मुख्यमंत्री विष्णुदेव साय ह आज अपन सरकार के बछर भर के रिपोर्ट कार्ड जारी करे हे अउ सरकार के उपलब्धि ल बताय हे। रईपुर म पत्रकार मनले गोठबात करत श्री साय ह किहीन कि भ्रष्टाचारी मनके खिलाफ तुरते कार्रवाई करे जात हे अउ प्रदेस म सुशासन लाय बर काम होवत हे। मुख्यमंत्री ह किहीन कि राज्य सरकार ह बछर दू हजार अट्ठाईस तक छत्तीसगढ़ के जीडीपी ल दस लाख करोड़ तक पहुंचाय के लक्ष्य राखे हे अउ हमर सरकार एखर बर काम करत हे। मुख्यमंत्री ह किहीन कि हमर सरकार ह आदिवासी अनुसूचित जाति अउ अन्य पिछड़ा वर्ग के विकास बर प्राधिकरण के गठन करे गेहे। मुख्यमंत्री ह बतइन कि हमर सरकार ह पहिली कैबिनेट के बइठका म प्रधानमंत्री आवास योजना म अट्ठारा लाख घर बनाय के मंजूरी दीन। ओमन किहीन कि महतारी वंदन योजना म राज्य के सत्तर लाख माईलोगिन बर दस किस्त म अभी तक छै हजार पांच सौ तीस करोड़ रूपिया के रकम जारी कर दे गेहे। मुख्यमंत्री ह पाछू बछर भर म सरकार कोति ले माओवाद प्रभावित क्षेत्र बर करे गे विकास काम अउ सुरक्षा बल के सफलता के जानकारी घलो दीन। ए मउका म मुख्यमंत्री ह किसान अउ प्रदेस के जनता के नांव ‘‘विष्णु की पाती‘‘ के संदेस के विमोचन करीन। संगेसंग अपन सरकार के एक बछर के कामकाज के उपलब्धि- ‘‘जनादेश परब रिपोर्ट कार्ड‘‘, पुस्तक बिल्डिंग टुमॉरोज छत्तीसगढ़, टुडे‘‘, दू पुस्तक- ‘‘खुशियों का आशियाना- प्रधानमंत्री आवास योजना‘‘ अउ ‘‘महतारी वंदन योजना-खुशियों की अधिसूचना के घलो विमोचन करीन।
मुख्यमंत्री-कोरबा
मुख्यमंत्री विष्णुदेव साय ह आज कोरबा अउ बिलासपुर जिला के तखतपुर म राखेगे कारीकरम म सामिल होइन। कोरबा म राखेगे कारीकरम म मुख्यमंत्री कन्या विवाह योजना म सामूहिक बिहाव कारीकरम म संघरीन ए मउका म ओमन आने -आने विकास काम के लोकार्पण अउ भूमिपूजन करीन। एखर संगेसंग मुख्यमंत्री बिलासपुर जिला के तखतपुर म राखेगे कारीकरम म सामिल होइन। इंहा ओमन शिक्षा अउ स्वास्थ्य विभाग म नवा नियुक्त होय करमचारी मन ल नियुक्ति पत्र सौंपिन अउ कतकोन विकास काम के लोकार्पण अउ सिलान्यास करीन।
ए मउका म मुख्यमंत्री ह किहीन कि आज जउन विकास काम के लोकार्पण अउ भूमिपूजन होय हे। ओखर ले जिला म विकास ल गति मिलही। मुख्यमंत्री ह तखतपुर सामुदायिक स्वास्थ्य केंद्र म बिस्तर के संख्या तीस ले बढ़ाके पचास करे। बेलतरा तहसील के नगोई गांव म तहसील के लिंक कोर्ट लगाय अउ तखतपुर म चौपाटी बनाय बर एक करोड़ रूपिया दे के संग कतकोन घोसना करीन हे।
मुख्यमंत्री-रायगढ़
