वित्त मंत्रालय के अनुसार, ए परियोजना पेड़-पौधा मन के स्वास्थ्य प्रबंधन ल बढ़ावा देथे। ए परियोजना के सफलता बर प्राइवेट नर्सरी, सोधकर्ता, राज्य सरकार अउ किसान मन ले जुड़े संगठन ल सामिल करे जाही।
मुख्यमंत्री-रेल राज्यमंत्री मुलाकात
केंद्रीय रेल अउ जलशक्ति राज्यमंत्री वी.सोमन्ना ह छत्तीसगढ़ दउरा म हवय। ओमन ह काली मुख्यमंत्री विष्णुदेव साय ले उंखर निवास म भेंट करीन। मुख्यमंत्री ह श्री सोमन्ना के सुवागत करत ओमन ल बस्तर आर्ट के प्रतीक चिन्ह अउ सॉल भेंट करीन।
ए दउरान मुख्यमंत्री ह केंद्रीय राज्य मंत्री ले राज्य म रेल परियोजना के विकास संघरा कतकोन मुद्दा उपर गोठबात करीन। ए मउका म मुख्यमंत्री के सचिव पी. दयानंद अउ डॉक्टर बसवराजु एस., मंडल रेल प्रबंधक रईपुर संजीव कुमार संघरा दूसर अधिकारी मन मौजूद रिहीन।
केंद्रीय राज्यमंत्री वी. सोमन्ना ह आज कोरबा पहुंचिन। ए दउरान ओमन ह नगर पालिक निगम अउ एस.एल.आर.एम. केंद्र के निरीक्षण करीन। उहें, स्वच्छता दीदी मन ले घलो भेंट करीन।
मुख्यमंत्री-सड़क सुरक्षा बैठक
मुख्यमंत्री विष्णुदेव साय ह सड़क दुर्घटना ल रोके बर सड़क सुरक्षा अउ यातायात नियम के कड़ाई ले पालन करे के निरदेस दीन हे। मुख्यमंत्री ह रईपुर म राखेगे छत्तीसगढ़ राज्य सड़क सुरक्षा परिषद के बइठका म सड़क सुरक्षा अउ सड़क दुर्घटना के नियंत्रण के उपाय के समीक्षा करीन। ओमन किहीन कि सड़क दुर्घटना ल रोके बर दूपहिया वाहन चालक मन बर हेलमेट अउ चारपहिया वाहन चालक बर सीट बेल्ट के उपयोग निश्चित करे जाय। संगेसंग यातायात नियम के प्रचार बर जन-जागरूकता अभियान घलो चलाय जाय।
बइठका म मुख्यमंत्री ह दुर्घटना के आसंका वाले रद्दा मनके सुधार काम म तेजी लाय के अउ सड़क दुर्घटना म घायल होय लोगन के इलाज बर ट्रामा स्टेब्लाईजेसन यूनिट के काम ल जल्दी ले जल्दी पूरा करे के निरदेस दीन।
बइठका म अधिकारी मन ह बतइन कि स्कूल मन म कक्षा पहिली ले दसवीं तक के पुस्तक मन म सड़क यातायात नियम ले जुड़े पाठ ल घलो सामिल करे गेहे।
प्रधानमंत्री आवास योजना
नगरीय प्रशासन अउ विकास मंत्री अरूण साव ह प्रधानमंत्री आवास योजना-शहरी बर करे जावत सर्वेक्षण के बेरा जरूरी दस्तावेज नइ होय के हालत म पात्र हितग्राही मन के आवेदन ले तुरते निरस्त झन करे जाय बर अउ ओमन ल कागज बनवाय बर समय दे जाय के निरदेस दीन हे। विभागीय सचिव डॉक्टर बसवराजु एस. ह प्रधानमंत्री आवास योजना के हितग्राही मनके लंबित जाति अउ आय प्रमाण पत्र के मामला के निपटारा जल्दी करे बर राजस्व विभाग ल चिट्ठी भेजिन हे।
