कारीकरम ल संबोधित करत भाजपा के राष्ट्रीय अध्यक्ष जेपी नड्डा ह किहीन कि छत्तीसगढ़ तेजी ले विकास के रद्दा म आगू बढ़त हे। ओमन किहीन कि भारतीय जनता पार्टी वंचित किसान, दलित युवा अउ सोशित वर्ग के विकास अउ सशक्तिकरण बर प्रतिबध्द हरय। कांग्रेस पार्टी छत्तीसगढ़ सरकार के महतारी वंदन योजना ल लेके अफवाह फैलात हे। श्री नड्डा ह किहीन कि विष्णुदेव सरकार डहार ले नक्सलवाद के खिलाफ चलाय जात अभियान के बड़ाई करत किहीन कि एक साल म दू सौ ले जादा माओवादी अभी तक मारे जा चुके हे, अउ एक हजार ले जादा माओवादी मन आत्मसमर्पण करे हे।
केंद्रीय मंत्री ह किहीन कि प्रधानमंत्री नरेंद्र मोदी ह देस के राजनीति म काम करे के एक नवा संस्कृति दीन हे, जेखर मूल उद्देस्य ‘‘सबका साथ-सबका विकास- सबका विश्वास हे‘‘ ओमन किहीन कि भारतीय जनता पार्टी के डबल ईंजन सरकार ह छत्तीसगढ़ ल पांच ठिन नवा मेडिकल कॉलेज देहे। केंद्रीय स्वास्थ्य मंत्री ह किहीन कि छत्तीसगढ़ के पचास लाख लोगन मन बर आयुष्मान कार्ड अभी तक बन चुके हे। प्रधानमंत्री नरेंद्र मोदी अउ विष्णुदेव सरकार सत्तर साल ले जादा आयु वर्ग के लोगन मन बर पांच लाख रूपिया तक के ईलाज बर आयुष्मान कार्ड देत हे। केंद्रीय मंत्री ह किहीन कि अवइया पांच साल म भारत दुनिया के तीसरा अर्थव्यवस्था के रूप म उभरही। अेमन किहीन कि छत्तीसगढ़ के भाजपा सरकार युवा मनके चिंता करने वाला सरकार हे, अउ ओमन ल रोजगार देके परयास करत हे। एक मउका म केंद्रीय मंत्री ह ग्यारा हजार करोड़ ले जादा के विकास कार्य मनके लोकार्पण अउ भूमिपूजन घलो करीन।
उहें, मुख्यमंत्री विष्णुदेव साय ह राज्य सरकार के एक साल के उपलब्धि ल जनता के आगू रखिस हे। ओमन किहीन कि राज्य सरकार सुशासन बर काम करत हे। ओमन तीन दिसंबर ल ‘‘जनादेश दिवस‘‘ के रूप म मनाय के घोसना करीन। ओमन किहीन कि ओखर सरकार ‘महतारी वंदन‘ योजना ल कभू बंद नइ करही।
कारीकरम स्थल म सरकारी विभाग डहार ले स्टॉल घलो लगाय गेहे। जिहां लोगन मन ल सरकार के जनकल्याणकारी योजना के जानकारी दे जात हे।
माओवादी-मुठभेड़
बीजापुर जिला म सुरक्षा बल अउ माओवादी मनके बीच आज होय मुठभेड़ म दू झिन माओवादी मारे गेहे। पुलिस अधीक्षक जितेन्द्र यादव ह बतइन कि केंद्रीय रिजर्व पुलिस बल सीआरपीएफ अउ डिस्ट्रिक्ट रिजर्व गार्ड-डीआरजी के संयुक्त टीम नेन्ड्रा अउ पुन्नुर के जंगल म माओवादी मनके मौजूदगी के सूचना म सर्चिंग बर निकले रिहीस। इही, दउरान माओवादी मन जवान मन उपर फायरिंग सुरू कर दीन, जेखर बाद जवान मन ह घलो जवाबी कार्रवाई करीन। मुठभेड़ के बाद सुरक्षा बल ह घटना स्थल के सर्चिंग के दउरान दू झिन माओवादी के शव के संघरा दू बारह बोर के बंदूक, एक ठिन भरमार बंदूक अउ माओवादी जिनिस बरामद करे हे।
नगरीय निकाय-उम्मीदवार खर्च
नगरीय प्रशासन अउ विकास विभाग ह अवइया नगरीय निकाय चुनाव बर चुनाव खरच के अधिकतम सीमा तय कर देहे। ए संबंध म राजपत्र म अधिसूचना जारी कर दे गेहे। नगर-निगम चुनाव म चुनाव खरचा के अधिकतम सीमा तीन लाख ले जादा जनसंख्या उपर आठ लाख रूपिया अउ तीन लाख ले कम जनसंख्या उपर पांच लाख रूपिया तय करे गेहे। उहें, नगर पालिका परिषद बर खरचा के सीमा दू लाख रूपिया अउ नगर पंचायत पचहत्तर हजार रूपिया होही।
राष्ट्रीय लोक अदालत
राज्य विधिक सेवा प्राधिकरण बिलासपुर डहार ले काली चौदह दिसंबर के प्रदेस के जम्मो जिला न्यायालय अउ व्यवहार न्यायालय मन म लोक अदालत के आयोजन करे जाही। लोक अदालत म आपसी सुलह राजीनामा के जरिया मामला मन के निपटारा करे जाही। एमा मोटर दुर्घटना दावा, बैंक रिकवरी प्रकरण, विद्युत संबंधी मामला अउ पारिवारिक विवाद के मामला के निराकरण करे जाही। एखर अलावा राजस्व, बैंक, विद्युत विभाग, दूरसंचार विभाग, नगर-निगम, नगर पालिका परिषद, नगर पंचायत म वसूली संबंधी लंबित मामला जिला विधिक सेवा प्राधिकरण म प्रस्तुत करे जाही।
