छत्तीसगढ़ के पहिली स्वतंत्रता संग्राम सेनानी अमर शहीद वीरनारायण सिंह के बलिदान दिवस के मउका म आज मुख्यमंत्री विष्णुदेव साय ह बलौदाबाजार-भाटापारा जिला के सोनाखान पहुंचीन। मुख्यमंत्री ह इहां एक सौ बयानवे करोड़ रूपिया के दू सौ बयालीस विकास काम के लोकार्पण अउ भूमिपूजन करीन। ए मउका म मुख्यमंत्री ह कहिन कि केन्द्र अउ राज्य सरकार जनजातीय वर्ग के कल्याण बर आने-आने योजना चलावत हे।
एखर पहिली, मुख्यमंत्री ह रायपुर के जयस्तंभ चौक म उंखर मूर्ति म फूलमाला पहिरा के ओमन नमन करीन। ए मउका म मुख्यमंत्री ह कहिन कि स्वतंत्रता बर अपन जिनगी न्यौछावर करइया आदिवासी जन-नायक वीरनारायण सिंह ह छत्तीसगढ़ महतारी के सच्चा सपूत रिहीन। ओमन सोनाखान के जमींदार परिवार ले रिहीन, फेर ओमन आदिवासी, किसान अउ गरीब मन बर लड़ई लड़ीन।
उहें, छत्तीसगढ़ विधानसभा परिसर स्थित सेंन्ट्रल हॉल म घलो शहीद वीरनारायण सिंह के फोटू म विधानसभा सचिव दिनेश शर्मा ह फूलमाला चढ़ाके ओमन ल नमन करीन।
अन्न कोष योजना-शुभारंभ
मुख्यमंत्री विष्णुदेव साय ह सरगुजा जिला म विशेष पिछड़ी जनजाति पहाड़ी कोरवा समुदाय के गर्भवती अउ शिशुवती माता मन ल उपरहा पोषण आहार देवाय बर ‘‘मुख्यमंत्री अन्न कोष योजना‘‘ के सुभारंभ करीन। जिला प्रसासन डहार ले ए योजना पायलट प्रोजेक्ट के रूप म सुरू करे गेहे। एमा पहाड़ी कोरवा समुदाय म माता अउ लइका मनके मृत्युदर ल कम करे म मदद मिलही।
मुख्यमंत्री-चिरमिरी
मुख्यमंत्री विष्णुदेव साय ह मनेन्द्रगढ़-चिरमिरी-भरतपुर जिला के चिरमिरी म सौ बिस्तर वाला सर्व-सुविधायुक्त जिला चिकित्सालय के सुभारंभ करीन। ए मउका म ओमन जनकपुर स्थित सामुदायिक स्वास्थ्य केन्द्र म सौ बिस्तर वाला अस्पताल के सेटअप तैयार करे, भरतपुर म अनुविभागीय अधिकारी पुलिस के पद के मंजूरी अउ चिरमिरी, खोंगापानी अउ झगराखंड म ग्रिड के माध्यम ले बिजली आपूर्ति कराय के घोसना करीन। ए मउका म मुख्यमंत्री ह कहिन कि राज्य म स्वास्थ्य सुविधा के विस्तार करना सासन के प्राथमिकता म हे। ए दउरान मुख्यमंत्री ह जिला अस्पताल के आने-आने वार्ड, कक्ष अउ मरीज मन ल मिलइया सुविधा के घलो जायजा लीन।
मुख्यमंत्री-महाकुंभ आमंत्रण
उत्तरप्रदेश के प्रयागराज म तेरह जनवरी ले छब्बीस फरवरी तक गंगा, युमना अउ सरस्वती नदिया के संगम म महाकुंभ के आयोजन करे जाही। ए आयोजन म सामिल होय बर उत्तरप्रदेश के मुख्यमंत्री योगी आदित्यनाथ ह छत्तीसगढ़ के मुख्यमंत्री विष्णुदेव साय ल नेवता भेजे हे। मुख्यमंत्री निवास म आज उत्तरप्रदेश के दू झिन मंत्री – सुनील कुमार शर्मा अउ संजय गोंड ह श्री साय ल गंगा जल अउ प्रतीक चिन्ह देके नेवता पत्र सौंपीन। महाकुंभ म जवइया छत्तीसगढ़ के श्रद्धालु मन बर प्रयागराज म राज्य सरकार डहार ले पंडाल के संगेसंग लोगन मनके रूके अउ भोजन के व्यवस्था घलो रइही।
