मुख्यमंत्री विष्णुदेव साय के अध्यक्षता म आज मंत्रालय म होय राज्य मंत्रिमंडल के बइठका म कतकोन जरूरी फइसला ले गीस। बइठका म प्रदेस के अनुसूचित जनजाति वर्ग के उम्मीदवार मन ल छत्तीसगढ़ पुलिस म सूबेदार, उप निरीक्षक संवर्ग अउ प्लाटून कमांडर के भर्ती बर ऊंचाई अउ सीना के निर्धारित मापदंड म एक घाव बर छूट देके निर्णय ले गेहे। मंत्रिपरिषद ह एसो द्वितीय अनुपूरक अनुमान के विधानसभा म उप-स्थापन बर छत्तीसगढ़ विनियोग विधेयक के प्रारूप के अनुमोदन करीन। उहें, छत्तीसगढ़ विधानसभा के सदस्य मन के वेतन, भत्ता अउ पेंसन संसोधन विधेयक अउ छत्तीसगढ़ भूराजस्व संहिता संसोधन विधेयक के प्रारूप के घलो अनुमोदन करे गीस।
मंत्रिमंडल ह राज्य म डेयरी उद्यमिता ल बढ़ाय खातिर अउ दुग्ध संकलन अउ प्रसंस्करण म तेजी लाय बर राष्ट्रीय डेयरी विकास बोर्ड के संग एमओयू करे के फइसला लेहे। उहे, रईपुर म पंद्रह जनवरी ले पंद्रह फरवरी तक होवइया ऑटो-एक्सपो के चलत गाड़ी के रोड टैक्स म सीधा पचास प्रतिसत के छूट दे जाय के निर्णय ले गेहे।
बइठका म छत्तीसगढ़ क्रीडा प्रोत्साहन योजना बर कार्ययेजना के अनुमोदन करे गेहे। उहें, खरीफ विपणन बछर म छत्तीसगढ़ राज्य सहकारी विपणन संघ एफआर के निर्माता मन ले भारत सरकार कोति ले तय करे गे दर म फोर्टीफाइड राईस कर्नेल खरीदे के अनुमति दे गेहे। संगेसंग समर्थन मूल्य म उपार्जित धान के कस्टम मीलिंग प्रोत्साहन रासि ल अस्सी रूपिया करे के बात केहे गीस। त, उहें कतकोन राईस मिल मन ल लंबित प्रोत्साहन रासि के पहिली किस्त दे जाय बर केहे गेहे।
मंत्रिपरिषद ह छत्तीसगढ़ पंचायत राज संसोधन विधेयक, छत्तीसगढ़ नगर पालिक निगम-पालिका अधिनियम संसोधन विधेयक, छत्तीसगढ़ माल अउ सेवा कर संसोधन विधेयक अउ छत्तीसगढ़ अनाधिकृत विकास के नियमतिकरण संसोधन विधेयक के प्रारूप के अनुमोदन करे हे।
हरदीभाटा-पुरस्कार
राष्ट्रपति द्रौपदी मुर्मु ह आज नई दिल्ली के विज्ञान भवन म आयोजित राष्ट्रीय पंचायत पुरस्कार समारोह म छत्तीसगढ़ के धमतरी जिला के हरदीभाटा ग्राम पंचायत ल राष्ट्रीय पुरस्कार ले सम्मानित करीन। हरदीभाटा के सरपंच मुनेन कुमार ह राष्ट्रपति ले ए पुरस्कार ल लीन।
पंचायत के बीच स्वस्थ प्रतिस्पर्धा ल बढ़ावा दे खातिर केंद्रीय पंचायती राज्य मंत्रालय कोति ले हर बछर कतकोन श्रेणी म ए पुरस्कार दे जाथे। एसो पंद्रह राज्य के पैंतालिस पंचायत अउ संस्था ल पुरस्कार दे गेहे।
ग्राम पंचायत हरदीभाटा ल सामाजिक रूप ले न्याय संगत अउ सामाजिक रूप ले संरक्षित पंचायत के श्रेणी म पुरस्कार दे गेहे। उहें, ग्राम पंचायत ल पचास लाख रूपिया के पुरस्कार रासि घलो दे गेहे।
स्मार्ट इंडिया हैकाथॉन
