राष्ट्रपति-सम्मान
ग्यारा दिसंबर के नई दिल्ली के विज्ञान भवन म होवइया कारीकरम म धमतरी जिला के हरदीभाटा गांव ल सम्मानित करे जाही। राष्ट्रपति श्रीमती द्रौपदी मुर्मु ह राष्ट्रीय पंचायत पुरस्कार दू हजार चौबीस के चलत ए गांव ल सामाजिक रूप ले न्यायसंगत अउ सामाजिक रूप ले संरक्षित पंचायत श्रेणी म ए पुरस्कार दीहीं। एसो कतकोन श्रेणी के पैंतालिस झिन पुरस्कार विजेता मन ल चुने गेहे, जेमा छत्तीसगढ़ ह घलो सामिल हे।
प्रधानमंत्री बीमा सखी योजना
प्रधानमंत्री नरेंद्र मोदी ह माईलोगिन मन म वित्तीय साक्षरता अउ बीमा जागरूकता ल बढ़ावा देबर हरियाणा के पानीपत म ‘‘बीमा सखी योजना‘‘ के सुभारंभ करीन। भारतीय जीवन बीमा निगम के ए पहल ले अट्ठारा ले सत्तर बछर तक के उमर के माईलोगिन मन के सशक्तिकरण होही। ए योजना के चलत दसवीं पास माईलोगिन मन ल बिसेसज्ञता प्रसिक्षण दे जाही अउ पहिली तीन बछर बर मासिक भत्ता दे जाही। प्रधानमंत्री ह भावी बीमा सखी मन ल नियुक्ति प्रमाण पत्र बांटिन।
ए बेरा म प्रधानमंत्री ह किहीन कि उंखर सरकार ह पाछू दस बछर म महिला सशक्तिकरण बर कतकोन जरूरी कदम उठाय हे। ओमन ह किहीन कि देस ह बीमा सखी योजना के सुभारंभ के संग महिला सशक्तिकरण के दिसा म घलो एक अउ कदम बढ़ा देहे।
मुख्यमंत्री-आवास योजना
मुख्यमंत्री विष्णुदेव साय ह आज रईपुर के अपन कार्यालय म ‘‘अटल विहार योजना‘‘ के चलत छत्तीसगढ़ गृह निर्माण मंडल के सात आवासीय परियोजना के सुभारंभ करीन। एखर चलत रईपुर के भूरकोनी, राजिम के पथर्रा, धमतरी के खरतुली अउ सिहाद, दुरूग के पुलगांव, बालोद के गुरूर अउ बीजापुर के कोकड़ापारा म ई.डब्ल्यू.एस., एल.आई.जी. अउ एम.आई.जी. के श्रेणी म घर बनाय जाही। करीबन तीन सौ करोड़ रूपिया ले ए जम्मो परियोजना के चलत एक हजार छै सौ पचास ठिन घर बनाय जाही। एमा ई.डब्ल्यू.एस. अउ एल.आई.जी. श्रेणी के एक हजार चार सौ बावन ठिन घर अउ एमआईजी श्रेणी के दू सौ ठिन घर बनाय जाही। हितग्राही मन ह भवन के ऑनलाइन पंजीयन ल वेबसाइट के माध्यम ले घर बइठे कर सकथे।
ए बेरा म मुख्यमंत्री ह किहीन कि राज्य सरकार के एक बछर पूरा होय बर जात हे। ए मउका म छत्तीसगढ़ के कतकोन सहर अउ विकासखंड म रहत बेघर लोगन मन ल पक्का घर दिलाय खातिर ‘अटल विहार योजना‘ ल सुरू करे गेहे। एखर चलत हाउसिंग बोर्ड कोति ले पचास हजार भवन ल बनाके आबंटन करे के लक्ष्य राखे गेहे।
राज्यपाल-आईआईटी केंद्र शुभारंभ
