केन्द्रीय आवासन अउ शहरी कार्य मंत्रालय ह प्रधानमंत्री आवास योजना-शहरी के दूसरा चरण के तहत प्रदेश के नगरीय निकाय मन म पन्द्रह हजार नवा आवास ल मंजूरी देहे। प्रधानमंत्री आवास योजना के पहिली चरण म छत्तीसगढ़ के प्रदर्शन के आधार म नवा आवास के स्वीकृति मिले हे। मुख्यमंत्री विष्णुदेव साय ह एखर बर प्रधानमंत्री नरेन्द्र मोदी अउ केन्द्रीय आवासन अउ शहरी कार्य मंत्री मनोहर लाल खट्टर के प्रति आभार जताय हे। ओमन कहिन कि नवा आवास के स्वीकृति मिले ले प्रदेस के हर गरीब मनखे के पक्का मकान के सपना साकार होही।
केन्द्रीय आवासन अउ शहरी कार्य मंत्रालय डहार ले नगरीय प्रशासन विभाग के सचिव ल प्रधानमंत्री आवास योजना-शहरी के दूसरा चरण के अंतर्गत पन्द्रह हजार नवा आवास के सैद्धांतिक स्वीकृति के पत्र प्रेषित करे गेहे। मंत्रालय ह योजना के पात्र हितग्राही मनके परीक्षण करत प्रस्ताव केन्द्र सरकार ल भेजे के निरदेस देहे।
मुख्यमंत्री-साइबर भवन
मुख्यमंत्री विष्णुदेव साय ह आज नवा रईपुर स्थित पुलिस मुख्यालय म राज्य स्तरीय साइबर भवन के उद्घाटन करीन। ए मउका म ओमन ह साइबर आपराध के चुनौती अउ ओखर ले निपटे बर राज्य सरकार डहार ले उठाय गे कदम के जानकारी दीन। मुख्यमंत्री ह कहिन कि साइबर अपराध आज के बेरा म सबले बड़े चुनौती हरय अउ एला रोके बर जागरूकता अउ तकनीकी दक्षता होना जरूरी हे। ओमन कहिन कि जन-जागरूकता अभियान साइबर अपराध ल रोके बर सबले महत्वपूर्ण कदम हरय।
कार्यक्रम म पुलिस कर्मी मनके कल्याण बर आठ बैंक के संग एमओयू करे गीस, जेखर तहत पुलिस अधिकारी-करमचारी मन ल विपरीत परिस्थिति म आर्थिक सहायता दे जाही। ए मउका म मुख्यमंत्री ह पुलिस विभाग डहार ले निर्मित समाधान मोबाइल ऐप अउ सशक्त मोबाइल ऐप ल लांच करीन। ए दउरान मुख्यमंत्री ह साइबर अपराध के उत्कृष्ट विवेचना करइया पुलिस अधिकारी अउ कर्मचारी मन ल सम्मानित करीन।
मुख्यमंत्री-माओवाद समीक्षा बैठक
मुख्यमंत्री विष्णुदेव साय के अध्यक्षता म आज नवा रायपुर म माओवाद परिदृश्य उपर समीक्षा बैठक होइस। ए मउका म उपमुख्यमंत्री अउ गृहमंत्री विजय शर्मा संग राज्य के वरिष्ठ अधिकारी उपस्थित रिहीन। बइठका म माओवाद उन्मूलन के प्रयास के मूल्यांकन अउ भविष्य के रणनीति उपर चर्चा करे गीस। मुख्यमंत्री ह कहिन कि राज्य सरकार ग्यारह महीना ले माओवाद के खिलाफ निर्णायक लड़ाई लड़त हे। ओमन कहिन कि माओवादी मनके आत्मसमर्पण बर जन-जानरूकता अभियान ल अउ तेज करे के आवश्यकता हे। मुख्यमंत्री ह प्रधानमंत्री आवास योजना के तहत आत्मसमर्पित माओवादी अउ माओवाद पीड़ित परिवार बर पन्द्रह हजार मकान के निर्माण काम तुरते पूरा करे के निरदेस दीन।
