आकाशवाणी ले आज प्रधानमंत्री नरेंद्र मोदी के ‘मन की बात‘ कारीकरम के एक सौ सोलहवां कड़ी के प्रसारण करे गीस। एमा प्रधानमंत्री ह युवा मन ले लेके सियान मन ल साइबर धोखाधड़ी ले बचाय बर आगू आय बर किहीन। ओमन अहमदाबाद के राजीव के उदाहरण देत किहीन कि ओहा लोगन ल डिजीटल अरेस्ट के खतरा के संबंध म बतावत हे। प्रधानमंत्री ह दोहराइन कि कानून म डिजीटल अरेस्ट के कोनो कीसम के प्रावधान नइ हे। ओमन किहीन कि ए बात के उछाह हवय कि हमर युवा साथी लोगन ल ए संबंध म जानकारी दे म भाग लेवत हे। प्रधानमंत्री ह गैर राजनीतिक पृष्ठभूमि के युवा मन ल राजनीति म संघरे के आह्वान करीन। प्रधानमंत्री ह निस्वार्थ भाव ले समाज बर काम करइया युवा मन के संबंध म बात करीन। संगेसंग डिजीटल जीवन प्रमाण पत्र के संबंध म सियान मनखे मनके मदद करइया लखनऊ के विरेन्द्र के प्रशंसा करीन। श्री मोदी ह किहीन कि डिजीटल जीवन प्रमाण पत्र ह सियान मन बर बड़े सुविधा देथे। ओमन किहीन कि अइसन परयास ले डिजीटल जीवन प्रमाण पत्र पवइया लोगन के संख्या अस्सी लाख ले जादा होगे हे।
मन की बात-02
आज राष्ट्रीय कैडेट कोर दिवस म श्री मोदी ह कैडेट के रूप म अपन पाछू दिन ल सुरता करीन। ओमन किहीन कि एनसीसी युवा मन म अनुशासन, अगुवई करे अउ सेवा के भावना पैदा करथे। प्रधानमंत्री ह युवा मन ले जादा ले जादा संख्या म एनसीसी ले जुड़े बर किहीन। प्रधानमंत्री ह किहीन कि दूनिया भर के दर्जनो देस म लाखो भारतीय हे, जिखर पूर्वज मनके अपन-अपन कहानी हे। ओमन लोगन ले ए कहानी ल नमो ऐप या माय जीओवी डॉट इन म साझा करे बर किहीन। प्रधानमंत्री ह किहीन कि ‘एक पेड़ मां के नाम‘ अभियान सिरिफ पांच महिना म सौ करोड़ पेड़ लगाय के उपलब्धि पा लेहे। प्रधानमंत्री ह स्वच्छता के संबंध म किहीन कि सरकारी कार्यालय मन म गजब जुन्ना फाइल अउ कबाड़ हटाय बर बिसेस स्वच्छता अभियान चलाय गीस।
इही बीच, मुख्यमंत्री विष्णुदेव साय ह आज पुलिस मैस रईपुर म पुलिस जवान मन संग ‘मन की बात‘ कारीकरम सुनिन। उहें, भाजपा के प्रदेस अध्यक्ष किरण सिंह देव ह अपन निवास म प्रधानमंत्री के मन की बात कारीकरम ल सुनिन हे।
मुख्यमंत्री-एनसीसी दिवस समारोह
मुख्यमंत्री विष्णुदेव साय आज राजधानी रईपुर के पुलिस परेड ग्राउण्ड म राखेगे छिहत्तरवां एनसीसी दिवस समारोह म संघरीन। समारोह म बोलत मुख्यमंत्री ह किहीन कि एनसीसी युवा मन म राष्ट्र प्रेम अउ अनुशासन के भावना ल जगाथे अउ राष्ट्रीय एकता ल मजबूत करथे। मुख्यमंत्री ह किहीन कि अभी हमर एनसीसी कैडेट मन ल हवई उड़ान के अनुभव अउ प्रसिक्षण रईपुर म दे जात हे, जेखर खरच छत्तीसगढ़ शासन देवत हे। प्रदेस म रईपुर के संगेसंग