केंद्रीय गृह अउ सहकारिता मंत्री अमित शाह आज रईपुर के पुलिस परेड मैदान म राखेगे राष्ट्रपति निशान अलंकरण समारोह म सामिल होइन। समारोह म श्री शाह ह राज्य के पुलिस ल राष्ट्रपति निशान-पुलिस कलर्स अवार्ड सौंपिन। समारोह म केंद्रीय गृह मंत्री ह किहीन कि छत्तीसगढ़ पुलिस ह माओवाद, संगठित अपराध अउ मादक पदार्थ के खिलाफ लड़ाई म जउन हिम्मत दिखाय हे, ओ ह उल्लेखनीय हे। छत्तीसगढ़ पुलिस ह देस के सबले बढ़िया अउ बहादुर पुलिस बल मन म एक हवय। ओमन किहीन कि केंद्र अउ राज्य सरकार ह छत्तीसगढ़ अउ देस ल मार्च दू हजार छब्बीस तक माओवाद ले मुक्त कराय बर प्रतिबध्द हवय। ओमन उम्मीद जतइन कि राष्ट्रपति के पुलिस कलर्स अवार्ड पुलिस बल बर प्रेरणा के स्त्रोत बनही।
ए मउका म मुख्यमंत्री विष्णुदेव साय ह किहीन कि राज्य सरकार के पुर्नवास नीति म पांच लाख या ओखर ले जादा के इनामी माओवादी मनके आत्मसमर्पण करे म ओमन ल आवास बर शहरी क्षेत्र म जादा ले जादा चार डिसमिल जमीन या ग्रामीण क्षेत्र म जादा ले जादा एक हेक्टेयर कृषि भूमि दे जाय के प्रावधान करे गेहे। उहें, आत्मसमर्पित माओवादी अउ माओवाद प्रभावित परिवार के पुनर्वास बर प्रधानमंत्री आवास योजना-ग्रामीण के तहत पंद्रह हजार पक्का मकान मंजूर करे गेहे।
समारोह म केंद्रीय मंत्री अमित शाह ह परेड के सलामी लीन, ओखर बाद परेड के निरीक्षण करीन। ए दउरान महिला अउ पुरूष प्लाटून डहार ले मार्च पास्ट घलो करे गीस। समारोह म छत्तीसगढ़ पुलिस के चौबीस बछर के सफर उपर आधारित कॉफी टेबल बुक के विमोचन घलो करे गीस।
अमित शाह-बस्तर ओलंपिक
केंद्रीय गृह मंत्री अमित शाह ह अपन छत्तीसगढ़ दउरा म आज जगदलपुर म आयोजित बस्तर ओलंपिक के समापन समारोह म घलो सामिल होइन। कारीकरम म श्री शाह ह किहीन कि बस्तर ओलंपिक ह बस्तर संभाग के सबो सात जिला के उम्मीद के पहिचान बनही। ए ओलंपिक ह आदिवासी क्षेत्र के युवा मन ल गलत रद्दा म जाय ले रोकही अउ ओमन ल देस के निर्माण के प्रक्रिया ले घलो जोड़ही, संगेसंग ए बस्तर ओलंपिक ह ए क्षेत्र म सांति, सुरक्षा अउ विकास के नींव डाले के काम घलो करही।
ए मउका म मुख्यमंत्री विष्णुदेव साय अउ उप मुख्यमंत्री विजय शर्मा घलो मौजूद रिहीन। समारोह के दउरान बस्तर संभाग के सबो सात जिला के खिलाड़ी मन ह सुघ्घर मार्चपास्ट घलो करीन।
सोल्जरएथॉन
भारतीय सेना ह आज नवा रईपुर म उन्नीस सौ इकहत्तर के भारत-पाक युध्द के तिरपनवां वर्षगांठ के सुरता म एक ठन कारीकरम के आयोजन करीस। छत्तीसगढ़ सरकार के मदद ले होवत ए सोल्जरएथॉन म तीन हजार ले जादा प्रतिभागी मन सामिल होइन। पूर्व सेना प्रमुख जनरल वी. के. सिंह ह एखर सुरूआत करीन। ए मउका म श्री सिंह ह कारीकरम म प्रतिभागी मन ल सेना म आय बर प्रेरित करीन। ओमन उन्नीस सौ इकहत्तर के युध्द के दउरान शहीद होय सेनिक मन के बलिदान ल सुरता करीन अउ सोल्जरएथॉन के तारीफ करीन।
सोल्जरएथॉन म इक्कीस, दस अउ पांच किलोमीटर वर्ग म दौड़ के संगेसंग तीन किलोमीटर पैदल दौड़ ल घलो सामिल करे गे रिहीस। ए आयोजन के बिसेस आकर्षण उन्नीस सौ इकहत्तर के भारत-पाक युध्द ल देखावत प्रदर्सनी रिहीस, जेमा सैन्य कलाकृति, फोटू अउ संघर्ष के यादगार चीज मन रिहीन।
राज्यपाल-टीबी मरीज
राज्यपाल रमेन डेका ह आज धमतरी प्रवास के दउरान राष्ट्रीय क्षय उन्मूलन कारीकरम के तहत टीबी के मरीज मन ल प्रोटीनयुक्त फूड बास्केट दीन। ए दउरान राज्यपाल ह किहीन कि टीबी ले घबराय के जरूरत नइ हे। ओमन खुद निक्षय मित्र बनके जिला के दस झन टीबी मरीज मन के मदद करे के बात किहीन। निक्षय मित्र छै महिना या ओखर ले जादा बेरा बर घलो आने मनखे बन सकत हे। ए मउका म राज्यपाल ह प्रधानमंत्री टीबी मुक्त भारत अभियान के गतिविधि म रेडक्रॉस ल घलो जोड़े के निरदेस दीन।