बइठका म गृहमंत्री विजय शर्मा ह माओवादी मनके वित्तीय नेटवर्क ल तोड़े के आवश्यकता उपर जोर दीन अउ कहिन कि लक्ष्य ल प्राप्त करे बर हरसंभव उपाय करे जाही। बइठका म सुरक्षा ग्रिड के विस्तार माओवाद प्रभावित क्षेत्र म नवा कैम्प स्थापित करना, आत्मसमर्पण करइया माओवादी मनके पुनर्वास अउ आवास संबंधी योजना अउ ज्वाइंट एक्शन प्लान संग आने विषय पर चर्चा करे गीस।
उद्योग मंत्री-नई औद्योगिक नीति
उद्योग मंत्री लखनलाल देवांगन ह आज नवा रईपुर म छत्तीसगढ़ के नवा औद्योगिक नीति उपर आधारित कार्यशाला के सुभारंभ करीन। ए कार्यशाला निर्यात प्रोत्साहन अउ निवेस बर स्टेकहोल्डर कनेक्ट ल ध्यान म राखके आयोजित करे जात हे। कार्यशाला ल संबोधित करत मुख्यमंत्री विष्णुदेव साय ह किहीन कि सत्ताईस आने-आने उद्योग मन ह प्रदेस म निवेस के इच्छा जताय हे, जउन मन ल बत्तीस हजार करोड़ रूपिया के रूलआउट ऑफ इनविटेशन टू इनवेस्ट लेटर दीन।
कार्यशाला म उद्योग मंत्री ह कहिन कि नवा औद्योगिक नीति ले प्रदेस म अच्छा औद्योगिक वातावरण के निर्माण होही। ओमन कहिन कि पहिली बार ए नीति के माध्यम ले राज्य म पर्यटन अउ स्वास्थ्य जइसन सुविधा म निवेस ल घलो प्रोत्साहित करे के निर्णय ले गेहे।
नौसेना दिवस
भारतीय नौसेना के भूमिका अउ उपलब्धि ल मान्यता दे बर हरेक बछर चार दिसंबर के नौसेना दिवस मनाय जाथे। प्रधानमंत्री नरेन्द्र मोदी ह आज नौसेना दिवस के मउका म जवान मन ल बधाई दीन हे। श्री मोदी ह सोशल मीडिया पोस्ट म कहिन कि नौसेना के बहादुर जवान साहस अउ समर्पण के संग देस के समुद्री सीमा मनके रक्षा करथे।
अग्निवीर भर्ती रैली
रायगढ़ जिला म आज ले राज्य स्तरीय अग्निवीर भर्ती रैली शुरू होगे हे। पहिली दिन प्रदेश के सारंगढ़-बिलाईगढ़ अउ जांजगीर-चांपा जिला के सात सौ सत्तर युवा मन ह भर्ती रैली म हिस्सा लीन। एमा ले दू सौ पच्यासी युवा दउड़ म सफल होइन। ए उम्मीदवार मन ल अब सारीरिक प्रणीणता, कागजी कार्यवाही अउ मेडिकल जांच के प्रक्रिया ले गुजरना होही। पहिली दिन नौ सौ सत्रह युवा मन ल एडमिड कार्ड जारी करे गे रिहीस, जेमा ले सात सौ सत्तर युवा आयोजन स्थल म पहुंचीन। सेना भर्ती ल लेके युवा मन म खासा उत्साह देखे बर मिलीस।
खबर के मुताबिक बारह दिसंबर तक चलइया ए भर्ती रैली म प्रदेस के तैंतीस जिला के आठ हजार पांच सौ छप्पन युवा मन ह सीईई परीक्षा पास करे हे।
राज्यपाल-पौधारोपण
राज्यपाल रमेन डेका ह आज धमतरी प्रवास के दउरान जिला पंचायत परिषद म ‘‘एक पेड़ मां के नाम‘‘ अभियान के तहत रूद्राक्ष के पौधा लगईन। ए दउरान ओमन ह लोगन ले घलो जादा ले जादा पेड़ लगाय के अपील करीन। अपन प्रवास के दउरान राज्यपाल ह प्रधानमंत्री आवास अउ केन्द्र के आने योजना के निरीक्षण करीन। संगेसंग रूद्री बैराज अउ गंगरेल बांध के घलो भ्रमण करीन।
