केंद्रीय युवा मामला खेल, श्रम अउ रोजगार मंत्री डॉ. मनसुख मांडविया ह काली जशपुर म जनजातीय गौरव दिवस के मउका म भगवान बिरसा मुंडा ‘माटी के वीर‘ पदयात्रा म सामिल होही। ए कारीकरम म माय भारत युवा स्वयंसेवक मन सामिल होही। मुख्यमंत्री विष्णुदेव साय के संगेसंग राज्य के कतकोन मंत्री मन घलो पदयात्रा म भाग लिही। पदयात्रा के सुरूआत प्रधानमंत्री श्री नरेंद्र मोदी के ‘एक पेड़ मां के नाम‘ एला सुरता करके पउधा रोपही। ए कारीकरम भगवान बिरसा मुंडा के जयंती के मउका म करे जात हे। एखर उद्देस्य देस के विकास म जन-जातीय समुदाय मनके योगदान ल आगू लाना हे।
एखर पहिली आज जशपुर जिला म आज योगाभ्यास अउ स्वच्छता श्रमदान के आयोजन करे गीस। ए कारीकरम म अधिकारी-करमचारी के संग माय भारत युवा स्वयंसेवक, छात्र अउ इंहा के लोगन मन भाग लीन। ‘माटी के वीर‘ पदयात्रा के तियारी ल लेके कलेक्टर रोहित व्यास ह बतइन कि योगाभ्यास अउ स्वच्छता श्रमदान के संग आज ले दू दिन के ए कारीकरम सुरू होगे।
ए पदयात्रा बालाछापर गांव ले सुरू होही अउ करीबन सात किलोमीटर के पदयात्रा करे के बाद रणजीता स्टेडियम म सिराही। पदयात्रा के दउरान प्रदर्सनी वाले जघा म ऐतिहासिक आदिवासी आंदोलन के बारे म जानबा दे जाही। संगेसंग आदिवासी नायक मन ल श्रध्दांजलि देके आदिवासी समुदाय के सिल्प कौसल के प्रदर्सन घलो करे जाही।
उप-चुनाव
रईपुर नगर दक्षिण विधानसभा उप चुनई बर काली तेरह नवंबर के बिहनिया सात बजे ले संझा छै बजे तक वोट डारे जाही। जेखर बर दू सौ तिरपन मुख्य मतदान केंद्र अउ तेरह ठिन सहायक मतदान केंद्र बनाय गेहे। ए उप-चुनई म क्षेत्र के कुल दू लाख इकहत्तर हजार एक सौ उनहत्तर मतदाता मन अपन मत के परयोग करही। जेमा ले एक लाख तैंतीस हजार आठ सौ पुरूष मतदाता त उहें, एक लाख सैंतीस हजार तीन सौ सत्रह महिला मतदाता के संगेसंग बावन झिन तृतीय लिंग मतदाता सामिल हे। मुख्य निर्वाचन पदाधिकारी रीना बाबासाहेब कंगाले ह रईपुर नगर दक्षिण विधानसभा क्षेत्र के जम्मो मतदाता मन ले काली अपन वोट के परयोग करे के अपील करे हे।
रईपुर दक्षिण विधानसभा उपचुनई बर काली होवइया मतदान बर वोटर मतदाता मन फोटो पहिचान पत्र के बारह ठिन वैकल्पिक फोटो वाले दस्तावेज देखाके वोट डार सकथे। मुख्य निर्वाचन पदाधिकारी ह बतइन कि फोटू पहिचान पत्र के संगेसंग आधारकार्ड, मनरेगा जॉब कार्ड, फोटू वाले पासबुक, स्मार्ट कार्ड, ड्राइविंग लाइसेंस, पेन कार्ड, भारतीय पासपोर्ट जइसन कार्ड देखाके वोटर मन अपन मत के परयोग कर सकथे।
मतदान तैयारी
