प्रधानमंत्री नरेंद्र मोदी ह आज नई दिल्ली के भारत मंडपम म अष्टलक्ष्मी महोत्सव के उद्घाटन करीन। तीन दिन के महोत्सव म पूर्वोत्तर भारत के सांस्कृतिक झलक देखे बर मिलही। उंहा के पारंपरिक कला, सिल्प अउ सांस्कृतिक प्रथा के प्रदर्सन करे जाही। ए महोत्सव कपड़ा उद्योग, हस्तसिल्प, पर्यटन के मउका अउ सबो आठ ठन पूर्वोत्तर राज्य के उत्पाद ल प्रदर्सित करे बर एक ठन बड़े मंच के रूप म काम करही।
दू सौ पचास ले जादा कारीगर मन ह चौंतीस ठन जीआई-टैग जिनिस संघरा हस्तसिल्प, हथकरघा अउ कृषि बागवाणी उत्पाद के प्रदर्सन करही। क्षेत्र के विकास बर नवा निवेस आमंत्रित करे जाही।
टीबी-उन्मूलन अभियान
टीबी के मामला अउ मृत्युदर के चुनौती ले निपटे बर काली सात दिसंबर के हरियाणा के पंचकुला म केंद्रीय स्वास्थ्य मंत्री जे.पी.नड्डा ह सौ दिन के अभियान के सुरूआत करही। ए अभियान तैंतीस ठन राज्य अउ केंद्र शासित प्रदेस के तीन सौ सैंतालिस ठन जिला मन म लागू करे जाही। अभियान म टीबी के मामला के पता लगाय के, इलाज म तेजी लाय के अउ इलाज के परिणाम म सुधार लाय बर एला डिजाइन करे गेहे।
पुलिस कर्मी-बैंक समझौता
छत्तीसगढ़ पुलिस विभाग के अधिकारी अउ कर्मचारी मन ल आर्थिक अउ सामाजिक सुरक्षा देबर राज्य सरकार ह आठ ठन प्रमुख बैंक के संग पुलिस सैलरी पैकेज के तहत समझौता करे हे। एमा भारतीय स्टेट बैंक, पंजाब नेशनल बैंक, बैंक ऑफ बड़ौदा, कैनरा बैंक, एचडीएफसी बैंक, आईसीआईसीआई बैंक, एक्सिस बैंक, अउ आईडीबीआई बैंक सामिल हे।
समझौता म पुलिस वाला मनके परिवार ल सामान्य मृत्यु के मामला म एक ले दस लाख रूपिया तक के जीवन बीमा रासि, दुर्घटना म मृत्यु के मामला म दस लाख ले एक करोड़ रूपिया, स्थायी विकलांगता के मामला म तीस लाख ले एक करोड़ तक अउ आंसिक विकलांगता बर साढ़े बाईस लाख ले एक करोड़ तक के बीमा रासि के प्रावधान सामिल हे। अइसने, लइका मनके पढ़ई बर चार लाख ले बीस लाख तक अउ नोनी मन के बिहाव बर पांच लाख ले दस लाख तक के आर्थिक मदद मिलही। नक्सल हिंसा म शहीद होवइया पुलिस कर्मी मनके परिवार बर दस लाख ले पचास लाख तक के रासि दे जाही।
मुख्यमंत्री विष्णुदेव साय ह ए पहल ल पुलिस कर्मी मन बर सुरक्षा अउ सहयोग के एक ठन मजबूत आधार बतइन हे।
माओवादी-आत्मसमर्पण/मुठभेड़
सुकमा जिला म एक झन माईलोगिन संघरा सात झन माओवादी मन ह आत्मसमर्पण करीन हे। ए माओवादी मन ह केंद्रीय रिजर्व पुलिस बल-सीआरपीएफ के अधिकारी रवि कुमार, जय सिंह राजपुरोहित अउ रौशन सिंह राजपुत के आगू आत्मसमर्पण करीन। ए सबो झन माओवादी मन ल मिलिसिया सदस्य बताय जावत हे। छत्तीसगढ़ सरकार के पुनर्वास नीति म आत्मसमर्पित माओवादी मन ल सहायता रासि अउ दूूसर सुविधा दे जाही।
उहें, कांकेर जिला के काकनार अउ कुरकुंज के जंगल म सुरक्षा बल अउ माओवादी मनके बीच मुठभेड़ होइस, जेखर बाद सुरक्षाबल के टीम ह मउका ले एक ठन बारह बोर के बंदूक, नौ ठन कारतूस संघरा बहुत अकन माओवादी जिनिस पाइन हे।
राज्यपाल-व्हाइट कोट समारोह
राज्यपाल रमेन डेका आज पंडित जवाहरलाल नेहरू स्मृति चिकित्सा महाविद्यालय म राखे गे व्हाइट कोट समारोह म सामिल होइन। ए कारीकरम म राज्यपाल ह विद्यार्थी मन ल स्वर्ण पदक दीन। ए मउका म ओमन किहीन कि चिकित्सा के क्षेत्र मानवता के सेवा के सबले बड़े माध्यम हे। डॉक्टर मन ह अपन ज्ञान के साथ मानवीय संवेदना ल संग लेके चलंय। समारोह म एमबीबीएस प्रथम वर्ष के विद्यार्थी मन ल चिकित्सा नैतिकता के सपथ देवाय गीस।
भीमराव अंबेडकर-पुण्यतिथि
भारतीय संविधान के मुख्य सिल्पकार डॉक्टर भीमराव अंबेडकर के उनहत्तरवां पुण्यतिथि ल आज महापरिनिर्वाण दिवस के रूप म मनाय जावत हे।
