आदिमजाति विकास के प्रमुख सचिव सोनमणि बोरा ह बतइन कि जनजातीय गौरव दिवस के सुभारंभ कारीकरम के सोज्झे प्रसारण पीएम जनमन योजना म सामिल जिला मन म गोठबात अउ बांकी जिला मन म प्रसारण के व्यवस्था भर करे जाही। ए मउका म होवइया कारीकरम मन म केंद्र अउ राज्य सरकार मंत्री, सांसद, विधायक, पंचायत प्रतिनिधि अउ जनजातीय परिवार के सदस्य मन ल नेवते जाही। ए आयोजन म स्थानीय स्वतंत्रता संग्राम सेनानी मन के सम्मान अउ उंखर वंसज ल घलो सम्मानित करे जाही।
जनजातीय गौरव दिवस के मउका म तेरह नवंबर के जशपुर जिला म पदयात्रा के आयोजन करे जाही। ‘‘माय भारत यूथ वालंटियर्स‘‘ के ए पदयात्रा म सामिल होय बर केंद्रीय युवा कारीकरम अउ खेल, श्रम अउ रोजगार मंत्री डॉक्टर मनसुख मांडविया घलो जशपुर पहुंचही। उहें, मुख्यमंत्री विष्णुदेव साय के संगे राज्य मंत्रिमंडल के सदस्य मन घलो एमा सामिल होही। ए पदयात्रा म दस हजार ले जादा वालंटियर्स हिस्सा लेही। पदयात्रा के माध्यम ले ए वालंटियर्स मन आदिवासी संस्कृति, विरासत अउ ओखर संरक्षण बर लोगन मन ल जागरूक करही। ए पदयात्रा जशपुर के कोमोडो गांव ले सुरू होही अउ करीबन सात किलोमीटर के दूरी तय करत रंजित स्टेडियम म समाप्त होही। ए पदयात्रा ह एक पेड़ मां के नाम अभियान के तहत पौधा लगाय ले सुरू होही। पदयात्रा दउरान प्रदर्सनी स्थल म ऐतिहासिक आदिवासी नायक मन ल श्रध्दांजलि अउ भारत के आदिवासी समुदाय मनके अनोखा कलात्मक अउ सिल्प कौसल के प्रदर्सन करे जाही।
जनजातीय गौरव दिवस-02
पीएम जनमन अउ ‘‘धरती आबा जनजातीय ग्राम उत्कर्ष अभियान‘‘ के चलत गांव, विकासखंड अउ जिला स्तर म योजना मनके प्रचार-प्रसार के संगे पंद्रह ले छब्बीस नवंबर तक सबो चिन्हारी पारे गांव मन म बिसेस ग्राम सभा होही। ए मउका म होवइया बिसेस ग्रामसभा म वन अधिकार अधिनियम, पेसा अधिनियम, सतत विकास लक्ष्य के पंचायत स्तर म स्थानीयकरण अउ गौरवसाल जनजातीय इतिहास के बारे म चर्चा करे जाही। उहें, छात्रावास आश्रम अउ परमुख जघा मन
म निसुल्क स्वास्थ्य परीक्षण सिविर राखे जाही। आश्रम, छात्रावास, एकलव्य विद्यालय के स्कूली लइका मनके बीच खेलकूद, निबंध, वाद-विवाद, प्रश्नोत्तरी, छात्रवृत्ति संबंधी, जागरूकता, केरियर काउंसिलिंग, चित्रकारी अउ जागरूकता रैली घलो निकाले जाही।
रईपुर के साईंस कालेज मैदान म चौदह अउ पंद्रह नवंबर के जनजातीय गौरव दिवस कारीकरम के राज्य स्तरीय आयोजन होही। ए दउरान बिहनिया ग्यारा बजे ले रतिहा आठ बजे तक जनजातीय गौरव वाले अब्बड़ अकन कारीकरम होही, जेमा बिसय बिसेसज्ञ समेत कई ठिन राज्य के आदिवासी कलाकार सामिल होही।
जनजातीय गौरव दिवस कारीकरम म भाग ले बर आदिमजाति कल्याण विभाग डहार ले कई ठिन राज्य मन ले आदिवासी नर्तक दल अउ कलाकार मन ल बिसेस रूप ले नेवता दे जात हे।
एखर पहिली अधिवेसन के दूसर दिन काली केंद्रीय राज्य मंत्री अजय टमटा ह तकनीकी उपकरण मनके प्रदर्सनी ल देखिन। ए दउरान ओमन सड़क निर्माण बर नवाचार तकनीक ल अपनाय उपर अधिकारी मनले चर्चा करीन। अधिवेसन के तकनीकी सत्र म शिक्षाविद सलाहकार अउ निर्माणकर्ता मन सड़क बनाय म उपयोग अवइया उपकरण मसीनरी जिनिस अउ साफ्टवेयर बारे म जानकारी दीन। ए सत्र म आईआईटी रूड़की ले आय रिसर्च स्कालर प्रीति राय, प्रोफेसर डॉक्टर प्रवीण कुमार अउ डॉक्टर निखिल साबू ह अपन प्रजेंटेसन दीन। अइसने अधिवेसन म आय शिक्षाविद सलाहकार निर्माणकर्ता अउ रिसर्च स्कॉलर मन सड़क बनाय अउ संधारण बारे म अपन बात राखिन।
