजर्व म छोड़े जाही।