प्रधानमंत्री नरेंद्र मोदी ह डिजीटल धोखाधड़ी, साइबर अपराध अउ आर्टिफिसियल इंटेलिजेंस प्रौद्योगिकी खासकर डीप फेक ले होवइया खतरा बर चिंता जताइन हे। भुवनेश्वर म उनसठवां अखिल भारतीय पुलिस महानिदेसक अउ महानिरीक्षक सम्मेलन के समापन सत्र म बोलत ओमन ह पुलिस उपर काम के भार कम करे बर नवा प्रौद्योगिकी के उपयोग उपर जोर दीन ।
राष्ट्रपति-दिव्यांगजन पुरस्कार
राष्ट्रपति द्रौपदी मुर्मु काली अंतर्राष्ट्रीय दिव्यांगजन दिवस म राष्ट्रीय दिव्यांगजन सशक्तिकरण पुरस्कार दिही। कुल बाईस झन मनखे अउ ग्यारा ठन संस्था ल राष्ट्रीय पुरस्कार ले सम्मानित करे जाही। केंद्रीय सामाजिक न्याय अउ अधिकारिता मंत्री डॉक्टर वीरेन्द्र कुमार ए मउका म दिव्यांग मनके सशक्तिकरण बर कतकोन कल्याणकारी योजना के सुरूआत करही।
मुख्यमंत्री-निर्देश
मुख्यमंत्री विष्णुदेव साय ह तमिलनाडू म आय चक्रवाती तुफान फेंगल के असर ले प्रदेस म बरसा के संभावना ल देखत धान ल नुकसान ले बचाय खातिर जरूरी कदम उठाय के निरदेस अधिकारी मन ल दीन हे। ए संबंध म खाद्य मंत्री दयालदास बघेल ह सबो जिला के कलेक्टर मन ल व्यवस्था करे के निरदेस दीन हे। ओमन किहीन कि समर्थन मूल्य म धान खरीदी हमर सरकार के प्राथमिकता हे।
खबर के मुताबिक प्रदेस म चौदह नवंबर ले धान खरीदी के महाअभियान चलत हे। अभी तक किसान मन ले अट्ठारा लाख मीट्रिक टन ले जादा धान खरीदी होगे हवय। उहें, किसान मन ल बैंक लिंकिंग व्यवस्था म तीन हजार सात सौ छै करोड़ रूपिया ले जादा के भुगतान करे गे हवय। धान खरीदी इकतीस जनवरी दू हजार पच्चीस तक चलही।
राईस मिलर्स-बैठक
धान उपार्जन केंद्र मन ले धान के उठाव नइ होय के सेति केंद्र मन म जाम के स्थिति अउ किसान मन ल धान बेचे म होवत परेसानी के निपटारा होगे हवय। राईस मिलर्स मन ह धान खरीदी केंद्र ले धान के नियमित रूप ले उठाव करे के अउ कस्टम मीलिंग जारी राखे के फइसला ले हवय। लघु उद्योग भारती अउ भारतीय किसान संघ के संग राईस मिल एसोसिएसन के पदाधिकारी मन के बीच होय गोठबात ले राज्य सरकार डहार ले मिलर मनके बकाया रासि के भुगतान जल्दी कराय के आस्वासन दे गीस।
अब धान उपार्जन केंद्र ले राईस मिलर्स मन ह सरलग धान के उठाव करही अउ जल्दी ले जल्दी कस्टम मीलिंग करके चंउर ल भारतीय खाद्य निगम अउ नागरिक आपूर्ति निगम म जमा करही।
मुख्य न्यायाधीश-न्यायालय शुभारंभ
छत्तीसगढ़ उच्च न्यायालय के मुख्य न्यायाधीश रमेश सिन्हा ह आज रईपुर जिला के व्यवहार न्यायालय आरंग के वर्चुअल उद्घाटन करीन। ए मउका म मुख्य न्यायाधीश ह किहीन कि आरंग म व्यवहार न्यायालय के स्थापना ले पक्षकार अउ अधिवक्ता मन बर काम के अच्छा वातावरण बनही। संगेसंग लोगन ल मामला के सुनवाई बर रईपुर नइ जाना पड़ही।
