केंद्रीय स्वास्थ्य मंत्री जगत प्रकाश नड्डा ह आज हरियाणा के पंचकुला म सौ दिन के टीबी उन्मूलन अभियान के सुरूआत करीन। ए मउका म श्री नड्डा ह किहीन कि बछर दू हजार पचीस तक देस ल टीबी मुक्त बनाय बर टीबी उन्मूलन अभियान ह मील के पत्थर साबित होही। ओमन किहीन कि टीबी के मरीज मन ल आयुष्मान भारत-प्रधानमंत्री जन आरोग्य योजना के फायदा मिलत हे।
ऐति, छत्तीसगढ़ म घलो आज ले सौ दिन के टीबी उन्मूलन अभियान के सुरूआत होइस। मुख्यमंत्री विष्णुदेव साय ह रईपुर के एम्स ऑडिटोरियम म राज्य स्तर के ‘निक्षय निरामय छत्तीसगढ़‘ अभियान के सुरूआत करीन। संगेसंग ओमन ह ए योजना म हितग्राही मन ल हर महिना दे जाने वाला एक हजार रूपिया के रासि के ट्रांसफर करीन। ओमन ह स्वास्थ्य सेवा बर सुघ्घर काम करइया डॉक्टर सामाजिक कार्यकर्ता अउ मितानिन मन ल घलो सम्मानित करीन।
केंद्रीय विद्यालय-सड़क निर्माण
इही बीच, केंद्रीय अवासन अउ सहरी राज्य मंत्री तोखन साहू ह छत्तीसगढ़ के मुंगेली संघरा चार ठन जिला म केंद्रीय विद्यालय खोले जाय म प्रधानमंत्री नरेंद्र मोदी अउ केंद्रीय शिक्षामंत्री धर्मेन्द्र प्रधान बर आभार जतइन हे।
उहें, केंद्रीय सड़क परिवहन अउ राजमार्ग मंत्रालय ह छत्तीसगढ़ म राष्ट्रीय राजमार्ग क्रमांक-एक सौ तीस म उच्च स्तर के पूल अउ सी-फोरलेन सड़क निर्माण अउ राष्ट्रीय राजमार्ग-एक सौ तिरपन ल बनाय बर एक सौ सैंतालिस करोड़ छब्बीस लाख रूपिया के मंजूरी दीन हे। मुख्यमंत्री श्री साय ह एखर बर प्रधानमंत्री नरेंद्र मोदी अउ केंद्रीय सड़क परिवहन मंत्री नितिन गडकरी के आभार जतइन हे। श्री साय ह बतइन कि राष्ट्रीय राजमार्ग-एक सौ तीस बिलासपुर-अंबिकापुर रद्दा म चुलहट नाला म उच्च स्तर के पुल बनाय बर चार करोड़ अठ्यासी लाख रूपिया अउ राष्ट्रीय राजमार्ग-एक सौ तीस ‘सी‘ म गरियाबंद नगरीय क्षेत्र म फोरलेन सड़क बनाय बर तैंतालिस करोड़ रूपिया ले जादा के रासि मंजूर करे गेहे। अइसने राष्ट्रीय राजमार्ग-एक सौ तिरपन रायगढ़-सरायपाली के चंद्रपुर सेक्सन म टू-लेन अउ दूसर काम बर निनान्वे करोड़ रूपिया के रासि मंजूर करे गेहे।
किसान-टोकन
राज्य सरकार ह सबो कलेक्टर मन ल समर्थन मूल्य म धान खरीदी के व्यवस्था म किसान मन ल टोकन जारी करे के प्रक्रिया के पालन करे बर निरदेस दीन हे। ए संबंध म छत्तीसगढ़ राज्य सहकारी वितरण संघ के प्रबंध संचालक ह सबो कलेक्टर मन ल चिट्ठी भेज के टोकन आवेदन समिति मॉड्यूल अउ ‘‘टोकन तुंहर हाथ‘‘ ऐप के माध्यम ले टोकन दे जाय के सुविधा के बारे म बतइन। चिट्ठी म केहे गे हवय कि कुल आवेदन के चालीस प्रतिसत समिति मॉडयूल अउ साठ प्रतिसत ऐप के माध्यम ले टोकन दे जाय के प्रावधान हे। टोकन आवेदन बर ईतवार ले शुक्रवार तक बिहनिया साढ़े नौ बजे ले संझा पांच बजे तक के बेरा तय हवय।
राईस मिलर-गतिरोध खत्म
