नवा रईपुर म आज ले ‘‘गुड गवर्नेंस‘‘ बिसय म दू दिन के क्षेत्रीय सम्मेलन के सुरूआत होइस। वित्त मंत्री ओपी चौधरी ह ए सम्मेलन के उद्घाटन करीन। ए सम्मेलन म देस भर ले डेढ़ सौ प्रतिनिधि मनके संग छत्तीसगढ़ के भारतीय प्रशासनिक सेवा के अधिकारी सामिल होवत हे।
कारीकरम ल संबोधित करत श्री चौधरी ह किहीन कि गुड गवर्नेंस देस के विकास बर प्रमुख घटक हे। ब्यूरोक्रेट्स देस के विकास म प्रमुख भूमिका निभावत हे। वित्त मंत्री ह ब्यूरोक्रेसी म रेड टैपिस्म ल खतम करे के बात किहीन अउ एमा सुधार उपर बल दीन।
आकाशवाणी समाचार ले गोठबात करत प्रशासनिक सुधार अउ लोक सिकइत विभाग के अतिरिक्त सचिव पुनीत यादव ह बतइन कि ए सम्मेलन म गुड गवर्नेंस ले संबंधित बिसय म विचार-विमर्स करे जात हे।
दू दिन के क्षेत्रीय सम्मेलन के समापन काली होही, जेमा मुख्यमंत्री विष्णुदेव साय अउ केंद्रीय कार्मिक, लोक सिकायत अउ पेंसन मंत्रालय के राज्य मंत्री डॉक्टर जितेन्द्र सिंह सामिल होही।
हाईकोर्ट-सड़क
छत्तीसगढ़ उच्च न्यायालय म आज प्रदेस के खराब सड़क म दायर जनहित याचिका उपर सुनवाई होइस। सुनवाई के दउरान कोर्ट ह प्रदेस के खराब सड़क अउ सड़क हादसा ल लेके राज्य सरकार ले अट्ठाईस जिला के रिपोर्ट मांगे हे। कोर्ट ह एखर बर सरकार ल सत्रह दिसंबर तक के समय देहे। प्रदेस म सड़क के स्थिति ल लेके मुख्य न्यायाधीश के डिवीजन बेंच म आज सुनवाई होइस। बेंच ह राष्ट्रीय राजमार्ग के पैच रिपेयरिंग बर नाराजगी जाहिर करत हुए किहीन कि भारी यातायात के बावजूद टोल के जरिया ले राजस्व तो पाय जात हे, फेर ए सड़क म मरम्मत म लापरवाही बरते जावत हे। सुनवाई के दउरान सड़क म आवारा मवेसी के जमाव अउ उंखर दुर्घटना म मउत के मामला म घलो चर्चा होइस।
भारत अंतर्राष्ट्रीय व्यापार मेला
नई दिल्ली के प्रगति मैदान म तिरालीसवां भारत अंतर्राष्ट्रीय व्यापार मेला के आयोजन करे जात हे। मेला स्थल म काली मुख्यमंत्री विष्णुदेव साय ह छत्तीसगढ़ राज्स दिवस समारोह के सुभारंभ करीन। समारोह म छत्तीसगढ़ के लोक कलाकार मन ह गौरा-गौरी, भोजली, राउत नाचा, सुआ अउ पंथी जइसन पारंपरिक लोकनाचा के प्रस्तुति दीन।
अपन संबोधन म मुख्यमंत्री ह किहीन कि छत्तीसगढ़ अब ‘‘सशक्त भारत‘‘ बनाय म जरूरी भूमिका निभावत हे। राज्य म बुनियादी ढांचा के विकास, कृषि म नवाचार अउ उद्योग ल बढ़ावा देबर सरकार डहार ले कतकोन प्रभावी कदम उठाय गेहे। ए बेरा म मुख्यमंत्री ह छत्तीसगढ़ पवेलियन म स्टाल मन के भ्रमण करके कलाकार मन ल प्रोत्साहित करीन।
सीबीएसई-परीक्षा तिथि