खबर के मुताबिक भारत सरकार के यूनिफाइड वेब पोर्टल म प्रधानमंत्री आवास योजना के हितग्राही मनके सर्वेक्षण के काम पंद्रह नवंबर ले सुरू होय हे। ए दउरान हितग्राही मनके जानकारी भारत सरकार के पोर्टल म दर्ज करे जावत हे। एखर बर हितग्राही परिवार के आधार कार्ड, बैंक खाता, आय अउ जाति प्रमाण पत्र, जमीन के कागज दिखाना जरूरी कर दे गे हवय।
विजय दिवस-राज्यपाल आमंत्रण
अवइया सोलह दिसंबर के विजय दिवस के मउका म छत्तीसगढ़ म घलो कतकोन कारीकरम कराय जाही। एमा सबले बड़े आकर्षण नया रईपुर के सेंट्रल पार्क म होवइया सोल्जराथान हे। एमा सेना के योध्दा मनके संगेसंग आम लोगन घलो भाग लिही। छत्तीसगढ़ अउ ओडिसा सब एरिया नया रईपुर के वरिष्ठ सैन्य अधिकारी कर्नल सुमीत शर्मा अउ कर्नल शैलेन्द्र पटनायक ह राज्यपाल रमेन डेका ले सौजन्य भेंट करके ओमन ल कारीकरम म मुख्य अतिथि के रूप म सामिल होय बर नेवता दीन।
खबर के मुताबिक बछर उन्नीस सौ इकहत्तर म पाकिस्तान उपर भारतीय सशस्त्र बल के जीत के सम्मान बर हर बछर सोलह दिसंबर के विजय दिवस मनाय जाथे।
‘बस संगवारी एप‘
छत्तीसगढ़ म अब बस यात्री मन ल घर बइठे बस के समय सारिणी अउ रद्दा के जानकारी मिल सकही। एखर बर ओमन ल गूगल प्ले स्टोर ले ‘बस संगवारी एप‘ डाउनलोड करना होही। मुख्यमंत्री विष्णुदेव साय ह छत्तीसगढ़ राज्य सड़क सुरक्षा परिषद के बइठका म ये एप ल लॉन्च करीन। ए मउका म मुख्यमंत्री ह किहीन कि छत्तीसगढ़ परिवहन विभाग के ये एप ह बस यात्री मन बर बिसेस रूप ले दूर-दराज के यात्री मन बर बहुते सुविधा होही। जल्दीच ये एप के माध्यम ले अंतर्राज्यीय बस के अवई-जवई अउ बस आय के सही बेरा जाने के सुविधा घलो मिलही।
ये एप म अभी आने-आने रद्दा म चलइया पांच हजार ले जादा बस मन ल सामिल करे गेहे। एखर बर बस मन म जीपीएस सिस्टम लगाय जावत हे, जेखर ले बस मनके लाइव ट्रैकिंग घलो करे जा सकही।
भाजपा-बैठक
भारतीय जनता पार्टी के छत्तीसगढ़ प्रभारी नितिन नबीन ह आज रईपुर के प्रदेस कार्यालय म पार्टी के सदस्यता अभियान के समीक्षा करीन। ए दउरान ओमन ह छत्तीसगढ़ म भाजपा के सदस्य संख्या साठ लाख पहुंचे म मुख्यमंत्री विष्णुदेव साय, प्रदेस अध्यक्ष किरण सिंह देव संघरा संगठन के पूरा टीम ल बधई दीन हे।
बाद म पत्रकार मन ले गोठबात करत ओमन बतइन कि बूथ कमेटी बनाय के बाद अब मंडल, जिला अध्यक्ष के चुनाव होही अउ ओखर बाद प्रदेस अध्यक्ष के चुनाव करे जाही। एखरे संग नगरीय निकाय अउ त्रिस्तरीय पंचायत चुनाव ल देखत संभागवार रणनीति घलो बनाय जावत हे।
माओवादी गिरफ्तार
