जल शक्ति अभियान
केन्द्रीय जल शक्ति मंत्रालय ह विश्व शौचालय दिवस के मउका म आज ‘‘हमारा सौचालय : हमारा सम्मान‘‘ नाम के तीन हफ्ता तक चलइया अभियान सुरू करीन। ए अभियान के उद्देश्य स्वच्छता के बुनियादी ढांचा म सुधार, व्यवहार परिवर्तन ल बढ़ावा देना अउ देशभर म सौचालय के कार्यक्षमता अउ रखरखाव ल बढ़ाकर सामुदायिक गौरव ल मजबूत करना हे। अभियान के दउरान प्रतियोगिता राखे जाही अउ नागरिक मन ल सोशल मीडिया प्लेटफॉर्म के माध्यम ले अपन स्वच्छता सफलता के कहानी साझा करे बर प्रोत्साहित करे जाही। एखर समापन अवइया महीना के दस तारीख के होही, जेला राष्ट्रीय मानवाधिकार दिवस के रूप मनाय जाथे।
छत्तीसगढ़ म घलो ए अभियान के सुरूवात होगे हे। उपमुख्यमंत्री विजय शर्मा ह आज रायपुर ले वीडियो कॉन्फ्रेंस के माध्यम ले ‘‘हमारा सौचालय-हमारा सम्मान‘‘ अभियान के सुभारंभ करीन।
गौरेला-पेण्ड्रा-मरवाही जिला के कलेक्टोरेट परिसर म रखे गे कार्यक्रम स्वच्छ भारत मिशन-ग्रामीण के तहत जिला म व्यक्तिगत सौचालय निर्माण बर पांच सौ तिरासी हितग्राही मन ल स्वीकृति पत्र दे गीस।
मुख्यमंत्री-बस्तर
मुख्यमंत्री विष्णुदेव साय ह अपन बस्तर प्रवास के दउरान काली रतिहा केन्द्रीय रिजर्व पुलिस बल-सीआरपीएफ के सेडवा कैंप म जवान मन ले भेंट करके रात्रि विश्राम करीन। मुख्यमंत्री के अचानके सीआरपीएफ कैम्प म पहुंचे ले जवान मन ह उंखर जोरसोर ले स्वागत करीन। ए मउका म मुख्यमंत्री ह जवान मन ल किहीन कि पाछु ग्यारह महीना के दउरान आप मन ह जउन माओवादी मनके खिलाफ सफलता हासिल करे हव, ओखर पूरा देस म बड़ई होवत हे। श्री साय ह किहीन कि राज्य सरकार ह बछर दू हजार छब्बीस तक बस्तर ले माओवाद खतम करे के संकल्प लेहे।
एखर पहिली, मुख्यमंत्री ह सीआरपीएफ बस्तरिया बटालियन के परिसर म ‘‘एक पेड़ मां के नाम‘‘ अभियान के तहत नीम के पौधा लगईन।
उहें, मुख्यमंत्री ह परिवार के संग दंतेवाड़ा स्थित मां दंतेश्वरी मंदिर पहुंचीन अउ पूजापाठ करके प्रदेसवासी मनके सुख-समृद्धि अउ खुसहाली के कामना करीन।
राष्ट्रीय ज्ञान कार्यशाला-तोखन साहू
उत्तरप्रदेश के लखनऊ म आयोजित दू दिवसीय राष्ट्रीय ज्ञान कार्यशाला म केन्द्रीय आवास अउ शहरी मामला के राज्यमंत्री तोखन साहू सामिल होइन। कार्यशाला ल संबोधित करत केन्द्रीय राज्यमंत्री ह किहीन कि चार हजार ले जादा सहर मन ल ओडीएफ प्लस के दर्जा मिले हे। उहें, पन्द्रह सौ ले जादा सहर मन ल ओडीएफ प्लस-प्लस के दर्जा घलो मिले हे। ए दउरान केन्द्रीय राज्यमंत्री ह जम्मों राज्य मन ले ए स्वच्छता अभियान म सामिल होय के आह्वान करीन।
