सुकमा जिला म आज सुरक्षा बल मन संग होय मुठभेड़ म दस झन माओवादी मारे गेहे। जिला के कोंटा इलाका म माओवादी मनके मौजूदगी के सूचना मिले के बाद केंद्रीय रिजर्व पुलिस बल-सीआरपीएफ अउ डिस्ट्रिक्ट रिजर्व गार्ड- डीआरजी के एक संयुक्त टीम तलासी अभियान बर निकले रिहीस। इही दउरान भेज्जी के जंगल म माओवादी अउ सुरक्षा बल मनके जवान के बीच मुठभेड़ होगे। ए मुठभेड़ म दस माओवादी मारे गेहे। सुरक्षा बल ह घटना स्थल ले मारेगे माओवादी मनके सव बरामद कर लेहे। एखर अलावा मउका ले एक ठिन एके-सैंतालिस अउ एक ठिन सेल्फ लोडिंग राइफल समेत बड़का संख्या म हथियार अउ गोला बारूद बरामद करे गेहे। इलाका म सर्च अभियान अभी घलो जारी हे।
मुख्यमंत्री विष्णुदेव साय ह सुरक्षा बल मनके ए उपलब्धि म खुसी जतात ओखर साहस के बड़ाई करे हे। मुख्यमंत्री ह किहीन कि ओखर सरकार नक्सलवाद के प्रति जीरो टॉलरेंस के नीति उपर काम करत हे। ओमन किहीन कि बस्तर म विकास, सांति अउ नागरिक मनके सुरक्षा सुनिश्चित करना राज्य सरकार के सर्वोच्च प्राथमिकता हरय। मुख्यमंत्री ह किहीन कि केंद्रीय गृहमंत्री अमित शाह ह मार्च बछर दू हजार छब्बीस तक छत्तीसगढ़ ले माओवाद ल खतम करे के लक्ष्य दीन हे। इही दिसा म राज्य सरकार आगू बाढ़त हे।
उहें, उप मुख्यमंत्री अउ गृहमंत्री विजय शर्मा ह घलो ए उपलब्धि बर जवान मन ल बधई दीन। ओमन किहीन कि अब बस्तर क्षेत्र म माओवाद अपन आखिरी चरण म पहुंच चुके हे। उपमुख्यमंत्री ह माओवादी मन ले हिंसा के रस्ता छोड़ के समाज के मुख्य धारा म लहुटे के अपील करीन हे।
रायपुर दक्षिण विधानसभा मतगणना
रईपुर नगर दक्षिण विधानसभा उप चुनाव बर मतगणना काली तेईस नवंबर के सेजबहार स्थित गवर्नमेंट इंजीनियरिंग कॉलेज म होही। मुख्य निर्वाचन पदाधिकारी रीना बाबा साहेब कंगाले ह बतइन कि मतगणना बिहनिया आठ बजे ले पोस्टल बैलेट के गिनती ले सुरू होही, एखर बाद बिहनिया साढ़े आठ बजे ले ईव्हीएम मसीन मन म दर्ज मत के गिनती करे जाही। श्रीमती कंगाले ह बतइन कि मतगणना बर चौदह टेबल लगाय गेहे। ए गणना उन्नीस राउंड म पूरा होही। पोस्टल बैलेट के गणना बर एक ठिन अतिरिक्त टेबल के व्यवस्था करे गेहे। ओमन बतइन कि निर्वाचन बर दू झन सहायक रिटर्निंग अधिकारी अउ मतगणना बर चार झिन अतिरिक्त सहायक रिटर्निंग अधिकारी के नियुक्ति करे गेहे।
मुख्य निर्वाचन पदाधिकारी ह बतइन कि स्ट्रांग रूम ल काली बिहनिया सात बजे जम्मो प्रत्यासी अउ पर्यवेक्षक मन के मौजूदगी म खोले जाही। मतगणना हाल म अभ्यर्थी या अभ्यर्थी मनके मतगणना एजेंट्स ल घलो मौजूद रहे के अनुमति होही। मतगणना हाल म अनाधिकृत मनखे के प्रवेस मना रिही। इलेक्टानिक गेजेट जइसे मोबाइल, आई पैड, लैपटॉप, स्मार्ट वॉच, कैमरा, तम्बाकू गुटखा आदि ले जाना प्रतिबंधित हरय।
बतादन कि रईपुर नगर दक्षिण विधानसभा उप चुनाव म कुल तीस प्रत्यासी मैदान म हे, जेमा मुख्य मुकाबला भारतीय जनता पार्टी के प्रत्यासी सुनील सोनी अउ कांग्रेस के प्रत्यासी आकाश शर्मा के बीच हरय। ए उप चुनाव म करीबन पचास प्रतिसत मतदान दरज करे गेहे।
शैक्षणिक संस्थान-जनजातीय गौरव पखवाड़ा
भगवान बिरसा मुंडा के विरासत ल सुरता करे बर देस भर के सैक्षिक संस्थान मन म जनजातीय गौरव पखवाड़ा मनाय जात हे।
केंद्र सरकार ह राष्ट्रीय बांस मिसन के माध्यम ले आदिवासी परिवार मन बर बांस के कटाई, प्रसंस्करण अउ बिक्री बर नवा रस्ता खोले हे, जेखर ले ओमन ल आय के एक स्थाई स्त्रोत मिले हे। पैंतालिस लाख ले जादा जनजातीय लाभार्थी मन ल वन धन विकास केंद्र ले समर्थन मिले हे, जउन ह ओमन ल वन उपज म मूल्य जोड़े अउ अपन आय बढ़ाय म सक्षम बनाय हे। पीएम किसान के अंतर्गत लगभग एक करोड़ बीस लाख जनजाति किसान मन ल कृषि म निवेस करे अउ ओखर उत्पादकता म सुधार करे बर प्रत्यक्ष वित्तीय सहायता घलो मिले हे। बछर दू हजार चौदह के बाद ले जनजातीय गांव मन ल कई हजार किलो मीटर सड़क ले जोड़े गेहे, जेखर सेति उंहा शिक्षा, स्वास्थ्य अउ व्यापार बर नवा अवसर बने हे।
