संविधान ल अंगीकार करे जाय के आज पचहत्तरवां वर्षगांठ हे। ए मउका म केन्द्र सरकार ह आज ले एक बछर तक चलइया समारोह के सुरूआत करे हे। ए समारोह छब्बीस नवंबर दू हजार पच्चीस तक देसभर म राखे जाही। संविधान दिवस के मउका म नई दिल्ली म राखे गे एक ठिन कारीकरम ल संबोधित करत राष्ट्रपति द्रौपदी मुर्मु ह किहीन कि भारतीय संविधान एक जीवित अउ प्रगतिशील दस्तावेज हवय। एखर माध्यम ले देस ह सामाजिक न्याय अउ समावेशी विकास के लक्ष्य ल हासिल करे हे। ओमन किहीन कि सरकार ह समाज के जम्मो वर्ग विशेषकर, कमजोर वर्ग के कल्याण बर ए बछर म कई ठिन उपाय करे हे। राष्ट्रपति ह लोकसभा अउ राज्य विधानसभा म माईलोगिन मन बर आरक्षण ले संबंधित नारी शक्ति वंदन अधिनियम पारित करे जाय के बड़ई करीन।
उहें, प्रधानमंत्री नरेन्द्र मोदी ह भारतीय संविधान के पचहत्तरवां वर्षगांठ के मउका म सोशल मीडिया प्लेटफॉर्म ‘एक्स‘ म लोगन मन सुभकामना दीन अउ कहिन कि संविधान राष्ट्र के मार्गदर्शक हे। भारतीय संविधान देस के हजारों बछर के परंपरा के आधुनिक अभिव्यक्ति हवय।
संविधान दिवस-पदयात्रा
संविधान दिवस के मउका म आज रायपुर म ‘‘हमारा संविधान-हमारा स्वाभिमान‘‘ के नाम ले पदयात्रा निकाले गीस। ए पदयात्रा म मुख्यमंत्री विष्णुदेव साय के संग मंत्री, विधायक, जनप्रतिनिधि अउ स्कूली छात्र-छात्रा मन ह सामिल होइन। ए पदयात्रा पंडित जवाहरलाल नेहरू स्मृति चिकित्सा महाविद्यालय सभागृह ले सुरू होके अंबेडकर चौक म सिरईस, जिहां मुख्यमंत्री ह डॉक्टर भीमराव अंबेडकर के प्रतिमा म माल्यार्पण करके ओमन ल नमन करीन।
एखर पहिली, मुख्यमंत्री ह पंडित जवाहरलाल नेहरू स्मृति चिकित्सा महाविद्यालय सभागृह म राखे गे कारीकरम ल संबोधित करत कहिन कि हमर संविधान भारत के जुन्ना संस्कृति, इतिहास अउ परंपरा के आइना हवय। ए संविधान हमर सालों के संघर्ष, अनुभव अउ उपलब्धि के प्रतिफल हवय।
संविधान दिवस के मउका म आज राजभवन सचिवालय के अधिकारी-कर्मचारी मन ह संविधान के प्रस्तावना के सामूहिक वाचन करीन। उहें, रायपुर रेलमंडल म मंडल रेल प्रबंधक संजीव कुमार ह अधिकारी अउ कर्मचारी मन ल संविधान के उद्देशिका पढ़के सपथ देवईन।
संविधान दिवस म प्रदेस के आने-आने जिला के अमृत सरोवर स्थल अउ सिक्षण संस्थान मन म कारीकरम राखे गीस।
राज्य मंत्रिमंडल निर्णय
मुख्यमंत्री विष्णुदेव साय के पगरइति म आज मंत्रालय म होय राज्य मंत्रिपरिषद के बइठका म कतकोन फइसला ले गीस। बइठका म किसान मनके हित म मंत्रिपरिषद ह बड़े फैसला लेहे। मंत्रिपरिषद ह किसान मन ल बीजा देवाय बर भारत सरकार डहार ले आने-आने योजना म इन्पैनल्ड सेंट्रल नोडल सीड एजेंसी ले बीजा खरीदे के मंजूरी दीन हे। उहें, राजनीतिक आंदोलन ले जुड़े चौव्वन प्रकरण ल वापस लेके फइसला ले गीस। उहें, पांचवीं अउ आठवीं के परीक्षा ल केन्द्रीयकृत करे जाय बर स्कूल सिक्षा विभाग ल अधिकृत करे गेहे।