अरूण साव-बीजापुर
उपमुख्यमंत्री अरूण साव ह आज बीजापुर जिला के प्रवास के दउरान लोक निर्माण विभाग के काम के जायजा लीन। ओमन नेलसनार ले गंगालूर रद्दा निर्माण के गुणवत्ता अउ फूंडरी इंद्रावती ब्रिज निर्माण म देरी ल लेके नाराजगी घलो जतईन। ओमन इंद्रावती नदी म बीजापुर ले अबूझमाड़ होवत नारायणपुर ल जोड़इया बनत पुल के काम ल जल्दी पूरा करे के निरदेस दीन। एखर बाद ओमन भैरमगढ़ के एकलव्य आदर्श विद्यालय म छात्र मन ले भेंट करीन। श्री साव ह गारमेंट फैक्ट्री अउ ज्ञानगुड़ी के निरीक्षण के संगेसंग बीजापुर म चलत बस्तर ओलंपिक के सुभारंभ करीन।
अपन प्रवास के दउरान श्री साव ह फुंडरी कैम्प म केन्द्रीय रिजर्व पुलिस बल-सीआरपीएफ के जवान मन ले भेंट घलो करीन।
सलाहकार बोर्ड-पुनर्गठन
राज्य सरकार ह गृह विभाग के सलाहकार बोर्ड के पुनर्गठन कर देहे। छत्तीसगढ़ उच्च न्यायालय के न्यायाधीश नरेन्द्र कुमार व्यास ल बोर्ड के अध्यक्ष नियुक्त करे गेहे। ए बोर्ड म दू सेवानिवृत्त न्यायाधीश – नवल किशोर अग्रवाल अउ विमला सिंह कपूर ल सदस्य बनाय गेहे। बोर्ड के गठन ल लेके छत्तीसगढ़ राजपत्र म अधिसूचना जारी कर दे गेहे।
पीएससी घोटाला
राज्य लोक सेवा आयोग-पीएससी भर्ती घोटाला मामला म सीबीआई ह तत्कालीन चेयरमैन टामन सिंह सोनवानी अउ उघोगपति श्रवण कुमार गोयल ल गिरफ्तार करके आज रायपुर के विशेष अदालत म पेस करीन। विशेष कोर्ट के न्यायाधीश लीलाधर यादव ह दूनों आरोपी मन ल सात दिन के रिमांड म सीबीआई ल सौंपे के आदेस देहे।
एखर पहिली, काली पीएससी के पूर्व चेयरमैन टामन सिंह सोनवानी अउ उद्योगपति श्रवण कुमार गोयल के गिरफ्तारी के बाद सीबीआई ह विज्ञप्ति जारी करीन। जारी विज्ञप्ति के मुताबिक ए दूनों के गिरफ्तारी पीएससी भर्ती परीक्षा म चयन बर पैंतालीस लाख रूपिया के रिश्वत लेके के आरोप म होय हे।
खबर के मुताबिक पीएससी भर्ती परीक्षा म होय गड़बड़ी के मामला म राज्य म दू ठिन एफआईआर दर्ज करे रिहीस। एमा ले एक सिकायत के आधार म ईओडब्ल्यू-एसीबी ह दर्ज करे रिहीस। दूसर बालोद जिला म एक अभ्यर्थी ह दर्ज कराय रिहीस। ए दूनों एफआईआर सीबीआई ल ट्रांसफर करे गेहे।
गुरू घासीदास तमोर पिंगला-टाईगर रिजर्व
बाघ मनके संरक्षण अउ संवर्धन बर छत्तीसगढ़ के गुरू घासीदास तमोर पिंगला ल छप्पनवां टाइगर रिजर्व के रूप म अधिसूचित करे गेहे। ए टाइगर रिजर्व दू हजार आठ सौ उनतीस वर्ग किलोमीटर क्षेत्र म फइले हे। राज्य सरकार ह राष्ट्रीय बाघ संरक्षण प्राधिकरण-एनटीसीए के सलाह म मनेन्द्रगढ़-चिरमिरी-भरतपुर, कोरिया, सूरजपुर अउ बलरामपुर जिला मन म गुरू घासीदास-तमोर पिंगला टाइगर रिजर्व ल अधिसूचित करे हे। ए टाइगर रिजर्व दू हजार उनचास वर्ग किलोमीटर के कोर टाइगर हैबिटेट हे, जेमा गुरू घासीदास राष्ट्रीय उद्यान अउ तमोर पिंगला वन्यजीव अभ्यारण्य सामिल हे। एखर बफर क्षेत्र सात सौ अस्सी वर्ग किलोमीटर के हे। ए ह देस के तीसर सबले बड़े टाइगर रिजर्व बनाथे।
