भारतीय सड़क कांग्रेस के तिरासीवां वार्षिक अधिवेशन ह राजधानी रईपुर म आयोजित करे जावत हे। अधिवेशन के दूसरइया दिन आज सड़क अनुसंधान, विकास अउ अत्याधुनिक हरित प्रौद्योगिकी के बारे म राजमार्ग अनुसंधान बोर्ड के बइठका होइस। संगेसंग कतकोन तकनीकी बइठका के आयोजन घलो होइस।
एखर ले पहिली, काली केन्द्रीय सड़क परिवहन और राजमार्ग मंत्री नितिन गडकरी ह चार दिनी ए सम्मेलन के उद्घाटन करीन। ए मउका म श्री गडकरी ह छत्तीसगढ़ म रद्दा मनके विकास बर बीस हजार करोड़ रूपिया के काम के स्वीकृति दीन। एमा चार ठिन राष्ट्रीय राजमार्ग म फोनलेन बर डीपीआर के स्वीकृति घलो सामिल हे। ओमन धमतरी ले जगदलपुर, रईपुर ले बलौदाबाजार-सारंगढ़, कटघोरा ले अंबिकापुर अउ बिलासपुर ले अकलतरा-रायगढ़ होवत हुए ओड़िशा बार्डर तक के राष्ट्रीय राजमार्ग ल फोरलेन करे बर पइसा स्वीकृत करे के घोसना करीन। श्री गडकरी ह रईपुर म सरोना, उद्योग भवन, तेलीबांधा अउ धनेली जंक्शन म फ्लाईओवर बनाय बर घलो रासि स्वीकृत करे के बात किहीन। ओमन सड़क बनाय बर केन्द्रीय सड़क निधि ले नौ सौ करोड़ रूपिया देहे के घलो घोसना करीन।
ग्यारा नवंबर तक चलइया ए सम्मेलन म दू हजार ले जादा बिसेसज्ञ, वैज्ञानिक अउ इंजीनियर मन भाग लेवत हे। भारतीय सड़क कांग्रेस के मुख्य उद्देश्य केन्द्र सरकार के सड़क निर्माण एजेंसी मन डहार ले सड़क परिवहन ले जुड़े कोड, विशिष्टताएं, नियमावली अउ भारतीय मानक तियार करना हे।
उपचुनाव-रायपुर
रायपुर दक्षिण विधानसभा बर होवइया उपचुनाव म भारतीय जनता पार्टी अउ कांग्रेस समेत आने-आने राजनीतिक दल ह प्रचार अभियान तेज कर देहे। कांग्रेस प्रत्याशी आकाश शर्मा के पक्ष म आज पूर्व मुख्यमंत्री भूपेश बघेल ह तीन सभा करीन। ओमन चंगोराभाठा बाजार चौक, कुशालपुर अउ गुरूनानक हॉल तेलीबांधा म जनसभा करीन। सभा ल प्रदेस कांग्रेस अध्यक्ष दीपक बैज ह घलो संबोधित करीन।
दूसर कोति, भाजपा प्रत्याशी सुनील सोनी के पक्ष म स्थानीय भाजपा नेता मन जनसंपर्क करीन।
इही बीच, निर्वाचन आयोग कोति ले स्वीप कार्यक्रम के तहत मतदाता जागरूकता रथ के माध्यम ले मतदाता मन ल सौ प्रतिसत मतदान बर प्रेरित करे जावत हे। इही म काली रईपुर के महंत लक्ष्मी नारायण दास कॉलेज के राष्ट्रीय सेवा योजना-एनएसएस के छात्र मन मतदाता जागरूकता रैली निकालीन अउ नुक्कड़-नाटक के आयोजन घलो करीन।
प्री-बोर्ड परीक्षा
राज्य म कक्षा दसवी अउ बारवी बोर्ड परीक्षा के पहिली लइका मन ल मुख्य परीक्षा के तियारी कराय के उद्देश्य ले प्री-बोर्ड परीक्षा ले जाही। ए परीक्षा जनवरी के आखिरी हफ्ता म होही। एखर ले पहिली सब्बो स्क्ूल म ए दूनो कक्षा के पाठ्यक्रम ल दस जनवरी तक पूरा कराना अनिवार्य हे।
स्कूल शिक्षा विभाग के सचिव सिद्धार्थ कोमल परदेसी ह ए बारे म सब्बो कलेक्टर अउ जिला शिक्षा अधिकारी मन ल दिसा-निरदेस जारी करे हे। जारी निदरेस म केहे गेहे कि प्री-बोर्ड परीक्षा हरेक जिला म आयोजित करे जाही। जेमा, विद्यार्थी मन ले पूरा पाठ्यक्रम ले जुड़े प्रश्न पूछे जाही। प्रश्न पत्र बनाय बर जिला म बिसय-बिसेसज्ञ मन के समिति घलो गठित करे जाही। ए समिति ल प्रश्न पत्र बनाय बर माध्यमिक शिक्षा मंडल के ब्लू प्रिंट के प्रसिक्षण घलो दे जाही।
दुर्घटना
गौरेला-पेण्ड्रा-मरवाही जिला म आज होय सड़क दुर्घटना म एक सब इंस्पेक्टर के मउत होगे। उहें, दू आरक्षक समेत चार झन घायल घलो होगे हे, जेमन ल जिला अस्पताल म भर्ती कराय गेहे।