रईपुर नगर दक्षिण विधानसभा चुनई बर आज बिहनिया शासकीय इंजीनियरिंग कालेज सेजबहार ले मतदान वाले जिनिस ल लेके मतदान दल मन ह रवाना होगे। ए दउरान जिला निर्वाचन अधिकारी डॉक्टर गौरव सिंह घलो मौजूद रिहीन। रईपुर के उप जिला निर्वाचन अधिकारी उमाशंकर बंदे ह बतइन कि उपचुनई ल सांतिपूर्ण ढंग ले निपटाय बर जम्मो मतदान केंद्र म तियारी पूरा कर ले गेहे। मतदान कर्मी के संग बियालिस झिन सेक्टर अधिकारी मन ल नियुक्त करे गेहे। तेरह ठिन सहायक केंद्र मनके संगेसंग दू सौ छैंसठ ठन मतदान केंद्र मन म वोट डारे जाही। ए उपचुनई म दस मतदान केंद्र मन म संगवारी केंद्र के रूप म माईलोगिन कर्मचारी मन ह अपन भूमिका निभाही अउ संगेसंग पांच ठिन आदर्स मतदान केंद्र मन ह युवा मन के निगरानी म होही। एखर अलावा एक ठिन मतदान केंद्र म दिव्यांग कर्मी मन ह अपन सेवा दीही। दू सौ सत्ताईस मतदान केंद्र म मतदान के बेरा लाइव स्क्रीनिंग करे जाही। उप चुनई बर एक हजार पांच सौ ले जादा मतदान कर्मी लगाय गेहे।
छत्तीसगढ़ राज्य निर्वाचन आयोग डहार ले एक अक्टूबर के अर्हता तिथि के मुताबिक फोटू वाले निवार्चक नामावाली तियार करे के आदेस जारी करे गेहे। जउन मतदाता एक अक्टूबर दू हजार चौबीस तक अट्ठार साल के उमर पूरा कर चुके हे, ओमन अवइया नगरीय निकाय चुनई म मतदाता सूची मन अपन नाव जोड़वा सकथे। पहिली निर्वाचक नामावली बर एक जनवरी दू हजार चौबीस के तारीख राखे गे रिहीस। एमा फेरबदल करके एक अक्टूबर करे गेहे।
नगरीय निकाय चुनई बर मतदाता सूची के प्रारंभिक प्रकासन सोलह अक्टूबर के करे जा चुके हे। दावा आपत्ति काली तेरह नवंबर ले बीस नवंबर तक करे जा सकही। एखर निपटारा चौबीस नवंबर तक करे जाही। निर्वाचक नामावाली के अंतिम प्रकासन ग्यारा दिसंबर के होही।
धान खरीदी
प्रदेस म चौदह नवंबर ले समर्थन मूल्य म धान बिसाय के काम सुरू हो जही। बिलासपुर जिला म धान खरीदी के तियारी पूरा कर ले गेहे। आज बिलासपुर कलेक्टोरेट म खरीदी केंद्र मनके नोडल अधिकारी मन ल प्रसिक्षण दे गीस। प्रसिक्षण म नोडल अधिकारी मन बतइन कि धान म सत्रह प्रतिसत ले जादा नमी नइ रहना चाही। संगेसंग निम्न श्रेणी के धान के मिश्रण छै प्रतिसत, डेमेज
अउ डिस्कलर पांच प्रतिसत, अधपके धान तीन प्रतिसत तक मान्य होही। उहें, नोडल अधिकारी मन ल शासन के नियम के कड़ई ले पालन करे के निरदेस दे गेहे। अपर कलेक्टर आर.ए. कुरूवंशी अउ खाद्य नियंत्रक ह बतइन कि जिला म एक सौ चालीस ठिन धान केंद्र बनाय गेहे। ए बार धान बेचे बर एक लाख सैंतीस हजार किसान मन पंजीयन कराय हे।