गुड गवर्नेंस-सम्मेलन
नवा रईपुर म राखेगे ‘‘सुशासन‘‘ बिसय म दू दिन के क्षेत्रीय सम्मेलन के आज समापन होइस। समापन समारोह म केंद्रीय राज्य मंत्री डॉक्टर जितेन्द्र सिंह अउ मुख्यमंत्री विष्णुदेव साय सामिल होइन। सम्मेलन ल संबोधित करत केंद्रीय राज्य मंत्री डॉक्टर जितेंद्र सिंह ह किहीन कि भारत सरकार के प्रशासनिक सुधार अउ सिकायत विभाग देस के वीजन डाक्यूमेंट दू हजार सैंतालिस तियार करही। डॉक्टर सिंह ह किहीन कि पाछू दस साल म प्रशासनिक सुधार बर मोदी सरकार डहार ले कई ठिन कदम उठाय गेहे। ओमन किहीन कि केंद्र सरकार ह लगभग दू हजार कानून खतम कर देहे।
समापन समारोह म मुख्यमंत्री विष्णुदेव साय ह घलो संबोधित करीन। ए मउका म ओमन राज्य म मुख्यमंत्री सुशासन फेलोशिप योजना सुरू करे के घोसना करीन। ए योजना के तहत छत्तीसगढ़ सरकार आईआईएम रईपुर के संग मिलके छत्तीसगढ़ के मूल निवासी छात्र मन बर पब्लिक पॉलिसी एण्ड गुड गर्वर्नेंस म मास्टर डिग्री पाठ्यक्रम सुरू करही। पाठ्यक्रम के पढ़ई के पूरा फीस राज्य सरकार दीही। संघरा छात्र मन ल मासिक स्टायफंड घलो मिलही।
ए मउका म मुख्य सचिव अमिताभ जैन, प्रशासनिक सुधार अउ लोक सिकायत विभाग के अपर सचिव पुनीत यादव अउ देसभर ले आय डेढ़ सौ ले जादा प्रतिनिधि समेत छत्तीसगढ़ के भारतीय प्रशासनिक सेवा के अधिकारी अउ कर्मचारी मौजूद रइही।
मुख्यमंत्री-लोकार्पण
मुख्यमंत्री विष्णुदेव साय काली तेईस नवंबर के बिलासपुर म राखे गे कारीकरम म एक सौ तिरालिस करोड़ रूपिया ले जादा के विकास कार्य के लोकार्पण करही। मुख्यमंत्री ए दउरान सकरी रोड, मिनोचा रोड, स्पोर्ट्स कॉम्पलेक्स, मिनी स्टेडियम, सिटी कोतवाली करा बने मल्टीलेवल पार्किंग अउ अरपा नदी तट म बने राम सेतु मार्ग के लोकार्पण करही। श्री साय ए मउका म लाल बहादुर शास्त्री स्कूल म राउत नाचा महोत्सव म सामिल होही।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ म ए बखत छत्तीसगढ़ की नवा औद्योगिक नीति उपर वाणिज्य अउ उद्योग सचिव रजत कुुमार ले लेगे भेंटवार्ता के प्रसारण करे जाही। ए कारीकरम आकाशवाणी केन्द्र रायपुर ले काली तेईस नवंबर के बिहनिया साढ़े दस बजे ले प्रसारित होही। एला छत्तीसगढ़ स्थित आकाशवाणी के जम्मो केन्द्र रिले करही।
निलंबित
राज्य सरकार के नगरीय प्रशासन विभाग ह रईपुर के तेलीबांधा चौक ले वीआईपी चौक तक करे गे निर्माण कार्य म लापरवाही बरते के आरोप म तत्कालीन चार अधिकारी मन ल निलंबित कर देहे। निलंबित अधिकारी मन उपर आरोप हे कि एमन तेलीबांधा चौक ले वीआईपी चौक के बीच बनाय गे डिवाइडर अउ सौन्दर्यीकरण म नियम के पालन नइ करे हे। निलंबित करे गे अधिकारी मन म नगर निगम के तत्कालीन अधीक्षक अभियंता हेमंत शर्मा, कार्यपालन अभियंता शिबू लाल पटेल सामिल हे। एखर अलावा उप अभियंता प्रभाकर शुक्ला सहायक अभियंता फत्तेलाल साहू ल घलो निलंबित कर दे गेहे।
प्रदेस म उत्तर ले ठंडा अउ सुष्क हवा के अवई सरलग जारी हे। एखर असर ले राजधानी रईपुर म न्यूनतम तापमान पंद्रह डिग्री सेल्सियस पहुंच गेहे। सामरी, मैनपाट अउ बलरामपुर म न्यूनतम तापमान छै ले आठ डिग्री सेल्सियस रिकार्ड करे गेहे। उहें, दुरूग जिला के न्यूनतम तापमान बारह दसमलव नौ डिग्रीस सेल्सियस रिहीस। पूरा प्रदेस म जाड़ के असर महसूस करे जात हे। मौसम विभाग के अनुसार अवइया दू-तीन दिन तक सरगुजा संभाग के एक-दू जिला मन म सीत लहर जइसे स्थिति बने रहे के संभावना हे। उहें, छब्बीस नवंबर ले छत्तीसगढ़ म न्यूनतम तापमान बाढ़े संभावना हे।