संसद के सीतकालिन सत्र आज ले सुरू होगे हे। छब्बीस दिन तक चलइया ए सत्र म कुल उन्नीस ठन बइठका होही।
प्रधानमंत्री नरेंद्र मोदी ह आसा जतइन कि संसद के सीतकालिन सत्र फायदेमंद रइही अउ एमा रचनात्मक गोठबात करे जाही। संसद सत्र ले पहिली मीडिया म श्री मोदी ह किहीन कि ए सत्र संविधान पारित होय के पचहत्तर बछर संघरा कतकोन कारण ले बिसेस रइही। ओमन किहीन कि ए सत्र लोकतंत्र बर गरिमापूर्ण ऐतिहासिक मउका होही।
संविधान दिवस
भारतीय संविधान के पचहत्तर बछर पूरा होय म खेल अउ युवा कल्याण विभाग डहार ले काली बिहनिया राजधानी रईपुर के पंडित जवाहर लाल नेहरू स्मृति चिकित्सालय ले अंबेडकर चौक तक पदयात्रा निकाले जाही। ए पदयात्रा म मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह सामिल होही।
पदयात्रा ले पहिली पंडित जवाहर लाल नेहरू स्मृति चिकित्सालय के सभागार म संविधान उपर प्रश्नोत्तरी प्रतियोगिता कराय जाही। एखर बाद चिकित्सा महाविद्यालय ले कलेक्ट्रेट परिसर अंबेडकर चौक तक पदयात्रा निकाले जाही। कारीकरम म उपमुख्यमंत्री अरूण साव, विजय शर्मा, केंद्रीय आवास अउ सहरी विकास मंत्री तोखन साहू, विधायक अउ दूसर जनप्रतिनिधि मन सामिल होही।
उहें, काली छब्बीस नवंबर ले प्रदेस म सालभर ‘‘हमारा संविधान, हमारा स्वाभिमान‘‘ के नाव ले स्मरण उत्सव के आयोजन करे जाही। रईपुर म होवइया मुख्य कारीकरम म राज्यपाल, मुख्यमंत्री, उपमुख्यमंत्री के संग सबो मंत्री, विधायक अउ दूसर मनखे मन डहार ले संविधान के प्रस्तावना के वाचन करे जाही। संविधान दिवस म स्कूल अउ कॉलेज मन म प्रश्नोत्तरी, वाद-विवाद अउ भाषण प्रतियोगिता के आयोजन करे जाही। संगेसंग अनुसूचित जाति-जनजाति गांव मन म पंद्रह दिन के संविधान यात्रा निकाले जाही। उहें, ग्राम पंचायत मन म ग्रामसभा के घलो आयोजन करे जाही।
इही बीच, कांग्रेस ह छब्बीस नवंबर ले छब्बीस जनवरी दू हजार पचीस तक साठ दिन के राष्ट्रव्यापी अभियान सुरू करे के फैसला लेहे।
मुख्य न्यायाधीश-मानव तस्करी
छत्तीसगढ़ उच्च न्यायालय के मुख्य न्यायाधीश रमेश सिन्हा ह किहीन हे कि मानव तस्करी ले निपटे बर निवारक रणनीति बनाना होही। संगेसंग न्याय पालिका ल प्रभावी तरीका ले काम करना होही। सरगुजा जिला म न्यायिक अधिकारी मनके डिवीजनल वर्चुअल सेमिनार म ओमन किहीन कि मानव तस्करी ए क्षेत्र बर ज्वलंत मुद्दा हे। मानव तस्करी एक ठन गंभीर अपराध हे अउ समाज बर कलंक हे। ओमन विस्वास जतइन कि सेमिनार ले ए बिसय म लोगन के ज्ञान बाढ़ही।
मुख्य न्यायधीश ह किहीन कि तेजी ले डिजीटल होवत दुनिया म तकनीकी ज्ञान बहुत जरूरी हे, एखर ले न्यायिक अधिकारी मन ह अपन संसाधन के पूरा फायदा उठा सकत हे।