राज्यपाल रमेन डेका आज दुरूग के आईआईटी भिलाई म ‘‘संस्कृति, भाषा और परंपरा केंद्र‘‘ के सुभारंभ करीन। ए बेरा म राज्यपाल ह किहीन हे कि आईआईटी भिलाई म ए केंद्र ह मील के पत्थर होही। ए केंद्र के स्थापना आदिवासी समुदाय के सांस्कृतिक विरासत अउ ज्ञान, भाखा अउ सरलग विकास ल बढ़ावा देबर करे गेहे। उहें, राज्यपाल ह कारीकरम वाले जघा म लगाय गे छत्तीसगढ़ जनजाति हैण्डीक्राफ्ट स्टाल ल घलो देखिन।
केंद्रीय मंत्री-दौरा
केंद्रीय स्वास्थ्य मंत्री अउ भाजपा के राष्ट्रीय अध्यक्ष जेपी नड्डा ह तेरह दिसंबर के छत्तीसगढ़ अवइया हे। ए बेरा म श्री नड्डा ह राज्य के भाजपा सरकार के एक बछर पूरा होय म रिपोर्ट कार्ड जारी करही। उहें, राष्ट्रीय अध्यक्ष के ए दउरा ल देखत हुए राज्य सरकार अउ भाजपा संगठन ह अपन तियारी ल सुरू कर देहे।
स्मार्ट इंडिया हैकाथॉन
स्मार्ट इंडिया हैकाथॉन के सांतवां कडी़ ह अवइया ग्यारा दिसंबर के देसभर के इंक्यावन ठिन केंद्र म एक संघरा सुरू होवत हे। केंद्रीय शिक्षा मंत्री धर्मेन्द्र प्रधान ह ए कारीकरम के ऑनलाइन उद्घाटन करही। छत्तीसगढ़ म रईपुर के एमिटी यूनिवर्सिटी ह घलो ‘‘स्मार्ट इंडिया हैकाथॉन‘‘ के मेजबानी करही। ए कारीकरम म तेरह राज्य ले अट्ठाईस झिन प्रसिक्षक मनके मार्गदर्सन म एक सौ छियासी झिन प्रतिभागी मन ह सामिल होही। एमा तिरासी झिन माईलोगिन मन ह घलो सामिल होही। उहें, देसभर के एकतीस टीम ह भाग लिही। छत्तीसगढ़ म चार ठिन जघा म स्मार्ट इंडिया हैकाथॉन के आयोजन करे जाही, जेमा भिलाई, बिलासपुर, रईपुर अउ दुरूग सामिल हे।
दसवीं/बारहवीं-समय सारिणी
छत्तीसगढ़ माध्यमिक शिक्षा मंडल ह हाई स्कूल अउ हायर सेकेंडरी के मुख्य परीक्षा बछर दू हजार चौबीस-पच्चीस के समय सारिणी ल जारी कर देहे। हायर सेकेंडरी परीक्षा ह एक मार्च ले सुरू होके अट्ठाईस मार्च तक चलही। उहें, हाईस्कूल के परीक्षा ह तीन मार्च ले सुरू होके चौबीस मार्च तक चलही। अइसने शारिरीक प्रसिक्षण पत्रोपाधि परीक्षा ह एक मार्च ले दस मार्च तक ले जाही। ए समय सारिणी ल छत्तीसगढ़ माध्यमिक शिक्षा मंडल के वेबसाईट म देखे जा सकत हे।
प्रसार भारती-पुरस्कार वितरण
प्रसार भारती सचिवालय ह आज नई दिल्ली के अपन कार्यालय म राजभाषा पुरस्कार वितरण समारोह के आयोजन करीन। ए कारीकरम म हिंदी माह के चलत सितंबर अउ अक्टूबर महिना म होय कतकोन प्रतियोगिता के विजेता मन ल पुरस्कार दे गीस। ए प्रतियोगिता म आने-आने बिसय उपर कार्यसाला अउ संगोष्ठी सामिल रिहीस, जेमा प्रसार भारती के अधिकारी अउ करमचारी मन ह भाग ले रिहीन।
जशपुर-पर्यटन