केंद्रीय माध्यमिक शिक्षा बोर्ड-सीबीएसई ह दसवीं अउ बारहवीं बोर्ड परीक्षा के तारीख के घोसना कर देहे। बोर्ड परीक्षा पंद्रह फरवरी ले सुरू होही। दसवीं के परीक्षा अट्ठारा मार्च के अउ बारहवीं के परीक्षा चार अप्रैल के खतम होही। छात्र मन ए परीक्षा के समय-सारिणी सीबीएसई के वेबसाइट म जाके देख सकत हे।
प्रसार भारती-वेव्स
राष्ट्रीय लोक प्रसारक प्रसार भारती ह अपन ओटीटी प्लेटफार्म ‘वेव्स‘ लॉन्च कर देहे। गोवा म पचपनवां भारतीय अंतर्राष्ट्रीय फिलीम महोत्सव-इफ्फी के उद्घाटन समारोह म एखर अनावरण करे गीस। डिजीटल स्ट्रीमिंग सेवा के बढ़त मांग ल पूरा करे के संग वेव्स के उद्देस्य आधुनिक डिजीटल रूप म पाछू के याद ल ताजा करना हे। ए बेरा म प्रसार भारती के अध्यक्ष नवनीत कुमार सहगल ह किहीन कि वेव्स ह आने ओटीटी प्लेटफार्म के तुलना म अनूठा हे।
सतीश चंद्र वर्मा-याचिका खारिज
कथित नागरिक आपूर्ति निगम-नान घोटाला मामला म पूर्व महाधिवक्ता सतीश चंद्र वर्मा के अग्रिम जमानत याचिका रईपुर के बिसेस अदालत ह खारिज कर देहे। ए मामला के सुनवाई के बाद एडीजे निधि वर्मा ह ओखर जमानत याचिका खारिज कर देहे। ईओडब्ल्यू ह बछर दू हजार पंद्रह म पूर्व आईएएस अनिल टूटेजा अउ आलोक शुक्ला के संगेसंग पूर्व महाधिवक्ता सतीश चंद्र वर्मा के खिलाफ मामला दर्ज करे गे रिहीस। ए मामला म बछर दू हजार उन्नीस म ईडी ह घलो केस दर्ज करे हे।
एकलव्य आदर्श विद्यालय-खेल प्रतियोगिता
छत्तीसगढ़ ए दरी एकलव्य आदर्श आवासीय विद्यालय के राष्ट्रीय खेल मनके मेजबानी करही। ए प्रतियोगिता चौदह ले बीस दिसंबर तक आयोजन करे जाही। प्रतियोगिता म पंद्रह एकल अउ युगल के संग सात सामूहिक खेल के आयोजन करे जाही, जेमा पच्चीस राज्य के छै हजार ले जादा खिलाड़ी मनके भाग लेके संभावना हे। आदिम जाति विकास विभाग के प्रमुख सचिव सोनमणि बोरा ह आज नवा रईपुर म कोआर्डिनेसन कमेटी के बइठका लेके प्रतियोगिता के तियारी के समीक्षा करीन।
उहें, गोवा म पंद्रह ले सत्रह नवंबर तक होवइया एशियन थाई बॉक्सिंग चैम्यिनशिप म स्वर्ण अउ रजत पदक जीत के कोरबा लहुटे खिलाड़ी मन ह श्रम मंत्री लखनलाल देवांगन ले मुलाकात करीन। प्रतियोगिता म कोरबा के हार्दिक दूरेजा, विशाल कुमार साहू ह स्वर्ण पदक अउ मुस्कान जायसवाल ह रजत पदक जीते हे। ए प्रतियोगिता म भारत, नेपाल, भूटान, बांग्लादेस, श्रीलंका, कंबोडिया, वियतनाम के संग आने देस मनके तीन सौ खिलाड़ी सामिल होइन।
माओवादी मुठभेड़