एखर संगेसंग मंत्रिपरिषद ह सार्वजनिक वितरण प्रणाली के अंतर्गत पात्र हितग्राही मन ल वितरण बर नागरिक आपूर्ति निगम ल ई-ऑक्सन प्लेटफॉर्म के माध्यम ले चना उपार्जन करे के मंजूरी दीन हे। उहें, खरीफ सीजन म राज्य म मक्का अउ प्रधानमंत्री अन्नदाता आय संरक्षण अभियान के अंतर्गत दलहन-तिलहन अउ रबी मौसम म चना, मसूर अउ सरसों के उपार्जन बर नेफेड अउ एनसीसीएफ ल एजेंसी नियुक्त करे के फइसला ले गेहे।
उहें, राज्य जल विद्युत परियोजना के तहत पांच साल बर हरेक बछर एक लाख रूपिया प्रति मेगावाट के दर ले लेवइया हरित ऊर्जा विकास शुल्क ल खतम करे के निर्णय ले गेहे। मंत्रिपरिषद डहार ले राज्य म हाउसिंग एण्ड अर्बन डेवलपमेंट कार्पोरेशन लिमिटेड ले आवास, नगरीय विकास अउ आने-आने क्षेत्र म सहायता प्राप्त करे बर समझौता ज्ञापन के प्रारूप के अनुमोदन करे गीस। एखर अलावा छत्तीसगढ़ गृह निर्माण मंडल डहार ले लागू व्यपवर्तन सुल्क प्रीमियम, अर्थदण्ड अउ भू-राजस्व के पुनः निर्धारण ले छूट प्रदान करे के फइसला घलो ले गीस।
राज्यपाल-दिल्ली प्रवास
छत्तीसगढ़ के राज्यपाल रमेन डेका ह आज नई दिल्ली म पूर्व उपराष्ट्रपति एम. वेंकैया नायडू अउ केन्द्रीय सड़क परिवहन मंत्री नितिन गडकरी ले भेंट करीन।
अपन दिल्ली प्रवास के दउरान राज्यपाल ह भारत मंडपम म राखे गे तिरालीसवां भारत अंतर्राष्ट्रीय व्यापार मेला ल देखीन। ए दउरान ओमन छत्तीसगढ़ पवेलियन म घूम के उहां प्रदर्सित वस्तु अउ उत्पाद मनके जानकारी लीन। राज्यपाल ह उहां मौजूद शिल्पकार अउ उद्यमी मनले गोठबात करके ओमन ल प्रोत्साहित करीन। ए मउका म राज्यपाल ह कहिन कि ए व्यापार मेला छत्तीसगढ़ के पहिचान ल राष्ट्रीय अउ अंतर्राष्ट्रीय स्तर म ले जाय के एक ठिन सुघ्घर मंच हवय। ओमन राज्य के उत्पाद अउ कला ल बढ़ावा दे बर हरसंभव कोसिस करे के बात कहिन।
खबर के मुताबिक अंतर्राष्ट्रीय व्यापार मेला के छत्तीसगढ़ पवेलियन म राज्य के सांस्कृतिक विरासत, हस्तशिल्प अउ औद्योगिक विकास ल प्रदर्सित करे गेहे।
ट्रेन-डिरेल
दक्षिण पूर्व मध्य रेलवे बिलासपुर-कटनी रेलमार्ग के भनवारटंक स्टेशन के तीर आज बिहनिया कोयला ले लदे मालगाड़ी के सत्रह डिब्बा पटरी ले उतर गे। एखर सेती ए रेलमार्ग म कई ट्रेन के अवई-जवई परभावित होय हे। आज अंबिकापुर-दुर्ग एक्सप्रेस ल रद्द कर दे गेहे। काली सत्ताईस नंवबर के बिलासपुर-शहडोल मेमू अप-डाउन रद्द रइही। उहें, दुर्ग-उधमपुर सुपरफास्ट, भोपाल-दुर्ग अमरकंटक एक्सप्रेस, छपरा-दुर्ग एक्सप्रेस, पुरी-योगनगरी ऋर्षिकेश उत्कल एक्सप्रेस अउ दुर्ग-एमसीटीएम एक्सप्रेस ल रद्दा बदल के चलाय जावत हे। मिले खबर के मुताबिक रेलवे के टीम मउका म पहुंचकर के रेल यातायात बहाल करे बर मरम्मत काम करत हे।