विधानसभा-सत्र
छत्तीसगढ़ विधानसभा के सीतकालीन सत्र काली सोलह दिसंबर ले सुरू होही। बीस दिसंबर तक चलइया ए सत्र म कुल चार ठन बइठका होही। सत्र के दउरान वित्तीय काम के संगेच आने सरकारी काम घलो करे जाही।
पहिली दिन काली सदन म राज्यसभा के पूर्व सांसद गोपाल व्यास अउ अविभाजित मध्यप्रदेस के पूर्व विधानसभा सदस्य नंदाराम सोरी ल श्रध्दांजलि दे जाही। एखर बाद चालू वित्तीय बछर बर द्वितीय अनुपूरक अनुमान सदन म पेस करे जाही। एमा दूसरइया दिन याने सत्रह दिसंबर के चर्चा होही। इही दिन सदन म विनियोग विधेयक उपर घलो चर्चा करे जाही। सत्र के दउरान छत्तीसगढ़ विधानसभा सदस्य वेतन, भत्ता अउ पेंसन संशोधन विधेयक, छत्तीसगढ़ भू-राजस्व संहिता संशोधन विधेयक, छत्तीसगढ़ नगर निगम अउ नगर पालिका संशोधन विधेयक पेस करे जाही।
कांग्रेस विधायक दल-बैठक
नेता प्रतिपक्ष डॉक्टर चरणदास महंत के अगुवई म आज रईपुर म कांग्रेस विधायक दल के बइठका होइस। बइठका म काली ले सुरू होवइया विधानसभा के सीतकालीन सत्र बर रणनीति बनाय गीस। बइठका म प्रदेस कांग्रेस अध्यक्ष दीपक बैज, अखिल भारतीय कांग्रेस कमेटी के सचिव जरिता लैतफलांग, संपत कुमार संघरा पूर्व मंत्री, विधायक अउ कांग्रेस के बड़े नेता मन सामिल होइन।
बाद म पत्रकार मनले चर्चा करत डॉक्टर महंत ह बतइन कि बइठका म आने-आने मुद्दा उपर चर्चा करे गेहे। ओमन किहीन कि सत्र के दउरान कांग्रेस स्थगन प्रस्ताव लाही, संगेसंग धान खरीदी अउ अवैध सराब बिक्री जइसन आने-आने मुद्दा घलो उठाही।
माओवादी-आत्मसमर्पण/जवान घायल
सुकमा जिला म पच्चीस लाख रूपिया के पांच झन इनामी माओवादी मन ह आत्मसमर्पण करीन हे। एमा ले दू झन माओवादी मन उपर आठ-आठ लाख रूपिया के इनाम रिहीस। जिला के पुलिस अधीक्षक किरण चव्हाण ह बतइन कि आत्मसमर्पण करइया माओवादी मन म एक झन दंपत्ति घलो सामिल हे। ए जम्मो माओवादी मन धर्मावरम अउ टेकलगुड़ा कैम्प म होय हमला म सामिल रिहीन। सब्बो माओवादी मन ल राज्य सरकार के पुनर्वास नीति के तहत मदद दे जाही। संगेसंग ओमन ल पच्चीस-पच्चीस हजार रूपिया के प्रोत्साहन रासि घलो दे जाही।
ऐति, कांकेर जिला म माओवादी मन डहार ले लगाय गे आईईडी ल निष्क्रिय करे के बेरा सुरक्षा बल-बीएसएफ के एक झन जवान ह घायल होगे हे। बताय जावत हे कि कोयलीबेड़ा थाना क्षेत्र के पानीडोबीर कैंप ले बीएसएफ के जवान मन सर्च ऑपरेशन म निकले रिहीस। ए दउरान हेटारकसा के तीर माओवादी मन कोति लगाय गे आईईडी ल निष्क्रिय करत ए हादसा होइस। घायल जवान मन ल पानीडोबीर कैंप म प्राथमिक इलाज के बाद हेलिकॉप्टर ले रईपुर लाय गीस।
अउ अब मौसम के हाल…
ठंडा अउ सुष्क हवा के असर ले प्रदेस के उत्तरी भाग के कुछेक इलाका म सीतलहर चलत हे। उहें, सरगुजा संभाग के कतकोन जिला म पाला पड़े के स्थिति बने हे। मौसम विभाग ह प्रदेस के न्यूनतम तापमान म अभी अउ गिरावट होय के संभावना जताय हे। बिलासपुर अउ दुरूग संभाग के जिला के एक-दू जघा म घलो सीतलहर चले के या वइसन स्थिति बने के संभावना हे।
– लौह पुरूष सरदार वल्लभ भाई पटेल के पुण्यतिथि म प्रधानमंत्री नरेंद्र मोदी ह अपन श्रध्दांजलि दीन हे। सोशल मीडिया पोस्ट म प्रधानमंत्री ह किहीन कि सरदार पटेल के व्यक्तित्व अउ उंखर काम देस के एकता अउ अखंडता के संग विकसित भारत के संकल्प ल हासिल करे बर देसवासी मन बर प्रेरणा के स्त्रोत बने रइही।
– जशपुर जिला के बगीचा थाना क्षेत्र म ट्रैक्टर के पलटे ले ओखर नीचे दब के एक झन युवक के मउत होगे।
– कोरबा जिला म पाली थाना तीर एक ठन आधा बने मकान के तीसरा मंजिल ले नीचे गिरे के सेति एक झन मजदूर के मउत होगे।
अउ
– बिलासपुर जिला के सरकंडा पुलिस ह एक झन मनखे ल गिरफ्तार करके ओखर तीर ले करीबन डेढ़ किलो गांजा बरामद करीन हे।