नवा रायपुर म चलत तीन दिन के राज्योत्सव अउ राज्य अलंकरण समारोह ह आज खतम हो जही। ए समापन कार्यक्रम म उपराष्ट्रपति जगदीप धनखड़ ह मुख्य अतिथि के रूप म सामिल होही। उहें, कार्यक्रम के अध्यक्ष राज्यपाल रमेन डेका ह करही। ऐति, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह विशिष्ट अतिथि रइही। ए बेरा म उपराष्ट्रपति श्री धनखड़ ह आने-आने क्षेत्र म अच्छा काम करइया लोगन ल छत्तीसगढ़ राज्य अलंकरण सम्मान ले विभूषित करही।
बतादन कि राज्योत्सव के शुभारंभ चार नवंबर के मध्यप्रदेश के मुख्यमंत्री डॉकटर मोहन यादव ह करे रिहीन। राज्योत्सव के बेरा कार्यक्रम वाले जघा म हरेक दिन सांस्कृतिक कार्यक्रम के आयोजन होवत हे। उहें, कतकोन विभाग कोति ले राज्य सरकार के आने-आने योजना ल लेके प्रदर्सनी घलो लगाय गेहे। राज्योत्सव के आखिरी दिन आज संझा अनुराग शर्मा कोति ले अनुराग स्टार नाइट, मनोज प्रसाद अउ टीम कोति ले मलखंभ, सवि श्रीवास्तव डहार ले जादू बस्तर, पवनदीप अउ अरूणिता के पार्श्व गायन के प्रस्तुति होही।
राज्योत्सव
एखर ले पहिली, काली राज्योत्सव के दूसर दिन राज्यपाल रमेन डेका अउ मुख्यमंत्री विष्णुदेव साय ह कार्यक्रम म सामिल होइन। ए बेरा म राज्यपाल ह अपन संबोधन म किहीन कि छत्तीसगढ़ ह एक युवा राज्य ले अउ युवा अवस्था म ही ए राज्य ह कतकोन क्षेत्र म अपन प्रतिभा अउ अपन क्षमता के प्रदर्सन करे हे। ओमन ह लोगन मन ले अपन विरासत ल सहेजे अउ छत्तीसगढ़ ल अग्रिणी राज्य बनाय के अपील करीन।
उहें, मुख्यमंत्री ह किहीन कि छत्तीसगढ़ विकास कोति तेजी ले बाढ़त हे। प्रदेस म लोक गायन, लोककला अउ सबो विधा ल राज्य सरकार ह बढ़ावा देवत हे। ओमन ह कहिन कि हमन अपन तीज-तिहार अउ मड़ई-मेला ल घलो सहेजत हन। विकास बर सबले बड़ ताकत संस्कृति ले ही मिलथे। ए मउका म छत्तीसगढ़ नैसर्गिक पर्यटन पत्रिका अउ संस्कृति विभाग के पत्रिका ‘‘बिहनिया‘‘ के विमोचन करे गीस।
राज्य स्थापना दिवस के मउका म बलौदाबाजार के पंडित चक्रपाणी स्कूल मैदान म चलत कारीकरम म स्वास्थ्य मंत्री श्यामबिहारी जायसवाल अउ खेल एवं युवा कल्याण मंत्री टंकराम वर्मा ह सामिल होइन। ए बेरा म प्रधानमंत्री आवास योजना-ग्रामीण के हितग्राही मन बर ई-रेत संगवारी एप्लीकेशन वन प्वाइंट ओ लांच करे गीस। उहें, करियर काउंसलिंग बर करियर इन्फॉर्मेशन सेंटर के सुभारंभ होइस। ए कारीकरम ल संबोधित करत हुए श्री जायसवाल ह किहीन कि डबल इंजन के सरकार ले छत्तीसगढ़ ह विकास कोति बाढ़त हे। त उहें, मंत्री श्री वर्मा ह किहीन कि राज्य सरकार ह विकसित भारत के सपना ल साकार करे बर सरलग काम करत हे।
कैबिनेट-निर्णय
केन्द्र सरकार ह मेधावी पढ़ईया लइका मन ल वित्तीय सहायता दे बर ‘‘पीएम विद्यालक्ष्मी योजना‘‘ ल मंजूरी देहे। एला लेके नई दिल्ली म मीडिया ले गोठबात करत हुए सूचना अउ प्रसारण मंत्री अश्वनी वैष्णव ह किहीन कि लइका मन उच्च सिक्षा बर बिना कोनों जमानत के ऋण लेके पात्र होही।
श्री वैष्णव ह बतईन कि सरकार ह भारतीय खाद्य निगम बर दस हजार सात सौ करोड़ रूपिया के इक्विटी के निवेस ल घलो मंजूरी दे देहे।
जल उत्सव
नीति आयोग ह लोगन मन म जल प्रबंधन अउ संरक्षण के जागरूकता बढ़ाय बर आज ले पन्द्रह दिन के जल उत्सव के सुभारंभ करे हे। प्रधानमंत्री नरेन्द्र मोदी ह पाछु बछर दिसंबर माह म होय मुख्य सचिव के सम्मेलन के बेरा नदी उत्सव के जइसे ही जल उत्सव मनाय के विचार राखे रिहीन। फेर नीति आयोग ह केहे हे कि चौबीस नवंबर तक बीस ठिन आकांक्षी जिला अउ प्रखंड भर म मनाय जाही। एखर आयोजन जलशक्ति मंत्रालय के राष्ट्रीय जल जीवन मिशन, पेयजल अउ स्वच्छता विभाग कोति ले करे गेहे। एखर चलत बिसेस मनखे अउ स्थानीय नेता डहार ले जल बंधन संकल्प दिलाय जाही अउ जल संपदा उपर जरूरी जानकारी दे जाही।