रईपुर म होवत चार दिन वाले भारतीय सड़क कांग्रेस अधिवेसन के काली समापन हे। समापन मउका म सड़क कांग्रेस के दू सौ इकतीसवां काउंसिल मीटिंग राखे जाही।
रायपुर दक्षिण-उपचुनाव
रईपुर दक्षिण विधानसभा क्षेत्र बर होवत उपचुनाव के चलत चुनाव प्रचार काली संझा पांच बजे थिरा जाही। एखर बाद प्रत्यासी अउ उंखर समर्थक मन घरो-घर जाके जनसंपर्क करही। काली प्रचार के आखिरी दिन मुख्यमंत्री विष्णुदेव साय ह भाजपा प्रत्यासी सुनील सोनी के पक्ष म रईपुर म रोड-सो करही। ओति, कांग्रेस के बड़का नेता मन घलो कांग्रेस प्रत्यासी आकाश शर्मा के पक्ष म कई ठिन जघा म जनसभा लेही।
रईपुर लोकसभा सांसद बृजमोहन अग्रवाल ह आज एकात्म परिसर म राखे गे पत्रकारवार्ता म किहीन कि भाजपा के चौबीस बछर के कार्यकाल म रईपुर दक्षिण म पांच हजार करोड़ रूपिया के विकास काम होय हे। लोगन मन ल सड़क पानी अउ बिजली असन बुनियादी, सोहलियत उपलब्ध कराय गेहे।
उहें, आकाशवाणी समाचार ले गोठबात म भाजपा प्रत्यासी सुनील सोनी ह किहीन कि ओमन अपन महापौर अउ सांसद के रूप म हासिल होय उपलब्धि ल लेके लोगन बीच जावत हे।
दूसर कोति, पूर्व मंत्री रविन्द्र चौबे ह पत्रकार मनले चर्चा करत किहीन कि रईपुर दक्षिण विधानसभा उपचुनाव म कल्पना ले ओपार रिजल्ट अवइया हे। उहें, कांग्रेस उम्मीदवार आकाश शर्मा ह आकाशवाणी समाचार ल बतइन कि ओमन दक्षिण विधानसभा क्षेत्र के स्थानीय मुद्दा ल लेके चुनाव लड़त हे। ए विधानसभा क्षेत्र म तेरह नवंबर के वोंटंग होही।
भूपेश बघेल-पत्रकारवार्ता
पूर्व मुख्यमंत्री भूपेश बघेल ह किहीन हे कि प्रदेस म चौदह नवंबर ले धान बिसई सुरू होवत हे। फेर धान बिसइया करीबन दू हजार अंठावन ठिन समिति मनके तेरह हजार कर्मचारी चार नवंबर ले हड़ताल म हवय। ओमन सवाल करीन कि अइसन म धान बिसई कइसे होही।
आज रईपुर के राजीव भवन स्थित प्रदेस कांग्रेस कार्यालय म एक ठिन पत्रकारवार्ता म बोलत श्री बघेल ह किहीन कि राज्य सरकार डहार ले ए हड़ताल ल खतम करे बर कोनो ठोस परयास नइ होवत हे।
केशकाल घाटी-प्रतिबंधित
कोंडागांव जिला के केशकाल घाटी म आज ले पच्चीस नवंबर तक सड़क नवीनीकरण अउ मरम्मत के काम करे जात हे। एखर चलत भारी गाड़ी मनके अवई-जवई ल पूरा तरह ले प्रतिबंधित कर दे गेहे। कांंडागांव कलेक्टर चित्रकांत चार्ली ठाकुर अउ अतिरिक्त पुलिस अधीक्षक रूपेश डांडे ह पत्रकारवार्ता म बतइन कि राष्ट्रीय राजमार्ग क्रमांक तीस म यात्री मनके सहूलियत बर कांक्रीटिंग अउ डामरी करण के काम होवत हे। उहें, यात्री बस अउ मालवाहक मन बर आने रद्दा तय करे गेहे।
प्रमुख सचिव-नारायणपुर
पंचायत अउ ग्रामीण विकास विभाग के प्रमुख सचिव निहारिका बारिक सिंह ह काली नारायणपुर जिला के कई ठन गांव के दउरा करके विकास अउ निर्माण कार्य के आरो लीन। प्रमुख सचिव ह अबूझमाड़ क्षेत्र के ईरकभट्ठी, मसपुर, सोनपुर अउ ढोंडरीबेड़ा के गा्रमीण मन ले गोठबात करत सरकारी योजना मनके लागू होवई अउ ओमन ल एखर ले मिलत फायदा बारे म जानकारी लीन।