स्मार्ट इंडिया हैकाथॉन के सातवां संस्करण ह अपन अंतिम दउर म हवय। जउन ह आज ले देसभर के इंक्यावन केंद्र म सुरू होगे हे। केंद्रीय शिक्षा मंत्री धर्मेन्द्र प्रधान ह ए हैकाथॉन के ऑनलाइन उद्घाटन करीन। कारीकरम ल संबोधित करत हुए श्री प्रधान ह नवाचार ले वैश्विक चुनौती के सामना करे म भारत देस के बाढ़त भूमिका उपर जोर दीन।
छत्तीसगढ़ के बिलासपुर के गुरू घासीदास केंद्रीय विश्वविद्यालय, रईपुर के एमिटी विश्वविद्यालय, भिलाई के रूंगटा कॉलेज अउ दुरूग जिला के आईआईटी भिलाई म घलो स्मार्ट इंडिया हैकाथॉन के आयोजन करे जात हे।
रईपुर के एमिटी विश्वविद्यालय म होवत कारीकरम म मुख्य अतिथि के रूप म राष्ट्रीय अउ राज्य सूचना विज्ञान विभाग के उप महानिदेसक टी.एन. सिंह सामिल होइन। ओमन ह हैकाथॉन म भाग लेवत प्रतिभागी मन ल सरकारी अउ निजी क्षेत्र मनके चुनौती बर अभिनव समाधान विकसित करे बर प्रेरित करीन। उहें, एमिटी विश्वविद्यालय के कुलपति प्रोफेसर पीयूष कांत पांडे ह प्रतिभागी मन ले प्रभावसाली विचार ल प्रस्ताव देके आह्वान करीन।
निर्माण श्रमिक मृत्यु-सहायता राशि
प्रदेस के अपंजीकृत निर्माण श्रमिक मनके कार्यस्थल म दुर्घटना ले होय मउत म उंखर घर वाला मन ल एक लाख रूपिया के सहायता रासि दे जाही। राज्य सरकार ह एखर बर नियम म संसोधन करे बर जात हे। अभी के बेरा म अगर कोनो मजूर ह छत्तीसगढ़ भवन अउ आने संन्निर्माण कर्मकार कल्याण मंडल के अंतर्गत पंजीकृत नइ हे, त ओखर कार्यस्थल म मउत होय म उंखर घर वाला मन ल कोनो प्रकार के आर्थिक सहायता रासि नइ मिल पात रिहीस। इही परेसानी ल देखत हुए श्रममंत्री लखनलाल देवांगन के निरदेस म विभाग, मुख्यमंत्री निर्माण श्रमिक मृत्यु अउ दिव्यांग सहायता योजना के अधिसूचना म आंसिक संसोधन करे बर जात हे।
माओवादी मुठभेड़ ग्रामीण-हत्या
बीजापुर जिला म पुलिस अउ माओवादी मनके बीच आज होय मुठभेड़ म एक झिन माओवादी ह मारे गेहे। उहें, मुठभेड़ के चलत माओवादी कोति ले करे गे आईईडी बिस्फोट म डीआरजी के दू झिन जवान मन घायल होगे। घायल जवान मनके ईलाज बीजापुर के चिकित्सालय म चलत हे। बीजापुर विधायक विक्रम मंडावी ह घायल जवान मन ले भेंट घलो करीन।
ऐति, जिला के पुलिस अधीक्षक जितेन्द्र यादव ह बतइन कि गंगालूर थाना क्षेत्र म मुनगा के जंगल म माओवादी मन के रेहे के सूचना मिले म आज बिहनिया पुलिस टीम ल भेजे गे रिहीस, इही बेरा म मुनगा के जंगल म पहिली ले घात लगाय बइठे माओवादी मन ह पुलिस उपर गोलीबारी सुरू कर दीन, फेर जवान मन कोति ले करेगे जवाबी कार्रवाई म एक झिन वर्दीधारी माओवादी ह मारे गीस। उहें, घटना वाले जघा ले पुलिस ह नौ एमएम के बंदूक के संग माओवादी जिनिस ल जब्त करे हे।