जीआरपी-गांजा तस्करी
पाछु दिन पुलिस ह गांजा के तस्करी करत सासकीय रेलवे पुलिस-जीआरपी के चार झिन जवान मन ल गिरफ्तार करे रिहीन। जांच म ए जवान मनके पैंतालीस बेनामी खाता घलो पाय गे रिहीस, जेला ओमन अपन रिश्तेदार के नाम ले खोलाय रिहीस। ए खाता म करीबन पन्द्रह करोड़ रूपिया के लेनदेन के पता चले हे, जउन ल गांजा तस्कर मन ह ट्रांसफर करे रिहीन। खबर के मुताबिक ए जवान मनके भूमिका पाछु पांच साल ले ओडिसा, कोलकाता, झारखंड अउ महाराष्ट्र तक गांजा के सप्लाई म रिहीस। ए मामला के गंभीरता ल देखत डीजीपी अशोक जुनेजा ह बिलासपुर एसपी रजनेश सिंह ल जांच के जिम्मा सौंपे हे।
अग्निवीर भर्ती-शारीरिक दक्षता परीक्षा
भारतीय थल सेना म अग्निवीर भर्ती बर सारीरिक दक्षता परीक्षा चार ले बारह दिसंबर तक रायगढ़ म राखे जाही। सेना भर्ती कार्यालय रायपुर ले मिले खबर के मुताबिक जनरल ड्यूटी पद बर दू सौ तैंतीस आवेदक मन बर पांच दिसंबर के सारीरिक दक्षता परीक्षा आयोजित करे जाही। उहें, ग्यारह दिसंबर के अग्निवीर टेक्निकल अउ ट्रेड्समेन के पद बर पन्द्रह आवेदक मनके सारीरिक दक्षता परीक्षा होही। जादा जानकारी बर जिला पंचायत सैनिक कल्याण बोर्ड के मोबाइल नंबर – नौ छह नौ एक तीन-तीन तीन एक शून्य चार म संपर्क करे सकत हे।
सक्ती ठगी
सक्ती जिला म एक युवती ले भिलाई स्टील प्लांट म नौकरी लगाय के नाम म करीबन पन्द्रह लाख रूपिया के धोखाधड़ी करे गेहे। ए मामला म पति-पत्नी रूबेन जेकाब मसीह अउ गायत्री चौहान के खिलाफ केस दर्ज करे गेहे। पुलिस के मुताबिक सक्ती निवासी किशन शर्मा ह रिपोर्ट दर्ज कराय हे कि उंखर बेटी नेहा शर्मा के भिलाई स्टील प्लांट म असिस्टेंट एचआर के पद म नौकरी लगाय के नाम म आरोपी मन ह अलग-अलग किस्त म पन्द्रह लाख रूपिया ले लीन अउ ओमन फर्जी जॉइनिंग लेटर घलो दीन। एक साल तक नौकरी नइ लगाय म जब पीड़ित ह अपन पइसा वापिस मांगीन त आरोपी मन ह सिरिफ तीन लाख पंचानवे हजार रूपिया वापस करीन। बाकी रकम ल नइ लहुटईस।
अउ अब मौसम के हाल….
प्रदेस म उत्तर ले ठंडा अउ शुष्क हवा सरलग आवत हे। मौसम विभाग के मुताबिक ए हवा के असर ले प्रदेस के न्यूनतम तापमान म लगातार गिरावट बने रेहे के संभावना हे। काली प्रदेस म मौसम शुष्क रइही।