पुरस्कार मिलइया म मुकेश एस. सिंह ल मधुकर खेर स्मृति पत्रकारिता पुरस्कार, प्रिंट मीडिया के पत्रकार भोलाराम सिन्हा अउ इलेक्ट्रॉनिक मीडिया के पत्रकार मोहन तिवारी ल ‘‘चंदूलाल चंद्राकर स्मृति पत्रकारिता पुरस्कार, छत्तीसगढ़ी फिल्म निर्देशक सतीश जैन अउ छत्तीसगढ़ फिल्म अभिनेता अउ निर्देशक प्रकाश अवस्थी ल ‘‘किशोर साहू राष्ट्रीय अलंकरण सम्मान‘‘ ले सम्मानित करे जाही। उहें, अतुल जैन ल रचनात्मक लेखन अउ हिन्दी भासा के प्रचार-प्रसार बर ‘‘पंडित माधवराव सप्रे राष्ट्रीय रचनाकार सम्मान‘‘, स्थानीय बोली ल बढ़ावा दे बर डॉक्टर पी.सी. लाल यादव ल ‘‘लाला जगदलपुरी साहित्य पुरस्कार‘‘, लोक संगीत के क्षेत्र म दुष्यन्त कुमार हरमुख ल ‘‘खुमान साव सम्मान‘‘ अउ लोकगीत ल बढ़ावा दे बर निर्मला ठाकुर ल ‘‘लक्ष्मण मस्तुरिया सम्मान‘‘ दे जाही। एखरे संग पंथी नृत्य अउ लोक कला के क्षेत्र म साधेलाल रात्रे अउ भगत गुलेरी ल ‘‘देवदास बंजारे स्मृति पुरस्कार‘‘, आनंद कुमार पांडे ल ‘‘छत्तीसगढ़ अप्रवासी भारतीय सम्मान‘‘, रामनरेश यादव ल अपराध अनुसंधान के क्षेत्र म ‘‘पंडित लखनलाल मिश्र सम्मान‘‘ अउ सुरेन्द्र कुमार राठौर, शोभा सिंह अउ ललित कुमार नायक ल ‘‘स्वर्गीय महाराजा रामानुज प्रताप सिंहदेव स्मृति श्रम यशस्वी पुरस्कार ले सम्मानित करे जाही।
अंबेडकर अस्पताल-आगजनी
राजधानी रायपुर के अंबेडकर अस्पताल के तीसइया मंजिल म हड्डी रोग विभाग म आज मंझनिया आग लग गे। मिले खबर के मुताबिक आगी ऑपरेशन थियेटर म लगीस। आगी लगे के बाद ऑपरेशन थिएटर के जाली ल काटके मरीज मन ल बाहिर निकाले गीस। घटना के सूचना मिलतेच दमकल के टीम मउका म पहुंचीस अउ आग म काबू पईस। आग लगे के कारण के पता नइ चल पाय हे।
आरबीआई-क्विज
भारतीय रिजर्व बैंक डहार ले आज रईपुर म राज्य स्तरीय आरबीआई-नब्बे क्विज के आयोजन करे गीस। ए कारीकरम म माईपहुना के रूप म उच्च शिक्षा विभाग के सचिव प्रसन्ना आर. सामिल होइन। ओमन क्विज के विजेता मन ल पुरस्कार देके सम्मानित करीन। ए क्विज प्रतियोगिता म अंडर ग्रेजुएट विद्यार्थी मन घलो भाग लीन।
राज्यपाल-मुलाकात
राज्यपाल रमेन डेका ले आज राजभवन म लोक निर्माण विभाग के अधिकारी मन ह भेंट करके उनला ऑल इंडिया रोड कांग्रेस के आठवां अधिवेशन बर आमंत्रित करीन। छत्तीसगढ़ म पहिली बखत होवइया ए अधिवेशन आठ ले ग्यारह नवंबर तक रायपुर के साईंस कॉलेज मैदान म होही। एमा आने-आने राज्य के लोक निर्माण विभाग के अधिकारी, कंस्ट्रशन विशेषज्ञ, डिजाइनर, स्टेट हाईवे के अधिकारी अउ तकनीकी संस्थान के विद्यार्थी मन सामिल होही।
छठ-पर्व
चार दिवसीय छठ महापर्व के सुरूआत आज ले नहाय-खाय के संग होगे हे। छठ महापर्व आयोजन समिति के अध्यक्ष राजेश कुमार सिंह ह बतईन कि काली छह नवंबर के लोहंडा अउ खरना होही। उहें, सात नवंबर के संध्या अर्ध्य अउ आठ नवंबर के उषा अर्ध्य के संग छठ महापर्व के समापन होही। ओमन बतईन कि सात नवंबर के रायपुर के महादेवघाट म सांस्कृतिक कारीकरम के आयोजन करे जाही, जेमा स्थानीय कलाकार के संगेसंग बाहिर ले आय कलाकार मन अपन प्रस्तुति दीहीं। इही दिन महादेवघाट म महाआरती के आयोजन घलो करे जाही।
राज्यपाल रमेन डेका अउ मुख्यमंत्री विष्णुदेव साय ह छठ पूजा के मउका म प्रदेसवासी मन ल बधाई अउ सुभकामना दीन हे।
