ए नियम ले आमजन ल न्यायिक प्रकरण म घलो संपत्ति के वास्तविक मूल्य मिल जाही। यदि कभू संपत्ति म कोई धोखाधड़ी पाय गीस त, व्यक्ति, विक्रेता ले उही मुहावजा पाय के हकदार होही, जउन ह रजिस्ट्री पेपर म लिखे होही।
संपत्ति के सही मुल्य रजिस्ट्री म अंकित होय ले, प्रभावित व्यक्ति ल उंखर सही मुआवजा प्राप्त हो पाही।
शासकीय सेवक-आय सीमा
वित्त विभाग ह शासकीय सेवक मन उपर आश्रित मनके अधिकतम आय सीमा म वृध्दि के प्रस्ताव ल मंजूरी दे देहे। अब शासकीय सेवक मन उपर आश्रित मन बर आय के अधिकतम सीमा तीन हजार पचास रूपिया प्रतिमाह ले बढ़ाके सात हजार सात सौ पचास रूपिया प्रतिमाह कर देहे।
बतादन की बछर दू हजार चौदह के बाद ले शासकीय सेवक मन उपर आश्रित मन बर आय के अधिकतम सीमा म कोई वृध्दि नही करे गे रिहीस, फेर राज्य म श्रमिक मनके आय म लगातार वृध्दि होवत रेहे हे। अइसे म शासकीय सेवक मन उपर आश्रित परिवार मन ल पेंसन के लाभ नही मिल पावत रिहीस। अब आय सीमा म बढ़े के संगेसंग जेन आश्रित मनके आय तीन हजार पचास रूपिया ले जादा रिहीस, वो सबो परिवार पेंसन के लाभ पाय के पात्र हो सकही।
धुड़मारास गांव-पर्यटन गांव
संयुक्त राष्ट्र विश्व पर्यटन संगठन डहार ले बस्तर जिला के धुड़मारास गांव के चयन सर्वश्रेष्ठ पर्यटन गांव के उन्नयन बर करे गेहे। संयुक्त राष्ट्र के पर्यटन ग्राम उन्नयन कारीकरम बर साठ ठन देस ले बीस ठन गांव के चयन करे गेहे, जेमा धुड़मारास घलो सामिल हे।
मुख्यमंत्री विष्णुदेव साय ह ए उपलब्धि बर पर्यटन विभाग के टीम के संगेसंग बस्तर जिला प्रशासन अउ कांगेरघाटी राष्ट्रीय उद्यान के अधिकारी अउ करमचारी मन ल बधाई देहे। मुख्यमंत्री ह किहीन हे कि धुड़मारास प्राकृतिक सौंदर्य, सांस्कृतिक विविधता अउ अपन परंपरा बर प्रसिध्द हे। बस्तर के आदिवासी जीवन सैली, पारंपरिक व्यंजन, हरियाली अउ जैव विविधता ले समृध्द ए गांव पर्यटक मन बर आकर्षक ही नही बल्कि रोमांचक जघा घलो हे।
बतादन कि धुड़मारास अउ चित्रकोट गांव ल ए बछर सत्ताईस सितंबर के विश्व पर्यटन दिवस के अवसर म भारत सरकार के पर्यटन मंत्रालय डहार ले सर्वश्रेष्ठ पर्यटन गांव के पुरस्कार मिले रिहीस।
मुख्यमंत्री-रितिका धु्रव
मुख्यमंत्री विष्णुदेव साय ह धमतरी निवासी बैडमिंटन खिलाड़ी रितिका धु्रव ले वीडियो काल म बातचीत कर उंखर हौसला बढ़ाइन। मुख्यमंत्री ह रितिका ल बैडमिंटन खेले बर हर संभव मदद के आस्वासन देहे। रितिका ह मुख्यमंत्री ल बतइन कि उंखर पिता ह मजदूर हे, अउ माता आंगनबाड़ी सहायिका हे। ओला बचपन ले ही बैडमिंटन के खेल म रूचि रेहे हे। रितिका ह बतइस कि ओहा बैंगलुरू म खेलो इंडिया यूनिवर्सिटी लेवल गेम्स अउ हाल ही म ओडिसा म नेसनल टूर्नामेंट म हिस्सा ले रिहीस। ओहा आगे राष्ट्रीय अउ अंतर्राष्ट्रीय स्तर म खेलना चाहथे अउ ओलंपिक म मेडल जीत के देस के नाम रोसन करना चाहथे।
ट्रेन-रद्द
नौरोजाबाद म तिसरइया लाइन जोड़े के काम चले के सेति छत्तीसगढ़ ले जवइया पचीस ठन ट्रेन ल रद्द कर दे गेहेे। संगेसंग दू ठन ट्रेन के रूट लाइन ल बदल दे गेहे। मध्य प्रदेस अउ उत्तर प्रदेस बर चलइया अउ छत्तीसगढ़ ले घलो गुजरइया लगभग चौबीस ठन ट्रेन अभी रद्द रहइी। ए सबो ट्रेन इक्कीस नवंबर ले दू दिसंबर तक अलग-अलग दिन म कैंसिल रहइी। एमा सोलह ठन एक्सप्रेस अउ नौ ठन लोकल ट्रेन सामिल हे।