इही बीच, बीजापुर जिला म माओवादी मन ह पाछू रतिहा कुटरू थाना क्षेत्र के सोमनपल्ली गांव म भाजपा नेता के हत्या कर दीन। पुलिस अधीक्षक जितेन्द्र यादव ह घटना के पुष्टि करीन। खबर के मुताबिक बीजापुर जिला म पाछू एक सप्ताह म माओवादी मन ह पांच लोगन के हत्या करे हे।
भाजपा-संसदीय दल-बैठक
केंद्रीय आवासन अउ शहरी कार्य राज्यमंत्रि तोखन साहू ह काली दिल्ली म होय छत्तीसगढ़ भाजपा के संसदीय दल बइठका म सामिल होइन। ए बइठका म संगठन महापरब अउ विकास ल लेके गोठबात होइस। बइठक म राष्ट्रीय सह संगठन मंत्री शिवप्रकाश, क्षेत्रीय महा सचिव अजय जामवाल अउ प्रदेस संगठन महामंत्री पवन साय ह मौजूद रिहीन। ए बइठक म छत्तीसगढ़ के सबो सांसद मन ह घलो सामिल होइन।
मानवाधिकार दिवस-कार्यशाला
अंतर्राष्ट्रीय मानवाधिकार दिवस म आज रईपुर के हिदायतुल्लाह नेशनल लॉ युनिवर्सिटी म कार्यसाला के आयोजन होइस। एला तीन सत्र म आयोजित करे गीस, जेमा मीडिया प्रणाली के संग कृत्रिम बुध्दिमता के संगम अउ मानवाधिकार म एखर प्रभाव ल लेके गोठबात करे गीस। ए कारीकरम म राज्य सरकार के कतकोन विभाग के जनसंपर्क अधिकारी, मीडियाकर्मी, एएफटी यूनिवर्सिटी ऑफ मीडिया अउ आर्ट्स संकाय के सदस्य मनके संगेसंग कतकोन विश्वविद्यालय के आने-आने छात्र मन ह घलो भाग लीन।
महिला फुटबॉल प्रतियोगिता
नारायणपुर के रामकृष्ण मिसन आश्रम म काली ले महिला फुटबॉल प्रतियोगिता सुरू होय हे, जेखर दूसर दिन आज पश्चिम बंगाल के टीम ह पंजाब ल छै गोल ले हराय हे। प्रतियोगिता के चलत काली के खेले गे उद्घाटन मैच म झारखंड ह तमिलनाडू ल तीन- सून्य ले हराय रिहीन। ए प्रतियोगिता म मनिपुर, सिक्किम, पिंश्चम बंगाल, पंजाब, हरियाणा, ओडिसा, झारखंड, महाराष्ट्र, तमिलनाडू अउ रेलवे के टीम ह भाग लेवत हे। ए प्रतियोगिता के चलत उन्नीस दिसंबर तक लीग मैच खेले जाही। त उहें, इक्कीस दिसंबर के सेमी फाइनल अउ तेईस दिसंबर के फाइनल मुकाबला होही।
जांजगीर-चांपा के बहेराडीह के किसान स्कूल म राज्य स्तरीय ‘भाजी महोत्सव‘ मनाय गीस, जेमा सक्ति, कोरबा, गरियाबंद, सरगुजा अउ धमतरी जिला ले लोगन मन ह आने-आने प्रकार के साग भाजी लेके पहुंचे रिहीन। ए बेरा म भाजी प्रतियोगिता घलो होइस, जेमा पहिली, दूसर अउ तीसर स्थान पाय वाले प्रतिभागी मन ल इनाम दे गीस। ए कारीकरम म कलेक्टर आकाश छिकारा ह घलो सामिल होइन। किसान स्कूल म छत्तीस प्रकार के भाजी ल इकट्ठा करे गेहे।
अउ अब मौसम के हाल…
प्रदेस म उत्तर ले ठंडा अउ सुष्क हवा आवत हे। एखर सेति प्रदेस के न्यूनतम तापमान म दू ले तीन डिग्री के गिरावट दरज करे गेहे। मौसम विभाग के अनुसार अवइया दिन म न्यूनतम तापमान म अउ गिरावट आही, जेखर सेति ठंड ह बाढ़ही।