प्रदेस के चार ठिन सहर-रईपुर, बिलासपुर, दुरूग, भिलाई अउ कोरबा म बहुत जल्दी प्रधानमंत्री ई-बस सेवा सुरू होही। ए चारों सहर म कुल दू सौ चालिस ई-बस चलाय जाही। प्रधानमंत्री ई-बस सेवा के तहत रईपुर बर सौ ठिन, बिलासपुर अउ दुरूग-भिलाई बर पचास-पचास ठिन उहें, कोरबा बर चालिस ठिन ई-बस मन ल मंजूरी दे गेहे। राज्य स्तर म एखर बर सूडा ल नोडल एजेंसी अउ संबंधित जिला मन म गठित अरबन पब्लिक सर्विस सोसाइटी के क्रियान्वयन एजेंसी बनाय गेहे।
मुख्यमंत्री विष्णुदेव साय ह किहीन हे कि ई-बस सेवा चालू होय ले छत्तीसगढ़ के सहर मन म कमती कार्बन उत्सर्जन सेति वायु गणवत्ता म सुधार अउ पर्यावरण के संरक्षण होही। कमती ऊर्जा खपत अउ सुघ्घर इंधन दक्षता के संगे नागरिक मन ल आरामदायक अवई-जवई के सहूलियत होही।
महतारी शक्ति ऋण योजना
वित्त मंत्री ओ.पी.चौधरी ह ‘महतारी शक्ति ऋण योजना‘ के सुभारंभ करीन। ए मउका म ओमन किहीन कि ए योजना ह महतारी अउ बहिनी मन ल आर्थिक रूप ले मजबूत बनाय सोज बड़का कदम राज्य ग्रामीण बैंक डहार ले सुरू होय ए योजना के उद्देस्य ग्रामीण क्षेत्र के माईलोगिन मन ल आत्मनिर्भर बनाना अउ उंखर आर्थिक सशक्तिकरण ल बढ़ावा देना हे। ए योजना ह माईलोगिन मन ल न केवल पइसा कैड़ी के मदद करही, भलूक ओमन ल स्वरोजगार के माध्यम ले अपन परिवार अउ समाज बर एक ठिन मजबूत आधार दे म सहायक होही। सुभारंभ कारीकरम म राज्य ग्रामीण बैंक के चेयरमैन विनोद अरोरा घलो मौजूद रिहीन।
माओवादी समाचार
छत्तीसगढ़-तेलंगाना सीमा म सुरक्षा बल मन संग होय मुठभेड़ म सात झिन माओवादी मारे गेहे। मउका ले एके-फोर्टीसेवन समेत कई ठिन हथियार बरामद करे गेहे। मिले जानकारी मुताबिक सुरक्षा बल मन ल तेलंगाना के मुलुगु जिला के चलपाका इलाका के जंगल मन म बड़झिन माओवादी मनके सकलाय के जानबा मिले रिहीस। एखर बाद तेलंगाना के ग्रेहाउंड्स फोर्स ल मउका बर पठोय गीस। जइसने ही सुरक्षा बल मनके जवान उंहे पहुंचिन, तभे माओवादी मन गोलीबारी सुरू कर दीस। दूनो डहार ले होय गोलीबारी म सुरक्षा बल मन सात झिन माओवादी ल मार गिराइस हे, जेखर मनके लास बरामद कर ले गेहे। संगे सबो माओवादी के चिन्हारी घलो होगे हे।
ऐति, कांकेर जिला म सीमा सुरक्षा बल-बीएसएफ अउ डिस्ट्रिक्ट रिजर्व गार्ड-डीआरजी के टीम ह सात टिफिन बम अउ एक कुकर आईईडी बरामद करे हे। ए बिस्फोटक ल माओवादी मन ह सुरक्षाबल मन ल नुकसान पहुंचाय के इरादा ले अतखड़ियांपारा गांव के तीर लगाय रखे रिहीस। बम निरोधक दस्ता के टीम ह सबो बिस्फोटक मन ल निष्क्रिय कर देहे।
उहें, बीजापुर जिला म सुरक्षा बल मन ह छै झिन जनमिलिसिया सदस्य मन ल गिरफ्तार करे हे। बताय जावत हे कि उसूर थाना क्षेत्र ले कोबरा बटालियन अउ सीआरपीएफ के संघरा टीम ह गलगम, नड़पल्ली अउ फुटापल्ली डहार सर्चिंग अभियान म निकले रिहीस। इही दउरान नड़पल्ली अउ फुटापल्ली के जंगल ले छै झिन जनमिलिसिया सदस्य मन ल गिरफ्तार करे गेहे। एखर तीर ले बिस्फोटक, प्रतिबंधित माकपा माओवादी संगठन के प्रचार-प्रसार वाले जिनिस अउ माओवादी साहित्य बरामद करे गेहे।
दुर्घटना