राज्य सरकार अउ राईस मिलर मनके बीच चलइया गतिरोध सिरागे हवय। सम्मार ले सब्बो खरीदी केंद्र मन म धान के उठाव सुरू हो जही। कैबिनेट मंत्री श्याम बिहारी जायसवाल संग राईस मिलर एसोसिएसन के बइठका के बाद ए फइसला ले गीस। श्री जायसवाल ह बतइन कि राईस मिलर मन के मांग ल मंजूर कर ले गेहे। जल्दीच राईस मिलर मन ह एग्रीमेंट संघरा दूसर प्रक्रिया ल पूरा करके धान के उठाव करही। ए मामला म मुख्यमंत्री विष्णुदेव साय के संग घलो राईस मिलर एसोसिएसन के बइठका होय रिहीस।
राईस मिलर एसोसिएसन ह उंखर सब्बो मांग ल मंजूर करे बर मुख्यमंत्री विष्णुदेव साय के आभार जतइन हे।
सशस्त्र सेना झंडा दिवस-राज्यपाल
सशस्त्र सेना झंडा दिवस म आज राजभवन म कारीकरम कराय गीस। ए मउका म राज्यपाल रमेन डेका ह शहीद मनके पत्नी, माता अउ आश्रित मन ल सम्मान रासि अउ सॉल भेंट करके ओमन ल सम्मानित करीन। संगेसंग वीरता अलंकरण पाय अउ झंडा दिवस के मउका म बिसेस योगदान देवइया दानदाता मन ल घलो सम्मानित करे गीस। ए मउका म श्री डेका ह किहीन कि सैनिक मन ह निस्वार्थ भाव ले देस के रक्षा करथे अउ अपन जीवन ल देस सेवा म लगाथे। श्री डेका ह आम लोगन ले अपील करीन कि ओमन ह जादा ले जादा सहयोग देके वीर जवान मन बर अपन सम्मान देखावंय। राज्यपाल ह सशस्त्र झंडा दिवस निधि बर दू लाख रूपिया के सहयोग रासि सैनिक कल्याण बोर्ड ल दीन।
आंगनबाड़ी कार्यकर्ता-हत्या/आत्मसमर्पण
बीजापुर जिला म बासागुड़ा थाना क्षेत्र के ग्राम तिम्मापुर म माओवादी मन ह एक झन आंगनबाड़ी कार्यकर्ता के हत्या कर दे हवय। मिले जानकारी के अनुसार पाछू रतिहा माओवादी मन तिम्मापुर पहुंचिन अउ आंगनबाड़ी कार्यकर्ता ल ओखर घर ले बाहिर निकाल के धारदार हथियार ले गला रेत के ओखर हत्या कर दीन। बीच-बचाव करे बर आय आंगनबाड़ी कार्यकर्ता के बेटा उपर घलो माओवादी मन ह हमला करे के परयास करीन। सूचना मिले म पुलिस ह मउका म पहुंच के घटना के जांच म जुट गे हवय। अतिरिक्त पुलिस अधीक्षक चंद्रकांत गवर्ना ह घटना के पुष्टि करीन हे। खबर के मुताबिक बीजापुर जिला म माओवादी मन डहार ले कोनो माईलोगिन के हत्या करे के ए ह पहिली घटना हे।
इही, जिला म पांच झन ईनामी माओवादी मन ह पुलिस के आगू आत्मसमर्पण करीन हे, इंखर मन उपर आने-आने माओवादी घटना म सामिल रेहे के आरोप हे। एमा ले एक झिन माओवादी उपर आठ लाख रूपिया के इनाम रिहीस। जिला म ए बछर अभी तक एक सौ नवासी माओवादी मन ह पुलिस के आगू आत्मसमर्पण करीन हे।
लोहारीडीह मामला
कबीरधाम जिला के लोहारीडीह म हत्या, आगजनी, मारपीट अउ लूट के मामला म सामिल तेईस झन आरोपी मन ल अपन सत्र न्यायालय ह सबूत नइ मिले के सेति आरोपी मुक्त कर देहे। डीएसपी कृष्णकुमार चंद्राकर ह बतइन कि लोहारीडीह मामला म पुलिस ह एक सौ सड़सठ लोगन के खिलाफ आने-आने मामला पांच ठन दर्ज करे गे रिहीस, जेमा उनहत्तर झन ल गिरफ्तार करे गे रिहीस। आरोपी मन ह आईजी ल आवेदन देके घटना म सामिल नइ होय के बात केहे रिहीन। एसआईटी बना के मामला के जांच करे गीस, जेमा तेईस झन आरोपी मन के खिलाफ कोनो सबूत नइ मिलिस।