बेमेतरा-हादसा
बेमेतरा जिला म नवागढ़ थाना क्षेत्र के झांकी गांव म आज एक ठिन पिकअप गाड़ी ह पलट गे। ए घटना म करीबन पच्चीस मजदूर मन घायल होगे, जेमा ले पांच के स्थिति गंभीर बने हुए हे। ओमन तुरते इलाज बर नवागढ़ के सामुदायिक स्वास्थ्य केन्द्र म भर्ती कराय गेहे।
अंबेडकर अस्पताल-आगजनी घटना
रायपुर के डॉक्टर भीमराव अंबेडकर अस्पलात के तीसर मंजिल के नवा ट्रामा सेंटर म लगे आगी म कोनों भी मरीज अउ मेडिकल स्टॉफ के नुकसान नइ होय हे। फेर अभी आगी लगे के कारण पता नइ चल पाय हे। स्वास्थ्य मंत्री ह चिकित्सा महाविद्यालय के डीन डॉक्टर विवेक चौधरी ल घटना के जांच तकनीकी टीम ले करा के रिपोर्ट दे बर केहे हे। संगेसंग ओमन तीन दिन के भीतरी नवा ट्रामा सेंटर ल ठीक करे बर घलो कहे हे।
पुलिस विभाग-चयन सूची
पुलिस विभाग म सूबेदार, उप निरीक्षक संवर्ग अउ प्लाटून कमांडर भर्ती परीक्षा दू हजार इक्कीस म नौ सौ पचहत्तर खाली पर बर नौ सौ उनसठ उम्मीदवार मनके चयन होय हे, जेखर सूची पाछु अट्ठाईस अक्टूबर के पुलिस विभाग के वेबसाइट म डाल दे गेहे। ए चयन प्रक्रिया म सामिल उम्मीदवार मन कोति ले सारीरिक दक्षता परीक्षा अउ साक्षात्कार म मिले नंबर के जानकारी ह घलो पुलिस विभाग के वेबसाइट म हवय। उम्मीदवार मनके मुख्य लिखित परीक्षा म मिले नंबर के जानकारी व्यापमं कोति ले दे जाही।
अग्निवीर भर्ती-एडमिट कार्ड
रायगढ़ जिला म अवइया चार दिसंबर ले अग्निवीर भर्ती रैली होही, जेखर बर अभ्यर्थी मन ल प्रवेस पत्र दे गेहे। प्रदेस के सबो तैंतीस जिला के पुरूष उम्मीदवार मन बर अग्निवीर जनरल ड्यूटी, अग्निवीर तकनीकी, अग्निवीर ऑफिस असिस्टेंट, स्टोर कीपर अउ अग्निवीर ट्रेडसमेन जइसे कतकोन पद म भर्ती करे जाही। ए भर्ती रैली ह बारह दिसंबर तक चलही।
रायपुर-उपचुनाव
रायपुर दक्षिण विधानसभा उपचुनई बर सेजबहार के इंजीनियरिंग कॉलेज म बनाय गे स्ट्रांगरूम के आज सामान्य प्रेक्षक जी. रेखारानी ह निरीक्षण करके तैयारी ल देखीन। ए बेरा म ओमन ह अधिकारी मन ल निरदेस दीन कि मतदान के सामान अउ बैलेट बॉक्स के सुरक्षा सुनिश्चित करे जाय। संगेसंग ओमन ह कहिन कि चुनाव आयोग के सबो सुरक्षा मानक के हिसाब से स्ट्रांग रूम के देखरेख करे जाय।
छठ-महापर्व
छठ महापर्व के दूसर दिन आज लोहंडा अउ खरना के रसम होइस। आज संझा ले छठ उपास माईलोगिन मनके खरना के संग छत्तीस घंटा के निर्जला उपास सुरू होगे हे। छठ महापरब आयोजन समिति के अध्यक्ष राजेश कुमार सिंह ह बतईन कि छठ परब के तीसर दिन काली संझा कुन डूबत सूरूज ल अर्ध्य दे जाही, जेखर बर रायपुर के महादेवघाट म तीस हजार ले जादा लोगन जुरे के संभावना हे।
स्पेशल ट्रेन
यात्री मनके सुविधा ल ध्यान म राखत हुए भारतीय रेलवे कोति ले दुर्गा पूजा अउ देवारी तिहार के बाद अब छठ पूजा बर घलो स्पेशल ट्रेन चलाय जात हे। रेलवे डहार ले एसो सात हजार सात सौ चौबीस बिसेस गाड़ी चलाय जात हे। जबकि पउर साल साढ़े चार हजार बिसेस गाड़ी चले रिहीस।
उहें, दक्षिण पूर्व मध्य रेलवे डहार ले रायपुर-सनतनगर, दुर्ग-अमृतसर अउ बिलासपुर-हडपसर के बीच छठ पूजा स्पेशल ट्रेन के सुविधा दे गेहे। सनतनगर-रायपुर के बीच दू फेरा बर चलाय जात ए ट्रेन ह सनतनगर ले रायपुर बर सात अउ चौदह नवंबर के रवाना होही। उहें, रायपुर ले सनतनगर बर ए ट्रेन ह आठ अउ पन्द्रह नवंबर के चलही।
अइसने, दुर्ग-अमृतसर स्पेशल ट्रेन ह दुरूग ले सात अउ दस नवंबर के अउ अमृतसर ले नौ अउ बारह नवंबर के दू फेरा बर चलही। उहें, बिलासपुर-हडपसर स्पेशल ट्रेन ह बिलासपुर ले हडपसर बर आठ नवंबर के अउ हडपसर ले बिलासपुर बर नौ नवंबर के एक फेरा बर चलाय जाही।