बातों-बातों में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत भारत के संविधान के विशेषता उपर गुरू घासीदास केंद्रीय विश्वविद्यालय, बिलासपुर के प्रोफेसर डॉक्टर अनुपमा सक्सेना ले लेगे भेंटवार्ता के प्रसारण करे जाही। ए कारीकरम के दूसरइया कड़ी के प्रसारण आकाशवाणी केन्द्र रायपुर ले काली चौदह दिसंबर के बिहनिया साढ़े दस बजे ले प्रसारित होही। एला छत्तीसगढ़ के सबो आकाशवाणी केंद्र मन रिले करही।
मुख्यमंत्री-स्ट्रीट वेंडर्स
मुख्यमंत्री विष्णुदेव साय ह काली रईपुर के पंडित दीनदयाल उपाध्याय ऑडिटोरियम म आयोजित कारीकरम म पीएम स्वनिधि अउ राष्ट्रीय शहरी आजीविका मिशन म अच्छा काम करइया वाला निकाय बैंक लाभार्थी अउ स्ट्रीट वेंडर्स मन ल सम्मानित करीन। ए मउका म मुख्यमंत्री ह किहीन कि देस के अर्थव्यवस्था ल मजबूत बनाय म स्ट्रीट वेंडर्स अउ महिला समूह मन के महत्वपूर्ण भूमिका हरय। पीएम स्वनिधि योजना ह स्ट्रीट वेंडर्स ल आत्मनिर्भर बनाय म मदद करे हे अउ डे- एनयूएलएम योजना ह महिला मन ल उद्यमसीलता के रस्ता म आगू बढ़ाय हे। ए मउका म मुख्यमंत्री ह पीएम स्वनिधि योजना अउ मुख्यमंत्री स्लम स्वास्थ्य योजना‘‘ उपर लघु फिलिम लांच करीन अउ लाभार्थी मन डहार ले लगाय गे प्रदर्सनी के घलो अवलोकन करीन।
मुख्यमंत्री-लोकार्पण
मुख्यमंत्री विष्णुदेव साय ह काली बिलासपुर जिला के तखतपुर म राखेगे कारीकरम म चार सौ इंक्यावन करोड़ पच्चीस लाख रूपिया के लागत के एक सौ चौंतीस विकास कार्य मनके लोकार्पण अउ सिलान्यास करीन। ए दउरान मुख्यमंत्री ह आने-आने योजना ले लाभान्वित तीन हजार ले जादा हितग्राही मन ल सामग्री अउ चेक के वितरण करीन। ए मउका म मुख्यमंत्री ह तखतपुर सामुदायिक स्वास्थ्य केंद्र म मरीज मन बर बिस्तर के संख्या तीस ले बढ़ाके पचास करे के घोसना करीन। उहें, चौपाटी निर्माण बर एक करोड़ रूपिया अउ बाबा गुरूघासी दास जयंती उत्सव बर पांच लाख रूपिया देके घलो घोसना करीन। कारीकरम म मुख्यमंत्री ह शिक्षक अउ स्वास्थ्य विभाग के चयनित एक सौ बयालिस कर्मी मन ल नियुक्ति पत्र सौंपिन। कारीकरम म केंंद्रीय आवास अउ सहरी विकास राज्य मंत्री तोखन साहू विशिष्ट अतिथि के रूप म मौजूद रिहीन।
सोल्जरथॉन मैराथन
भारतीय सेना डहार ले छत्तीसगढ़ शासन के सहयोग ले पंद्रह दिसंबर के नवा रईपुर के सेंट्रल पार्क म सोल्जरथॉन मैराथन के आयोजन करे जाही। पूर्व सेनाध्यक्ष जनरल वीके सिंह कारीकरम के मुख्य अतिथि होहीं। ए मउका म ओमन पैराप्लेजिक रिहैबिलिटेशन सेंटर ल उन्नीस लाख तिरसठ हजार ले जादा रूपिया के चेक दिही। मैराथन म आने-आने श्रेणी के दौड़ होही, जेमा इक्कीस किलोमीटर, दस किलोमीटर अउ पांच किलोमीटर के दौड़ के संघरा तीन किलोमीटर के पैदल यात्रा सामिल हे। एखर बर रेस-एक्सपो के आयोजन काली चौदह दिसंबर के सेंट्रल पार्क नवा रईपुर म करे जाही।
बतादन कि ए आयोजन पाकिस्तान के साथ उन्नीस सौ इकहत्तर के लड़ाई म भारत के जीत के तिरपनवां वर्षगांठ के उपलक्ष्य म होही। प्रदर्सनी म युध्द ले जुड़े सैन्य कलाकृति, फोटो अउ यादगार चीज मन ल दिखाय जाही।
ईडी-शराब कारोबारी
प्रवर्तन निदेशालय-ईडी ह आज रईपुर के एक बिसेस अदालत म छत्तीसगढ़ म संचालित तीन सराब कारोबारी मन ल आरोपी बनाय के संबंध म याचिका पेस करे हे। ईडी ह अपन याचिका म सबूत पेस करत आसंका जताय हे कि सराब घोटाला म सराब कंपनी मनके अलावा छत्तीसगढ़ म संचालित तीन ठन डिस्टलरी के संचालक मन के संदिग्ध भूमिका रेहे हे। ईडी के याचिका ल स्वीकार करत बिसेस अदालत ह सुनवाई के तिथि तय कर देहे।