छत्तीसगढ़ म काली आठ नवंबर ले भारतीय सड़क कांग्रेस के अधिवेशन रायपुर के साईंस कालेज मैदान म सुरू होही। छत्तीसगढ़ म पहिली बार होवइया तिरासीवां अधिवेशन के रायपुर मेजबानी करही। ए अधिवेशन के सुभारंभ केन्द्रीय परिवहन मंत्री नितिन गडकरी कली संझा साढे़े चार बजे करही। कार्यक्रम के अध्यक्ष मुख्यमंत्री विष्णुदेव साय ह करही।
खबर के मुताबिक भारत के हर मेट्रो सिटी के बड़े डेवलपर्स ए अधिवेशन म सामिल होही। एखर संग श्रीलंका, बांग्लादेश, ऑस्ट्रेलिया, इंडोनेशिया अउ सिंगापुर जइसे देश मनके कंस्ट्रक्शन एक्सपर्ट अउ वैज्ञानिक घलो राजधानी पहुंचही। ग्यारह नवंबर तक चलइया ए अधिवेशन म रोड कंस्ट्रक्शन ले जुड़े नवा तकनीकी उपर चर्चा होही। ए कारीकरम म तकनीकी प्रदर्शनी घलो जाही अउ युवा इंजीनियर मन बर प्रतियोगिता होही।
जनजातीय गौरव दिवस
भगवान बिरसा मुण्डा के जयंती के मउका म चौदह अउ पन्द्रह नवंबर के जनजातीय गौरव दिवस के राज्य स्तरीय आयोजन रायपुर के साईंस कॉलेज मैदान म होही। आदिम जाति विकास विभाग के प्रमुख सचिव सोनमणि बोरा ह वीडियो कॉन्फ्रेंसिंग के माध्यम ले प्रदेस के सबो कलेक्टर, जिला पंचायत के मुख्य कार्यपालन अधिकारी अउ आदिम जाति विकास विभाग के सहायक आयुक्त मन ल सबो जरूरी तैयारी करे के निरदेस देहे।
राज्योत्सव-समापन
छत्तीसगढ़ के स्थापना दिवस के मउका म नवा रायपुर म आयोजित तीन दिवसीय राज्योत्सव के समापन कारीकरम म उपराष्ट्रपति जगदीप धनखड़ सामिल होइन। कारीकरम ल संबोधित करत श्री धनखड़ ह किहीन कि राज्यहित ल राष्ट्रीय दृष्टिकोण ले देखना चाही। ओमन कहिन कि छत्तीसगढ़ देस बर एक ठिन मिसाल हरय। यहां विकास के नवा कीर्तिमान बनत हे। उपराष्ट्रपति ह किहीन कि विकसित भारत के निर्माण बर सबके भागीदारी के जरूरत हे। एमा छत्तीसगढ़ के योगदान बढ़-चढ़के होही।
उहें, राज्यपाल रमेन डेका ह किहीन कि छत्तीसगढ़ म अच्छा काम होवत हे। एक ठिन युवा राज्य के रूप म सरकार के उद्देश्य सिरिफ आर्थिक विकास नहीं, भलूक समग्र विकास हे, जेमा हर मनखे के उत्थान हो सकय।
ए मउका म मुख्यमंत्री विष्णुदेव साय ह लोक कलाकार मन ल प्रोत्साहित करे बर कतकोन घोसना करीन हे। ओमन ‘‘ए‘‘ श्रेणी के कलाकार मनके अधिकतम कार्यक्रम स्वीकृति सीमा ल दस ले बढ़ाके बीस अउ ‘‘बी‘‘ श्रेणी के कलाकार मनके अधिकतम सीमा बारह ले बढ़ाके चौबीस करे के ऐलान करीन।
समापन कारीकरम म उपराष्ट्रपति ह आने-आने क्षेत्र मन म उत्कृष्ट काम करइया राज्य के विभूति मन ल छत्तीसगढ़ राज्य अलंकरण सम्मान से विभूषित करीन।
रेलवे विशेष-गाड़ी
भारतीय रेलवे ह तिहार म यात्री मनके सुविधा बर काली आठ नवंबर ले एक सौ चौसठ बिसेस रेलगाड़ी चलाही। रेलवे बोर्ड के कार्यकारी अधिकारी दिलीप कुमार ह बतईन कि तिहार ल देखत बिसेस ट्रेन मनके परिचालन जारी हे। भारतीय रेल डहार ले सात हजार सात सौ ले जादा गाड़ी मनके परिचालन के योजना तैयार करे गेहे। चार नवंबर के सबसे जादा रिकॉर्ड संख्या म रेलवे ह स्पेशल ट्रेन चलईस अउ कुल मिलाके देस के आने-आने हिस्सा ले भारतीय रेल के मदद ले तीन करोड़ ले जादा यात्री मन ह सफर करीन, जउन ए बछर के अपन आप म रिकॉर्ड हे। स्पेशल ट्रेन मनके परिचालन के सिलसिला अभी चलत रइही। आज घलो रेलवे ह करीबन एक सौ साठ स्पेशल रेलगाड़ी के परिचालन करत हे अउ काली के तारीख म रेलवे ह एक सौ पैंसठ बिसेस रेलगाड़ी मनके परिचालन करही।
अग्निवीर भर्ती-एडमिट कार्ड