रईपुर ले अंबिकापुर जावत कार अउ ट्रक भीतरी होय टक्कर म पांच झिन मनखे के मउत होगे। ए हादसा सरगुजा जिला के गांव गुमगा तीर आज मुंदरहा करीबन पांच बजे होइस। हादसा म कार म बइठे चार झिन मनखे के मउकच म मउत होगे, फेर गंभीर रूप ले घायल एक झिन मनखे ह अस्पताल ले जावत बेरा प्राण त्यागिस। ए सबो मउत होय मनखे मन रईपुर के चंगोराभाठा जघा के रहवइया रिहीन। घटना स्थल म पुलिस अउ राहत दल के टीम ह पहुंच के बचाव काम सुरू करिस। ए दुर्घटना अतका भयंकर रिहीस कि एमा कार के परखच्चा उड़ गे। थाना प्रभारी कुमारी चंद्राकर अउ उंखर टीम ह कटर के मदद ले कार म फंसे लास ल बाहिर निकालीन।
एसीबी-छापा
एंटी करप्शन ब्यूरो-एसीबी के टीम ह आय ले जादा संपत्ति के मामला म आज प्रदेस के कई ठिन जिला म छापामार कार्रवाई करे हे। ए कार्रवाई के चलत एसीबी ह तीन आरक्षक अउ लेखाधिकारी के ठिकाना म छापा मारे गेहे। ए कार्रवाई ट्रेन म गांजा तस्करी मामला के आरोपी जीआरपी के आरक्षक विरूध्द आय ले जादा संपत्ति मामला म करे गेहे। आरोपी के घर अउ ओखर ले जुड़े जघा मन आज बिहनिया एसीबी के छै ठिन अलग-अलग टीम ह दबिस देके लाखो रूपिया के गहना गुठा मकान अउ जमीन के दस्तावेज बरामद करिस।
उहें, कबीरधाम जिला के सस्पेंड सहायक लेखा अधिकारी नरेंद्र राउतकर के आनंद विहार स्थित मकान के संगे दू आने ठिकाना म छापा मारे हे। इंहा ए बतादन कि जनपद पंचायत बोड़ला के सहायक लेखा अधिकारी ल एसीबी ह बीते बारह सितंबर के एक लाख रूपिया के लूजपत लेवत रंगे हाथ गिरफ्तार करे रिहीस।
केंद्रीय मंत्री-कोरबा
केंद्रीय राज्य मंत्री वी. सोमन्ना ह कोरबा दउरा बेरा आकांक्षी जिला के राखे गे संकेतक मनके प्रगति बारे म समीक्षा करीन। ओमन जिला म विकास के संभावना बतइन अउ किहीन कि गरीबी उन्मूलन अउ सामाजिक विकास बर कन्वर्जन, कोलाब्रेसन अउ कॉम्पीटिसन के आधार म काम करना होही। केंद्रीय राज्यमंत्री ह किहीन कि जिला म गरीबी उन्मूलन बर सबो विभाग मन ल संघरा परयास करे ल पढ़ही। ओमन यहू किहीन कि जिला के दूरिहा जघा मन म जरूरी सहूलियत रहे अउ आकांक्षी जिला बर राखे गे लक्ष्य मुताबिक कोरबा जिला ह विकास अउ प्रगति के रद्दा म आगू बाढ़य। ए ह उंखर पहिली प्राथमिकता रइही।
चिकित्सा अधिकारी-पदस्थापना
राज्य म स्वास्थ्य सेवा मन ल मजूबत बनाय बर राष्ट्रीय स्वास्थ्य मिशन के अंतर्गत संविदा पद मन बर चिकित्सा अधिकारी मन के पोस्टिंग करे गेहे। एखर चलत रईपुर संभाग के सरकारी अस्पताल म एकतीस चिकित्सा अधिकारी, बिलासपुर संभाग म बाईस, सरगुजा संभाग म तीन अउ दुरूग संभाग म सत्ताईस चिकित्सा अधिकारी मनके पोस्टिंग करे गेहे। राष्ट्रीय स्वास्थ्य मिशन डहार ले ए बारे म आदेस जारी कर दे गेहे।
केंद्रीय राज्यमंत्री-दुग्ध वितरण कार्यक्रम
केन्द्रीय आवासन अउ सहरी कार्य राज्यमंत्री तोखन साहू ह बिलासपुर जिला के सेंदरी ले पोषणयुक्त दुग्ध वितरण कारीकरम के सुभारंभ करीन। ए योजना के चलत बिलासपुर जिला के पैंतालिस ठिन स्कूल मनके चार हजार पांच सौ संतावन झिन पढ़ईया लइका मन ल हरेक दिन दू सौ मिली लीटर दूध मिलही। दुग्ध वितरण कारीकरम के चलत मुंगेली जिला के लोरमी विकासखंड अउ राजनांदगांव जिला ल घलो सामिल करे गेहे। ए तीनों जिला के आठ हजार पढ़इया लइका मन ल हरेक दिन दुध बांटे जाही।
बिलासपुर, जगदलपुर अउ अंबिकापुर एयरपोर्ट के विकास काम बर वित्त विभाग ह तेईस करोड़ चौसठ लाख रूपिया के मंजूरी देहे। ए रासि ले एयरपोर्ट के इंफ्रास्ट्रक्चर अउ सुरक्षा ले जुड़े काम करे जाही।