राष्ट्रपति ह दिव्यांगजन मन ल सार्वभौमिक सुगमता प्रदान करे म ‘‘सुगम्य भारत अभियान‘‘ के उल्लेख घलो करीन। ओमन यहू किहीन कि एसो के विषय हे – ‘‘समावेशी अउ टिकाऊ भविष्य बर दिव्यांगजन मनके हिम्मत ल बढ़ावा देना हे।‘‘
अंतर्राष्ट्रीय दिव्यांगजन दिवस-रायपुर
अंतर्राष्ट्रीय दिव्यांगजन दिवस के मउका म आज रईपुर के साईंस कॉलेज मैदान म राज्य स्तरीय कार्यक्रम करे गीस। ए मउका म बढ़िया काम करइया चार झन दिव्यांग अउ संस्था मन ल राज्य स्तरीय इनाम दे गीस। ए कारीकरम म बोलत समाज कल्याण मंत्री लक्ष्मी राजवाड़े ह किहीन कि विकसित राष्ट्र बनाय म दिव्यांगजन मनके बहुत जादा भूमिका हे। ओमन राज्य सरकार डहार ले दिव्यांगजन मन बर चलाय जात योजना मनके जानकारी दीन।
कारीकरम म एक सौ तीस झन दिव्यांग मनखे मन ल बैटरी वाला साइकिल अउ दिगर सामान बांटे गीस।
अंतर्राष्ट्रीय दिव्यांगजन दिवस के मउका म आज राज्य के कई ठिन जिला म कारीकरम राखे गीस।
मुख्यमंत्री-रायगढ़
मुख्यमंत्री विष्णुदेव साय ह आज रायगढ़ के मरीन ड्राईव क्षेत्र म बयालीस करोड़ रूपिया के लागत ले बनइया प्रदेस के सबले बड़े लाइब्रेरी नालंदा परिसर के भूमिपूजन करीन। एखर अलावा ओमन जिला म एक सौ सैंतीस करोड़ रूपिया के विकास काम के लोकार्पण अउ सिलान्यास करीन। ए दउरान मुख्यमंत्री ह महतारी वंदन योजना के दसवां किश्त के रासि ल ऑनलाइन जारी करीन। कारीकरम म श्री साय ह रायगढ़ म रिंग रोड बनाय के घोषणा घलो करे हे।
मुख्यमंत्री-गौ-शाला
राज्य के गउ-शाला मन ल हरेक गाय-गरूआ मन उपर देवइया पच्चीस रूपिया के रासि ल बढ़ाके अब पैंतीस रूपिया कर दे गेहे। ए घोसना मुख्यमंत्री विष्णुदेव साय ह काली रईपुर म छत्तीसगढ़ राज्य गौ-सेवा आयोग के नवा अध्यक्ष विशेषर सिंह पटेल के पदभार ग्रहण कारीकरम के दउरान करीन।
राज्यपाल-सैनिक कल्याण बोर्ड
राज्यपाल रमेन डेका के अगुवई म आज राजभवन म सैनिक कल्याण बोर्ड के राज्य प्रबंधन समिति के सोलहवां बइठका राखे गीस। ए बइठका म भूतपूर्व सैनिक, विधवा अउ उंखर आश्रित घर वाले मन बर सशस्त्र सेना झंडा दिवस निधि डहार ले चलाय जात जनकल्याणकारी योजना उपर चर्चा करे गीस। संगेसंग भूतपूर्व सैनिक के हित म कई ठिन जरूरी फइसला ले गीस। ए दउरान राज्यपाल ह किहीन कि देस के रक्षा करइया वीर जवान मनके कल्याण करना हम सब झन के जिम्मेवारी हरय।
निर्वाचन आयुक्त-बैठक
राज्य निर्वाचन आयुक्त अजय सिंह के अगुवई में आज नवा रईपुर म रायपुर संभाग के अंतर्गत नगर पालिका अउ त्रिस्तरीय पंचायत चुनाव के तैयारी के बारे म समीक्षा बइठका राखे गीस। ए बइठका म रईपुर संभाग के आयुक्त, पुलिस महानिरीक्षक, कलेक्टर, पुलिस अधीक्षक अउ उप जिला निर्वाचन अधिकारी मन ह सामिल होइन। बइठका म चुनाव ल बढ़िया ढंग करे, सुरक्षा व्यवस्था, मतदान केन्द्र अउ चुनाव काम ले जुड़े जम्मों तियारी उपर गोठबात करे गीस। राज्य निर्वाचन आयुक्त ह जम्मों अधिकारी मन ल सातिपूर्वक ढंग ले चुनाव कराय के निरदेस दीन। ओमन मतदाता सूची प्रकाशन ले पहिली जम्मों प्रशिक्षण कारीकरम ल कराय के निरदेस दीन। ओमन किहीन कि निर्वाचन नामावली म कोनों भी प्रकार त्रुटि झन राहय।
एखर पहिली, बिलासपुर, सरगुजा अउ दुरूग संभाग के अधिकारी मनके बइठका लेके चुनाव तियारी के समीक्षा करे गेहे। काली, चार दिसंबर के बस्तर संभाग के अधिकारी मन संग बइठका राखे जाही।