मुख्यमंत्री विष्णुदेव साय ह आज रायगढ़ जिला के तमनार म अपेक्स बैंक के नवा शाखा के वर्चुअल रूप ले सुभारंभ करीन। ए मउका म ओमन किहीन कि बैंक के ए साखा खुले ले ए क्षेत्र के किसान मन ल खेती-किसानी ले जुड़े काम बर बैंकिंग सुविधा पाय बर दूरिहा नइ जाय ल पड़ही अउ साखा खुले के फायदा तमनार अउ घरघोड़ा विकासखंड के लोगन ल मिलही।
माओवादी मुठभेड़
नारायणपुर जिला म आज होय मुठभेड़ म सात झिन वर्दीधारी माओवादी मारे गेहे, जिंखर सव बरामद कर ले गेहे। बस्तर रेंज के आईजी सुंदरराज पी. ह बतइन कि दस दिसंबर के नारायणपुर, दंतेवाड़ा, जगदलपुर अउ कोंडागांव जिला ले डीआरजी एसटीएफ अउ सीआरपीएफ के जवान अबूझमाड़ क्षेत्र बर निकले रिहीन। आज भिंसरहा तीन बजे सुरक्षा बल अउ माओवादी मनके बीच मुठभेड़ होइस, एमा सुरक्षा बल ह माओवादी मन ल मार गिराय हे। ए मुठभेड़ म मुख्यमंत्री विष्णुदेव साय ह एला जवान मन के बड़े सफलता बतइन हे। संगेसंग किहीन कि मैं ए अभियान म सामिल सबो सुरक्षा अधिकारी अउ जवान मनके बहादुरी ल सलाम करत हव। ओमन किहीन कि माओवाद के खातमा तक ए लड़ाई चलत रइही।
मतदाता सूची-अंतिम प्रकाशन
राज्य निर्वाचन आयोग ह नगरीय निकाय चुनाव बर मतदाता सूची के अंतिम प्रकासन कर देहे। उहें, पंचायत चुनाव बर मतदाता सूची के अंतिम प्रकासन काली तेरह दिसंबर के करे जाही। प्रदेस म पहिली घांव नगरीय निकाय अउ पंचायत चुनई एक संघरा होवइया हे। दूनों चुनाव के अधिसूचना एक संघरा जारी होही।
आईपीएस-तबादला
राज्य सरकार ह भारती पुलिस सेवा के चार झिन अधिकारी मनके तबादला कर देहे। बछर दू हजार ग्यारा बैच के अधिकारी लाल उम्मेद सिंह ल रईपुर के नवा पुलिस अधीक्षक बनाय गेहे। लाल उम्मेद सिंह आज रईपुर पुलिस अधीक्षक के रूप म अपन कार्यभार ले लेहे। उहें, रईपुर के बड़का पुलिस अधीक्षक संतोष कुमार सिंह ल पुलिस मुख्यालय म सहायक पुलिस महानिरीक्षक बनाय गेहे। उहें, रवि कुर्रे कोरिया जिला के नवा पुलिस अधीक्षक होही। एखर संगेसंग कोरिया के एसपी सूरज सिंह परिहार ल बालोद के धनोरा के सेनानी चौदह बटालियन के पद म पदस्थ करे गेहे। उहें, राज्य शासन ह राज्य पुलिस सेवा के अधिकारी हरीश राठौर ल मुख्यमंत्री सुरक्षा के पुलिस अधीक्षक पद म पदस्थ करे गेहे।
लोहारीडीह मामला
कबीरधाम जिला के लोहारीडीह मामला म मध्य प्रदेस के उच्च न्यायालय के निरदेस म आज मध्य प्रदेस अउ छत्तीसगढ़ के पुलिस ह मउत होय कचरू साहू के शव ल निकाल के फेर ले पोस्टमार्टम कराय हे। जिला के डीएसपी कृष्ण कुमार चंद्राकर ह बतइन कि मध्यप्रदेस के डॉक्टर के टीम ह ए पोस्टमार्टम करे हे।
हरदीभाटा-पुरस्कार
