केंद्रीय जांच ब्यूरो-सीबीआई ह छत्तीसगढ़ लोक सेवा आयोग पीएससी भर्ती परीक्षा म होय गड़बड़ी मामला म परीक्षा कंट्रोलर रेहे राज्य प्रशासनिक सेवा के अधिकारी आरती वासनिक ल हिरासत म ले बाद सीबीआई ह पूछताछ करत हे।
इंहा, ए बतादन कि पीएससी परीक्षा गड़बड़ी मामला म होय एफआईआर म आरती वासनिक के नाम घलो रिहीस। दू दिन पहिली सीबीआई टीम ह आरती वासनिक के राजनांदगांव स्थित घर म छापा मारे रिहीस, जेखर बाद सीबीआई ह ओखर ले सरलग पूछताछ करत हे। एखर आगू पाछू कुछ दिन पहिली सीबीआई ह पीएससी के पूर्व चेयरमेन टामन सिंह सोनवानी ल गिरफ्तार करे हे।
मुख्यमंत्री-लोकार्पण
मुख्यमंत्री विष्णुदेव साय ह आज नवा रईपुर स्थित रावतपुरा सरकार इंस्टीट्यूट ऑफ मेडिकल साइंसेस के नवा बिल्डिंग के लोकार्पण करीन। ए दउरान मुख्यमंत्री ह मेडिकल कॉलेज के कई ठिन विभाग अउ अत्याधुनिक क्लास रूप ल देखिन अउ उंहा मौजूद सुविधा के जायजा लीन। मुख्यमंत्री ह छै सौ पचास ठिन दसना वाले अस्पताल के स्वास्थ्य सुविधा बारे म घलो जानबा लीन। ए दउरान ओमन हॉस्पिटल म नवा सिटी स्कैन, एमआरआई यूनिट, डायलिसिस यूनिट अउ इमरजेंसी चिकित्सा यूनिट के सुभारंभ करीन।
एखर बाद मुख्यमंत्री ह व्हाइटकोट सेरेमनी म सामिल होइन, जिहां ओमन एमबीबीएस म एडमिसन ले पढ़इया लइका मन ल मेडिकल प्रोटोकाल के सपथ देवाइन। सेरेमनी म बोलत मुख्यमंत्री ह किहीन कि चिकित्सा क्षेत्र ह जवान लइका मन बर एक ठिन सुघ्घर कैरियर होय के संगेसंग लोगन मनके सेवा करे के बने मउका घलो देथे।
मुख्यमंत्री-शपथ ग्रहण
मुख्यमंत्री विष्णुदेव साय काली रईपुर के इंदिरागांधी कृषि विश्वविद्यालय परिसर के कृषक सभागार म राखेगे छत्तीसगढ़ सर्व आदिवासी समाज के नवनिर्वाचित प्रबंध कारिणी समिति के सपथ ग्रहण समारोह म सामिल होइन। ए मउका म मुख्यमंत्री किहीन कि जनजाति समाज के विकास बर हमर सरकार प्रतिबध्द हे अउ एखर विकास बर सरलग काम करत हे। प्रधानमंत्री नरेंद्र मोदी ह धरती आबा जनजाति ग्राम उत्कर्ष अभियान के सुरूआत करीन हे, जेखर फायदा पांच करोड़ जनजाति मन ल मिलही, जेमा छत्तीसगढ़ के कई ठिन गांव सामिल हे।
उपमुख्यमंत्री-लोकार्पण
उप मुख्यमंत्री अरूण साव ह काली मुंगेली जिला के खुड़िया म दू सौ नब्बे करोड़ रूपिया ले जादा लागत के मल्टी विलेज जल प्रदाय योजना के वाटर ट्रीटमेंट प्लांट बर भूमिपूजन अउ सिलान्यास करीन। जल जीवन मिसन के खुड़िया मल्टी-विलेज योजना ले मुंगेली जिला के तीनों विकासखंड के दू सौ छै गांव मन ल साफ अउ सुरक्षित पिये के लइक पानी दे जाही।