हल्बी/गोण्डी-समाचार बुलेटिन
सुनइया मन ल बतादन कि काली ईतवार के हल्बी अउ गोण्डी बोली म समाचार बुलेटिन प्रसारित करे जाही। ए दूनों बुलेटिन आकाशवाणी जगदलपुर ले प्रसारित करे जाही, जेला बस्तर संभाग म सुने जा सकही। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छै बजे प्रसारित करे जाही।
जिले की चिट्ठी
प्रादेसिक समाचार एकांश आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘राजनांदगांव‘‘ जिला के गतिविधि के बारे म जानकारी दे जाही।
बीएड/डीएलएड-आवंटन प्रक्रिया
छत्तीसगढ़ राज्य शैक्षिक अनुसंधान अउ प्रसिक्षण परिसद ह डीएलएड, बीएड, बीएबीएड अउ बीएससीबीएड पाठ्यक्रम म भर्ती बर आखिरी चरण के प्रक्रिया आज ले सुरू हो गेहे। जउन विद्यार्थी मन ह पहिली पंजीयन के बाद चयन होय के बावजूद प्रवेस नइ ले हवय, ओमन ह निसुल्क पंजीयन करा सकही। उहें, जउन विद्यार्थी मन ह पहिली घांव पंजीयन करही, ओमन ह निर्धारित सुल्क के साथ कोनो कॉलेज या संस्था के नाव विकल्प के रूप म बारह दिसंबर तक ऑनलाइन भर सकत हे। अंतिम चरण के प्रथम सूची के प्रकासन बारह दिसंबर के करे जाही। महाविद्यालय म प्रवेस के तिथि बारह ले सोलह दिसंबर तक निर्धारित हे। अइसने दूसर सूची के प्रकासन उन्नीस दिसंबर के करे जाही अउ प्रवेस के आखिरी तारिख बाईस दिसंबर हे। अंतिम सूची के प्रकासन तेईस दिसंबर के अउ विद्यार्थी मन ह कॉलेज म चौबीस दिसंबर के संझा पांच बजे तक प्रवेस ले सकही।
अधिवक्ता संघ-शपथ समारोह
उपमुख्यमंत्री अरूण साव ह काली मुंगेली म अधिवक्ता संघ के सपथ ग्रहण समारोह म सामिल होइन। समारोह म जिला अउ सत्र न्यायाधीश चंद्रकुमार अजगल्ले ह अधिवक्ता संघ के नवा चुने गे पदाधिकारी मन ल सपथ देवाइन। ए मउका म उपमुख्यमंत्री श्री साव ह मुंगेली जिला अउ सत्र न्यायालय म ई-लाइब्रेरी बनवाय के घोसना करीन। कारीकरम म विधायक पुन्नूलाल मोहले घलो मौजूद रिहीन।
उद्योग मंत्री-कोरबा
उद्योग मुंत्री लखनलाल देवांगन ह काली कोरबा प्रेस क्लब म राखे गे ‘राज्य सरकार का अमृतकाल‘ कारीकरम म सामिल होइन। ए मउका म श्री देवांगन ह अपन एक बछर के कार्यकाल के लेखा-जोखा पेस करीन। ओमन बतइन कि कोरबा विधानसभा क्षेत्र म तीन सौ करोड़ रूपिया के काम सुरू कराय गेहे। राज्य सरकार ह मोदी के गारंटी के सब्बो वादा ल पूरा करे के परयास करे हे। श्री देवांगन ह प्रेस क्लब म पचीस लाख रूपिया के लागत के निर्माण काम के भूमिपूजन करीन। संगेसंग ओमन ह प्रेस क्लब के मांग म अतिरिक्त विकास बर बीस लाख रूपिया दे जाय के घोसना करीन।