जशपुर जिला ह पर्यटन वेबसाइट म सामिल होय वाला प्रदेस के पहिली जिला बन गेहे। अब पर्यटन के वेबसाइट ले लोगन मन ल जशपुर के कतकोन सुंदर जघा के जानकारी आसानी ले मिल पाही।
मुख्यमंत्री विष्णुदेव साय ह किहीन हे कि वैश्विक पर्यटन के नक्सा म जशपुर जिला के सामिल होना सबो प्रदेसवासी मन बर गरब के बिसय हे। ओमन ह किहीन हे कि छत्तीसगढ़ म पर्यटन ल अउ बढ़ाय खातिर राज्य सरकार ह सरलग काम करत हे।
खबर के मुताबिक जशपुर के मधेश्वर पहाड़ ल दुनिया के सबले बड़का स्वयंभू शिवलिंग माने जाथे। एखर अलावा इंहा के दमेरा, देशदेखा, चाय बगान, सोगड़ा आश्रम, रानीदाह, बगीचा विकासखंड म कैलाश गुफा समेत कुनकुरी म एशिया के दूसर सबले बड़े चर्च हवय।
ठगी आरोपी-गिरफ्तार
बालोद जिला के पंचानवे गांव के कतकोन माईलोगिन मन ले सत्तर करोड़ रूपिया ले जादा के ठगी करे के मामला आगू आय हे। पुलिस ह ए मामला म मुख्य आरोपी समेत तीन झिन लोगन मन ल गिरफ्तार करे हे। पुलिस ह बतइन कि आरोपी मन ह माईलोगिन मन के नाव म बैंक अउ माइक्रो फाइनेंस कंपनी ले करीबन सत्तर करोड़ रूपिया ले जादा के लोन निकाले हे। जब माईलोगिन मन ल एखर बारे म पता लगिस त, शनिवार के नारागांव अउ किनारगोंदी के छियासी ले जादा माईलोगिन मन ह पुलिस थाना म जाके सिकइत दरज कराइन। एखर बाद पुलिस ह मुख्य आरोपी खोलबहरा कैवर्त्य, बालोद के रहइया चंद्रहास करियाम अउ पत्नी सरिता ल हिरासत म ले लेहे।
दुर्घटना
कोरबा जिला के घूमानीडांड़ गांव करा आज तेजी ले आत पिकअप गाड़ी ह पलट गे, जेमा एक बछर के लइका के मउत होगे। उहें, पच्चीस झिन आने मनखे मन ह घायल होगे हे। सबो घायल मन ल अस्पताल म भर्ती कराय गेहे। बताय जात हे कि बनखेता ग्राम पंचायत के कांसामार के लोगन मन पिकअप गाड़ी ले बुका पिकनिक मनाय बर गे रिहीन। ईतवार के रतिहा उंहा ले लहुटे के बेरा बजटगा चौकी के तीर इही पिकअप गाड़ी ह पलट गे रिहीस।
ऐति, इही जिला म राष्ट्रीय राजमार्ग-एक सौ तीस के कटघोरा ले अंबिकापुर जवइया रद्दा म अज्ञात ट्रक ह बाइक सवार ल टक्कर मार दीस, जेमा एक मनखे के मउका म ही मउत होगे अउ दू झिन आने लोगन मन ह गंभीर रूप ले घायल होगे हे।
अउ अब मौसम के हाल…पाछू कुछेक दिन म प्रदेस के कतकोन जघा म होय बरसा के बाद जाड़ बाढ़ सकत हे। मौसम विभाग के अनुसार आज ले न्यूनतम तापमान अउ कम हो सकत हे, जेमा अवइया चौबीस घंटा के बाद दू ले चार डिग्री तक के गिरावट हो सकत हे। मौसम विभाग ह आज प्रदेस के एक दू जघा म हल्का बरसा या फेर गरज-चमक के संग गाज गिरे के संभावना जताय हे।