पांचवीं-आठवीं-केन्द्रीयकृत परीक्षा
राज्य सरकार ह शैक्षणिक गुणवत्ता म सुधार लाय के उद्देश्य ले चालू सिक्षा सत्र म कक्षा पांचवीं अउ आठवीं के केन्द्रीयकृत परीक्षा आयोजित करे के निर्णय लेहे। पाछु दिन मुख्यमंत्री विष्णुदेव साय के अध्यक्षता म होय राज्य मंत्रिमंडल के बइठका म ए निर्णय ले गीस। केन्द्रीयकृत परीक्षा राज्य के सबो सासकीय अउ अशासकीय विद्यालय मन म संचालित होही। सीबीएसई अउ आई.सी.एस.सी. पाठ्यक्रम वाले विद्यालय ए व्यवस्था म सामिल नइ होही। ए संबंध म स्कूल सिक्षा विभाग डहार ले सबो जिला कलेक्टर अउ जिला सिक्षा अधिकारी मन ल निरदेस जारी कर दे गेहे।
स्कूल सिक्षा सचिव सिद्धार्थ कोमल सिंह परदेशी ह कहिन कि परीक्षा जिला स्तर म निःशुल्क आयोजित करे जाही। परीक्षा मार्च महीना म होही अउ एखर समय-सारिणी लोक शिक्षण संचालनालय डहार ले जारी करे जाही। ओमन कहिन कि प्रश्न-पत्र विषय-विशेषज्ञ सिक्षक डहार ले पूरा गोपनीयता के संग तैयार करे जाही अउ प्रश्न पत्र बांटे के बाद, ओमन ल संबंधित केन्द्र के तीर के थाना म सुरक्षित रखे जाही। श्री परदेशी ह बतईन कि उत्तर पुस्तिका के मूल्यांकन केन्द्रीय मूल्यांकन केन्द्र मन म करे जाही। मूल्यांकन काम उही सिक्षक ले कराय जाही, जउन ए कक्षा म अध्यापन करवात रहिन।
बस्तर संभाग-भूकंप
बस्तर संभाग म आज बिहनिया करीबन साढ़े सात बजे भूकंप के झटका महसूस करे गीस। भूकंप के असर लगभग सात सेकेंड तक सुकमा, दंतेवाड़ा, बीजापुर अउ जगदलपुर संग कतकोन जघा म महसूस करे गीस। भूकंप के केन्द्र तेलंगाना के मुलूगु म बताय जात हे। रिएक्टर स्केल म भूंकप के तीव्रता पांच दशमलव तीन मापे गेहे। भूकंप के झटका महसूस होय म लोगन घर ले बाहिर निकल गीस। फेरहाल, भूकंप ले जानमाल के नुकसान के खबर नइ हे।
दुर्घटना
सूरजपुर जिला के प्रतापपुर थाना क्षेत्र म काली रतिहा होय सड़क हादसा म तीन लोगन के मउत होगे। उहें, दू आने लोगन गंभीर रूप ले घायल होगे हे। खबर के मुताबिक गोवर्धनपुर गांव ले कार म सवार होके चार झिन युवक अंबिकापुर जावत रिहीन। इही दउरान प्रतापपुर-अंबिकापुर रद्दा म गोटगवां के तीर तेज रफ्तार पिकअप अउ कार के बीच टक्कर होगे। ए दुर्घटना म कार म सवार तीन लोगन के मउका म ही मउत होगे। उहें, दू आने लोगन घायल होगे हे, जउन मन ल अंबिकापुर मेडिकल कॉलेज अस्पताल म भर्ती कराय गेहे।
उहें, कोरबा जिला के पाली थाना क्षेत्र म चारपहिया एक ठिन वाहन अनियंत्रित होके पलट गे। ए हादसा म छह लोगन घायल होगे हे, जेमा ले तीन झन के हालत गंभीर बताय जात हे।