वित्त मंत्री-जीएसटी परिषद
छत्तीसगढ़ के वित्त मंत्री ओ.पी. चौधरी ह आज नई दिल्ली म जीएसटी परिषद के बइठका म भाग लीन। ए दउरान ओमन ह वस्तु अउ सेवाकर-जीएसटी के तहत मुआवजा उपकर के भविष्य उपर बड़े सुझाव दीन। बइठका म केंद्रीय वित्त राज्य मंत्री के अगुवई म आने-आने राज्य के वित्तमंत्री अउ बड़े अधिकारी मन सामिल होइन। मंत्री मन म छत्तीसगढ़ संघरा असम, गुजरात, कर्नाटक, मध्य प्रदेस, पंजाब, तमिलनाडू, उत्तरप्रदेस अउ पश्चिम बंगाल के सदस्य सामिल रिहीन। ए मंत्री मन ह जीएसटी प्रणाली ल अउ जादा मजबूत अउ पारदर्सी बनाय बर सुझाव देथे।
माओवादी-आत्मसमर्पण
दंतेवाड़ा जिला म चलाय जावत लोन वर्राटू अभियान ले प्रभावित होके आज दू झन माओवादी मन ह आत्मसमर्पण करीन हे। ए माओवादी मन ह पूर्वी बस्तर डिवीजन के आमदई एरिया कमेटी के तोड़मा आरपीसी म सक्रिय रिहीन। ए दूनों माओवादी मन ल राज्य सरकार के पूनर्वास नीति म पच्चीस-पच्चीस हजार रूपिया के सहायता रासि दे जाही। संगेसंग शासन के आने-आने सुविधा अउ योजना के फायदा दे जाही।
राजभवन-राज्य स्थापना दिवस
राजभवन म आज असम अउ नागालैंड राज्य के स्थापना दिवस मनाय गीस। ए मउका म राज्यपाल रमेन डेका ह किहीन कि केंद्र सरकार के ‘‘एक भारत श्रेष्ठ भारत‘‘ कारीकरम म विविधता म एकता के भावना ल बढ़ावा देबर सबो राज्य मन एक-दूसर के स्थापना दिवस मनाथे। इही कड़ी म आज राजभवन म असम अउ नागालैंड राज्य के स्थापना दिवस मनाय गीस। राज्यपाल ह स्थापना दिवस के मउका म ए राज्य के लोगन ल बधई दीन।
कारीकरम के दउरान असम के माईलोगिन मन ह बिहू नृत्य प्रस्तुत करीन। संगेसंग आने-आने विश्वविद्यालय के विद्यार्थी मन ह दूनों राज्य के लोकनृत्य के प्रस्तुति दीन।
सेना भर्ती रैली
सेना भर्ती कार्यालय डहार ले रायगढ़ जिला म चार ले बारह दिसंबर तक अग्निवीर भर्ती रैली राखे जाही। ए भर्ती रैली म प्रदेस के सबो तैतीस ठिन जिला मनके आठ हजार पांच सौ छप्पन झिन पुरूष उम्मीदवार सामिल होही। रैली बर उम्मीदवार मन के पाछू फरवरी-मार्च महिना म ऑनलाइन रजिस्ट्रेसन करे गीस। उहें, अप्रैल-मई महिना म ऑनलाइन सीईई परीक्षा होय रिहीस। उम्मीदवार मन ल अपन संग रैली एडमिट कार्ड, आठवीं, दसवीं, बारहवीं अउ स्नातक के मार्कसीट स्थानीय निवासी प्रमाण पत्र, जाति प्रमाण पत्र, एफीडेविट, एनसीसी, खेल, आईटीआई, ड्राइविंग लाइसेंस अउ जेआईए के संगे आधार कार्ड म दर्ज मोबाइल नंबर लाना जरूरी रइही। रायगढ़ जिला प्रशासन डहार ले उम्मीदवार मन के ठहरे के व्यवस्था, रायगढ़ रेलवे स्टेसन अउ बस स्टैण्ड ले लेवई-लेजई खातिर बस के मुफत व्यवस्था करे गेहे।