बीजापुर जिला म अतिसंवेदनसील नक्सल मोर्चा म तैनात सुरक्षा बल ह तेरह झन माओवादी मन ल गिरफ्तार करे हे। एमा ले एक झन माओवादी उपर दू लाख रूपिया के ईनाम रिहीस। माओवादी तीर ले पांच किलो के टिफिन बम संघरा दूसर विस्फोटक समान बरामद करे गेहे। पुलिस अधीक्षक जितेन्द्र कुमार यादव ह एखर पुष्टि करीन हे। मिले जानकारी के अनुसार बिसेस कार्यबल-एसटीएफ अउ केंद्रीय रिजर्व पुलिस बल के कोबरा बटालियन के संयुक्त दल ह तर्रेम थाना क्षेत्र ले तीन, आवापल्ली अउ जांगला थाना क्षेत्र ले पांच-पांच झन माओवादी मन ल गिरफ्तार करीन हे। गिरफ्तार माओवादी मन म कोसापुनेम ह जगरगुंडा एरिया कमेटी के सदस्य हे अउ एखर उपर दू लाख रूपिया के ईनाम रिहीस।
चांपा-ठगी
जांजगीर के चांपा पुलिस ह करीब दू हजार सात सौ माईलोगिन मनले करीबन आठ करोड़ रूपिया के ठगी के आरोप म फ्लोरा मैक्स कंपनी के तीन झन करमचारी मन ल गिरफ्तार करे हे। ए सबो झन ल न्यायिक हिरासत म भेजे गेहे। पुलिस ह संबंधित कंपनी के चांपा कार्यालय के सबो समान ल घलो जब्त कर लेहे। ए मामला म पुलिस ह पांच झन के खिलाफ एफआईआर दर्ज करे हे। एमा ले डायरेक्टर संघरा दू झन आरोपी मन ल कोरबा पुलिस ह पहिलीच ले गिरफ्तार कर लेहे।
खबर के मुताबिक ए कंपनी ह माईलोगिन मन ल बिजनेस स्कीम के झांसा दीस अउ तीस हजार रूपिया लेके हर महिना सत्ताईस सौ रूपिया दे जाय के बात कहिके आठ करोड़ रूपिया के ठगी कर लीस। कंपनी वाले मन ह कोरबा के बाद चांपा म घलो अपन ऑफिस खोले रिहीन। बाद म माईलोगिन मनके रिपोर्ट म चांपा पुलिस ह मामला दर्ज करीस अउ तीन झन आरोपी मन ल गिरफ्तार कर लीस।
उहें, कांंडागांव जिला म महिला अउ बाल विकास विभाग म नौकरी लगाय के नांव म कतकोन झन ले करीबन इक्कीस लाख रूपिया के ठगी करे के मामला म पुलिस ह एक झन माईलोगिन ल गिरफ्तार करे हे। न्यायालय म पेस करे के बाद आरोपी ल न्यायिक रिमांड म जेल भेज दे गेहे।
राष्ट्रीय रिसर्च फेलो चयन समिति
रईपुर के इंदिरागांधी कृषि विश्वविद्यालय के कुलपति डॉक्टर गिरीश चंदेल ल भारत सरकार के जैव प्रौद्योगिकी विभाग, विज्ञान अउ प्रौद्योगिकी मंत्रालय के रिसर्च एसोसिएट चयन समिति के सदस्य मनोनीत करे गेहे। ए चयन समिति म डॉक्टर चंदेल संघरा देस के दूसर विश्व विद्यालय अउ अनुसंधान संस्थान के कुल बाईस झन सदस्य ल सामिल करे गेहे। ए समिति के अध्यक्ष बनारस हिंदी विश्वविद्यालय के पूर्व कुलपति डॉक्टर राकेश भटनागर हे। ए समिति के मुख्य काम देसभर के प्रतिभावान विद्यार्थी मन ल अनुसंधान बर फैलोसिप देवाना अउ उंखर मार्गदर्सन करना हे।