जशपुर-गोलीकांड
जशपुर जिला के कांसाबेल थाना क्षेत्र के बटईकेला गांव म आज दू झिन अज्ञात हमलावर मन ह कियोस्क ग्राहक सेवा केन्द्र के संचालक अउ ओखर दादी उपर गोली चला दीन। ए हमला म ओखर दादी के मउत होगे हे। उहें, संचालक घायल होगे हे, जउन ल कांसाबेल अस्पताल म भर्ती कराय गेहे।
जिला के पुलिस अधीक्षक शशि मोहन सिंह ह बतईन कि आज मंझनिया फटफटी सवार दू झिन नकाबपोस मन कियोस्क सेंटर पहुंचीन अउ लूटपाट करे के कोसिस म सेवा केन्द्र के संचालक उपर गोली चला दीन। ए दउरान बीच-बचाव करे बर आय संचालक के दादी ल घलो हमलावर मन ह गोली मार दीन, जेखर ले ओखर मउकाच म ही मउत होगे। ओमन बतईन कि घटना के बाद आरोपी फटफटी छोड़के भगा गे। पुलिस ह आरोपी मन ल खोजत हे।
आईईडी-बरामद
बीजापुर जिला म सुरक्षा बल मन ह पांच किलो के आईईडी बरामद करे हे। जिला के पुलिस अधीक्षक जितेन्द्र यादव ह बतईन कि डीआरजी, सीआरपीएफ अउ कोबरा बटालियन के सामलात टीम सावनार ले कोरचोली कोति गश्त म निकले रिहीन। इही दउरान माओवादी मन डहार ले सुरक्षा बल मन ल नुकसान पहुंचाय बर लगाय गे आईईडी बरामद करे गीस। बम निरोधक दस्ता के टीम ह आईईडी ल मउकाच म निष्क्रिय कर दीन।
सुंरदराज पी.-समीक्षा बैठक
बस्तर रेंज के पुलिस महानिरीक्षक सुंदरराज पी. ह आज जगदलपुर म वीडियो कांन्फ्रेंसिंग के माध्यम ले बस्तर संभाग के जम्मों पुलिस अधिकारी मनके समीक्षा बइठका लीन। बइठका म माओवाद विरोधी अभियान, नवा पुलिस कैम्प के स्थापना, कानून व्यवस्था अउ अपराध नियंत्रण के संगेसंग बस्तर ओलंपिक अउ पुलिस आरक्षक भर्ती प्रक्रिया के संबंध म करे जावत कार्यवाही के समीक्षा करे गीस। बइठका के दउरान पुलिस अधिकारी मन ल संभाग के जम्मों जिला म अपराध के रोकथाम, पंजीबद्ध प्रकरण के तुरते समाधान अउ साप्ताहिक बाजार के अचानके जांच के संबंध म दिसा-निरदेस दे गीस।
कोरबा-नाश्ता योजना
कोरबा जिला के पाली विकासखंड के अंतर्गत उतरदा गांव म चलत सासकीय विद्यालय म कटघोरा विधायक प्रेमचंद पटेल ह लइका मन ल नाश्ता बांटके ‘‘नाश्ता योजना‘‘ के सुरूवात करीन। ए मउका म विधायक पटेल ह किहीन कि मध्यान्ह भोजन के संगेसंग नाश्ता मिले ले लइका मन ल कुपोषण ले मुक्ति मिलही। उहें, विकासखंड शिक्षा अधिकारी एस.एन. साहू ह किहीन कि ए योजना लइका मन के मानसिक अउ सारीरिक विकास म उपयोगी होही।
प्रशिक्षण सम्मेलन
राष्ट्रीय सांख्यिकी कार्यालय डहार ले आज रायपुर म डिजिटल जनरल क्रॉप एस्टिमेशन सर्वे के सुपरविजन मॉडयूल के वेब-मोबाइल एप्लीकेशन म एकदिवसीय राज्य स्तरीय प्रशिक्षण सम्मेलन के आयोजन करे गीस। ए कारीकरम के उद्घाटन राष्ट्रीय सांख्यिकी कार्यालय नागपुर के उप महानिदेशक श्रीनिवास उपाला अउ क्षेत्रीय कार्यालय रायपुर के उपमहानिदेशक अल्ताफ हुसैन हाजी ह करीन। प्रसिक्षण कारीकरम के तहत राष्ट्रीय क्रॉप एस्टिमेशन सेंटर के उपनिदेशक कुणाल कपूर अउ उंखर सहायोगी मन ह प्रशिक्षणार्थी मन ल डिजिटल मॉडयूल के तकनीकी अउ व्यावहारिक बिन्दु म प्रसिक्षण दीन। उहें, राष्ट्रीय सांख्यिकी कार्यालय के संयुक्त निदेशक सुधीर कुमार ह सामान्य फसल अनुमान सर्वेक्षण के महत्व अउ उपयोगिता के जानकारी दीन।