बिलासपुर, अंबिकापुर, जगदलपुर-जशपुर म घलो हवाई पट्टी हे। ए प्रसिक्षण उंहा घलो सुरू करे जा सकथे। एखर ले इंहा के कैडेट मन ल फायदा होही। समारोह म मुख्यमंत्री ह एनसीसी कैडेट मनले परेड के सलामी लीन। एनसीसी दिवस कारीकरम म कैडेट मन ह मार्च पास्ट अउ सांस्कृतिक कारीकरम प्रस्तुत करे के संगेसंग घुड़संवारी, ऐरो मॉडलिंग जइसन प्रस्तुति दीन। मुख्यमंत्री ह बने प्रदर्सन करइया मन ल इनाम बांटिन।
रेलवे स्टेशन उन्नयन कार्य
अमृत भारत स्टेसन योजना म प्रदेस के बिलासपुर-रईपुर अउ दुरूग रेलवे स्टेसन के बढ़वार अउ आधुनिकीकरण के काम करे जाही। बिलासपुर स्टेसन ल चार सौ पैंतीस करोड़ रूपिया, रईपुर स्टेसन ल चार सौ छप्पन करोड़ अउ दुरूग रेलवे स्टेसन ल चार सौ तिरसठ करोड़ रूपिया के लागत ले बढ़वार करे जाही। ए योजना ले यात्री मन के सुविधा म बढ़वार करना स्टेसन परिसर ल सुघ्घर बनाना, बने सुरक्षा व्यवस्था, साफ-सफाई, प्रतिक्षालय के बने रख-रखाव के संगेसंग हरियाली म बिसेस धियान दे जाही।
मुख्यमंत्री-विकास संघ
मुख्यमंत्री विष्णुदेव साय आज राजधानी रईपुर म राखेगे छत्तीसगढ़ अनुसूचित जनजाति, शासकीय सेवक विकास संघ के सपथ ग्रहण समारोह म सामिल होइन। मुख्यमंत्री ह कारीकरम म बोलत किहीन कि अनुसूचित जनजाति समाज हमर संस्कृति के धरोहर, परंपरा ल आगू बढ़इया हे। संगेसंग ए संघ के नवा बने पदाधिकारी मन ल किहीन कि जनजाति समाज के विकास अउ बढ़वार बर राज्य शासन के परयास के संगेसंग आप सबो झन के सहभागिता जरूरी हे।
जवान घायल
सुकमा जिला म आज माओवादी मन कोति ले लगाय गे बम के चपेट म आय ले एक जवान घायल होगे। खबर के मुताबिक जिला के चिंतलनार थाना क्षेत्र के रायगुड़ा कैम्प ले डीआरजी के जवान सर्चिंंग म निकले रिहीन। इही दौरान रायगुड़ा के जंगल म माओवादी मन कोति ले लगाय गे बम के चपेट म आय ले डीआरजी के जवान पोड़ियाम विनोद घायल होगे। घायल जवान के इलाज चलत हे, जिहां ओखर हालत खतरा ले बाहिर हे। उहें, इही जिला म सर्चिंंग अभियान के दौरान सुरक्षा बल ह चिंतलनार नरसापुरम रद्दा म माओवादी मन कोति ले लगाय गे बम ल बरामद करके ओला निष्क्रिय कर देहे।
मुख्यमंत्री-लोकार्पण
मुख्यमंत्री विष्णुदेव साय ह काली बिलासपुर के रिवर व्यू म बने श्रीराम सेतु रद्दा के लोकार्पण करीन। लेजर सो अउ आतिसबाजी ले श्रीराम सेतु रद्दा के लोकार्पण ल उछाह के संग मनाय गीस। संगेसंग बिलासपुर विकास दीप महोत्सव मनाय गीस। ए बेरा म दस हजार दीया अरपा नंदिया म एक संघरा जलाय गीस। उहें, अरपा के दूनों पुल ल सुघ्घर लाइट ले सजाय गे रिहीस। समारोह म मुख्यमंत्री ह मल्हार महोत्सव ल बिलासपुर म फेर ले सुरू करे अउ ओखर बर बीस लाख रूपिया के बजट के प्रावधान राखे के घोसना करीन। उहें, मुख्यमंत्री ह बिलासपुर के सिटी कोतवाली म उनतीस करोड़ छिहत्तर लाख रूपिया के लागत ले बनाय गे मल्टीलेवल पार्किंग के लोकार्पण करीन। लोगन के सुविधा बर साढ़े तीन एकड़ म कोतवाली थाना परिसर म तीन मंजिला मल्टीलेवल कार पार्किंग बनाय गेहे।