छत्तीसगढ़ सरकार-एक वर्ष
छत्तीसगढ़ के भाजपा सरकार ह आज अपन एक बछर के कार्यकाल ल पूरा कर लेहे। आज के दिन ल सरकार ह जनादेश दिवस के रूप म मनावत हे। ए मउका म मुख्यमंत्री विष्णुदेव साय ह अपन संदेश म राज्य के जनता मनके आभार जतईन हे।
सुगम्य भारत अभियान
सुगम्य भारत अभियान ह आज अपन नौवां वर्षगांठ मनावत हे। एला सुलभ भारत अभियान के नाव ले घलो जाने जाथे। ए परिवर्तनकारी पहल के उद्देश्य हे कि दिव्यांगजन मन बर एक सुगम अउ समावेशी भारत के निर्माण करना हे। ए अभियान म बुनियादी ढांचा म सुधार परिवहन अउ दिव्यांगजन मन बर सार्वजनिक जघा ल अउ जादा सुगम बनाय म ध्यान दे गेहे। संगेसंग दिव्यांगजन मनके अधिकार अउ उंखर जरूरत ल लेके जन-जागरूकता बढ़ाय म घलो जोर दे गेहे।
सेना भर्ती रैली
रायगढ़ जिला म काली चार दिसंबर ले अग्निवीर भर्ती रैली के आयोजन करे जाही। बारह दिसंबर तक चलइया ए भर्ती रैली म प्रदेस के सबो तैंतीस ठन जिला मनके आठ हजार पांच सौ छप्पन झिन पुरूष उम्मीदवार मन ह सामिल होही। रैली म सामिल होवइया उम्मीदवार मन ल अपन संग एडमिट कार्ड, आठवीं, दसवीं, बारहवीं अउ स्नातक के मार्कसीट, स्थानीय निवासी प्रमाण पत्र, जाति प्रमाण पत्र, एफीडेविट, एनसीसी, खेल, आईटीआई, ड्राइविंग लाइसेंस अउ जेआईए के संगेसंग आधार कार्ड म दर्ज मोबाइल नंबर लाना जरूरी हे। रायगढ़ जिला प्रशासन डहार ले उम्मीदवार मनके रूके के व्यवस्था गेहे। संगेसंग रायगढ़ रेलवे स्टेसन अउ बस स्टैण्ड ले लेगे-लाने खातिर बस के मुफत व्यवस्था करे गेहे।
सेना भर्ती कार्यालय डहार ले जम्मों उम्मीदवार मन ल सलाह दे गेहे कि ओमन धोखाधड़ी ले सावधान राहय। भारतीय सेना म चयन निष्पक्ष, पारदर्शी अउ सिरिफ योग्यता के आधार म करे जाथे।
आईईडी-बरामद
कोंडागांव जिला म सुरक्षा बल के टीम डहार ले दू-दू किलो के तीन ठन टिफिम बम बरामद करे गेहे। मिले खबर के मुताबिक कोंडागांव अउ कांकेर ले लगे गांव – भंडारपाल, जबकसा अउ माड़गांव के पहाड़ी क्षेत्र म माओवादी मन डहार ले लगाय गे आईईडी बम ल सुरक्षा बल के टीम डहार ले बरामद करे गीस। ए बम ल बम निरोधक दस्ता के टीम डहार ले मउकाच म निष्क्रिय कर दे गीस।
बीएसएफ-मैराथन दौड़
सीमा सुरक्षा बल-बीएसएफ के स्थापना के साठ बछर पूरा होय के मउका म आज भिलाई मैराथन दउड़ ‘‘रन फॉर बॉर्डरमैन‘‘ के कारीकरम करे गीस। खबर के मुताबिक पांच किलोमीटर लंबा ए दउड़ म बीएसएफ के बड़का अधिकारी के संगेसंग जवान मन ह हिस्सा लीन। उहें, दुरूग पुलिस के अधिकारी अउ जवान मन ह घलो बिसेस रूप ले सामिल होइन। ए मउका म छत्तीसगढ़ बीएसएफ के आई.जी. आनंद प्रताप सिंह ह खिलाड़ी मन ल इनाम घलो बांटीन।
अउ अब थोरकुन समाचार सार म –
– भारतीय नौसेना दिवस के मउका म मुख्यमंत्री विष्णुदेव साय ह भारतीय नौसैनिक अउ उंखर परिवार वाले मन ल बधाई अउ सुभकामना दीन।
– रईपुर जिला के बिलाड़ी धान खरीदी केन्द्र के प्रभारी मुकेश वैष्णव ल गड़बड़ी पाय के आरोप म हटा दे गेहे।
– महिला डॉक्टर ले दुर्व्यवहार के आरोप म गरियाबंद जिला अस्पताल के सिविल सर्जन डॉक्टर एम.के. हेला ल निलंबित कर दे गेहे।
अउ
– जांजगीर-चांपा जिला के बलौदा जनपद पंचायत म काली चार दिसंबर के राष्ट्रीय ग्रामीण आजीविका मिशन-बिहान के तहत आजीविका ऋण मेला के आयोजन करे जाही।