स्वास्थ्य मंत्री-धान खरीदी
स्वास्थ्य मंत्री श्याम बिहारी जायसवाल ह आज मनेन्द्रगढ़ के रतनपुर, बरदर, खड़गंवा अउ बड़ाबाजार धान खरीदी केंद्र के निरीक्षण करीन। श्री जायसवाल ह केंद्र मन म धान खरीदी प्रक्रिया के अवलोकन करीन। संगेसंग किसान मन ल मिले सुविधा के जायजा घलो लीन। ए दउरान श्री जायसवाल ह समिति मन म धान बेचे बर आय किसान मन ल माला पहिराके अउ श्रीफल देके सम्मानित घलो करीन। स्वास्थ्य मंत्री ह केंद्र मनके निरीक्षण करे के संगेच समिति प्रभारी मन ल निरदेस देवत किहीन कि किसान मन ले इक्कीस कुंटल प्रति एकड़ के दर ले ही धान खरीदे जाय, कम धान खरीदी के सिकायत म समिति मन उपर कड़ा कार्रवाई करे जाही।
राष्ट्रीय परख सर्वेक्षण
राष्ट्रीय शिक्षा अनुसंधान अउ प्रसिक्षण परिषद-एनसीईआरटी डहार ले प्रस्तावित परख सर्वेक्षण- एनएएस ल चार दिसंबर के देसभर म आयोजित कराय जाही। एखर उद्देस्य राष्ट्रीय शिक्षा नीति के तहत लइका मनके शैक्षणिक प्रदर्सन के मूल्यांकन के बारे म मापदंड बनाना हे।
ए बखत के सर्वेक्षण कक्षा तीसरी, छटवीं अउ नवमीं के लइका मन उपर केंद्रित होही, जउन ह उंखर पाछू कक्षा म मिले योग्यता उपर आधारित होही। परीक्षा म प्रश्न ओएमआर सीट के माध्यम ले बहुविकल्प वाले प्रारूप म होही। ए सर्वेक्षण लइका मनके योग्यता के आंकलन के संगेच राज्य के शैक्षणिक रैंकिंग म घलो अपन भूमिका निभाही। राज्य के रैंकिंग के उपयोग कतकोन शैक्षिक योजना म करे जाथे। राज्य मन डहार ले परयास करे जाथे कि ओमन ह सर्वेक्षण म सुघ्घर प्रदर्सन करके रैंकिंग म अपन स्थिति ल मजबूत करय। ‘‘परख‘‘ के उद्देस्य विद्यार्थी मनके शैक्षणिक प्रदर्सन के मूल्यांकन करना हे।
पीएससी-आरोपी
छत्तीसगढ़ पीएससी घोटाला के आरोपी आयोग के पूर्व अध्यक्ष टामन सिंह सोनवानी अउ श्रवण कुमार गोयल ल आज सीबीआई के बिसेस अदालत म पेस करे गीस। बिसेस अदालत ह दूनों ल तेरह दिन के न्यायिक रिमांड म जेल भेज दे गेहे। मामला के अगला सुनवाई सात दिसंबर के होही।
सट्टा ऐप-गिरफ्तार
महोदव सट्टा मामला म राजधानी रईपुर के एक झन दवा कारेबारी ल ओडिसा पुलिस ह गिरफ्तार करे हे। पाछू रतिहा ओडिसा के कटक पुलिस के टीम ह रईपुर पहुंचिस अउ ए कार्रवाई करिस। पुलिस के अनुसार आरोपी कारोबारी अश्वनी पाल के बैंक खाता ले करोड़ो रूपिया के लेनदेन के खुलासा होय हे। ए मामला म पाछू महिना लखनऊ पुलिस ह घलो कारोबारी ल नोटिस जारी करके पूछताछ बर बलाय रिहीस, फेर आरोपी ह पुलिस के आगू पेस होय ले मना कर दे रिहीस। गिरफ्तारी के बाद आरोपी ल रईपुर के कोर्ट म पेस करके कटक पुलिस ह ओला अपन संग ओडिसा ले गेहे।