रायगढ़ जिला म अवइया चार दिसंबर ले अग्निवीर भर्ती रैली के आयोजन करे जाही, जेखर बर अभ्यर्थी मन ल प्रवेस पत्र जारी कर दे गेहे। प्रदेस के सबो तैंतीस जिला के पुरूष उम्मीदवार मन बर अग्निवीर जनरल ड्यूटी, अग्निवीर तकनीकी, अग्निवीर ऑफिस असिस्टेंट, स्टोर कीपर अउ अग्निवीर ट्रेडसमेन जइसे कतकोन पद म भर्ती करे जाही। ए भर्ती रैली ह बारह दिसंबर तक चलही।
गोपाल व्यास-निधन
भारतीय जनता पार्टी के वरिष्ठ नेता अउ पूर्व राज्यसभा सदस्य गोपाल व्यास के आज बिहनिया निधन होगे। ओमन इंक्यानवे बछर के रिहीन। श्री व्यास ह अपन कार्यकाल म राज्यसभा म छत्तीसगढ़ के प्रतिनिधित्व करीन अउ ओमन भारतीय संसद के सदस्य के रूप म महत्वपूर्ण भूमिका निभईन। ओमन दू हजार छह ले दू हजार बारह तक छत्तीसगढ़ ले राज्यसभा सांसद रहिन। तेरह फरवरी दू हजार उन्नीस के ओमन राज्यसभा ले सेवानिवृत्त होइन। श्री व्यास राष्ट्रीय स्वयंसेवक संघ-आर.एस.एस. के वरिष्ठ कार्यकर्ता घलो रिहीन।
मुख्यमंत्री विष्णुदेव साय आज पुरैना स्थित श्री व्यास के निवास पहुंचीन अउ अंतिम दर्शन कर ओमन ल श्रद्धांजलि अर्पित करीन। स्वर्गीय व्यास जी के मंशानुरूप उंखर पार्थिव शरीर अखिल भारतीय आयुर्विज्ञान संस्थान-एम्स ल दान करे जाही।
दुर्घटना
कोरबा जिला के रावा गांव म एक एंबुलेंस पुल ले नीचे गिर गे। ए घटना म चार लोगन घायल होगे हे, जेमा ले दू के स्थिति गंभीर हे। घायल मनके अच्छा इलाज बर अस्पताल म भर्ती कराय गेहे। दुर्घटनाग्रस्त एम्बुलेंस राजस्थान के बताय जात हे। खबर के मुताबिक ए एम्बुलेंस म जयपुर ले एक झन मनखे के सव बिलासपुर लाय गे रिहीस। एखर बाद एम्बुलेंस वापस राजस्थान जावत रिहीस। इही दउरान रावा गांव के तीर एम्बुलेंस अनियंत्रित होके पुल ले नीच गिर गे।
उहें, कोरबा सहर के सिविल लाइन थाना क्षेत्र के अंतर्गत ट्रेलर के चपेट म आय ले मोटर साइकिल सवार एक झन मनखे के मउत होगे। उहें, दू आने मनखे घायल होगे हे।
आईईडी बरामद
बीजापुर जिला म सुरक्षा बल मन ह माओवादी मन डहार ले लगाए गे स्पाइक्स अउ आईईडी बरामद करे हे। खबर के मुताबित गंगालूर थाना क्षेत्र के सुरक्षा कैम्प ले डीआरजी, कोबरा बटालियन अउ सीआरपीएफ के संयुक्त टीम गश्त म निकले रिहीस। ए दउरान मुतवेंडी ले पीड़िया जाने वाला रद्दा म सुरक्षा बल मन ह स्पाइक्स अउ आईईडी बरामद करीन, जेला मउका म ही जवान मन नष्ट कर दीन।
छठ महापर्व
छठ पूजा के तीसरा दिन आज संझा श्रद्धालु मन ह नदी के तीर स्थित आने-आने छठ घाट मन म डूबत सूरज ल अर्घ्य दीन। चार दिन के ए परब के समापन काली बिहनिया उगत सूरज ल अर्घ्य देके संग होही।
मुख्यमंत्री विष्णुदेव साय ह उत्तर भारतीय अउ भोजपुरी समाज संग प्रदेसवासी मन ल छठ महापर्व के बधाई अउ सुभकामना दीन हे। श्री साय ह छठी मईया ले प्रार्थना करत कहिन कि छठ परब सबके जीवन म सुख, समृद्धि अउ खुसहाली लेके आय।
अउ अब थोरकुन समाचार सार म –
– उच्चतम न्यायालय ह आज व्यवस्था दीन कि सरकारी नौकरी मन म नियुक्ति बर भर्ती के निर्धारित नियम म बीच म कोनों प्रकार के फेरबदल नइ करे जा सकय।
– केन्द्रीय पर्यावरण, वन अउ जलवायु मंत्रालय ह पराली जलाय म जुर्माना दोगुना कर देहे।
– जांजगीर-चांपा जिला के हेड़सपुर गांव के निलंबित सरपंच शांति बाई चार दिन ले अकलतरा एसडीएम कार्यालय के आगू अनशन म बइठे हे। न्याय नइ मिले म ओमन ह आत्मदाह के चेतावनी देहे।
– जांजगीर-चांपा जिला के सिटी कोतवाली पुलिस ह नौकरी लगाय के नाम म करीबन डेढ़ लाख रूपिया के ठगी करइया आरोपी सिक्षक ल गिरफ्तार कर लेहे।
अउ
– बेमेतरा जिला के स्पेशल ब्लास्ट लिमिटेड म होय विस्फोट मामला म सासन कोति ले श्रमिक मनके संग आने सारीरिक क्षति पीड़ित मन बर आवेदन के प्रक्रिया सुरू करे गेहे। पीड़ित मनखे क्षतिपूर्ति के संबंध म इक्कीस नवंबर तक आवेदन कर सकथे।