मिले जानकारी अनुसार कोरबा के पाली थाना के पुलिस टीम ह कानपुर ले दुष्कर्म के आरोपी ल गिरफ्तार करके वापिस लहुटत रिहीस। इही बीच गौरेला थाना क्षेत्र के खंता गांव तीर उंखर गाड़ी ह अनियंत्रित होके पलट गे। ए हादसा म सब इंस्पेक्टर विलायत अली के मउका म ही मउत होगे अउ आरक्षक नारायण कश्यप, शैलेन्द्र कंवर, वाहन चालक करमू अउ सहायक गोपी कुमार ल थोरकुन चोट आय हे।
उहें, कोरबा जिला म आज सर्व मंगला-कनवेरी रद्दा म दू मोटर साइकिल म होय टक्कर ले एक युवक के मउत होगे अउ दू झन घायल होगे।
माओवादी-शव बरामद
बीजापुर जिला म काली सुरक्षा बल के संग होय मुठभेड़ म आठ लाख रूपिया के इनामी समेत तीन माओवादी मारे गेहे। तीनों माओवादी के सव बरामद कर ले गेहे। एमा ले एक माओवादी के शिनाख्त पी.एल.जी.ए. प्लाटून नंबर-दस के कमांडर जोगा के रूप म होय हे, जेखर उपर आठ लाख रूपिया के इनाम घोसित रिहिस। घटना के जघा ले एक एस.एल.आर. बंदूक अउ बड़ मात्रा म हथियार अउ गोलाबारूद बरामद करे गेहे।
अफीम-आरोपी गिरफ्तार
रईपुर पुलिस ह करीब चार किलो अफीम के संग तीन झन आरोपी ल गिरफ्तार करे हे। एमा दू झन झारखंड के अउ एक झिन भिलई के रहइया हे। तीनों आरोपी ल जेल भेज दे गेहे। मुखबिर ले सूचना पाके पुलिस ह काली कौशल्या माता विहार के तीर सेक्टर-पांच ले एमन ल पकड़े हे। जब्त अफीम के कीमत लगभग बाईस लाख रूपिया बातय जावत हे।
जिले की चिट्ठी
प्रादेसिक समाचार एकांश रायपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके 5 मिनट ले छै बजके 10 मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘जांजगीर-चांपा‘‘ जिला के गतिविधि के बारे म जानकारी दे जाही।
कोरबा-राशि गबन
कोरबा जिला म मुख्यमंत्री समग्र ग्रामीण विकास योजना अउ जिला खनिज संस्थान न्यास ले जारी पइसा के दुरूपयोग के मामला म ग्राम पंचायत के सरपंच अउ सचिव मन उपर चालीस लाख रूपिया ले जादा के गबन के आरोप लगे हे। ए मामला म एसडीएम न्यायालय ले सरपंच अउ सचिव मन ल नोटिस जारी करे गेहे। संगेसंग ओमन मन ले वसूली के कार्रवाई घलो करे जावत हे।
जनजातीय गौरव दिवस
जनजातीय गौरव दिवस के मउका म रईपुर के सांईंस कॉलेज मैदान म अवइया तेरा ले पंद्रा नवंबर तक राज्य स्तरीय जनजातीय चित्रकला प्रतियोगिता के आयोजन करे जाही। आदिम जाति अनुसंधान और प्रसिक्षण संस्थान नवा रईपुर डहार ले आने-आने आयु वर्ग बर ए प्रतियोगिता आयोजित करे जाही। चित्रकला प्रतियोगिता के बिसय ’’जनजातीय जीवन सैली’’ हे। प्रतियोगिता म भाग लेवइया लोगन मन ग्यारा नवंबर तक पंजीयन करा सकथे।
जांजगीर-क्रिकेट चयन
जांजगीर-चांपा जिला के तीन खिलाड़ी मनके चयन अहमदाबाद म होवइया राष्ट्रीय शालेय क्रिकेट प्रतियोगिता बर होय हे। ए तीनों झन छत्तीसगढ़ क्रिकेट टीम के प्रतिनिधित्व करही। अंडर-फोर्टीन म मोहम्मद असद अउ अंडर-सेवंटीन म आदित्य यादव अउ देवाषीश सिंह के चयन होय हे।
अउ अब थोरकुन समाचार सार म –
– मुख्यंमत्री विष्णुदेव साय ह रईपुर के तहसील कार्यालय म सहायक ग्रेड-दो के पद म काम करत प्रदीप उपाध्याय के आत्महत्या के जांच के निरदेस दीन हे।
– मुख्यमंत्री विष्णुदेव साय के अध्यक्षता म छत्तीसगढ़ जनजातीय सलाहकार परिषद के गठन करे गेहे। आदिम जाति कल्याण मंत्री रामविचार नेताम ल परिषद के उपाध्यक्ष बनाय गेहे।
– राज्य सरकार ह पच्चीस अतिरिक्त पुलिस अधिक्षक अउ ग्यारा उप पुलिस अधीक्षक मनके तबादला आदेस जारी करे हे।
अउ
– प्रदेस म वनरक्षक के एक हजार चार सौ चौरासी पद म सीधा भर्ती बर सारीरिक नापजोख अउ दक्षता परीक्षण अवइया सोला नवंबर ले सुरू होही।