रेलवे ह यात्री मनके सुविधा बर बिलासपुर, रायगढ़, अनूपपुर, शहडोल, उसलापुर, दुर्ग, रायपुर अउ गोंदिया स्टेसन म बूथ के स्थापना करे हे।
प्रसार भारती-फ्रीडम प्लान
प्रसार भारती ह रेलटेल अउ प्लेबॉक्स टीवी रेलवायर ब्रॉडबैंड म फ्रीडम प्लान सुरू करही। प्रसार भारत के मुख्य कार्यकारी अधिकारी गौरव द्विवेदी अउ रेलटेल के अध्यक्ष अउ प्रबंध निदेशक संजय कुमार ह काली नई दिल्ली म एखर सुरूआत करीन। एखर उद्देश्य पारंपरिक अउ आधुनिक प्रसारण के बीच के दूरिहा ल कमती करना अउ कनेक्टिविटी अउ सुघ्घर मनोरंजन देवाना हे। श्री द्विवेदी ह किहीन कि देस ह डिजिटल क्रांति कोति बाढ़त हे अउ वेव्स ओटीटी प्लेटफॉर्म प्रसार भारती बर एक बड़े छलांग हे।
गृह मंत्री-नशीली दवाई कार्रवाई
गृह मंत्री विजय शर्मा ह आज मंत्रालय म गृह विभाग अउ स्वास्थ्य विभाग के एक ठिन उच्च स्तरीय बइठका लीन। बइठका म ओमन प्रदेस म नसीला दवई बेचइया मन उपर कड़ा कार्रवाई करे के बात किहीन। ओमन किहीन कि प्रदेस म नसीला दवई के सेवन अउ बेचे म रोक लगाय जाय।
उंहे, बइठका म स्वास्थ्य मंत्री श्याम बिहारी जायसवाल ह खाद्य अउ औषधि विभाग के नियंत्रक ल पुलिस अधिकारी मनके संग टीम बनाके कार्रवाई करे बर कहिन।
पंजीकृत वाहन-एचएसआरपी
राज्य म अप्रैल दू हजार उन्नीस के पहिली पंजीकृत जम्मों श्रेणी के मोटर गाड़ी म एक सौ बीस दिन के भीतर हाई सिक्योरिटी रजिस्ट्रीकरण चिन्ह-एचएसआरपी लगवाना जरूरी कर गेहे। ए बारे म परिवहन विभाग डहार ले मेसर्स रीयल मेजॉन इंडिया लिमिटेड अउ रोसमर्टा सेफ्टी सिस्टम लिमिटेड ल एचएसआरपी चिन्ह लगाय बर अधिकृत करे गेहे। परिवहन विभाग डहार ले जम्मों आरटीओ कार्यालय ल जोन-ए अउ जोन-बी म बांटे गेहे। जोन-ए के तहत सामिल आरटीओ कार्यालय म पंजीकृत गाड़ी म एचएसआरपी चिन्हा लगाय के जिम्मेदारी मेसर्स रियल मेजॉन इंडिया लिमिटेड ल दे गेहे। एमा रायपुर, बिलासपुर, कोरबा अउ बीजापुर सहित चौदह जिला ल सामिल करे गेहे। अइसने, जोन-बी म रायगढ़, धमतरी, राजनांदगांव, दुर्ग, दंतेवाड़ा अउ जगदलपुर समेत आने चौदह जिला सामिल हवय, जिहां पंजीकृत गाड़ी मन म एचएसआरपी चिन्ह लगाय के जिम्मेदारी मेसर्स रोसमर्टा सेफ्टी लिमिटेड ल सौंपे गेहे।
अउ मौसम के हाल…
उत्तर ले आवत ठंडा अउ सुष्क हवा के सेती अवइया दू-तीन दिन तक सरगुजा संभाग अउ ओखर ले लगे जिला मन म न्यूनतम तापमान म गिरावट जारी रेहे के संभावना हे। प्रदेस के मध्य क्षेत्र म न्यूनतम तापमान म हल्का बढ़ोतरी हो सकत हे। उहें, बस्तर संभाग अउ ओखर ले लगे जिला मन म न्यूनतम तापमान म बढ़ोतरी होय के संभावना हे।