कोचिंग संस्थान-ठगी
राजधानी रईपुर के कौटिल्य एकेडमी संस्थान डहार ले यूपीएससी संघरा कतकोन प्रतियोगी परीक्षा के तियारी कराय के नांव म विद्यार्थी मनले अट्ठारा लाख रूपिया के ठगी के मामला सामने आय हे। सरस्वती नगर पुलिस ह ब्रांच डायरेक्टर अउ उंखर पत्नी के खिलाफ एफआईआर दर्ज करे हे, जेखर बाद कोचिंग के संचालक अउ ओखर पत्नी फरार होगे हे। उंखर मनके मोबाइल घलो बंद बताय जात हे। कोचिंग के स्टाफ अउ लइका मन के कहना हे कि सिफ्टिंग के बहाना करके क्लास बंद करे गे रिहीस।
नारायणपुर-सड़क निर्माण
नियद नेल्लानार योजना म नारायणपुर जिला म ओरछा ले आदेर तक सड़क बनाय के काम सुरू कर दे गेहे। सड़क बने ले ओरछा के आगू पहुंचविहीन इलाका म लोगन ल बुनियादी सुविधा मिले बर लगही। उहें, पीएम ‘जन मन‘ योजना म आवास, बिजली, स्कूल, स्वास्थ्य, खेल मैदान अउ आंगनबाड़ी के सेवा घलो मिलही।
अउ अब मौसम के हाल…
प्रदेस म पड़त जाड़ के असर अब नजर आवत हे। कतकोन जिला म तापमान सामान्य ले दू डिग्री नीचे आगे हवय। एखरे संग अवइया पांच दिन तक तापमान म बिसेस बदलाव होय के संभावना नइ हे। मौसम विभाग ले मिले जानकारी के अनुसार अंबिकापुर म सबले कमती तापमान आठ डिग्री सेल्सियस दर्ज करे गीस। उहें, राजधानी रईपुर म चौदह दसमलव दू, पेण्ड्रा रोड म नौ दसमलव छै, दुरूग म बारह, जगदलपुर म चौदह अउ बिलासपुर म चौदह दसमलव चार डिग्री सेल्सियस तापमान दर्ज करे गेहे। मौसम विभाग ह सरगुजा संभाग के कुछेक जिला म सीत लहर चले के आसंका जताय हे। उनतीस नवंबर ले दक्षिण छत्तीसगढ़ म न्यूनतम तापमान म बढ़ोत्तरी हो सकत हे।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म काली छब्बीस नवंबर के मंत्रालय म राज्यमंत्री परिषद के बइठका कराय जाही, जेमा कतकोन जरूरी फइसला होय के संभावना हे।
– श्री रामलला दर्सन योजना म रईपुर संभाग के पांच सौ पचास श्रध्दालू मन ल लेके आज एक ठन बिसेस ट्रेन अयोध्या धाम बर रवाना होइस। ए गाड़ी ल खाद्य मंत्री दयालदास बघेल अउ राजस्व मंत्री टंकराम वर्मा ह हरा झंडा दिखाके रवाना करीन।
– दक्षिण पूर्व मध्य रेलवे के रईपुर मंडल डहार ले अंतरमंडलीय सांस्कृतिक प्रतियोगिता म एकांकी नाटक, एकल अभिनय अउ मिमिक्री प्रतियोगिता के आयोजन करे गीस, जेमा मुख्य अतिथि के रूप म मंडल रेल प्रबंधक संजीव कुमार सामिल होइन।
अउ
– जांजगीर-चांपा जिला म माईलोगिन मनले तीस-तीस हजार रूपिया के ठगी के मामला आगू आय हे। आज सैकड़ो माईलोगिन मन कलेक्ट्रेट पहुंचके एखर सिकायत करीन हे।