राष्ट्र निर्माण म बाबा साहब के योगदान ल बताय बर छत्तीसगढ़ संघरा पूरा देस म कतकोन कारीकरम कराय जावत हे। उप राष्ट्रपति जगदीप धनखड़, प्रधानमंत्री नरेंद्र मोदी अउ लोकसभा अध्यक्ष ओम बिरला ह नई दिल्ली के संसद भवन परिसर म प्रेरणा स्थल म बाबा साहब ल पुष्पांजलि दीन।
एक ठन सोसल मीडिया पोस्ट म प्रधानमंत्री नरेंद्र मोदी ह ए बछर के सुरूआत म मुंबई के चैत्य भूमि के अपन यात्रा के एक ठन चित्र साझा करत अंबेडकर ल सामाजिक न्याय के आकाशदीप बतइन। ओमन किहीन कि बाबा साहब के सामानता अउ मानवीय मर्यादा बर संघर्ष लोगन ल प्रेरित करत रइही।
किसान-सम्मानित
नारायणपुर के दू झन किसान चौतू राम यादव अउ नीलकंठ नाग ल मिलेनियर फार्मर ऑफ इंडिया अवार्ड ले सम्मानित करे गेहे। नई दिल्ली म एक ले तीन दिसंबर तक मिलेनियर फार्मर ऑफ इंडिया कारीकरम म ए अवार्ड दे गीस। ए दूनो झन किसान मन कृषि विज्ञान केंद्र नारायणपुर के मदद ले अइसन कृषि प्रणाली ल अपनाके अपन कमई ल बढ़इन हे।
चौतू राम यादव ह धान के खेती के संग पशुपालन, मछली पालन अउ केचुआ खाद उत्पादन ले कमई के नवा साधन बनाइन। उहें, नीलकंठ नाग ह सब्जी उत्पादन, मछली अउ बतख पालन ल अपनाके अपन आर्थिक स्थिति ल मजबूत बनाइन हे।
मुख्यमंत्री विष्णुदेव साय अउ कृषि मंत्री रामविचार नेताम ह नारायणपुर के ए किसान मन ल उंखर उपलब्धि बर बधई अउ सुभकामना दीन हे।
रईपुर के डॉक्टर भीमराव अंबेडकर स्मृति चिकित्सालय परिसर म मरीज मनके बढ़ोत्तरी ल देखत सात सौ बिस्तर वाले नवा अस्पताल भवन बनाय जाही। एखर बर दू सौ इकतीस करोड़ रूपिया के टेंडर प्रक्रिया सुरू करे गेहे। स्वास्थ्य मंत्री श्याम बिहारी जायसवाल ह किहीन कि ये एकीकृत अस्पताल भवन के बने ले रईपुर संघरा पूरा प्रदेस के लोगन ल इलाज के बने सुविधा मिल सकही।
अग्निवीर भर्ती रैली
रायगढ़ म चलत अग्निवीर भर्ती रैली के तीसर दिन आज प्रदेस के दू ठन जिला बिलासपुर अउ बालोद के एक हजार एक सौ पचहत्तर युवा मन ह भाग लीन। एमा ले तीन सौ तिरसठ युवा मन ह दौड़ परीक्षा म सफलता हासिल करीन। अब शारीरिक प्रवीणता, कागजी कार्यवाही अउ मेडिकल जांच के प्रक्रिया होही। युवा मन म अग्निवीर भर्ती रैली ल लेके उछाह हवय।
बातों-बातों में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ म ए बखत भारत के संविधान पर गुरू घासीदास केंद्रीय विश्वविद्यालय, बिलासपुर के प्रोफेसर डॉक्टर अनुपमा सक्सेना ले लेगे भेंटवार्ता के प्रसारण करे जाही। ए कारीकरम आकाशवाणी केन्द्र रायपुर ले काली सात दिसंबर के बिहनिया साढ़े दस बजे ले प्रसारित होही। एला छत्तीसगढ़ के सबो आकाशवाणी केंद्र मन ह एके संघरा रिले करही।
दुर्घटना
राष्ट्रीय राजमार्ग म सूरजपुर जिला ले लगे चंद्रपुर ओवरब्रिज तीर सड़क हादसा म आज तीन झन मनखे के मउत होगे। मिले जानकारी के अनुसार तेज रफ्तार गाड़ी के एक ठन चक्का निकल गीस, जेखर सेति गाड़ी ह डगमगा के पलट गीस। ए हादसा म दू झिन माईलोगिन अउ एक झन मनखे के मउकच म मउत होगिस। ए गाड़ी म सात झन बइठे रिहीन, जउन मन ह अंबिकापुर के बिहाव म सामिल होगे मनेन्द्रगढ़ वापिस लहुटत रिहीन। हादसा म घायल पिता अउ उंखर दस बछर के बेटा ल अंबिकापुर मेडिकल कॉलेज अस्पताल म भर्ती कराय गेहे। उहें, दू झन दूसर माईलोगिन मन ह सुरक्षित हे।
अउ अब मौसम के हाल…
प्रदेस म नमी वाले हवा आना सुरू होगे हे। एखर सेति मध्य अउ उत्तर छत्तीसगढ़ म मौसम सुष्क रइही, फेर बस्तर संभाग के दक्षिणी भाग म हल्का बरसा होय के अउ छींटा पड़े के संभावना हे। मौसम म होय बदलाव के सेति प्रदेस म आठ, नौ अउ दस दिसंबर के बरसा होय के आसार हे। बादल छटे के बाद दस दिसंबर ले जाड़ बाढ़े के संभावना हे।