मुख्यमंत्री-पीएससी टॉपर्स
मुख्यमंत्री विष्णुदेव साय ह अपन निवास म छत्तीसगढ़ लोक सेवा आयोग बछर दू हजार तेईस के परीक्षा म चुने गे लोगन ले भेंट करीन। ए मउका म मुख्यमंत्री ह किहीन कि प्रदेस म सुशासन बनाय बर युवा पीढ़ी के बड़े भूमिका हे। ओमन किहीन कि जतका पारदर्सिता के संग आपमन के चयन होय हे, ओतके पारदर्सिता के संग आपमन अपन जिम्मेदारी निभाहू। मुख्यमंत्री ह किहीन कि प्रशासन के विस्वास बनाय राखे म आपमन सबो झन ल संवेदनसील होना होही। कारीकरम के दउरान अभ्यर्थी मन ह अपन सफलता के अनुभव साझा करीन अउ ओखर श्रेय अपन माता-पिता अउ गुरू मन ल दीन। कारीकरम म मुख्यमंत्री ह सबो टॉपर मन ल महापुरूष मनके जीवन उपर आधारित पुस्तक अउ प्रमाण पत्र दीन।
ठगी-आरोपी गिरफ्तार
रईपुर रेंज के साइबर थाना पुलिस ह सिम्स स्वैपिंग, क्रिप्टोकरेंसी अउ शेयर ट्रेडिंग के नांव ले ठगी करइया नौ झन आरोपी मन ल गिरफ्तार करीन हे। ए आरोपी मन ल आने-आने छै ठन मामला म दुरूग, महासमुंद, बिलासपुर, रईपुर, पुणे, मुंबई अउ नासिक ले पकड़े गेहे। ए आरोपी मनके बैंक खाता ले छै लाख रूपिया पीड़ित मनके खाता म जमा करे गेहे। एखरे संग बैंक अकाउंट म होल्ड चार करोड़ रूपिया ले जादा के रासि पीड़ित मनके खाता म जल्दी ले जल्दी लहुटाय के प्रक्रिया चलत हे। गिरफ्तार आरोपी मन ह शेयर ट्रेडिंग म मुनाफा कमाय के नांव म लोगन ले करोड़ो रूपिया के ठगी करीन हे। सबो आरोपी मन ल न्यायिक अभिरक्षा म जेल भेज दे गेहे।
ओति, सक्ति जिला के बाराद्वार पुलिस ह दू झन मनखे ले पइसा दुगूना करे के नांव म साढ़े तेईस लाख रूपिया के ठगी करइया कंपनी के डायरेक्टर के पत्नी ल गिरफ्तार करीन हे। ए मामला म कंपनी के डायेरक्टर संघरा तीन आरोपी मन फरार हे, जेमा ले दू झन आरोपी मन ल ओडिसा के रहइया बताय जात हे।
अउ अब मौसम के हाल…
फेंगल के असर ले प्रदेस म काली दक्षिण छत्तीसगढ़ म हल्का वर्षा होय के संभावना हे। फेर बस्तर संभाग म चार दिसंबर तक वर्षा के दौर चलही। मौसम विभाग के अनुसार चक्रवात फेंगल कमजोर होके एक ठन अवदाब के रूप म उत्तर तमिलनाडु के ऊपर म हवय। उहें, बंगाल के खाड़ी ले बड़े मात्रा म नमी आवत हे, जेखर प्रभाव ले प्रदेस ले जादा ले जादा जघा म बादल छाए रइही। अवइया चौबीस घंटा म बादल छटे ले न्यूनतम तापमान म गिरावट होही।