सुकमा जिला के एर्राबोर के सीमा म नदी पार करके ओडिसा ले छत्तीसगढ़ दाखिल होवत माओवादी मनले जवान मनके मुठभेड़ होगिस। ए मुठभेड़ म ओडिसा पुलिस के एक जवान घायल होय हे। जानबा के मुताबिक आज बिहनिया ओडिसा पुलिस के जवान मनके संग माओवादी मनके मुठभेड़ होइस, जेखर बाद ओडिसा ले छत्तीसगढ़ डहार माओवादी मनके नदी पार करके आय के सूचना म छत्तीसगढ़ ले सुरक्षाबल के जवान सर्चिंग म निकलिस। इही दउरान मल्कानगिरी जिला के जिनेलगुड़ा गांव तीर शबरी नदी के किनारे माओवादी मनले जवान मनके मुठभेड़ होगे।
गांजा तस्करी-सिपाही बर्खास्त
पाछू गांजा तस्करी के आरोप म गिरफ्तार जीआरपी के चार सिपाही मन ल छत्तीसगढ़ रेलवे पुलिस ह बर्खास्त कर देहे। जानबा के मुताबिक गांजा के तस्करी के खुलासा के बाद पुलिस ह ए चार जवान मन ल गिरफ्तार करे रिहीस। तस्करी बर ए जवान मन ह अपन रिस्तेदार मनके नाम म पैंतालिस बैंक खाता खोले रिहीस, जेमा करीब पंद्रह करोड़ रूपिया के लेनदेन के घलो पता चले हे।
हाथी-उत्पात
कोरिया जिला म बैकुंठपुर वनमंडल के कतकोन गांव म ग्यारा हाथी मनके दल ह किसान मनके फसल ल नुकसान पहुंचाय हे। जानबा के मुताबिक मेको, सरई गहना, सलवा अउ बकिरा गांव ले हाथी मनल वन विभाग अमला ह खदेड़ देहे, जेखर बाद हाथी मनके दल कांदाबाड़ी के जंगल म देखे गेहे। वन मंडलाधिकारी प्रभाकर खलको ह लोगन ल हाथी मन ले दूर रहे के सलाह देहे। संगेसंग हाथी मनके आगू फटाखा नइ फोड़े अउ पत्थर न फेंके के समझाईस घलो देहे।
उहें, रायगढ़ जिला म छाल वन परिक्षेत्र के हाटी गांव म तालाब तीर हाथी के सावक के सव मिले हे। सावक के उमर तीन ले चार महिना के बताय जात हे। वन विभाग के टीम मामला के जांच म जुट गेहे।
मोहला मानपुर-ठगी
ऑनलाइन ठगी करके लोगन मनके बैंक खाता ले पइसा चुराने वाला झारखंड के दू ठग मन ल मोहला-मानपुर पुलिस ह झारखंड ले गिरफ्तार करे हें ए ठग मन ह पाछू तीस अक्टूबर के मोहला ब्लॉक के गोटाटोला निवासी एक माईलोगन के मोबाइल हैक करके दू लाख नब्बे हजार रूपिया के ऑनलाइन ठगी करिस। पीड़ित माईलोगन एखर सिकायत मोहला-मानपुर थाना म दर्ज कराइस, ेजेखर बाद पुलिस ह झारखंड के देवघर ले आरोपी मन ल गिरफ्तार करीन। इंखर मन तीर धोखाधड़ी म उपयोग करेगे तीन मोबाइल अउ सिमकार्ड जब्त करे गेहे। पुलिस ह दूनो आरोपी मन ल जेल भेज देहे।
अउ अब मौसम के हाल…
उत्तर ले आवत ठंडा अउ सुष्क हवा के सेति सरगुजा संभाग के एक-दू जिला म सीतलहर जइसन स्थिति बने के संभावना हे। संगेसंग वातावरण के मध्य स्तर म नमी आवत हे। जेखर कारण न्यूनतम तापमान म बिसेस परिवर्तन होय के संभावना नइ हे। मौसम विभाग के अनुसार पच्चीस नवंबर ले दक्षिण छत्तीसगढ़ म न्यूनतम तापमान म वृध्दि हो सकत हे।