एखर पहिली, मुख्यमंत्री ह काली बिलासपुर म राखेगे सैतालिसवां राउत नाचा महोत्सव म पारंपरिक वेसभूषा म सामिल होइन अउ यादव समाज ल राउत नाचा परब के बधई दीन।
संविधान दिवस-स्मरणोत्सव
भारतीस संविधान के पचहत्तर बछर पूरा होय म छब्बीस नवंबर ले प्रदेस म साल भर ‘हमारा संविधान, हमारा स्वाभिमान‘ के नाव ले मनाय जाही। ए आयोजन चार स्तंभ संविधान के प्रस्तावना, अपन संविधान ल जानन, संविधान के निर्माण अउ संविधान के गौरव बिसय म केंद्रीय रइही। रईपुर म राखेगे मुख्य कारीकरम म राज्यपाल, मुख्यमंत्री, उपमुख्यंमत्री के संगेसंग विधायक अउ आने लोगन कोति ले संविधान के प्रस्तावना के वाचन करे जाही। संविधान दिवस म स्कूल अउ कॉलेज म प्रश्नोत्तरी, वाद-विवाद, भाषण प्रतियोगिता राखे जाही। संगेसंग अनुसूचित जाति, जनजाति गांव म पंद्रह दिवसीय संविधान यात्रा निकाले जाही। यात्रा के बेरा बाबा साहेब के प्रतिमा म फूल माला चढ़ाय जाही। उहें, ग्राम पंचायत मन म ग्रामसभा के आयोजन होही। एमा नागरिक मनके मौलिक कर्तव्य ल पढ़े अउ समझाय जाही। संगेसंग स्वतंत्रता सेनानी मन ल सम्मानित घलो करे जाही।
कारीकरम म केंद्रीय संस्कृति मंत्रालय कोति ले संविधान म बने फिलिम देखाय जाही। रईपुर म राखेगे कारीकरम म संविधान ले जुड़े कला प्रदर्सनी लगाय जाही।
धान-खरीदी
प्रदेस म धान बिसाय के काम चलत हे। राज्य म अभी तक छै लाख छिहत्तर हजार मीट्रिक टन धान बिसाय गेहे। धान बिसाय म एक लाख चौवालिस लाख किसान मन ल बैंक लिंकिंग व्यवस्था ले एक हजार दू सौ अठयासी करोड़ पचपन लाख रूपिया के भुगतान करे गेहे। धान बिसाय के काम इकतीस जनवरी दू हजार पचीस तक चलही।
मुख्यमंत्री-निशा यादव
मुख्यमंत्री विष्णुदेव साय ह काली बिलासपुर म राखेगे एक ठिन कारीकरम म छत्तीसगढ़ के पर्वतारोही निशा यादव ल स्वेच्छानुदान ले मंजूर करे तीन लाख पैंतालिस हजार रूपिया के चेक दीन। ए बेरा म निशा यादव ह मुख्यमंत्री ल बतइन कि ओ ह अफ्रीका महाद्वीप के सबले ऊंची चोटी किलीमंजारो पर्वत ल फतह करना चाहत हे।
मंत्री-दुर्घटना
महिला अउ बाल विकास मंत्री लक्ष्मी राजवाड़े के काफिला के चार गाड़ी आज आपस म टकरा गे। फेर ए हादसा म कोनों ल चोट नइ आय हे। बताय जात हे कि अंबिकापुर-रामानुजगंज राष्ट्रीय राजमार्ग म ग्राम चरगढ़ के तीर ट्रक चालक के लापरवाही के सेती ए हादसा होइस।