मानवाधिकार दिवस
आज मानवाधिकार दिवस मनाय जावत हे। हरेक बछर दस दिसंबर के मानवाधिकार के बारे म सार्वभौम घोसना के सुरता म ए दिवस मनाय जाथे। नई दिल्ली म राखे गे कारीकरम ल संबोधित करत राष्ट्रपति द्रौपदी मुर्मु ह जम्मों अधिकार अउ गरिमा के सुरक्षा करइया समान डिजिटल वातावरण ल सुनिश्चित करे के महत्व उपर बल दीन। राष्ट्रपति ह कहिन कि साइबर अपराध अउ जलवायु परिवर्तन मानवाधिकार बर नवा चुनौती आय। राष्ट्रपति ह कहिन कि भारत ह गरीबी अउ भुखमरी ल समाप्त करे अउ युवा मन ल समान अवसर देवाय बर नीति लागू करके दुनिया के आगू उदाहरण पेस करे हे।
ईडी-संपत्ति कुर्की
प्रवर्तन निदेशालय-ईडी ह आईएएस अधिकारी रानू साहू समेत नौ आने आरोपी मनके जमीन, आवासीय संपत्ति अउ बैंक म जमा पइसा समेत इक्कीस करोड़ सैंतालीस लाख रूपिया के चल-अचल संपत्ति ल कुर्क कर लेहे। जिला खनिज निधि-डीएमएफ घोटाला म उंखर कथित भूमिका बर धन शोधन निवारण अधिनियम के तहत नौ आरोपी मनके खिलाफ जांच चलत हे। भारतीय दंड संहिता के तहत छत्तीसगढ़ पुलिस डहार ले दर्ज तीन आने-आने मामला के आधार म घलो ईडी डहार ले जांच करे जावत हे।
सूखा नशा-एएनटीएफ
राज्य सरकार ह प्रदेस म बाढ़त सूखा नशा म रोक लगाय बर एंटी नारकोटिक्स टास्क फोर्स-ए.एन.टी.एफ. के गठन करे हे। ए टास्क फोर्स पंजाब, उत्तरप्रदेश अउ दिल्ली जइसन राज्य के तर्ज म काम करही। नारकोटिक्स विभाग के पुलिस महानिरीक्षक अजय यादव ल टास्क फोर्स के चीफ बनाय गेहे। पुलिस मुख्यालय म आईजी के संग बीस अधिकारी मनके टीम होही। एखर संगेसंग सबो जिला मन म घलो एंटी नारकोटिक्स टास्क फोर्स के टीम बनाय जाही। ए टीम म डीएसपी, एएसपी समेत पुलिस विभाग के दस झिन लोगन सामिल होही। ए.एन.टी.एफ. ह नारकोटिक्स ले जुड़े जम्मों मामला के जांच अउ कार्रवाई करही। एनडीपीएस ले जुड़े जम्मों मामला के निगरानी पुलिस मुख्यालय म बने टीम करही। हर जिला म मौजूद बल मन ले ए.एन.टी.एफ. के टीम के गठन होही। टीम म एएसपी, एक टीआई, दू एसआई, दू प्रधान आरक्षक अउ चार आरक्षक मनके नियुक्ति होही। ए टीम सीधा पुलिस मुख्यालय म बने निगरनी टीम ल रिपोर्ट करही।
अग्निवीर भर्ती रैली-युवक मौत
रायगढ़ म जारी अग्निवीर भर्ती रैली के दउरान अभ्यर्थी मनके बीच कराय गे दउड़ म एक युवक बेहोश होके गिर गे। इलाज के दउरान ओखर मउत होगे। डॉक्टर अउ परिवार वाले मनके मुताबिक ए युवक सिकलसेल के बीमारी ले ग्रसित रिहीस। पोस्टमार्टम के बाद प्रसासन ह युवक के सव ल परिवार ल सौंप देहे। एखर बाद युवक के सव ल जिला प्रसासन के अधिकारी मनके संग गृहग्राम भेजे गीस। एखरे संग जिला प्रसासन डहार ले युवक के अंतिम संस्कार बर थोरबहुत मदद करे गीस। उहें, मृतक के परिवार वाले ल मुख्यमंत्री स्वेच्छानुदान ले दस लाख रूपिया दे जाही।