उहें, बलरामपुर जिला म उनचास ठिन धान खरीदी केंद्र के माध्यम ले पंजीकृत किसान मनले धान बिसाय जाही। जिला म धान बेचे बर पचास हजार ले जादा किसान मन ह अपन पंजीयन कराय हे। धान खरीदी बर लघु अउ सीमांत किसान मन ल दू ठिन टोकन अउ बड़े किसान मन ल तीन टोकन दे जाही।
जानबा के मुताबिक प्रदेस के किसान मनले धान के खरीदी अवइया साल के इकतीस जनवरी तक करे जाही।
रईपुर के पंडित जवाहर लाल नेहरू मेडिकल कॉलेज के सीनियर छात्र मन डहार ले पहिली साल के जूनियर छात्र मन के संग पाछू दिन रैगिंग करे गे रिहीस ए मामला म एंटी रैगिंग कमेटी के बइठका के बाद पांच झिन छात्र मन ल एक महिना बर कॉलेज ले निलंबित कर दे गेहे अउ संगेसंग ए छात्र मनके परिवार मन ल अवइया बेरा म रैगिंग म एमन सामिल झन रहय एखर बर ओखर मनले सपथ पत्र ले जही। एखर पहिली होय कार्रवाई म दूसर साल के दू झन छात्र मन ल दस दिन बर कॉलेज ले निलंबित करे दे गे रिहीस।
जानबा के मुताबिक सीनियर छात्र मन डहार ले रैगिंग के नाव उपर फर्स्ट ईयर के जूनियर छात्र मन के संग मारपीट अउ ओमन ल परेसान करे गे रिहीस।
देवउठनी एकादशी
देवउठनी एकादसी के परब आज प्रदेस म भक्तिभाव अउ उछाह के संग मनाय जात हे। प्रदेस म एला जेठौनी या छोटे देवारी के रूप म मनाय जाथे। ए मउका म घरो-घर तुलसी अउ भगवान शालीग्राम के प्रतीकात्मक बिहाव करे जात हे। ए बिहाव बर जम्मो घर मन म तुलसी चांवरा के तीर गन्ना के मंडप बनाय गेहे। उजियारा करे बर घर म जम्मो कोति दीया, रंगोली अउ सुघ्घर ढंग ले छोटे-छोटे लाइट ले घर ल सजाय गेहे।
अइसन मानता हे कि आजे के दिन भगवान विष्णु ह करीबन चार महिना सुते के बाद आज उठ जथे अउ एखरे सेति आज ले बिहाव जइसन मांगलिक कारीकरम घलो सुरू हो जथे।
मुख्यमंत्री विष्णुदेव साय ह प्रदेस के लोगन मन ल जेठौनी तिहार के बधई अउ सुभकामना देहे।
अउ अब थोरकुन समाचार सार म –
– छत्तीसगढ़ के प्रधान मुख्य वन संरक्षक ह वन्यजीव के अवैध सिकार ल रोके अउ जांच म लापरवाही के आरोप म कटघोरा वन मंडल म पदस्थ रेंजर ल तुरते परभाव ले निलंबित कर दे गेहे।
– बिलासपुर जिला म गिरदावरी काम म लापरवाही बरते उपर एसडीएम ह इकहत्तर झिन पटवारी मन ल कारण बताओ नोटिस जारी करके दू दिन के भीतर जवाब मांगे हे।
– नोनी मन ल आत्मरक्षा के पाठ पढ़ाय बर कांकेर जिला म अखिल भारतीय विद्यार्थी परिसद डहार ले ग्यारा नवंबर ले उन्नीस नवंबर तक मिसन साहसी के आयोजन करे जात हे।
अउ
– मुंगेली जिला म पीएम विश्वकर्मा योजना के तहत काली तेरह नवंबर के सिविर राखे जाही। सिविर म हितग्राही मन बिहनिया ग्यारा बजे ले एक बजे तक पंजीयन करा सकथे।