धमतरी जिला के हरदीभाटा ग्राम पंचायत ल राष्ट्रीय पुरस्कार ले सम्मानित करे गेहे। ए पुरस्कार राष्ट्रपति द्रौपदी मुर्म ह हरदीभाटा के सरपंच मुनेन्द्र धु्रव ल दीन हे। ओमन आकाशवाणी समाचार ले गोठबात करत बतइन कि हरदीभाटा ग्राम पंचायत ल सामाजिक रूप ले न्याय संगत अउ संरक्षित पंचायत श्रेणी देस म तीसर रैंक बर ईनाम दे गेहे।
जनादेश परब
रईपुर के साईंस कॉलेज मैदान म काली तेरह दिसंबर के ‘जनादेश परब‘ मनाय जाही। एक कारीकरम म मुख्य अतिथि के रूप म भारतीय जनता पार्टी के राष्ट्रीय अध्यक्ष अउ केंद्रीय स्वास्थ्य मंत्री जेपी नड्डा सामिल होही। उहें, पंद्रह दिसंबर के केंद्रीय गृहमंत्री अमित शाह छत्तीसगढ़ दउरा के बेरा अउ जगदलपुर म बस्तर ओलंपिक के समापन समारोह म सामिल होही।
मुख्यमंत्री इनोवेशन सेंटर
मुख्यमंत्री विष्णुदेव साय ह रईपुर के भाठागांव के अंतर्राज्यीय बस स्टैंड म नवा बने इनोवेसन सेंटर के सुभारंभ करीन। संगेसंग जयस्तंभ चौक मल्टीलेवल पार्किंग म नवा बने को-वर्किंग स्पेस के घलो वर्चुअल लोकार्पण करीन। ए मउका म मुख्यमंत्री ह सेंटर फॉर इनोवेसन, ट्रेड एंड स्कीलिंग के स्थापना रईपुर जिला म एक हजार सीटर को-वर्किंग स्पेस निर्माण अउ नगर-निगम क्षेत्र के हरेक जोन म एक-एक बॉक्स र्स्पोट्स काम्पलेक्स बनाय के घोसना करीन।
मुख्यमंत्री-कांकेर
मुख्यमंत्री विष्णुदेव साय ह काली कांकेर जिला के पखांजूर म दू सौ चौवन करोड़ रूपिया के आने-आने विकास काम के लोकार्पण अउ भूमिपूजन करीन। ए दउरान मुख्यमंत्री ह पखांजूर ले मायापुर तक रद्दा बनाय के काम, खेल परिसर, नालंदा परिसर अउ लाइब्रेरी बनाय के घोसना करीन। उहें, स्वर्गीय असीम रॉय के प्रतिमा के अनावरण करीन। कारीकरम म बोलत मुख्यमंत्री ह किहीन कि नियद नेल्लानार जइसन योजना ले बस्तर के विकास सरलग होवत हे।
व्यवहार न्यायाधीश परिणाम
छत्तीसगढ़ लोक सेवा आयोग ह व्यवहार न्यायाधीश प्रवेस परीक्षा दू हजार तेईस के नतीजा जारी कर देहे। ए परीक्षा म रईपुर के श्वेता दीवान ह अव्वल आय हे। टॉप टेन म सात झिन नोनी मन ह जघा बनाय हे। उनचास पद बर लिखित परीक्षा परिणाम म एक सौ सैंतालिस उम्मीदवार मन ल साक्षात्कार बर चुने जाना रिहीस, फेर वर्गवार उम्मीदवार मनके उपलब्धता के आधार म एक सौ इंक्यावन उम्मीदवार मन ल चुने गेहे। कुल एक सौ पचास उम्मीदवार मन साक्षात्कार म सामिल होइन।
अउ अब मौसम के हाल…
प्रदेस म उत्तर ले ठंडा अउ सुष्क हवा सरलग आवत हे। जेखर सेति राज्य के पेंड्रा मरवाही जिला अउ सरगुजा संभाग के उत्तरी भाग म कुछेक जघा म सीतलहरा चले के संभावना हे। मौसम विज्ञानी एच.पी. चंद्रा ह बतइन कि राज्य म मौसम सूख्खा बने रइही अउ न्यूनतम तापमान म बिसेस फेरबदल होय के संभावना नइ हे।