विषाक्त भोजन-छात्रा मौत
बीजापुर जिला म धनोरा के एक आवासीय विद्यालय म विषाक्त भोजन खाय ले एक छात्रा के मउत होगे। उहें, पैंतीस छात्र-छात्रा मन बीमार होगे हे, जेमा ले नौ के हालत गंभीर बताय जात हे। आवासीय विद्यालय के मंडल संयोजक भूपति नक्का ह बतईन कि इतवार के रतिहा पनीर के सब्जी खाय के बाद कुछेक लइका मन ल उल्टी-दस्त सुरू होगे रिहीस। लइका मनके हालत बिगड़त देखके अधीक्षक ह ओमन ल तुरते जिला अस्पलात म भर्ती करईस, जिहां इलाज चलत हे।
इही बीच, बीजापुर के कलेक्टर संबित मित्रा ह जिला अस्पताल पहुंच के बीमार छात्रा मनके हालचाल जानीन।
सतीशचंद्र वर्मा-जमानत याचिका
एन्टी करप्शन ब्यूरो-एसीबी अउ आर्थिक अपराध अन्वेषण शाखा-ईओडब्ल्यू डहार ले दर्ज मामला म प्रदेस के पूर्व महाधिवक्ता सतीशचंद्र वर्मा के अग्रिम जमानत याचिका म हाईकोर्ट म आज सुनवाई होइस। सुनवाई पूरा होय के बाद एकल पीठ ह अपन फैसला सुरक्षित राखे हे। खबर के मुताबिक राज्य के पूर्व महाधिवक्ता सतीशचंद्र वर्मा ह रायपुर के एसीबी कोर्ट के फैसला के खिलाफ हाईकोर्ट म याचिका लगाय रिहीन।
अब अब मौसम के हाल…
प्रदेस म ठंडा अउ सुष्क हवा ह सरलग बाढ़त हे, जेखर कारण राज्य के मैदानी इलाका म तापमान म करीबन पांच डिग्री सेल्सियस के गिरावट दर्ज करे गेहे। उहें, उत्तरी हिस्सा के तापमान म तीन डिग्री सेल्सियस के कमी आय हे। मौसम विभाग के मुताबिक ठंडा हवा के सेती बस्तर संभाग म घलो तापमान म कमी आवत हे। अवइया चौबीस घंटा के दउरान प्रदेस म ठंडा हवा के असर ले न्यूनतम तापमान गिरावट हो सकत हे।
प्राधिकरण गठन-प्रभारी सचिव
राज्य सरकार ह नवभारत साक्षरता कार्यक्रम के तहत चलाय जावत अभियान ‘उल्लास‘ के क्रियान्वयन बर जिला, विकासखंड अउ सहर स्तर म प्राधिकरण के गठन कर देहे। ए बारे म सामान्य प्रसासन विभाग ह आदेस जारी कर देहे। जिला स्तर म कलेक्टर, ब्लॉक स्तर म जनपद पंचायत के सीईओ अउ नगर स्तर म संबंधित नगरीय निकाय के आयुक्त या सीएमओ प्राधिकरण के अध्यक्ष होही।
प्रदेस के जम्मों जिला म जनकल्याणकारी कारीकरम ल लागू के संगेसंग विकास काम के मॉनिटरिंग बर प्रभारी सचिव नियुक्त करे गेहे। संबंधित जिला के प्रभारी सचिव मन ह जिला म चलत योजना अउ विकास काम के निगरानी करही। प्रभारी सचिव हरेक महीना अपन प्रभार जिला के भ्रमण करके विकास काम के समीक्षा करही अउ जानकारी मुख्य सचिव ल दीहीं।