उहें, उपमुख्यमंत्री ह इही जिला के नवरंगपुर म नवा विद्युत सब स्टेसन के लोकार्पण घलो करीन।
स्मार्ट इंडिया हैकाथॉन
स्मार्ट इंडिया हैकाथॉन के सातवां संस्करण अवइया ग्यारा दिसंबर के देसभर के इंक्यावन ठिन केंद्र मन म संघरा सुरू होही। केंद्रीय शिक्षा मंत्री धर्मेन्द्र प्रधान ह ए कारीकरम के वर्चुअली उद्घाटन करही। छत्तीसगढ़ म दुरूग स्थित भिलाई इंस्टीट्यूट ऑफ टेक्नालॉजी ह ‘‘स्मार्ट इंडिया हैकाथॉन‘‘ के मेजबानी करही। ए कारीकरम म तेरह ठिन राज्य ले अट्ठाईस झिन प्रसिक्षक मनके मार्ग दर्सन म एक सौ छियासी झिन प्रतिभागी सामिल होही, जेमा तिरासी झिन नारीपरानी रइही। उहें, देसभर के एकतीस ठिन टीम भाग लिही।
छत्तीसगढ़ म चार ठिन जघा म स्मार्ट इंडिया हैकाथॉन होही, जेमा भिलाई, बिलासपुर, रईपुर अउ दुरूग सामिल हे।
मुख्यमंत्री-झंडा दिवस
मुख्यमंत्री विष्णुदेव साय ह भूतपूर्व सैनिक अउ शहीद मन के परिवार मनके कल्याण बर सशस्त्र सेना झंडा दिवस निधि म अपन योगदान देहें। ए बेरा म मुख्यमंत्री ह प्रदेसवासी मन ल घलो सशस्त्र सेना झंडा दिवस निधि म अपन योगदान देके अपील करे हे।
मुख्यमंत्री ले काली सैनिक कल्याण बोर्ड के संचालक बिग्रेडियर विवेक शर्मा ह उंखर घर के ऑफिस म भेंट करीन अउ ओमन ल लेपल पिन लगाके सशस्त्र सेना झंडा दिवस के सुभकामना दीन। बिग्रेडियर विवेक शर्मा ह मुख्यमंत्री ल बतइन कि सशस्त्र सेना झंडा दिवस निधि ले सत्ताईस ठन कल्याणकारी योजना मनके संचालन करे जात हे।
माओवादी- गोलीबारी
बीजापुर जिला म माओवादी मन ह आज पुलिस कैंप उपर गोलीबारी कर दीस। पुलिस अधीक्षक डॉक्टर जितेन्द्र यादव ह बतइन कि माओवादी मन आज बिहनिया पामेड़ थाना के जिड़पल्ली पुलिस बेस कैंप म हमला कर दीस। माओवादी डहार ले होय हुरहा फायरिंग के जवाब सुरक्षा बल मन घलो दीन। पुलिस अधीक्षक ह बतइन कि गोलीबारी म तीन झिन जवान ल मामूली चोट लगे हे, जेखर मन के प्राथमिक इलाज बेसे कैंप म चलत हे।
माओवादी-हत्या
बीजापुर जिला के लोदेड गांव म माओवादी मन एक झिन माईलोगिन के हत्या कर देहे। पुलिस अधीक्षक जितेन्द्र यादव ह बतइन कि माओवादी मन मुखबरी के आरोप लगाके ए माईलोगिन सुकरा यालम के रस्सी ले गला घोंटके मार डरिन। ओमन बतइन कि माओवादी मन काली बिहनिया घर ले पति-पत्नी के अपहरण करे बाद गांव ले थोरिक दूरिहा जंगल भीतरी ए माईलोगिन के हत्या कर दीस। उहें, ओखर पति रामैया यालम संग मारापीटी करे बाद ओला छोड़ दीस। रतिहा बेरा सूचना मिले बाद पुलिस ह आज घटना जघा म पहुंच के लास ल बरामद करीस।