राष्ट्रीय परख सर्वेक्षण
स्कूल शिक्षा विभाग के सचिव सिध्दार्थ कोमल सिंह परदेसी ह प्रदेस के स्कूल मन म राष्ट्रीय परख सर्वेक्षण के मद्देनजर स्कूल मनके दक्षता बढ़ाय बर तैयारी करे के निरदेस देहे।
बतादन कि आगामी चार दिसंबर ले केंद्रीय स्कूल शिक्षा मंत्रालय डहार ले छत्तीसगढ़ के अलग-अलग स्कूल मन म विद्यार्थी मनके दक्षता के परीक्षण करे जाही, जेखर तहत कक्षा तीसरीं, छठवीं अउ नवमीं के विद्यार्थी मनके दक्षता के राष्ट्रीय सर्वेक्षण होही।
धान खरीदी-बिचौलिया
छत्तीसगढ़ म सबो धान खरीदी केंद्र म बायोमेट्रिक मसीन लगाय गेहे। राज्य के सीमावर्ती जिला मन म एंट्री, एग्जिट प्वाइंट म स्थाई अउ अस्थाई नाका घलो बनाय गेहे, जेखर ले बिचौलिया अउ कोचिया मन अपन धान सीमावर्ती राज्य ले लाके झन बेच सकय। एखर अलावा कई ठन नोडल अउ उड़नदस्त टीम घलो बनाय गेहे। जउन मन लगातार सबो केंद्र के निगरानी करही। खाद्य विभाग के सचिव अनबलगन पी ह प्रदेस के किसान मन ले ए बिचौलिया मनले बचके रेहे के अपील करे हे।
बतादन कि इकतीस सौ रूपिया म धान खरीदी होय के सेति सीमावर्ती जिला म पड़ोसी राज्य ले लाके बिचौलिया मन प्रदेस म धान बेचे के कोसिस करत हे।
श्रमिक सम्मेलन
कोरबा जिला के प्रियदर्शिनी इंदिरा गांधी स्टेडियम म काली प्रदेस स्तरीय श्रमिक सम्मेलन के आयोजन करे गीस। वाणिज्य उद्योग अउ श्रममंत्री लखनलाल देवांगन ह ए सम्मेलन के सुभारंभ करीन। सम्मेलन म सत्रह अलग-अलग योजना के पचीस हजार ले जादा श्रमिक मन ल छियालिस करोड़ साठ लाख रूपिया ले जादा के रासि उंखर बैंक खाता म अंतरित करे गीस। ए रासि छत्तीसगढ़ भवन अउ दूसर सन्निर्माण कर्मकार कल्याण मंडल, असंगठित कर्मकार राज्य सामाजिक सुरक्षा मंडल अउ श्रम कल्याण मंडल के अंतर्गत काम करइया श्रमिक मन ल जारी करे गीस।
कारीकरम ल संबोधित करत हुए श्रम मंत्री ह किहीन कि प्रदेस सरकार डहार ले विश्वकर्मा जयंती के अवसर म अलग-अलग योजना के तहत दू सौ पैंतीस करोड़ रूपिया के सहायता रासि श्रमिक मन ल प्रदान करे जा चुके हे। श्रम मंत्री ह किहीन कि श्रमिक मन ल डीबीटी के माध्यम ले अलग-अलग योजना के तहत सहायता रासि भेज दे गेहे। जेखर सीधा लाभ श्रमिक अउ उंखर परिवार के सदस्य मन ल मिलही। श्रम मंत्री ह बतइन कि श्रमिक मन के समस्या सिकायत के समाधान अउ सहायता बर श्रमेव जयते पोर्टल सुरू करे गेहे, जेमा श्रमिक मन अपन समस्या बता सकत हे, अउ समाधान पा सकत हे।
अउ अब थोरकुन समाचार सार म –
– मुख्यमंत्री अउ बस्तर क्षेत्र आदिवासी विकास प्राधिकरण के अध्यक्ष विष्णुदेव साय के अध्यक्षता म प्राधिकरण के बइठका काली अट्ठारा नवंबर के चित्रकोट म आयोजित करे जाही।
– कोरबा जिला के प्रभारी सचिव अलरमेल मंगई डी ह काली जिला के अधिकारी मनके बइठका लीन। ओमन श्रमिक मन ल श्रम विभाग के योजना मन ले लाभान्वित करे बर सिविर लगाय के निरदेस दीन।
– बिलासपुर के सिम्स मेडिकल कालेज के अस्पताल के हॉस्टल म महिला डॉक्टर ह फांसी लगाके खुदखुसी कर लेहे। ए महिला डॉक्टर अंबिकापुर जिला के सुखरी स्थित प्राथमिक स्वास्थ्य केंद्र म पदस्थ रिहीन।
– कबीरधाम जिला के चिल्फी पुलिस ह जांच के दौरान संदिग्ध वाहन ले तीस-तीस लाख रूपिया ले जादा के नगदी बरामद करे हे।