दुर्घटना
दुरूग जिला के सेक्टर-एक स्थित स्टेट बैंक तीर होय सड़क दुर्घटना म दू झिन माईलोगिन समेत तीन झिन मनखे के मउत होगे। उहें, एक झिन आने मनखे ह घायल हो गेहे। मिले जानकारी मुताबिक सिविक सेंटर सोज जावत एक ठिन कार ह अंते-तंते होके बड़का रूप ले टकरा गीस, जेखर ले कार सवार एक झिन जवान नोनी अउ बाबू के मउकच म मउत होगे। उहें, एक झिन आने नोनी ह ईलाज बेरा पराण छूट गीस।
पुलिस आरक्षक-भर्ती
छत्तीसगढ़ हाईकोर्ट डहार ले पुलिस विभाग म कांस्टेबल पद म भर्ती बर रोक हटे के बाद दुरूग संभाग पुलिस आरक्षक संवर्ग के चलत दुरूग, बालोद, बेमेतरा जिला बर आज ले भर्ती प्रक्रिया सुरू होगे हे। एस.पी. दुरूग जितेन्द्र शुक्ला ह बतइन कि आज पांच सौ उम्मीदवार मन ल पहलइया चरण म फिजिकल अउ दस्तावेज सत्यापन बर बलाय गे रिहीस, जेमा ले दू सौ संतावन झिन आवेदनकर्ता उपस्थित होइन। श्री शुक्ला ह किहीन कि बांचे उम्मीदवार मन ल बीस दिसंबर के बादे टेस्ट देके मउका मिलही।
हाथी-मौत
सात नवंबर के उदंती सीतानदी टाइगर रिजर्व म किंजरत हाथी के दल म सामिल एक ठिन नान्हे हाथी ल सिकारी मन पोटास बम ब्लास्ट करके घायल कर दीस, जेखर ले बिस्फोट म घायल हाथी के सावक के मउत होगे। फेर, वन विभाग अउ डॉक्टर मन के टीम ह इलाज बेरा ओला बचाय के पूरा कोसिस करे रिहीन। उदंती सीतानदी टाइगर रिजर्व के उपनिदेसक वरूण जैन ह बतइन कि पाछू कई दिन ले घायल हाथी म इंफेक्सन बाड़ गे रिहीस, जेखर पाय ले उंखर मउत होगे।
अउ अब मौसम के हाल…
अवइया चौबीस घंटा के दउरान प्रदेस के एक-दू जघा म थोड़ बहुत पानी गिर सकत हे। उहें, कुछेक जघा म गरजई-चमकई के संगे सिटीर-साटर पानी गिरे के संभावना हे। रईपुर स्थित मौसम विज्ञान केंद्र के विज्ञानी एच.पी.चंद्रा ह आकाशवाणी समाचार ल बतइन कि एक ठिन पश्चिमी विक्षोभ अउ उपरी हवा म चक्रीय-चक्रवाती घेरा द्रोणिका के रूप म हवय, जेखर परभाव ले बंगाल के खाड़ी ले नमी ह आवत हे। एखरे सेति एक-दू दिन म प्रदेस के न्यूनतम तापमान म गिरावट हो सकत हे।
बस्तर ओलंपिक-मशाल रैली
बस्तर ओलंपिक मशाल रैली आज केशकाल ले रवाना होके जिला मुख्यालय कोंडागांव पहुंचिस। कलेक्टर कुणाल दुदावत, पुलिस अधीक्षक वाय अक्षय कुमार अउ नगर पालिका अध्यक्ष जसकेतू उसेंडी समेत जनप्रतिनिधि मन रैली म सामिल होके खिलाड़ी मन ल हारफूल पहिना के सुवागत करीन।